2007年11月13日 星期二

2007-11-13

財富易得快樂難求  

11月12日,周一。恒生指數跌1117.68,收27665.73;成交1399.52多億元。11月期指跌1241點,收27630點。由8月 17日19386點,上升到10月30日31958點如回落前升幅三分一,即大市最小跌幅係4190點,可見27768點,今天已完成;如出現最大調整,即前升幅三分二(或0.618),支持點係23578點;如調整前升幅二分一,即25672點,將成為另一攻防陣地。呢次恒指跌穿頭肩頂頸線,潘朵拉的盒子係咪從此打開?  

今天控(005)跌2.77%,收137.1元,大摩估計控下半年須為450億美元按揭撥備21億美元,建議減持。中移動(941)跌5.55%,收129.4元;港交所(388)跌6.7%,收225.4元;中石油(857)跌7.3%,見14.96元;東方航空(670)回落 17%,見6.37元;國航(753)跌8.8%,見8.34元;國航母公司持有東方航空11%。工商銀行(1398)跌5%,見6.07元;建行跌 4.3%。國企指數回落5.91%。

期銅後市睇跌  

滬深A股跌1.24%,上海B股及深圳B股跌幅較大,睇外資正從內地股市撤退。估計內地10月份CPI升幅6.5%,較9月份有所提高,將令內地銀行再加息,因政府目標通脹率只係3%;今天有八隻A股跌停版。  

上海期銅跌至八個月內最低,1月期銅成59650元人民幣一噸,跌4.1%,係3月15日以來最低;現貨成61190元,跌2.1%。期銅較現貨便宜,代表後市進一步睇跌。上海期鋅亦跌4%,成21805元;期鋁跌1%,成18500元。  

Global Insight Inc主要分析員認為,油價如升至100美元一桶,可引發美國經濟陷入衰退;日本可能進入1990年以來第四次經濟衰退。不過,Rockwell Collins Inc主要分析員相信,各國央行將減息以防止衰退出現。  

德銀估計,全球次按資產貶值3000億到4000億美元,但金融機構唔會一次過撥備,而會分段入賬。

成思危插美元一刀  

美元利淡因素係咪被誇大?羅傑斯宣布未來幾周將所有美元資產拋售,狂買內地A股(記得去年佢曾叫各位買期糖合約嗎?),係咪進入非理性亢奮?上述說話如果佢2002年講,乃投資界天才;而到今年11月才講,咁就木宰羊。上述言論媲美巴西名模(不過人地只有二十七歲咋)。貝南奇去年2月上任至今,美元價已下跌11%,令美國貿赤9月份大幅收窄,但對中國貿赤仍然擴大5.8%,代表更多產品移師中國生產。同歷任總統唔同,殊仔上台後七年從來唔干預外市場,係唯一一位美國總統冇政策上支持美元價,但壓低美元價就有。依家連成思危亦插美元一刀,今天美元真係四面楚歌。美國經濟增長放緩已非新聞,投資策略係點樣美國經濟增長放緩下尋找商機?我老曹質疑繼續睇好硬商品分析,近月油價、金價上升相信同政治有關而非經濟。中國人常常話有三十六行(美國上市企業可分一百三十行),冇理由行行都唔得,我老曹睇好明年食品行業及內地高新科技股。今天全球MP3大部分中國製造,仲有蘋果iPods(至於iPhones就未知),為降低製造成本,愈來愈多高科技產品將移到中國生產。  

8月17日至10月31日升市中,二線股大大落後於恒生指數升幅(尤其係紅籌國企),出現所謂20∕80現象,即升市集中20%股份身上。踏入11 月,國企、紅籌股面對獲利回吐,過去兩個多月underperformed二線股又點睇?找尋淡市之花從來唔易,但唔係唔可能。  

海外資金繼續流入港股(令豐銀行一星期內兩次減息),呢批資金又流去邊度?  

世界各地投資者講起中國股市,心態係複雜,言論係充滿矛盾的,差唔多所有人一提起中國股票市場,聲線都突然提高。有人擔心中國股市隨時可能崩潰而影響世界各地股市,亦有人仍叫「美國佬去東方」。依家才投資中國股市,係咪遲D?尤其係滬深三百指數自10月17日5891點開始形成一浪低於一浪走勢。  

站2007年回望1973年3月恒生指數1700點,過去三十四年,恒生指數共上升十七倍。到2040年回望2007年滬深A股,中國經濟未來數十年繼續快速增長下,相信再升十幾倍亦唔奇;2040年中國GDP應該超過日本,可能僅次於美國!不過,如果你1973年3月購買港股打後二十個月(1973 年3月至1974年12月)都咪話唔慘。短期滬深A股下跌空間好大,雖然長期而言滬深A股上升空間十分大。點樣掌握時機?一如張立兄所講:「術」容易學,「數」難掌握。A股短期係咪進入亢龍有悔期,而影響本港國企、紅籌股表現?

從金融力量重新認識中國  

中國人民大學國際關係學金燦榮教授認為,世界以前因為廉價而認識中國,依家世界開始從金融力量上重新認識中國!由「Made in China」改為到「中國投資」去!今年中國GDP已超過3萬億美元;進出口居全球第二,外儲備世界第一!中國金融項目開始崛起。「Made in China」已面對全球包抄,無論石油、棉花、礦產價格皆因中國因素而大升,中國被迫走節約能源及資源路線,不然只有面對油價漲、棉花漲、礦產漲,點樣應付?另一場世紀之戰係豪賭人民幣升值,股市、樓價國際熱錢流入下升完可以再升,熱錢流入造成中國境內流動性過剩,負利率環境迫使中國十三億人口把存款趕去買股票、基金或物業,形成資產泡沫愈吹愈大。中國政府為洩洪,今年8月20日宣布港股直通車計劃,令本港H股同紅籌股亦因此狂升。呢種紙上富貴,1973 年3月港人經歷過一次,1990年1月前日本人亦嘗過。如果富貴唔係來自生產和累積,只靠吹氣球(國際資金魔術棒傑作),出事乃遲早事。泡沫好少能夠維持三年。踏入今年10月,滬深A股上升早已進入第三年,各位要小心(太早睇淡係死罪,因為群眾最終唔信你;太遲睇淡係活該。2007年11月起睇淡A股係咪時間好?事後才知道)。今次同1973年3月港股唔同,亦同1990年1月日經平均指數唔同,中國政府至今仍嚴格管制外,過去一再提升存款保證金率。中國政府控制不了國際油價、棉花價、礦產價,但控制人民幣升值步伐,一於慢慢來唔使急;亦控制到內地信貸(一再提升存款保現金率)。面對美元自2002年起大貶值、日圓接近零利率下,中國政府雖然無法完全阻止國內資產升值,但起碼將部分水分擠掉。

擢升王岐山迎戰國際資金  

國際熱錢目的只有一個──追求高回報率。追求高回報率時,表現往往有如洪水猛獸,吞噬一切可供獲利項目:八十年代係日本、1997年7月前係東南亞國家同香港、二十一世紀係中國。美國雙赤危機下,只有透過美元貶值令資金泛濫全球,吹大別國資產泡沫,從中獲利去填補自己雙赤。八十年代攫奪對象係日本、 1997年前係東南亞國家同香港、二十一世紀係中國,只有咁樣,才可保持美國人今天生活水準。在整個攫奪過程中,自然有危有機,應利用潮起潮落去壯大自己,而非被洪流所淹沒。八十年代德國利用馬克升值而成功將產業結構轉型,確立今天歐洲地位;反之,日本為抗拒日圓升值而將資金投資美國房地產,1990年次美國地產低潮中損失慘重。中國面對人民幣升值,能否一如八十年代德國,成功將產業結構轉型升級?  

中國國運日隆,呢點可由王岐山由北京市市長升到中央政治局、有望明年出任副總理見到。王岐山才幹2003年處理沙士事件中臨危受命出任北京市長可見到。另一件事係亞洲金融危機爆發後出任廣東省第一副省長,奔赴廣東省救火,宣布廣東國際信託投資公司破產、重組粵海集團;切斷亞洲金融風暴刮進中國引線,犧牲廣東國際信託、重組粵海集團,將中國當年脆弱金融制度穩定下來。壯士斷臂決定並非人人可以做,再加上2002年處理海南省地產泡沫破滅留下爛攤子。上述反映中央已做好兩手準備,面對國際資金挑戰而無懼色。  

2004年中航油新加坡石油期貨慘敗;2005年國家物資儲備局銅期貨出現巨大虧損,加上今年入股百仕通,都暴露中國缺乏國際金融人才。呢次擢升王岐山做第一把手,同國際金融大鱷大混戰,會否一如1998年香港成功擊退國際金融大鱷?

瘦死的駱駝仍比馬大  

近年A股股價大漲,為中國製造唔少世界第一,可喜抑或可悲?反觀日本去年GDP達5萬億美元、中國到今年才達3萬億美元。日本1911年已完成六年免費教育,1947年開始九年免費教育,2007年日本人口48%受過大學教育。東京大學世界排名十七(中國至今六年免費教育仍未搞好,北京大學世界排名三十六、清華大學四十)。日本人不但接受教育方面全球最高,財富方面亦一樣,2005年年底日本海外資產淨值180.7萬億日圓,全球第一(中國加香港海外資產淨值只有44.23萬億日圓)。環保方面,日本森林覆蓋率達64%,係全球森林覆蓋率最高國家之一,中國只有18%,連世界平均水平22%亦達唔到。壽命方面,日本人亦係全球最高,平均壽命八十二歲(女子八十五點三三歲);仲有日本係全球收入分配最公平國家之一,堅尼系數只有0.285,日本呢方面世界第一才令人羨慕。今年日本已係泡沫經濟爆破後第十八年;反之,中國正處於泡沫經濟將破未破邊緣,真係瘦死駱駝仍比馬大,中國人應收斂一下自己財大氣粗,教育、財富、環保、壽命方面同日本人爭第一才對,不要有D小成績便吹噓不已。  

今年9月中出版《論勢》最近第八版已出售,反應之佳出乎我老曹意料,不但如此,亦獲唔少同業好評。我老曹在此多謝各位同業,亦不妨同大家分享一下自己心路歷程。我老曹活到今天快六十歲,對未來已唔再抱幻想,好多事物已經歷過,進入淡然以對心情(可以講衰已衰過,威亦威過)。我老曹今天一把年紀,仍常問自己:人生意義係乜?依家心境雖然平靜,卻未能忘懷少年時喪父之痛,種挫折感真係一生難忘。經過四十年努力,財富上獲得良多,回首其他方面失去更多。眼見詹瑞文兄同女兒快樂相處,撫心自問,我老曹兒女成長過程大部分由太太負責,佢地擁有只係一個工作狂爸爸;幸好太太體諒,我老曹今天仍有一個快樂家庭,唔少朋友事業成功,換可能只係一個破碎家庭。相信係我老曹少年時貧窮,造成自己追求財富性格。《論勢》一書出版目的,唔係教各位多D搵錢方法,而係希望讀者追求財富與快樂人生之間,達致一個平衡點。做個富爸爸同時做個笑爸爸,令自己下一代自己歡笑中成長。財富易得,快樂難求,希望大家不但搵到財富,同時搵到快樂。  

明年中國減少五一黃金周假期兩天,新增清明、端午同中秋各一天,即內地人明年假期多一日,但香港卻失去五一黃金周大做內地人生意機會。過去五一黃金周有三天假期,如連同周末及周日可達五天,來港購物最合適(如要出國日子唔夠長)。明年只有一天勞工假期,到時內地人會否來港購物成疑。至於春節,通常回家看父母,即真正來港購物只餘下十一黃金周,相信對本港零售股有一定壓力。  

建設部住宅與房地產業司副司長侯浙「第八屆中國宏觀經濟運行與政策論壇」上表示,通過有區別稅收及信貸政策,抑制房價過快上漲,以貫徹十七大報告精神;穩定房價,認真落實今年8月國務院頒布「國務院關於解決城市低收入家庭住房困難」若干意見。去年底全國城市低收入家庭中,人均住房面積不過十平方米仲有一千萬戶,佔城市居民家庭總數5.5%。內地壓抑房價政策似乎陸續有來。

沒有留言:

張貼留言