2007-11-08

努力射中牛眼　　

11月7日，周三。恒生指數升270.8，收29708點；成交1595億元。11月期指低水，升87點，收29528點。　　

美元兌英鎊見 2.0955美元，跌至二十六年低價；兌澳元跌至二十三年低價；兌加元係1950年以來新低；兌歐羅出現1.4666美元兌1歐羅，係1999年1月歐羅成立以來新低。甚至兌日圓亦見113.69兌1美元，理由係中國政府表示今年8月至今已減持5％美元外。　　

油價升至98美元一桶，金價見二十七年新高，因62％分析員估計12月11日美國將第三次減息，令美元價跌過不休，引發全球資產價格升值，加劇新興市場流動性，因資金大量流入；人民幣見7.442兌1美元。納指已上破上升通道阻力【圖】。　　

香港地產股繼續大幅升值，新地（016）升6.2元，見147.8元；太古A（019）升3.5元，見105.6元；恒地（012）升10.27％，收71.9元；長實（001）升2.7元，報145.5元；中海油（883）升3％，見14.94元。

純利增長率重於資產淨值　　

內地鋼鐵股繼續回落，如太鋼不銹跌2.8％、馬鋼跌2.6％、寶鋼跌1.4％；麥格理銀行估計鐵礦石價格明年上升50％。油價見98美元，令西山煤電上升5.8％、神華升2.4％、大同煤業升2％。英國石油公司接觸神華，表示有意內地投資煤變油計劃。　　

過去投資要研究資產淨值、息率、O等，新一代投資更加注重「轉身」（Transformational）及「爆炸性概念」（explosive idea）。例如中移動（941）過去兩年成功吸納超過一億五千萬新用戶，由於移動電話營運成本唔會因用戶加減而出現變化，增加一億五千萬新用戶收入大部分變成企業純利，支持股價上升250％。最近上市阿里巴巴（1688）更係爆炸性概念成功例子，外國則有Google及Apple。股票市場，企業純利同增長率係一切，而非資產淨值。　　

財富來自新概念（innovation）及解決難題方案（problem solution），而非勤勤力力。勤力人只可搵兩餐，但好難發達，最多成為中產階級，但地產商財富卻來自七十年代開始解決港人居住難題。未來財富主要來自引入新概念，例如過去兩個多月港股A股化，為唔少人帶來財富，請留意邊D企業剛完成大轉身。我地已唔需要大牛市去賺錢，而係努力去射中牛眼，追求 100％回報（或跌15％離場）。Trading is hard work但值得，份射中牛眼所帶來感覺，除金錢回報外，更帶來一份光榮感。另一方面，要留心自己係咪過分自信，而睇唔到投資股份缺點？又或者過分猶豫，例如呢次黃金大升浪中，自己倉位不足？又或者太蠢太早減持廣船（317），讓太多利潤從自己手中流走？Trading有如《洛奇》電影中主角，打倒別人之前，自己先被別人打到口腫面腫！射中牛眼感覺好比一次又一次追求、戀愛及成功贏得女性芳心。現實生活中，人只能瘋狂地追求一次、戀愛一次，當贏得芳心後便要結婚，唔容許有第二次。股票市場卻容許一次又一次追求、甚至苦戀，而最後成功。

到應該轉移陣地時刻　　

H股相信毋須溫總提點，亦到應該轉移陣地時刻，理由係O三十五倍，而A股指數則進入整固期，已無法再起牽動作用。Double or Quits，上述策略未必人人用，如對股市冇經歷者或無法控制自己情緒者皆不宜採用。上述策略最適宜新興市場或牛市剛開始時（例如2003年4月）運用。港股已踏入第五年牛市，採取上述策略者應視乎自己年齡而訂下投入資金比重。例如我老曹快六十歲，只投入全部資金30％（以100減年齡，理論上應投入 40％才對）。如果你今年三十歲，投入資金可以係全部資金70％。牛眼投資法強調揀股，較少理會指數高低（恒生指數8000點時亦有唔少股份偏高，恒生指數32000點一樣有唔少股份偏低），採用者必須係對個別股票有深入了解者而非初哥（神槍手通常只有兩粒子彈，第一粒射唔中便第二粒，再唔打中便走頭。只有新兵才使用機關槍，亂槍掃射下，希望有一粒射中）。　　

今年股市波動性（volatility）愈來愈大，亦愈來愈密。例如今年2月同7月之後，最近又再發生一次。技術上睇，恒指在形成頭肩頂。

不可亂抄別人投資組合　　

有人喜歡將個人投資組合公開，但one man's meat is another man's poison；我老曹投資組合只適合我老曹，唔適合大家，不然我地亦唔需要財務策劃師為你度身訂造一個適合你個人投資組合。有病便要睇醫生，千萬唔好亂服成藥。最近為我老曹裝修屋企判頭，因感冒吃一星期成藥，結果搞到胃出血入醫院。如果自己經驗不足，便搵財務策劃師為你度身訂造；如果自己經驗豐富，便自行制訂，千萬不可亂抄別人投資組合。以我老曹為例，因為仲有份工，唔太注意經常性收入（Income），投資組合以資本增值為主；加上自己每天花十二小時投資上，有條件玩二線股及將投資集中三幾隻股份身上。上述策略未必人人適合，有人需要穩定收入、有人唔可能每天花十二小時投資上、有人承受唔起二線股股價大上大落。股市永遠存在不可預測因素，而且經常overextended（唔係跌過籠就係升過籠）。　　

2008年概念係唔少OECD國家高科技項目將大量移到中國生產去降低生產成本，而中國製造業正由樣樣都做轉向集中做高科技產品。人民幣升值、工資上升、出口退稅減少（或取消）、國家加強執行環保條例等等，令低技術投入工業例如紡織、成衣、玩具、廉價電器及電子產品面對壓力，因而移去越南、孟加拉、印度、斯里蘭卡等低工資國家生產，騰出更多生產力去承接來自OECD國家高科技產品生產。上述情況七十年代日本出現，八十年代台灣、南韓出現，依家中國亦開始進入此一周期。

高科技工序正移向中國　　

當股市完成巨變後，邊D股份可以吸納？呢類股份必須：一、唔受美國次按危機影響；二、唔受美國樓市回落影響；三、可承受中國人民幣升值、工資上升及唔污染環境；四、受國家支持而唔會減少出口退稅項目。　　

65％美國人相信經濟快陷入衰退，而我老曹仍相信貝南奇黃金歲月（Goldilocks）。家美國CPI仍處於過去四十五年平均低水平，失業率亦一樣；今年第三季GDP增長率係近一年半內最高。Economic Cycle Research Institute指數顯示Goldilock繼續──我老曹同意，根據ECRI指標，未來美國經濟增長率只係放緩而非衰退！　　

經濟放緩不利化工股，投資呢類股份應小心。美國經濟放緩亦不利日本，因消費者傾向買較便宜中國製造產品，而非日本製造產品，迫使日本高科技工序移向中國去降低生產成本。　　

根據The Birth of Plenty: How the Prosperity of the Modern World was created（作者Dr. William Bernstein）呢本書，1980年全球經濟已由供應不足走向供應過剩。現代世界繁榮來自科技傳遞；例如彩電1927年發明、影印機1938年出現、傳真機1948年出現，上述科技曾令美國RCA、蘭克斯樂等走向繁榮，然後係日本新力、NEC、松下電器等，以及今天南韓的LG、三星，明日將輪到中國。例如飛利浦近年發明LED（Light-emitting diode）主要台灣生產，但世界仍未普遍被採用，最近移向中國生產，令生產成本進一步下降，未來可成為家庭主要照明工具（因極之省電，唔會發熱，而且使用壽命好長）。世界經濟繁榮建基於高科技由一個國家傳遞到另外國家令生產成本大降、大量人採用結果。我老曹誠意向大家推介內地高科技股。