2007-11-19

難為了家嫂 　　

11月18日，周日。美國經濟增長放緩，最終令利率下降，上述情況今年第四季已開始，未知何時結束。有人認為利率回落有利房產，上述言論並唔正確（1997年8月至2003年6月本港利率回落，但本港房地產價格同時間下滑60％）。樓價升降除利率外，更受其他因素影響。小心求證，唔好人云亦云。　　

美國消費股今年平均跌幅12％、金融股平均跌幅17％，令明年美國可能出現衰退機會由今年8月前30％上升到上周五50％。如各位仍相信股市係晴雨計，明年美國出現衰退機會已上升至50％。道指已升起衰退黃旗，除非12月11日聯儲局再減息，不然今年美國聖誕零售業令人擔心。如聯儲局12月再減息，美國經濟極有可能進入滯脹（我老曹感覺係一早已進入）。總之難為了家嫂，今時今日貝南奇呢個家嫂唔易做。大富之家做家嫂好輕鬆，甚至貧窮之家大家都識做，最難做家嫂就係D家道中落之家；美國依家正正係咁。　　

上周五房利美（Fannie Mae）股價跌5.5％，係1987年10月以來最大跌幅，第三季虧損3.43億美元；該公司擁有（或擔保）11.5萬億美元住宅貸款。房利美2004年9月股價成77美元後，今年8月仍值70美元，依家收40.69美元，已下跌40％，上周五已跌至最近五十二星期低價，金融擔保公司如Ambac及MBIA正面臨一再被人downgrade命運，Countrywide Financial即使有索羅斯入股，上周五股價一樣照跌。

美元拋空情況嚴重　　

美指數由11月9日低點74.978回升至上周五75.827；至今為止今年美元兌歐羅回落10％、兌日圓回落6.7％。美今年11月8日下跌9.8％。巴西名模拒收美元，羅傑斯建議全沽美元，但美元仍反彈，令金價一下子下跌8.47％，英鎊由2.0903美元跌落2.0474美元，菲律賓披索上周回落1.7％、印尼盾回落2.1％、南韓圜亦跌1.2％，甚至加元、澳元亦受挫折，再次證明投資市場冇專家，只有輸家同贏家。美國財長保爾森認為，美元下跌已唔再有秩序，因須挽救，雖然只係口部服務，但已對美元價產生作用，可見家美元係幾咁被嚴重拋空。　　

上周五道指回升0.5％，見13176.79；納指回升0.7％，見2637.24，理由係思科系統回購股份達620億美元；大摩推介惠普，德銀推介美國石油股，加上美股連續回落三星期，亦應該反彈。Epoch Investment PartnersDavid Pearl認為，依家係購入科技股時刻。上周五標普五百資訊科技指數升1.4％。阿聯酋阿布達比政府投資公司亦投資高科技股，宣布購入Advanced Micro Devices Inc. 8.1％，代價6.22億美元，即以每股12.7美元認購四千九百萬股新股；AMD過去四季共虧損20億美元，股價今年已回落38％，依家總市值76.3億美元。阿布達比擁有全球10％石油儲備，呢次趁低認購AMD新股，係咪代表電腦晶圓業務見底回升？　　

今年第四季起美國經濟增長放緩早已肯定，投資策略係點樣bad market中做good pickings。恒指經8月17日至10月30日急升後，就算唔下跌亦無法再創新高，踏入11月已進入易跌難升格局，投資策略員責任係搵出「淡市之花」作推介。　　

過去二十五年Nancy Prial係成功投資者，平均每年增長22.3％；2002年佢加入Essex Investment Management，專注中小型增長股，今年該基金升幅16％；依家正專注科技股、護理股及另類能源股。早一年前佢已對消費股、房地產股及信貸股表示謹慎。佢最睇好科技股係on-demand軟件類，即容許網上用戶需要時採用該公司軟件而收取費用；另一睇好項目係VoIP科技（即網上電話）。高科技大企業如蘋果、Google、微軟等佔標普五百指數10月份升幅其中61％，前者今年升幅達100％，後者亦有35％。今年高科技大企業股上升情況，會否明年擴散到二線高科技股身上？將成為分析界爭論點。　　

過去十二個月美國核心通脹（即唔計食物及能源）平均升幅只有2.1％，即利率有條件回落到4厘；至於非核心CPI升幅，估計11月份係3.8％、12月份為4％，令聯儲局處於尷尬局面。CPI其實只係數字遊戲，過去CPI中，牛肉佔好大比重（因外國人多食牛扒），九十年代開始以漢堡包取代牛肉地位……。用新公式計，美國10月份CPI升幅只有3.6％；反之，用過去傳統方式計，美國CPI升幅已達7％。係咪今天美國人多食漢堡包、少食牛扒？便睇閣下飲食習慣而定。其他有趣項目，例如美國CPI只計供樓支出而非樓價，供樓支出過去十年只上升30％（但樓價上升超過100％）；美國加薪幅度及福利支出皆參考CPI。新計算方法令政府及店東每年支出減少4-5％。

CPI只係數字遊戲　　

10月份美國零售數字上升0.2％（其實係回落）；美國消費者多花16％汽油支出（其實係油價上升而非消費上升）。零售數字又係消費指數之外另一數字遊戲。　　

聯儲局操控下，美國出現衰退（連續兩季GDP負增長）機會仍然唔大，但股市會否出現2000年3月至02年10月式下跌？過去呢段日子美國樓價仍然上升、消費繼續增加；美國樓價去年下半年起回落，雖然消費仍按年上升3％，主要係美股上升。不過道指係咪已今年10月11日14198點見頂？美國樓價經一年回落後，今年下半年起進入較危險第二階段，即樓價回落影響金融業，例如今年8月次按危機出現。

澳門賭場前景受考驗　　

為對抗信貸收縮，聯儲局已減息兼注資，令油價自8月17日至今上升25％，刺激CPI上升。美國樓價可見將來仍回落，並影響建造業。新屋建造較高峰時減少47％，依家建造業只佔GDP 4.4％（2005年佔6.3％），對整個美國GDP增長率影響唔大，唔似香港房地產佔整體GDP比重較大。美國GDP唔會因房地產價格回落而陷入衰退，只會出現低增長（但建造業已進入衰退期）。1997至2006年美國樓價升幅超過100％，引發當地信貸擴張，去年下半年至今樓價只回落5％，估計未來仍可回落10％，因未來十八個月有超過二百萬次按貸款者到期，須重新安排貸款利率。不過，即使未來美國樓價回落15％（或20％），對美國GDP影響仍然唔大。財富每消失100元，消費者才減少3至5元消費；美國住宅樓依家約值21萬億美元（佔美國家庭三分一財富），如回落10％，美國消費唔會減少，只會影響金融業，反而唔及高油價影響力大。美國消費佔GDP 70％，只要呢方面唔萎縮，美國GDP出現負增長機會唔大，但唔排除美股進一步回落。　　

香港短期趨勢係食物價格仲會上升，電費及煤氣費燃料附加費上升，交通工具申請加價；超市貨品平均加幅已有12.7％，估計未來六個月仍上升，酒樓食物亦暗中提價。至於二線股，80％回落，只有20％能逆市上升。11月投資策略係搵出D應升未升二線股，做一個出色stock picker。如你自己唔肯做功課，只識打電話問功課，冇人可以幫到你。　　

澳門賭場開始面對麻煩。中央政府收緊內地人去澳門賭，令賭場大豪客減少。澳門賭三年內增加四倍，至四千六百二十二張，酒店客房更誇張，增加十一倍，至八千九百零一個。賭客有冇增加四倍？你問我，我問邊個？澳門政府有見及此，已唔再發新牌照直至2010年，讓市場先吸收新建賭場及在建賭場，以免尾大不掉。　　

去澳門賭錢誰輸誰贏，我老曹木宰羊。不過，去年12月如投資新濠國際（200）已係大輸家，股價由去年12月18日24.5元到依家12.7元，十一個月內股價損失接近50％，同期恒生指數卻由不足20000點一度升穿30000點，升幅達50％，一來一回條數點計?!今天澳門大大小小賭場二十六個，由十八個超級富豪控制，賭場增加後競爭漸趨激烈，向旅行社提供回佣以便帶客去自己賭場賭，已成為必要動作，因此大大侵蝕邊際利潤。11月起港股進入回落期，未來澳門賭場前景亦將面臨考驗！New Constructs主席David Trainer認為，雖然澳門賭場股已下跌50％，但仍然偏貴。過去一段日子澳門賭場的確風光，明年又點？有D令人擔心。澳門酒店房租已升至2400元一晚，再希望酒店客房常滿已有困難，更何況2010年前澳門酒店客房仍不斷增加。

A股未來跌幅唔細　　

新興股市如中國又如何？滬深A股今年10月17日開始已出現疲態，但政府正努力冷卻經濟，希望將GDP增長率由今年11.5％降至未來8％。一旦GDP增長率放緩，股市應由高O走向低O，到時唔知市場承受力係點？中國A股今年升幅已達104％，以今年估計純利計，O仍高達四十倍，如回落到較合理O二十二倍，擔心未來跌幅唔細。1994年美國經濟出現軟陸時，曾令大摩新興市場指數回落60％。1997年7月亞洲金融風暴影響下，恒生指數亦由1997年8月7日16820點回落到1998年8月13日6544點，跌幅達61％。不過，高盛證券認為，種種泡沫爆破前象未見中國出現，單單高O並不能確定泡沫快將破。1994年墨西哥危機及1997年亞洲金融風暴成因係企業純利大降，上述情況未中國股市出現云云。