2007-11-12

出得嚟行預咗要還 　　

11月11日，周日。路透社估計，標普五百第三季獲利減少2％，只有健康護理及科技類獲利上升12％及15％，消費業下降24％，金融業下降26％跌幅最大；展望第四季情況繼續。面對債券黑洞、次按泥沼、房產跌價危機，美國選擇放縱美元下跌及減息，利用美元貶值及通脹將風險轉嫁畀全球美元持有者，目前已引發恐慌性拋售美元資產……。 欣然面對調整市　　

天有陰晴，月有圓缺，人有禍福；世事無常。馬龍白蘭度响《教父》一片中講：「This is the business we're chosen!」（出得嚟行，預咗要還）。股票市場過去帶畀各位唔少歡樂，自然亦有哀愁嘅日子，如果你事前已作出適量減持，應該欣然接受依家面對嘅淡市。例如中移動（941）由去年12月8日 60.75元升到今年10月30日160元，上升166％，回落少少都唔得？恒隆地產（101）由去年11月13日16.14元升至今年10月29日 39.35元，上升143％，調整下亦好應該啦。Halloween雖然已過，但股市繼續嚇人。　　

中石油完成A股發行後，市值全球第一。去年埃克森美孚營業額3655億美元、中石油919億美元；今年上半年埃克森美孚獲利195億美元、中石油獲利 109億美元；去年埃克森美孚石油產量十五億六千萬桶、中石油十億六千萬桶。除咗因為A股O偏高外，中石油憑乜嘢做世界第一？上述情況同樣出現响中移動、國壽身上，呢個老大地位可保持幾耐？一旦A股泡沫破裂，呢D世界第一地位立即消失。上述所謂「第一」，不要也罷。　　

國際油價已升至98美元一桶，今年漲幅80％以上，但中國汽油、柴油平均出廠價每噸4710元人民幣，相當於每桶原油51美元（上浮約58.5美元），同國際油價比較，平均每噸成品油蝕本1470元人民幣。天然氣出廠價77仙一立方米，相當於國際價30％；車用天然氣2元一立方米，只及汽油價一半。如天然氣及成品油售價同國際接軌，對中國汽車業影響有幾大？　　

上周六中國將存款保證金率提升0.5個百分點，至13.5％，11月26日生效，係今年內第九次（上一次喺10月25日），對內地A股影響係點？周一便清楚。　　

如周一恒生指數跌穿28500點，便可確認頭肩頂呢個轉勢形態。內地A股近日早已出現自2005年7月以來首個一浪低於一浪形態，上述都係令人擔心嘅走勢。美元由今年2月到11月跌幅亦算大，美元拋售令油價同金價齊齊高升，最終動搖咗股票市場嘅投資信心，引發全球股市拋售（美元回落初期有利股市上升，後期將引發投資信心危機，則不利股市）。未來十五到二十年，美元仲係各國儲備貨幣（家吓佔全球貨幣儲備65％），只係百分比下降DD而已。未來十五到二十年人民幣唔會成為別國外滙儲備；反之日圓、歐羅及英鎊嘅國際地位將因美元地位下降而上升。　　

正當投資者從8月次按風暴中信心漸漸恢復過來，新一輪次按虧損又再浮現，人們發現金融機構原來可以收埋咁多污糟嘢。The Financial Accounting Standards Board發出Statement 157，要求各金融機構將資產分為三級，11月15日生效。第一級以市值計；第二級按估值入賬，主要係冇公開報價嘅項目，但要公布公司估值模式；第三級由公司自行假設資產價值，由於係估計，因此必須作大額撥備。响新會計指引下，美國金融機構公布第四季業績時，大概可反映較真實嘅一面，上述公布可能嚇投資者一跳：原來自己投資嘅金融機構可以揸咁多第三級資產。新準則令唔同級別嘅資產須作不同撥備，尤其係第三級資產，金融機構第四季作幾多撥備令人關注。　　

蘇格蘭皇家銀行信貸策略員Bob Janjuah上周三出咗一份報告，認為响新會計標準下，全球金融機構須作撥備金額大約為2500億到5000億美元；經上述撥備後，金融機構業績才可反映企業嘅真實價值。換言之，全球金融機構第四季將面對新會計準則壓力，須為手上按揭作重新評估。例如今年借出嘅三A級次按，响10月1日至11月8日止唔少已失去30％市值；反之，去年借出嘅三A級次按，响10月1日至11月8日只回落5.87％；2005年借出嘅三A級次按則冇問題（三A級次按响一個月前借出每1美元，市值只有96美仙，依家只值69美仙，喺新會計制度下必須作撥備）。此乃美林及花旗公布第三季虧損不久後又要宣布增加撥備嘅理由，因為三 A級次按市值計由10月1日96美仙跌至11月8日69美仙。過去董事局可以認為市場價格唔合理而不作撥備，响新會計準則下，如不按市值入賬，便撥入第二類及第三類級別，一樣要增加撥備。三A級次按跌幅已經咁大，至於三B級次按，例如信用卡貸款連抵押品都冇，你認為應作幾多撥備才恰當？過去銀行撥備只佔總貸款4.5％。

日經發揮淡市輸家先行特點　　

次按危機可以話係按揭證券化所種下嘅禍根，响今年才爆發。上周五因Wachovia撥備上升，令道指下跌1.69％；柏克萊雖然否認撥備100億美元，但股價仍跌3.6％。任何升市中都有落後股，任何跌市中亦有淡市之花，不過找尋逆市上升股份比較困難，尤其係熊似乎剛剛睡醒，依家正龍精虎猛地去搵人嚟咬。　　

日經平均指數再次發揮淡市輸家先行嘅特點。日經早响2月26日18300點見頂，如無意外，周一將跌穿今年8月17日低點15262點創新低，成為全球十大股市中第一個創全年新低嘅股市。日本係全球第二大經濟體系，自1990年1月開始至今，各位聽過幾多個轉勢故事？令人擔心上述故事係咪自2000年 3月開始响美國出現（雖然道指今年升破2000年高點，但納指同2000年比較仍然有好大距離。所謂道指高點，只係由美元弱勢製造出來）？美國房地產市場喺可見將來肯定回落，次按危機明年上半年才係高潮，美元滙價回落加上地緣政治，令油價同金價狂升。過去三個交易日納指回落7％，即連高科技股亦受影響。上周五日圓升上110.79，係去年6月首次，利差交易將引發周一亞太區股市新一輪拋售。Fannie Mae第三季虧損14億美元或每股1.56美元（第二季虧損6.29億美元或每股79美仙），股價回落7％，見46.3美元，公司為房貸撥備12億美元，並估計明年情況仍無法好轉。今時今日美國樓市只宜觀望不宜購入。過去五年世界經濟繁榮建基於美元低利率及寬鬆貨幣政策，今年美國出現次按危機，代表上述情況終結，一連串影響將由美國擴散到全球，恐怕仍會進一步轉壞。不過，亦有部分公司純利仍可大幅上升，唔受次按危機影響，令股市出現兩個市場。尋找純利仍可高增長嘅企業去投資係2008年嘅投資策略，earnings growth估計响高科技項目出現。　　

上周五12月期油收98.62美元。過去油價上升由需求推動；反之，1973年石油危機、1980至81年伊朗危機及1991年波斯灣危機時油價上升係因為擔心供應不足；過去油價上升只係反映全球經濟繁榮。但最近兩個月卻唔同，油價上升係因為地緣政治，油價上升並非需求進一步增加（美國經濟增長率由 10月份起放緩），而係擔心供應出現短缺，中東、伊拉克及巴基斯坦局勢皆令人擔心。响油價上升嘅同時，銅價卻回落，銅價更能反映未來世界經濟大氣候，因唔少工業產品需要銅去製造。歐洲、日本及美國經濟增長率早已放緩，只有中國例外，最終銅價點睇？由中國製造業決定。

金價超買回吐十分正常　　

上周三金價一度上升見845.4美元，十分接近歷史高位（1980年1月21日850美元），較8月17日聯儲局宣布減貼現率半厘前上升205美元。唔使三個月金價已上升超過30％，家吓極度超買，出現獲利回吐好正常，雖然長線睇1000美元。短期而言，850美元有阻力，不過黃金牛市仍繼續。　　

11月份密歇根大學消費信心跌至75（10月份為80.9），係2005年10月74.2以來最低，上一次係受颶風卡特里娜影響，今年感恩節後美國聖誕貨銷售情況係點？　　

美國貿赤降至二十八個月內最低，因出口大幅上升；9月份貿赤只有565億美元，係2005年5月以來最少；出口上升至1401億美元，入口1966億美元。對中國貿赤仍升5.8％，至230億美元，主要來自中國電視機、手機、電腦及玩具增加。　　

從未試過有咁多好消息同壞消息同時出現，形成投資市場好混亂，個別股份如十五隻吊桶七上八落。　　

1984年由列根與雪茄伏醫好嘅滯脹，喺貝南奇接手聯儲局主席後又再出現。面對次按危機，貝南奇採用「The easy way out」，雖然令8月16日至10月11日道指由12517點反彈到14198點，上升13.4％，但10月11日起道指又再回落。如果兩次減息仍無法阻止道指跌穿12517點便大件事，犧牲美元滙價去救股市，結果可能係美元同美股同時回落。No Pain No gain又再重演，1967至82年嘅美國滯脹到2000年起又再重演。　　

烏魯木齊新區地價兩年前賣緊30萬元一畝，依家已漲到120萬元一畝；市區樓盤均價每平方米4000元左右，有D已漲到6000元。依家人口四百二十三萬，其中一百六十四萬係外來人口。　　

昆明總人口五百一十四萬（城鎮人口二百一十四萬），最吸引係低密度休閒住宅，約四成左右賣畀外來投資者，平均每平方米7000元人民幣，可以講已炒到火熱。　　長沙一個多月前一幅土地以92億元賣出，引起極大哄動。第三季商品房均價達每平方米3791元，較去年同期上升29.5％；10月份平均成交價3925元一平方米。上述情況可反映內地二線城市樓價仍炒得火熱。　　

香港白領標準工資8900元以上；上海、深圳、北京5000多元；杭州、廣州、青島4000多元；南京、天津3000多元；長沙、三亞2000多元；太原、成都1000多元；其他地方900多元。香港樓價3萬多元一平方米；上海、深圳、北京亦漲到1.8多萬元；廣州亦要1萬元。如以工資比較，內地二線城市樓價已炒得過火了。2004年中國樓價仍係人均年收入六點五倍，依家一般都達十五倍，有D地區達二十倍；如以人均收入計，內地樓價今年甚至較香港更貴。

中國步向農畜牧業企業化　　

軍山湖位於江西進賢縣，係內地縣城最大淡水湖，共三十二萬畝，自1981年起開始養大閘蟹，青背白肚，金爪黃毛，味道鮮美，今年起由盾安控股公司獨家經營，以確保蟹嘅品質保持水準。盾安集團不但包辦大閘蟹，旗下另一集團亦成為杭州山核桃行業嘅龍頭企業，積極發展杭州臨安嘅山核桃種植戶。另一企業杭州新希望雙峰乳業喺杭州臨平買地四十多畝，準備建設一個日產二百噸牛奶生產嘅基地，投資4000多萬元購入一百多畝土地，飼養奶牛一千五百多頭。响湖北安陸創辦嘅安豐達紡織廠，面對紡織業毛利率走低，計劃進軍養豬業。寧波商會祕書長王志明等，亦响湖北新洲陽暹地區投資5000萬元，籌建一個日產豆芽二百噸嘅項目。睇嚟中國正在步向農畜牧業企業化。　　

交通銀行（3328）北京分行去年底响全國最先推出嘅知識產權抵押貸款，至今年有二十八個客戶取得共1.9億元，抵押品再唔係房產，而係知識產權。例如北京柯瑞生物醫藥技術公司以蛋白多糖生物活性物質發明專利取得150萬元貸款後，第二筆貸款更高達1000萬元。知識產權睇唔到、摸唔着，市場狹小，過去一直好難獲銀行貸款。呢次交通銀行開咗先河，如果成功，將有助中國知識產權發展。