2007-11-09

管制物價反令CPI狂升　　

11月8日，周四。恒生指數跌948.71，收28760.22；成交1488.57多億元。11月期指低水，跌989點，收28539點。頭肩頂走勢頸線未破，未能肯定乜，如周五港股再跌，技術表現才轉差。東亞銀行（023）跌3.4％、建行（939）跌3.4％、交通銀行（3328）跌 4.5％、工商銀行（1398）跌4.1％、國壽（2628）跌3.9％、中國銀行（3988）跌3.1％。利豐（494）挫5.1％、恒地（012）跌 6.3％、中海油（883）挫6.7％、中石化（386）跌8.1％、中石油（857）跌7.4％。恒發（097）則上升8.9％、中華煤氣（003）升 4.4％。8月20日受港股直通車刺激，上周二恒指曾見31638點，上升55.2％；技術上睇，如28500點失守，將有較大跌幅。中國收緊外商涉足房地產　　中國股市今天出現四個月來最大跌幅，滬深指數跌4.8％，收5093.6；由10月17日5891.72至今，跌幅13.5％【圖】。萬科跌 4.3％，收34.93元，因10月份房產銷售較9月縮減25％。世茂跌8.6％，收20.39元；金融街跌5.8％，收34.8元；北辰實業跌 6.3％，收11.14元；江西銅跌8.8％，收53.65元；銅陵有色跌10％停板，收27.33元；雲南銅業跌9.3％，收57.61元，因上海1月期銅下跌2.6％。　　

高盛證券估計內地樓價明年上升20%至30％，2009年再升15％，將本港上市中國海外（688）目標價由17.78元上調至24.71元；雅居樂（3383）由20.1元上調至22.16元；上海復地（2337）由7.39元上調至8.26元；世茂房地產（813）由21.06元上調至 25.13元；綠城中國（3900）由21.78元上調至22.80元；華潤置地（1109）由15.95元上調至20.19元；富力地產（2777）由 36.17元上調至42.11元；並首次將遠洋地產（3377）納入研究範圍，目標價14.6元。今天內地上市內房股卻大跌，因中央推出「2007年外商投資產業指導目錄」，進一步收緊外商投資房地產。

數碼導航流行程度將媲美iPod　　

9月成立中投約有2000億美元，三分一資金投資海外、三分一注資中國農業銀行及國家開發銀行、三分一買中央金公司，即日後將有670億美元資金到海外尋找合適投資項目。　　

花旗推介合景泰富（1813），目標價20元；恒基地產目標價90元。至於建滔集團（148）估計今年每股獲利3元，較去年下跌64.8％，O十五點四倍；2008年純利恢復增長，每股獲利3.75元，上升25％，未來O十二點四倍。　　

今年蘋果股價上升120％、Google升58％，Research in Motion更勁到飛起。香港上市高科技股中，有冇另一隻蘋果、Google及RIM？技術上睇，國企、紅籌股升幅已大致上完成，你必須重新調配你財產配置（Reposition your assets）。揀股正確乃賺取過百萬元方法，如選股出錯而唔及時止蝕，損失閣下自理。今時今日石油同金價已太貴，餘下可投資項目只有高科技股。 Plasma電視今年第三季美國銷量上升45％，達二百三十萬台，LCD電視銷量更上升99％，高清電視將成全球主流，引發唔少商機。新產品如數碼導航（利用GPS科技）外國汽車已漸漸成為必備產品，未來二十年可成為全球另一重要消費品，流行程度媲美今天iPod。　　

AIG公布第三季為資產減價26.8億美元。大摩話8月31日次按投資市值104億美元，到10月31日已跌至60億美元，因此今年第四季要大幅撥備，進一步證明投資市場無大戶散戶之分（大戶亦經常睇錯市），只有贏家同輸家。次按問題將延續到2008年（甚至2009年），最好避開同次按有關及美國房地產有關項目。畢非德投資第一戒條──唔好損失，第二條係唔好忘記第一條。

內地管制食物價格壓抑CPI　　

今天連超級名模都話唔收美元，現年二十七歲巴西模特兒係咪有投資智慧？記得1979年亦傳產油國唔收美元只收黃金，令金價1980年1月見850 美元，之後卻一沉不起。1994年日本人亦拒收美元，當年一美元兌78日圓，我老曹正帶住老婆仔女同埋D美金遊日，坐完的士後司機拒收美元，搞到我老曹好尷尬。呢次美元自2002年1月起已回落，至今為止真係到一沉百踩地步，兌歐羅今年已回落9％。根據3P理論，美元已極度超賣，不過任何事未到極端係唔會反彈（物極才必反）。美國係全球最大出口市場，由德國豪華房車到中國廉價玩具，美元價一跌再跌，各國產品出口能否唔受影響？美國消費市場佔全球消費總額20％。美元危機平均每七年出現一次，自1971年9月放棄同黃金掛後，美元購買力過去三十六年失去95％，上述係好無奈事，但至今全球大交易仍以美元作計算單位，未有一個國家貨幣可取而代之。美指數自2001年見120點跌到近日75點，即過去三年美元率上損失37.5％。根據七年理論，唔排除明年見底，通常最後跌幅才最eye-catching，例如超級名模唔收美元等消息。　　

油價已漸漸接近100美元，科威特石油專家塔萊勒．巴宰話，汽油價格上升，美元貶值係首要因素，因為產油國都以美元結算原油出口貨幣，如美國同伊朗緊張關係加劇，唔排除明年油價見120美元一桶。　　

國際能源署表示，國際油價見100美元，各國暫時唔會動用戰略油儲，因為油價唔係考慮動用戰略石油原因。但中石化仍須按60美元一桶去出售成品油，大做蝕本生意（雖然11月1日起內地成品油獲准提價10％）。油價上升進一步刺激全球食物價格上升，中國政府宣布對唔少食物價格進行物價管制，以壓抑10 月份CPI上升。記得尼克遜總統1973年亦曾宣布凍結美國物價十二個月，到1974年取消管制時，反令美國CPI狂升。管制物價結果只會令物質供應更加短缺，並非治本之道。10月起中國政府凍結部分物價，令10月份CPI升幅減低，結果只會令明年一旦放棄管制時物價大幅上升，上述係放諸四海皆準道理，中國亦不能例外。

老殊的智慧　　

今天一百萬BTU，由石油產生較用天然氣產生貴8.5美元（兩年前一樣），如果唔係油價太貴，就係天然氣太便宜，或遲或早出現調整。　　

外界好擔心土耳其揮軍入侵伊拉克北部，土耳其內部人士睇法剛剛相反，理由係伊拉克北部投資有80％來自土耳其，伊拉克北部亦係土耳其農產品及工業產品大買家，攻打伊拉克北部有如同自己蚊年過唔去。各位會否自己古董店內打老鼠？土耳其人相信，自己政府只係擺姿勢，希望庫爾德族人唔再要求獨立，並非真正發動戰爭，以便向土耳其人民交代政府正處理緊呢件事……。庫爾德族人過去受制於侯賽因，依家因伊拉克政府搞民主，而令庫爾德族人暫時冇王管、搞搞震。土耳其計劃邊界駐兵四百、坦克車五十架，隨時攻擊庫爾德族內D要求獨立分子。當然，美國亦要畀D好處呢位盟友；反之，美軍伊拉克卻十分麻煩，因親伊朗伊拉克民兵同美軍打游擊戰，令美軍重陷越南困局。強大武器在正規戰爭中好有效，但打游擊戰中作用唔大，親伊朗民兵因熟悉地形神出鬼沒，搞到美軍心緒不寧，但又分唔出誰是敵人、誰是朋友。各位不得不佩服老殊策略：留番低侯賽因，唔推翻佢政權，證明對美國有更大好處；殊仔呢次揮軍入侵伊拉克，搞到世界油價高漲、美元唔值錢，2008年大選共和黨將失去政權，等民主黨上台後至收拾伊拉克殘局。根據民意調查，依家有52％美國選民計劃選民主黨，只有34％仍然支持共和黨。　　

美國經濟增長率放緩，對新興國家影響係點？過去五年新興國家經濟受惠於美國2002年開始經濟復甦（2001年第三季GDP見底），近幾年美元弱勢，令中國產品順利打入歐盟市場（人民幣兌美元雖然升值，兌歐羅仍貶值），保持中國出口高增長及GDP雙位數字上升。今天中國對美國市場依賴度已下降，加上內部消費上升，我老曹估計中國所受影響極之有限，除非美國經濟不但停止增長，同時陷入衰退（連續兩季GDP負增長）。依家美國核心CPI升幅只有 2.8％，美元減息空間好大，應有足夠能力阻止衰退美國出現。減息從來唔係好消息，如經濟良好，點解要減息？減息作用只係阻止經濟進一步轉弱（通常頭三次減息有DD作用，之後作用就十分微弱）。因此第一次減息後，通常係出貨訊號而非入貨訊號。秋季係收割季節，所謂秋收冬藏。恒生指數係咪10月 30日31958點見頂？未跌穿頸線之前不能肯定。

人民幣仍有兩次加息可能　　

中國A股市場漸令人擔心，2005年至今A股指數上升335％（1998至2000年納指上升277％）。納指最後狂升由1999年10月開始、 2000年3月結束，六個月內上升87％。滬深A股由今年7月6日3475點上升，到10月17日見5891點，三個多月內上升69.5％，係咪泡沫已到尾聲？今年結束前，人民幣仍有兩次加息可能，令存貸利率上調27個基點。　　

中國國務院批准、國家發改委同商務部10月31日發布第57號令，修訂「外商投資產業指導目錄」；2007年12月1日起施行，同時廢止「2004年外商投資產業指導目錄」。新目錄多達二十八頁，涉及項目十分多，主要係唔再鼓勵外商投資中國已能掌握技術產業、不可再生重要礦產資源，禁止高物耗、高能耗、高污染產業外資專案准入，而傳統製造業唔再鼓勵外商投資，只有中西部地區才可讓外資投資老工業基地。　　

外商投資房地產亦將受限制，例如土地成片開發、高檔賓館、別墅、高檔寫字樓及國際會展中心建設；至於房地產二級市場交易、房地產仲介或經紀公司亦限制外商投資。壽險公司外資所佔比例唔超過50％；證券公司外資所佔比例唔超過三分一；基金管理公司唔超過49％。此外，高爾夫球場建設及經營、博彩業、武器彈藥製造業亦禁止外商投資。不過，有關目錄進一步鼓勵外商投資中國高新技術產業。　　

前年南韓政府向二手房轉讓徵收30％稅率，令去年南韓樓價立即停止上升，但二手房市場亦出現蕭條。呢次限制外資進入中國二手房影響如何？木宰羊。今天內房股亦出現較大跌幅。　　

調低出口退稅率商品9月份出口增長率只有22.7％，較1月至8月放緩7.4個百分點。取消出口退稅商品出口由升轉降，1月至8月出口升幅 39.4％，9月份下降6.3％。一般貿易出口增幅亦在放緩，9月份升幅24.7％，較1月至8月減少10.2個百分點；加上貿易方式出口增長 14.1％，較1月至8月減少5.4個百分點。　　

新版「外商投資產業指導目錄」對三高說不，今年12月1日起實施：一、促進產業結構升級，進一步鼓勵外商投資高新技術產業；二、節約資源，保護環境，減少能耗、高污染項目准入；三、減少中國貿易順差，唔再單純鼓勵出口導向產業來華，並幫助中西部開發。