2007-11-26

揸美元先問兩個問題 　　

11月25日，周日。上周伊朗總統認為美元係廢紙，中國總理溫家寶認為美元弱勢對中國經濟產生好大壓力，令美元上周大幅回落。海灣國家12月3日响卡達開會，決定係咪繼續保持海灣國家貨幣同美元掛鈎。唔少國家認為同美元掛鈎可令本國貨幣穩定，但近年美元滙價回落刺激當地通脹率上升，油價上升令呢D國家貨幣有升值壓力。近年唔少國家貨幣政策一如中國，唔再採用固定聯繫，改為浮動聯繫（即係仍同美元聯繫，但滙價又可浮動）。如海灣國家取消同美元聯繫，唔排除美元短期內出現另一拋售潮。美元到底只係「五色彩紙」定係「火鳳凰」？2008年便可清楚。揸美元者最先要問問格蛇2001至03年6月點解將利率由 6.5厘降至1厘，將嗰隻馴服已久嘅通脹野獸重新放生？第二要問問貝南奇，佢嘅「目標通脹論」去咗邊？點解喺8月17日注資兼減貼現率為通脹率加油。作為香港人，亦有權問問金管局，本港維持聯滙制度嘅好處同壞處？我老曹唔相信減息可改變信貸收縮嘅命運（最終必引發美國經濟通縮），減息只帶來短期內不必要嘅波幅，例如道指由8月16日12517點升上10月11日14198點，又再回落到11月21日12786點（呢段日子恒生指數因為有港股直通車計劃，較難分析），犧牲美元滙價嘅代價只會令油價、金價上升，而非股價同樓價。　　

殊仔嘅優點係唔干預外滙市場，當歐羅接近1.5美元，德國財長施泰因布呂克似乎忍唔住痛，要求入市干預。最終會否出現G7聯手入市托美元？10月份歐羅區CPI升幅2.6％，係2001年春天以來最高，未有足夠理由支持各國央行入市干預。　　

如明年美國GDP只升1.8％（聯儲局估計），美元需要一再減息，以免經濟出現衰退，只憑央行干預，能否令美元止跌回升？今年美元滙價回落10％，令美國企業海外利潤大升，支持美股股價；反之，歐羅強勢令歐洲股市進一步回落。令人擔心嘅係貝爾斯登、高盛、雷曼兄弟、大摩等會否喺12月來一次「大清洗」，以便出年條數乾乾淨淨，即12月份金融股繼續面對拋售壓力？

空中巴士大嗌救命　　

美元弱勢令美國收支赤字由佔今年GDP 6.5％降至明年只佔4.5％。美元回落，令空中巴士公司大嗌救命，空中巴士嘅控股公司European Aeronautic Defence and Space Co.（EADS）每年補貼由21億歐羅增加到30億歐羅；EADS股價已回落至20.89歐羅，即今年股價回落19％，整間公司市值只有171億歐羅。部分理由係歐羅升上1.4967美元（即今年美元滙價下跌12％），令大量訂單流向波音公司。去年空中巴士公司經營虧損5.72億歐羅（未計利息支出），波音公司則獲利38.1億美元；加上A380超級空中巴士較計劃遲咗兩年面世，令空中巴士公司虧損多68億美元；A400M軍事運輸機遲一年面世，又損失多11億歐羅；A350廣體機需重新設計，令空中巴士公司上述項目落後波音787夢幻型五年。可以講，空中巴士公司正在慘淡經營，依家再加上歐羅由1.2 美元升上1.5美元，令空中巴士公司成為歐洲國家一項長期負擔，工會卻發動罷工要求加人工。當歐羅升上1.5美元，出事嘅唔單止空中巴士，歐洲貨出口亦有困難。當2008年美國GDP進入低增長期，歐洲GDP增長率又點睇？如美國、歐洲、日本GDP皆陷入低增長期，中國GDP高增長又可維持幾耐？當大部分 OECD國家GDP皆進入低增長時，原材料價格可以升幾耐？以鉛為例，10月10日成3890美元一噸，上周五成2920美元一噸，回落24.9％，單係上周已回落11.5％，主因係中國政府加強環保，鉛入口要交13％入口稅及出口退稅減少10％，上述改變令鉛價急跌，由此可見中國政府政策對全球原材料價格嘅影響力。　　

通脹壓力令中國政府加強宏調力量，蓋過奧運效應。有人認為2003年4月至07年10月係港股最易賺錢嘅日子。2007年11月起內地持續性通脹環境（尤其食物10月份升幅達33.6％）正在改變客觀因素，中國政府不得不收緊銀根，唔少內地中小銀行存貸比率已達80％（超過法例容許嘅75％），內地中小銀行响12月結前不得不加強吸收存款，同時限制貸款。內地已面對銀根收緊期，影響A股表現，最終影響H股走勢。估計明年H股純利升幅21％，無法支持現水平H股O，尤其係保險股及商品股，未來調整壓力十分大。　　

明年中國經濟繼續由出口帶動轉向內部消費帶動，因此消費股股價仍有上升空間。2005年5月至今年10月上海A股指數由1113點上升至6252點，上升462％；股票總值由2005年相等於全國GDP 17.3％，到06年年底118.8％、07年9月160％；O由十六倍升至七十倍。情況有如八十年代東京及台北，其後O由超過七十倍回落到二十至三十倍。上述情況會否由今年10月响內地開始？上海A股第三季純利升幅73.8％、深圳A股第三季純利升幅88.7％，但第四季內地A股純利升幅急速下跌。

美股開始聖誕節反彈　　

明年中國改革開放進入第三十年。所謂「黃金三十年」（香港1967至97年）會否响中國重演?!未來五年肯定唔再係過去五年：一、奧運效應將逐漸消失；二、資產泡沫進入收縮期；三、出口增長率放緩、入口增長率加快，令外貿盈餘收窄；四、投資增長率下降，消費增長率上升；五、政府改為追求高質素投資，而非加快GDP增長率嘅投資。中國經濟過渡期已開始（A股指數如非今年10月開始下跌，亦應响不久將來）。如美國同歐洲GDP由今年第四季增長率放緩，可加快令中國經濟進入調整期。由於稅項及成本壓力，令原材料股未來上升空間有限，雖然能源價格上升令能源股下調速度減慢。內房股亦進入整固期，細價股進入尋寶遊戲期，高科技股進入國家扶植期。明年投資要表現出色愈來愈艱難。　　

上周五美股開始咗感恩節後嘅「聖誕節反彈」（Christmas Rally），上周五嘅Black Friday，沃爾瑪提供三十二吋寶麗萊LCD HDTV，售價448美元；新力數碼相機79.87美元；四十二吋樂聲牌Plasma HDTV賣899.99美元……，一於減價大傾銷。Black Friday來源係零售店儘管全年虧損，只要感恩節後至聖誕節前銷售理想，全年賬目仍可由紅轉黑，所以上周五叫做Black Friday）。舊年呢段日子銷售上升4.6％（過去十年平均升幅係4.8％），估計今年可上升4％。上周五道指上升181點或1.4％、標普升 1.7％，相信可刺激周一恒生指數上升。市場開始炒12月11日減息四分一厘後再減息；58％估計明年1月有第四次減息；明年3月有第五次減息，即未來仍有三次減息機會。美元弱勢令富者更富（2002年至今過去六年美元弱勢，令全球股價同樓價上升幾多？）中產階級生活成本上升咗，薪金加幅追唔上生活成本上升嘅速度，中產階級必須更努力工作去支付供樓利息上升（2004年6月至今上升唔少）、孩子學費、父母醫療費……。雖然樓價上升，但唔少係自住物業，無法套現。

貧富差距大同舟難共濟　　

至於窮人，自1980年香港政府修改入境政策後，每年香港必須接納來自祖國三萬六千五百人，二十七年後今天香港新增人口九十八萬五千五百人（未計來港後出生嘅子女），成為香港嘅新貧窮階級；加上1980年原先嘅一百萬香港窮人面對湧入新移民爭飯碗外，更要面對本港製造業內移，令實質工資過去二十七年並冇上升，形成本港二百多萬人口嘅新貧窮階級佔全港總人口26％，由於人多勢眾，漸成為特區政府一項沉重負擔。1982年成為《福布斯》全球四百個富人最少需要擁有8200萬美元財產，2007年已跳升十五倍，達13億美元（同期CPI只升112％）。經濟環球化，富者的確愈富。　　

香港社會逐漸分裂成為一個擁有一百萬人口屬富有人家、四百萬人口係中產階級、二百萬人口係貧窮階級。今日香港人嘅財富差距咁大，點樣再同舟共濟？　　

美國三個月聯邦基金利率4.75厘、二年期國庫券3.18厘，點解貸款者寧收3.18厘亦唔肯以4.75厘借出去，以致少收1.75厘？可能性有二 ──一、未來利率將由依家4.75厘逐步回落到3.28厘（即日後將減息1.5厘）；二、以4.75厘借出街嘅資金風險好大，上述1.57厘利率差係代表「風險」。我老曹認為兩大因素都存在。市場認為12月11日減息四分一厘機會升至已接近98％；明年1月30日再減息機會亦升到88％；3月11日第五次減息機會係60％。減息可刺激部分行業上升，但次按危機又會拖累唔少行業，形成道指响12500到14200點之間上上落落。　　

從商業周期睇，明年出現經濟衰退機會唔大，但能源價格及原材料價格有機會今年見頂回落；內地零售業仍有上升空間，其次係高科技行業。今年尾係沽出能源股同礦務股，改為吸納零售股及高科技股嘅時刻，例如有色金屬股11月份跌幅好大，內地有色金屬企業面對資源稅改革方案上報國務院消息及新方案年底出台嘅揣測，由過去從量徵稅改為從價徵收（包括石油在內）。上述改革令價愈升所交嘅稅愈多，估計未來稅率响3％至5％。今年8月1日起中國政府已大幅上調鋁、鋅、銅同鎢礦石嘅資源稅，日前公布「關於深化煤炭資源有償使用制度改革試點實施方案」，採取唔同採區採回來嘅煤炭唔同稅率，並實行累進費率。最新消息，礦產資源補償稅試點將响二十多個煤炭礦種開始，然後擴展到有色金屬及原油，即明年起內地資源股可能面對新資源稅（即以價收稅，而非過去以量收稅）。　　

從恒生指數睇，股市似乎由今年10月30日31958點開始回落，真實情況並非如此，80％股份早喺恒生指數7月26日嘅23537點起回落，即 80％股份由7月26日前開始A浪下跌，8月17日至10月30日出現B浪上升，踏入11月出現C浪下跌，只有國企、紅籌及大藍籌股才由10月30日起進入A浪下跌。唔排除感恩節後出現B浪上升，然後再出現C浪下跌。

鄉親父老做晒大閘蟹　　

上周國家科工負責人表示，近日出台嘅「軍工企業股份制改造實施暫訂辦法」和「中介機構參與軍工企業事業單位改制上市管理暫訂規定」，係開闢軍事工業利用資本市場嘅途徑，鼓勵軍事工業改制上市，成為2008年申請上市公司嘅另一主流，即日後將有更多軍事工業股新股在A股市場掛牌。　　

中石油重返A股首天上牌最高見48.6元，上周五收市價34.59元，表面上跌幅十分大（跌28.8％），但仍較本港上市嘅中石油（857）H股有 100％溢價，以上周五收市價計，中石油A股O仍高達四十倍，較埃克森美孚、英國石油等O十二倍左右高出好多。估計已有唔少股民已做咗大閘蟹；加上內地近日推出四隻QDII基金亦因11月份本港H股回落令認購者被綁，即愈來愈多鄉親父老嘅資金被套住了，令近日A股成交額大減。11月5日中石油响A股市場上板當天，外資則喺香港狂拋H股及期指做空，形成呢次賺大錢嘅係國際資金，套牢嘅都係中國鄉親父老。如類似中石油嘅情況一再發生（外資套現，中國鄉親父老資金被套牢），內地A股前景令人擔心。