2007-11-07

美國好快第三次減息　

11月6日，周二。恒生指數一度見28479.03，三個交易天內由10月30日最高31958點下跌3479點，跌幅10.9％；加上美林出報告估計明年恒生指數可見36000點，建議買進。恒指收市29438點，倒升495點；成交 1690億元。11月期指高水，升665點，收29441點。港交所（388）主席夏佳理表示，港交所短期將與國家外管局簽訂有關港股直通車協議，令內地投資者可來港投資順利，但時間未確定。他表示，香港亦要做足準備工夫，使內地投資者詳細了解香港股票市場運作情況，並準備介紹港股小冊子同光碟，向內地投資者及中介人士介紹香港市場。　　

恒生指數28479點乃頸線反彈，似乎形成右肩中（我老曹再次提醒大家，恒生指數形態分析準確度十分低，唔似個別股份。我老曹只信移動平均數組合，唔信恒指形態分析）。　　

高盛上調新地（016）目標價27％，至175元；嘉里建設（683）上調31％，至80.8元，估計2008及09年本港住宅樓價每年可上升 30％；同時上調恒地（012）、信置（083）、恒隆地產（101）及恒隆集團（101）目標價。美林預測2009年前香港樓價將上升50％，最睇好係恒基地產。今天新地升6.6％、信置升4.6％、恒地升3.8％。交通銀行（3328）升7.4％，該行表示正入股江蘇省部分農村銀行。中石油（857）下跌2.8％，三個交易天內下挫12％，貝爾斯登建議賣出。

創意企業純利高增長　　

中國最大企業交易網站經營商阿里巴巴（1688）上市，較招股價13.5元上升193％，總市值250億美元，O一百五十倍，一下子超過韓國NHN網站，成為僅次於雅虎日本、亞洲市值第二大國際網路公司。阿里巴巴預測今年獲利上升兩倍，因國內企業增加網上商品及服務行銷支出。內地好多公司冇自己網站，而使用阿里巴巴去搵客戶；為增加收入，阿里巴巴明年計劃將更多免費用戶轉為付費用戶。Google 2004年8月上市價85美元，依家700美元，升幅724％。阿里巴巴未來升幅係點？近期不但軟件公司睇好，硬件公司表現亦不俗，例如蘋果及 Research In Motion等。創意令呢類企業純利進入高增長期，並支持股價。　　

野村同東泰證券估計，中石油（857）及神華能源（1088）可能恒指季度評估後加入成為成分股，令中國大陸公司佔恒指比重由1997年年底 1.5％到今年年底佔28％。估計恒指成分股將逐漸由四十家增加到五十家。另一家有機會加入將係中國海外（688），電盈（008）則有機會被剔除，因市值只有329億元，而中國海外市值已達1390億元。

美元弱勢股市衰極有譜　　

滬深三百指數微跌42.76，收5317.55。中石化跌8.8％，收23.68元；中石油跌9％，收39.99元；江西銅業跌5.4％，收 55.68元；雲南銅業跌6.3％，收61.63元。桑福德伯恩斯坦分析員Andrew Keen報告中估計，明年銅價將下跌25％，因庫存增加需求減弱。寶鋼下跌1.1％，收16.79元，中國特鋼企業協會估計，今年中國不銹鋼產量將超過需求五十萬噸，2010年更擴大到一百萬噸。不過，華廈銀行上升3.5％，收19.57元，公司申請工資稅前扣除事項獲政府批准，而可減少所得稅3.2億元。　　

近期我老曹覺得，要協助投資者將佢地資金適當時刻放適當行業上正感受到無比壓力；至於告訴投資者避開唔合適項目就更加困難。例如次按危機過去一年，我老曹已揮動紅旗不知幾多次，睇呢個項目仍要經歷一段痛苦日子。貸款機構過分介入SIVs（mortgage-related structured investment vehicles）及CDOs（collateralized debt obligations）而無法自拔；繼花旗CEO辭職後，你信唔信The worst is over？反之，科網泡沫2000年3月爆破至今已七年，仍能生存者今後應唔再被淘汰，因為循環周期又再企佢地邊，情況有如2004年再次進入香港樓市情況一樣（1997年8月香港樓市泡沫爆破到2004年共七年）。市場往往由一個極端走向另一極端，並冇合理價。次按危機去年下半年浮現，未來衰相信會陸續有來。　　

上述信念令我老曹上月聯儲局宣布第二次減息後相信美元仍須再減息，依家已漸多人相信，令美元價繼續受壓。美元倫敦跌至1.4543美元兌1歐羅歷史新低，主因係美國樓市疲弱，打擊美國人消費。金價倫敦見820美元一盎斯，係1980年1月以來最高，瑞銀估計一個月內見850美元【圖】；只有兌日圓變化唔大，仲係114.63日圓。美元唔再係高息貨幣，外傳周三澳洲將加息至6.75厘，令澳元升上92.17美仙。分析員已改變睇法，家有 62％估計12月11日美國將減息至4.25厘（上月只有6％）；反之，歐羅11月8日極有可能保持4厘，令美元同歐羅利率差12月接近消除。　　

近日面對瘋瘋癲癲股市如何自處？美國樓價回落壓力下，美國政府必須維持寬鬆貸款政策去減少損傷，咁樣第三次減息好快出現。換言之，美元弱勢可見將來仍然維持，基於上述睇法，股市後市展望衰極有限。　　

內地鋼鐵股經過上半年大幅上升後，隨今年7月1日中國政府減少出口退稅而進入回落期。

明年係內地航空股營運高潮　　

內地航空股又點？依家外國航空公司只能中國三大城市升降。明年起七大省會（福建、廣東、河北、江蘇、山東、浙江及天津直轄市）每天最少有一班航班由美國前往。中國天空將逐步開放，明年起內地航空公司開始面對更多外國航空公司競爭……。中國政府打算內陸興建多三十六個國際機場，未來五到十年內投入服務，上述機場可容許波音787升降，呢類長程飛機營運成本比較上便宜，因此中國會考慮引入廉價航空公司。明年起聯合航空公司已可經營三藩市到廣州航線， 2009年起六間美國航空公司可提供十四航班到北京及上海等；2010年起中、美兩國向對方開放天空。換言之，2008年不但係內地航空公司營運高潮，亦係將面對各國航空公司更激烈競爭，尤其係2010年以後。　　

油價因伊拉克局勢緩和而回落2美元。今年夏季至11月初油價上升40％，最近見96美元才回落，估計其中20美元係地緣政治溢價。油價正進入消化期。　　

國家發改委最新監測顯示，10月29日至11月2日中國三十六個大中城市，豬肉價每五百克12.39元又再上升，牛肉及羊肉價亦上升，雞肉和雞蛋價則下降。睇住內地農產品售價上升，但香港缺乏呢方面投資工具。內地10月份CPI月中宣布估計升幅大於6.4％，如中國CPI連續三個月企於6％以上，唔排除第六次加息及進一步收緊銀根。11月份成品油加價，某程度上令11月份CPI保持高增長；因此年底前人民幣將有兩次加息機會。估計今年中國GDP上升 11.8％、明年升10.8％。今年CPI平均升幅4.72％、明年將達7.34％。隨國際資源價格上升，中國正面對輸入型通脹壓力。　　

Some days something goes wrong（任何時間總有D唔妥）。請唔好再問後市點睇，改問各行各行點睇仲好。市場呢隻怪獸近期食完淡友食好友，食完好友再食淡友，最近幾個月做好友又死、做淡友又死，因走勢上出現大量Deep V，好友淡友互片情況，可以講沙塵滾滾、殺錯良民。