2007-11-20

明年可能見負利率 　　

11月19日，周一。恒生指數跌154.26，收27460.17；成交1039.5多億元。11月期指跌90點，收27170點。　　渣打（2888）因《金融時報》報道有中資銀行收購，响倫敦升2.9％，成1712便士，但內地中資銀行紛紛否認上述傳聞，包括工商銀行（1398）、中國銀行（3988）及建行（939）等。　　

世茂房地產（813）跌3.4％，但中國電信（728）則升4.6％，網通（906）升5.5％，因謠傳好快會發放3G牌照。　　

滬深A股微跌0.3％，上海浦發銀行跌3.9％、民生銀行跌2.5％、萬科下跌4％、保利地產跌8.4％；不過，蘇寧電器升3.3％、上海汽車升3.9％、寶鋼升2.7％、中興通訊升4.4％，亦係個別發展。

港將進入資產再膨脹期　　

最近一次美元滙價回落由8月中開始，估計漸近尾聲；12月11日無論減息四分一厘抑或唔減，相信美元弱勢都已完成，雖然種種不利美元嘅消息繼續浮現。美股今年純利計，O十五點三倍，市價係賬面值二點七倍，可算喺合理水平，即未來美股下跌空間已有限。　　

反之，近年滬深A股上升，主因係流動性過剩所推動，如有不利因素引發未來調整，下跌幅度唔細。　　

港股8月17日至10月30日受美國減息、美元弱勢，加上中國QDII及QDRI推動大升，11月份進入調整期；如12月11日美國減息，可阻止港股喺12月進一步回落，因香港消費上升及房地產升值，對本港GDP起着支持作用。香港今年第三季GDP增長率6.2％，估計明年降至5.1％。10月份 CPI增長率1.6％，同三個月本港銀行同業拆息1.95厘好接近，如港元利率進一步回落，明年香港經濟有機會重返負利率期【圖】，再次刺激本港房地產價格上升，令香港再次重返資產再膨脹期（Asset-Reflation）。有咗1990至97年嘅經驗，呢次反應應該細好多，因為香港人已產生抗體。　　

10月17日滬深A股指數5891點，以今年估計純利計，O仍高達五十五點六二倍，相較道指O只有十六倍，即滬深A股O較美股高出二點四倍，可以講滬深A股已到咗超貴水平。內地A股早已進入鬥傻期，理由係流動性過剩及負利率（銀行一年期存款利率低於CPI增長率）。上述情況1990至97年本港亦曾經歷過，係典型泡沫瘋狂，維持日子幾耐則事前難以估計。　　

中共十七大之後，政府開始殺雞儆猴政策，希望喺泡沫瘋狂嘅股市中盡量將水分擠壓出來，以減少日後泡沫爆破所造成嘅損傷。內地上市公司超過一千四百間，連內地官員亦認為有三分二係冇投資價值。2001至05年內地A股熊市調整幅度高達55.27％，呢次調整幅度有幾大？

宏調係打定預防針　　

十七大之後，推出一連串加強及改善宏觀調控，防止經濟增長過熱，目的係防止明年8月奧運前出現大跌市影響氣氛，作用有如打預防針。政策包括將存款準備金率提升至13.5％嘅歷史高位、透過行政指令嚴格限制商業銀行响11、12月新增信貸，令好多大銀行暫停房地產按揭業務，以及國家稅務總局上周公布新嘅個人所得稅申報表時，要求申報炒股及賣樓所得，同時強調只係申報唔係徵稅，看似山雨欲來，為打擊炒股炒樓嘅新稅出台而做準備。據了解，內地政策人士指出，今年內地股市同樓市首三季表現太強勁，升幅遠超當局預期，如果唔壓抑一下，明年8月北京奧運會舉行前出現大跌市便認真冇癮。依家讓股市、樓市調控一下，明年初重拾上升軌，咁明年8月北京舉辦奧運期間，才會皆大歡喜……。　　

繼8、9月軍工企業改制後，軍工板塊日後亦容許上市，即未來各位有機會投資內地軍事工業，例如中國衛星、四創電子、遼通化工、北方天鳥等。中國軍事工業近年以年率15％嘅速度上升，屬高增長行業。為支持月球探測行動嘅二、三期工程而建立高解析度對地觀測系統、北斗衛星導航定位系統、氣象衛星風雲二號及風雲四號新型靜止軌道氣象衛星，新型海洋衛星亦須盡快建立。其他如資源一號、海洋二號及風雲三號衛星、環境減災小衛星三號……在在需財，透過企業上市集資，只要政府仍擁有控制權，便可將民間財納入協助軍事工業發展上。依家中國正力爭實現太陽同步軌道衛星設計壽命由兩至三年提升到四至五年，地球靜止軌道衛星壽命由八年提升到十五年。中國航天科工集團力爭突破第三代防空導彈技術，到世界先進行列，達到鄧小平要求軍事現代化，唔再打人海戰術。發射衛星新技術亦可迅速轉為民用，例如通信衛星、寬帶多媒體、音頻廣播衛星等，研製硬X射線望遠鏡，返回式微重力衛星等。透過同俄羅斯合作發展火星探測項目，亦同法國合作發展天文、海洋觀測衛星項目，同巴基斯坦合作發射地球資源衛星，協助亞太地區及非洲利用遙感數據開發地球資源，亦與委內瑞拉合作發展通信衛星。中國正式建立亞太空間合作組織，打破家吓美國响太空技術上獨大嘅地位。換言之，明年相信唔少軍工企業將來港上市集資，利用來自四面八方湧入嘅國際熱錢，協助中國軍工企業開拓太空領域。軍工企業明年完成股改後，將成為新一輪上市生力軍。　　

中國五縱七橫嘅國道主幹線明年初基本上完成，提前十三年完成規劃目標。五縱七橫規劃响1991年提出，主要幹線包括黑龍江省至海南省三亞，長約五千二百公里；北京至福州長約二千五百公里；北京至珠海長約二千四百公里；二連浩特至雲南河口長約三千六百公里；重慶至湛江長約一千三百一十四公里，合稱五縱。七橫包括綏芬河至滿洲里長一千三百公里；丹東至拉薩長四千六百公里；青島至銀川長四千四百公里；連雲港至霍爾果斯長四千四百公里；上海至成都長二千五百公里；上海至雲南瑞麗長二千五百公里；衡陽至昆明長二千公里。

內地再生能源發展潛力大　　

五縱七橫主幹線明年建成後，全國高速公路接近六萬公里。中國公路網絡已接近四通八達。　　中國氣象局最近已完成風能、太陽能資源評估。沿海陸上及北方兩大風能資源可開發二十八億六千萬千瓦電力，十分豐富，建議中央政府全力開發，估計呢個市場發展潛力十分大，未來三至五年內可擴大十倍。另一值得睇好嘅項目係太陽能發電，相信將由一個50億美元市場擴大成為一個500億美元市場。另類能源股已成為中國新貴。　　

國家發改委財政金融司司長徐林話，中國產權變化，下一步主要係土地，領域响農村。集體所有制令農村土地產權十分含糊，亦令農村留下太多勞動力。改革土地產權制度、進一步界定農村產權後，可令農村土地作更有效運用，以及讓更多農村勞動力轉移到非農產業及城市，成為中國產權變化嘅主要領域。　　

中國中產階級人口正大量湧現，唔少鄉村城市化。中國已用去全球40％化肥，令外地化肥生產廠股價由今年8月至今升幅達60％。中國正從外國大量入口化肥以滿足糧食需求（依家全國食米存量只夠七十天食用嘅低水平）。點解內地化肥工業股價升幅有限？因政府限制內地化肥零售價，令化肥廠賺唔到大錢，一如限制汽油零售價打擊汽油零售業務一樣。　　

中國市場係勇敢新世界，無數財富可以產生及消失。今天中國女性最認得嘅英文字母唔係ABC而係LV，差唔多所有五千萬個中國新女性，人人都擁有一個（可能部分係A貨），成為女性最起碼嘅豪華；反之，Avon化妝品努力多年仍未見成功，中國女性用化妝品嘅並唔多，唔似日本女性接近人人化妝。對中國女性而言，揸LV手袋較化妝更重要。　　

今天中國擁有全球最大嘅流動人口，中學畢業後，如非到另一城市讀大學，就係離鄉去做工，形成唔少大城市都有大量外來人口，流動電話及網站需求十分大，單單上海便有五千多個網吧二十四小時開放畀人上網，叫做第三處（即既非工作處又非住處）。對中國人而言，所謂美國口味係指KFC同Pizza Hut，日本口味係指味千拉麵（538），反而星巴克只係畀外地遊客嘅，中國人去嘅唔多。　　

今天中國有四億人口係年輕人（二十至三十五歲），大部分係流動人口。喺中國，真係乜嘢事都可以發生。　　

任何人都喜歡做money-doubler（賺取100％回報實在吸引，更何況有機會獲200％甚至300％回報）。8月17日至10月30日香港股票市場的而且確提供唔少money-double嘅機會，但11月份又點？知所行止並非易事，所謂「入市易、離市難」，過去三個月double your money之後，能否將所有利潤banked又係另一回事，不然有如坐過山車：上得快、落得快。股市走勢永遠係鐘擺，即由一個極端走向另一極端，然後物極必反。8月17日至10月30日恒生指數上升13000點嘅速度極快，係咪投資者對港股直通車over-react而將國企、紅籌股股價推得太盡，令11 月股市出現方向改變？找Someone who knows the game and how to play it successfully問問意見。　　

當一隻股份成交價由10元升上11元，我地便感覺貴而唔買，反而一隻股份成交價由100元回落到90元，我地便感覺便宜而買入。上述係一般人常犯嘅錯誤，忘記由10元升上11元係當頭起，由100元回落到90元係當頭跌。投資者在水中央，又點會感覺到潮汐漲退？因此當股價由高價回落10-15％便得小心；反之，股價由低價上升10-15％便應留意。寧買當頭起，莫買當頭跌。另一方法係觀察市場幾時出現傻瓜大量湧入（Fools Rush in），當佢地受人為性低息推動而去購買升值中嘅資產，期望賺取資產升值利潤（capital gains）時，當大部分傻瓜完成高價入貨後，趨勢便往往出現改變。上述情況响8月17日到10月30日國企、紅籌股身上係咪已出現？家吓最多傻瓜湧入嘅係所謂當代藝術品市場，今年已升值55％，正正反映資金冇正常出路。當富豪們花一億幾千萬元購入所謂現代藝術品之時，通常亦係股票市場見頂嘅日子。

美國滯脹期有排拖　　

標準普爾認為，亞洲證券市場經過今年大幅上升後，明年要進一步上升會有困難。11月起風險正迅速上升，點樣保護你嘅財產成為首要項目。聯儲局只有兩種工具──利率及貨幣供應，卻須面對千百樣問題，包括食物價格及能源價格上升。如8月17日唔減息兼唔注入資金，可引發美國信貸收縮（更多資金用於食物及能源，令其他項目資金供應便減少，最終可引發衰退）。聯儲局因擔心衰退出現，响食物價格及能價格上升之際仍減息及注入資金，去阻止信貸收縮出現，結果令通脹率揮之不去，經濟陷入滯脹──即GDP增長率放緩、信貸危機一再爆發、物價仍然上升……。參考七十年代情況，最終仍會引發一次信貸收縮期（例如1981－ 82年）才能解決問題，但基於大部分人又痕又怕痛嘅心態，美國滯脹期由1966年開始一直拖到1980年才痛下決心，睇落呢次仍有排拖。　　

1990年至今日經平均指數表現一再令投資者失望。雖然响大摩國際資本市場指數，日股仍佔21％比重，但大部分跨國投資者對日股比重已降至佔整個組合 16％。自從1990年資產泡沫爆破至今，日本仍未脫離通縮。今天日股估計O只有十五點四倍，同美股接近，而非1989年時嘅三位數字。日圓利率較美國仲低好多，日股平均息率只有1.46厘（政府債券1.48厘）。美國滯脹期1966年開始，美股大牛市1982年開始，相差十六年。日股1989年12月見頂後，2003年4月28日日經平均指數7603點係咪見底？今年政治方面日本仍一片混亂，夏季自民黨更失去上議院控制權。經濟方面，暫時前無進路後有追兵，尤其係中國產品正在蠶食一向被日本佔據嘅世界市場。明年日本企業純利升幅估計只有7％，再加上日圓已由117升上110，通縮壓力再次浮現，政府可能加銷售稅去減少財赤，打擊消費信心，令人擔心六年嘅日股反彈响今年10月21日結束。　　

同詹瑞文兄做Show（滙豐銀行已有影碟派），發現投資同學做戲一樣，分為三部曲：一、即時反應（詹兄喺遊戲中證明大部分參與者都做唔到）；二、作出抉擇；三、立即行動。唔少人因想得太多而缺乏行動，更多人响行動前諗都唔諗。投資成功和學做戲有好多共同點，例如EYF（Enjoy your failure!）。响亞視《電視風雲五十年》節目中，盧海鵬兄講得好：因自己喜歡做戲，無論別人點糟質自己，自己都做好本分。因為睇戲嘅係觀眾，只要觀眾接受你，最終冇人夠膽再糟質你。詹兄喺未成名之前亦受盡別人揶揄，比起佢地，我老曹過去走嘅路原來易行好多。我老曹成日以為自己少年窮，喺Show中已被詹兄取笑：「你屋企仍可以set budget、佢屋企係零budget。」睇落我老曹日後都唔好再講自己少年時好窮，原來唔少港人都係窮孩子出身。