2007年11月26日 星期一

2007-11-22

減息又死唔減息又死   

11月21日,周三。恒生指數跌1153.02,收26618.19;成交1288.2多億元。11月期指跌947點,收26498點。大市跌幅漸接近前升幅50%,正常調整幅度好少超過前升幅50%,理論上恒指25600點前應守得住;至於前升幅61.8%,如調整幅度達到呢個水平,後市將無力再創新高價。技術分析睇,今天表現好差。利豐(494)跌4.3%、裕元(551)跌4.9%;控(005)跌2.5%,已係去年4月以來最低。東方航空(670)跌6.5%、國航(753)跌4.2%,今年航空燃油價上升55%,成本飛漲漸抵銷人民幣升值所帶好處。  

恒生指數11月份下跌15%,係1997年10月以來最大跌幅,開始面對止蝕沽盤壓力(從最高價回落10%至15%,D止蝕沽盤便自動生效,令股市進入因下跌而下跌局面)【圖】。周四乃感恩節,應該食火雞,但本港投資者食緊驚風散。今年財富轉移速度較往年快。

沽港公用股吸內地電力股  

今天花旗推介鷹君(041),目標價41.17元,理由係寫字樓需求好大,而且股價長期落後大市;並建議減持國壽(2628),擔心明年開始人壽保險單增長率減慢,冇高增長率支持下,估計明年純利將減少22.7%,至每股95仙,未來O高達四十三倍;但推介平安保險(2318),目標價102.81元,估計明年純利仍可保持今年水平,每股獲利2.08元,未來O四十倍;建議減持長江基建(1038),估計明年獲利減少9.5%,至每股2.2元,未來O二十四倍,即上升空間十分有限;建議吸入中國電力(2380),因股價長期落後大市,而明年純利可上升160%,至24.8仙,未來O十五倍;亦推介華潤電力(836),估計明年每股獲利1.12元,未來O二十三倍;但唔推介中電(002),因估計明年純利減少11.7%,至每股4.17元,未來O十二點三倍;推介大唐發電(991),目標價8.5元,明年純利上升11%,至35仙,O十九點一倍;建議減持中華煤氣(003),估計明年每股獲利83仙,減少45.2%;亦建議減持港燈(006),因冇增長率。簡單D講,就係沽出本港公用股,吸納內地電力股。  

滬深三百指數過去十個多交易天中有八天係下跌,其中石化股跌幅較大,理由係國際原油價創新高,但內地煉油商未獲政府批准前,不得將上升成本轉嫁用戶。今天中石化再跌1.9%、上海石化跌3.6%、儀征化纖下挫3.8%;國際油價已升上99.29美元一桶。  

如果畢非德、格蛇及李實發睇市正確話,內地A股下跌空間好大。美國ADR本月已回落15%,同期滬深三百指數只下跌11%,反映外資全面睇淡內地A股。

第一次減息真係出貨訊號  

受內地A股回落影響,本港國企同紅籌股亦面對較大拋售壓力,外資國企紅籌股身上大量獲利回吐或換馬。  

美國十年期債券利率自2005年首次低於四厘,因格蛇認為美國樓價回落可進一步打擊信貸市場,令資金flight for quality(流向高質債券)。利率期貨市場估計,12月11日美國減息至4.25厘機會高過92%,明年1月再減息至4厘機會高過77%,即美國將有第四次減息行動。受上述消息刺激,日圓升上108.8兌1美元,此乃2005年9月以來新高價;澳元兌日圓亦回落1.5%,成96.68日圓;紐元跌1.4%,成82.95日圓。自從美國第二大物業按揭公司Freddie Mac宣布出現虧損後,日圓兌澳元升11.6%。日本人減少利差交易,估計年底可見107兌1美元。日圓強勢,令日經平均指數今天跌2.46%,成14837點。  

港股今天回落4.15%,證明第一次減息後乃出貨訊號。日圓利率只有0.5厘、澳元有6.75厘、紐元8.25厘,表面上睇借日圓存澳元淨賺6.25厘。但當日圓兌澳元上升11.6%後,利差所產生利潤無法抵銷率損失……。當美元進一步減息,日本人面對率上進一步損失,因此收番D日圓唔肯再外幣,於是引發全球股市回落。  

11月20日恒指最低見26404點,超賣環境再配合謠言出現反彈,今天恒指最低見26500點,能否守住?美國聯儲局一方面面對油價、金價上升,另一方面面對資產(樓價)回落,真係減息又死、唔減息又死。但以貝南奇直升機擲銀紙性格,12月11日仍傾向減息,以免美國陷入上世紀九十年代日式衰退,至於減息能否挽救信貸危機,又係另一回事,情況有如南加州森林大火,消防隊總要擲幾個水彈(雖然明知幾個水彈不能阻止森林大火蔓延),目的只係告訴災民:政府正忙於救火。如減幾次息便可撲滅森林大火,咁又點解釋日本1990年至今半死不活經濟(1997年8月至2003年6月香港亦多次減息,段日子本港樓價又點?)。信貸危機有如森林大火,一旦蔓延,只有任由山火燒清整個樹林才會熄滅,能夠做就係逃離災場(除非你係救火隊隊員有責任留守)。  

聯儲局兩次減息後,並冇改變美國樓價方向,點解各位認為第三次減息有效?8月17日減貼現率兼注資入金融體系,雖然產生短期效果,但同時令油價、金價急升,係典型飲鴆止渴(或食止痛餅醫病,結果只係拖延病情,日後更惡化)。減息呢味止痛針,第一針通常極之有效,第二針效力減半,第三針仍有D反應,之後作用便冇乜。減息從來唔係治病良方。聯儲局10月30、31日會議紀錄中提到希望2010年核心通脹回落到1.6%至1.9%,明年GDP增長率1.8%至2.5%(今年6月佢地曾估計2008年GDP增長率2.5%至2.75%),2009年2.3%至2.7%。睇落聯儲局對2008年通脹率愈來愈擔心,對GDP增長率亦愈來愈冇信心。

通脹失控必引發衰退  

1980年雪茄伏為控制通脹,不惜將利率提升至20厘(當年CPI升幅只有16%),雖然引發1981-82年衰退,但換回1983年起美國長期通脹率受控制。1994年1月上海朱亦咬實牙根將人民幣同美元併軌,1美元兌8.7元人民幣,以後許升不許跌,1994年10月人民幣利率升上15厘亦唔理。中國CPI洪峰1994年10月過後,1995年起中國通脹率回落。  

2001年「九.一一慘劇」,美國為防止衰退(2001年第三季GDP已出現負增長),不惜將利率一減再減,到2003年6月減至1厘,通脹呢頭猛獸因此重獲自由。今年8月17日聯儲局面對次按危機又急急減貼現率及注資,令通脹呢頭猛獸再肆無忌憚矣。中國2005年7月起雖然讓人民幣升值,但慢郎中動作令中國通脹率漸漸唔受控制。通脹率唔受控制最終必引發經濟衰退(好簡單Boom and Bust理論)。世人皆怕痛,而忘記no pain no gain教訓。嚴父出孝子,慈母多敗兒。當油價升穿100美元時,你說怎麼辦?當個仔已做蠱惑仔,到時後悔已太遲。  

今年9月開始,美國七千七百萬戰後嬰兒開始陸續退休。退休人士會做乜?一、賣掉城市住宅,搬到小鎮居住,令美國大城市樓價面對壓力。二、股票投資唔再增加,開始增持債券、收利息作為生活費,即未來美股面對較多沽家、較少買家;反之,債券可能出現較多買家(退休人士投資策略改為保守)。美國物業方面大方向去年已改變,美股大方向係咪今年10月起改變?  

1976至80年美國財政部及IMF共拋售一千二百噸黃金,1978年4月IMF宣布推出紙黃金,一樣無法阻止上世紀九十年代金價上升。一旦信貸危機形成,聯儲局亦一樣無法阻止佢蔓延;政府唔係萬能。當恒生指數11月份形成一浪低於一浪後,淡市莫估底,因為你唔知、我唔知個底邊,無謂亂估。所有預測,95%都係睇錯市。  

近年中國同印度經濟興旺,令全球食品需求以每年30-40%速度上升(由穀物為主轉為多食肉結果);加上今年全球第七大小麥出口國澳洲出現乾旱,令小麥今年產量減少60%。2008年拉妮娜現象,令美國產麥區陷入乾旱,明年小麥價進一步推高機會極大;再加上化肥乃石油副產品(不過只佔農產品成本0.18%)。近日小麥價回落,相信只係秋收結果,明年春季進一步大升機會極大。  

中國商務部公布,全國肉類、食用油、蔬菜價格等均有唔同程度上漲。其中豬肉批發價格連續六周上漲,上周豬肉價升1.6%、牛肉價升1.2%、羊肉價升1.3%、食用油漲1.9%、豆油升2%、花生油升1.8%。近期美元走軟,加上天氣轉冷,連菜價上周亦升1.6%。預計短期內肉價、油價及菜價將繼續上升。

加息點令豬肉供應增加?  

中國境內農民面對可耕地萎縮,卻要求糧食增產,結果形成濫用化肥,污染大地。大量農民湧入城市,令城市樓價升完又升、漲完又漲。政府政策卻係限制土地供應去打擊樓價上升,後果係阿崩叫狗,愈叫愈走。內地中產階級冒起,但又缺乏投資項目,結果將A股炒到半天高,港股直通車又遲遲唔准開出。過去中國人窮,有餐飽飯食已好開心;依家富起來,人人想吃肉,此乃十分正常要求,可惜養豬業仍未現代化,搞到今年豬肉價上漲60%,刺激CPI上升。人行希望透過加息去壓抑通脹(點樣透過加息令豬肉供應增加?真係晒頭)。為刺激豬肉增產,飼料價上升,於是玉米又漲價,國家卻唔准企業用玉米去生產乙醇,令呢類投資者泡湯,結果愈搞愈糊塗,搞到唔似自由經濟,但又唔係計劃經濟。  

中國七億五千萬農民人口,卻無法產生足夠食物養活十三億中國人口;反之,美國六百萬農民,不但養活美國三億人口,而且有大量糧食出口。中國唔少產區欠缺交通工具,令農產品運唔出去;交通良好農田為一再增產(動用大量化肥),結果良田漸變成瘦地。過去三十年中國工業現代化,農業則冇變化,仍停留包產到戶水平,形成中國城鄉經濟兩極化。中國政府日後要做事係將農業現代化。  

希臘人的智慧──男人一生最大詛咒係娶一個較自己聰明女性為太太,結果自己所做一切妻子眼中不值一哂。為證明自己,男人一生努力,結果仍畀太太睇唔起。男性需要只係一位賢妻良母,一個曉打理家務、有D崇拜自己丈夫(其實自己好普通)及曉教導子女女性,便一生幸福。除非你想做蘇格拉底,因被妻子嘲笑,結果成為哲學家。投資同娶妻一樣,如不量力而為,痛苦一生。  

昨天本欄第三段文中指恒指由10月30日31958點回落至今,應為回落5552點,跌幅17.37%,合此更正。

沒有留言:

張貼留言