2007-11-14

上落千點視等閒　　

11月13日，周二。恒指最低見26952.94，收市27803.35，一天之內上落1000點已被視為閒事；成交額1540億多元。11月期指升 160點，收27787點。　　日本首相警告日圓太高，令日圓由109.13略為回落；今年上半年日本樓價上升16％，支持第三季GDP上升。最近日經平均指數創新低，令明年日本經濟展望並唔樂觀。

留港資金唔打算撤走　　

恒生指數回落壓力已確認，未出現新高點前，大方向係一浪低於一浪（即係有反彈冇上升），但唔影響個別選股。至於調整幅度係前升幅三分一、二分一或三分二，事後才知道。美國上市中國基金CHN、CAF及GCH調整幅度已達50％，市價更低於NAV 20-30％。從呢點睇內地A股仍會下跌；本港國企、紅籌股壓力未消除；反之，道瓊斯亞太小型股指數、富時亞太小型股指數表現不俗，仍處上升趨勢，代表資金繼續流向二線股。　　

11月3日溫家寶談話主要係回應香港記者發問，解釋QDRI要延期理由，而非正式宣布QDRI停止，D炒賣國企、紅籌股海外基金有D唔耐煩而拋售，令恒指兩星期內下跌超過4000點。係咪足夠？假設冇QDRI，以恒生指數今年純利睇，大市可企於23000點，即23000點以上升幅係來自政府入股港交所（388）及8月20日QDRI刺激。會否打回原形？受好多因素影響，事前木宰羊。本港地產股及二線股過去未受惠於QDRI，理論上唔受呢次國企、紅籌股下調所影響，仍可睇好。過去三個月因炒賣QDRI而流入香港資金並唔打算撤走，令本港銀行同業拆息低企，繼續本港股市搵其他投資項目。　　

利率回落，加上港元追隨美元貶值，北京主辦奧運效應可令2008年香港GDP保持6％增長。加埋佘當奴宣布「十大」建設項目，大大加強香港、深圳及珠三角聯繫。恒指O二十三倍（明年下降到二十倍）只係略為偏高，如剔除高O國企、紅籌股，恒指2007年O只有十七倍，點可以話貴？

代客買賣漸失市場　　

8月17日至10月30日恒生指數上升超過55％，唔少人賺錢而需要換樓，大大刺激中價樓需求（指七百五十至一千二百五十呎）。假設明年上市企業純利上升13％，以及未來利率再下降四分一厘到半厘，恒指仍然有條件明年重返32000點或以上。　　花旗推介中渝置地（1224），目標價18.5元；推介雨潤食品（1068），目標價15.3元。　　

本港又有證券公司出事。近年財富管理人員吃香，並非股票經紀，代客買賣地位漸被網上買賣取代，如無法向客戶提供財富管理意見，點解要畀佣你賺？因網上買賣佣金早已極低，反而投資者極願意付出費用（tuition costs）去聽取專家意見。今年我老曹開Show，三千座位都唔夠應付，反映市場需要投資顧問而唔需要股票經紀。花旗、美林、UBS、大摩等公司報告吃香，就係提供買賣意見，而非單純代客買賣股票。中國及油組未放棄美元　　

中國同OPEC並唔打算放棄美元，而係調整美元佔儲備比重。次按危機爆發後，金融市場創造信貸能力下降，亦有助美元價企穩。周二美國金價跌27美元，見807.7美元；油價跌1.7美元，見94.62美元；美元價兌加元急升3％。　　

2000年起黃金再次供不應求。過去二十年金價回落，令投資金礦公司極少；加上舊金礦產金量日漸減少，即黃金早已存在上升因素，只係中央銀行拋售及生產商對沖（將未掘出黃金提前期貨市場拋售），令升幅唔明顯。2002年1月美元價回落引發投資需求，加快金價上升。近年推出ETF，進一步增加黃金需求，令供求不平衡進一步惡化。近年阻止金價上升力量反而係自投資客獲利回吐（例如我老曹2001年曾大手吸納，去年獲利回吐）。

金價長期仍睇1000美元　　

展望未來，2010年前黃金仍供不應求（今年短缺2.9％、明年3.5％、2009年3.7％、2010年3.5％、2011年2.7％及2012 年1.6％）。金價一定程度上受油價（影響開採成本）、美元價（影響投資需求）影響。估計今年第四季平均價770美元一盎斯、2008年838美元、 2009年950美元、2010年1050美元。我老曹早幾天指出金價第二次接近850美元必引發獲利回吐，但長期金價仍睇1000美元。　　

能源股指數跌破50天移動平均線進入調整期，或有機會重返200天移動平均線，即能源股股價短期有下調壓力。　　

過去人們相信任何對銀行不利因素亦對經濟不利，漸漸人們明白銀行股回落期，一樣可以有上升項目。即使美國經濟放緩，亞太區經濟所受影響亦較之前大減，雖然中國有21％產品係出口到美國，美國經濟增長放緩下，中國GDP增長率可能由11.5％下降至8％，但上述係好事多於壞事。日本GDP增長率只有2％，卻令人擔心，仲有台灣同南韓高科技項目可能流向中國。今天56.5％全球人口亞洲，中國同印度漸成為經濟增長引擎，而香港正處於亞洲經濟中心。　　

1980年商品價格高潮由日本、歐洲等OECD國家造成，涉及人口只有八億零五百萬；今天則面對五十五億人口，需求壓力自然較上一次大。今時今日商品價格即使未見頂，亦必須整固一下。中國因素、印度因素已耳熟能詳，早已令唔少商品期貨出現彈道式上升，只要需求略為減少DD，已支持唔住依家價格。 MMC Asset Management投資策略員Peter Constable質疑繼續睇好商品價格論。

美股已分為兩個市場　　

過度興奮心情令人睇唔到眼前風險，情緒去到極端才會over-leveraged。太早提出警告者因為一錯再錯而羞於啟齒，更加準確訊號係長期淡友忽然轉為睇好。我老曹無意反駁商品Supercycle論，雖然我老曹同意明年美國經濟可避免陷入衰退，但只要GDP增長率放緩，對商品價格回落已構成一定壓力。近日銅、鋅、鋁、鎳價已開始回落，足可證明。Supercycle好玄，非我地D普通人可以理解。中國同印度正在工業化，對鐵礦石、銅、鋁、鎳等需求按年上升，刺激金屬價格出現彈道式上升，最後視乎中國經濟對原材料高價承受能力如何而定。AMP主要策略員Shane Oliver認為，中國工業化及城市化大趨勢唔會停止，但中國出口能力部分有賴人民幣追隨美元貶值。美國GDP增長率放緩，加上人民幣加快升值，有條件削弱中國產品出口能力，繼而影響中國對原材料入口需求。以銅為例，生產成本150美仙一磅，卻售350美仙，理由係供不應求，價格由賣方決定；銅一旦由賣家市場轉為買家市場，銅價跌幅唔細。中國產品出口係獲出口退稅補貼，今年7月1日起中國逐步取消或減少，影響需要一段時間才浮現。中國係一條極大極大船，由開始慢駛到停下來需要一段好長時間。2003年起工業生產成本不斷上升，上述升幅大部分由生產商承受，未有轉嫁畀消費者，令美國CPI升幅唔高。經過五年後，生產商仲能夠承擔成本升幅咩？一旦產品出廠價上升，美國入口成本價格肯定上漲……。　　

過去資源股同能源股表現較大市出色，但近月已改變，證明大戶正在拋售，如次按危機進一步惡化，資源股同能源股跌幅可以相當大。　　

美國房屋價格進入回落周期，亦係令原材料價格或遲或早回落因素之一。事實上，今年3月起美股已分為兩個市場，科技、工業及原材料項目仍上升，金融及消費項目則早已回落，近期連科技、工業及原材料股亦加入下跌行列【圖】，令指數跌幅更明顯。