2007-11-16

大戶梗有辦法 　　

11月15日，周四。周三恒生指數升1362點，但成交只有1490億元。周四恒指再跌414.8，收28751.21；成交額進一步減少至1197億元。11月期指低水，下跌594點，收28626點。深圳境內銀行限制大額提取人民幣，目的係阻止內地資金非法來港炒股。不過，大戶梗有方法，就係利用內地工廠，內地付人民幣畀工廠出糧，然後香港收取港元（只要多付10％，唔少工廠願意以身試法）。今天人民幣兌美元7.4228，自改以來已升值11.4％，投資界相信人民幣逐步升值政策不變，唔會大幅升值。 內地加息腳步聲漸近　　

新世界發展（017）跌4.8％，收28.1元，8月20日以來已狂升74％。利豐（494）跌2.3％，收31.25元，因美國10月份零售增長率只有0.2％。信德集團（242）跌4.7％，收11.36元。　　

滬深三百指數下跌1.26％，收5081.11。金地集團跌5.9％、保利地產跌3.6％、中石油跌2.5％，但南方航空上升4.7％。由於中國10月份CPI升幅達6.5％，另一次加息腳步聲漸近。　　

油價回升2.33美元，見93.5美元。12月5日OPEC開會決定係咪增產，依家認為增產需要並唔大。　　

貝南奇例會中冇透露12月會否減息，只係話會增加聯儲局透明度。美國樓市及次按問題仍佔據報章唔少篇幅，美國經濟增長率肯定放緩。　　

摩根大通睇好明年東南亞、中國及香港股市，但唔包括南韓及台灣，因後者對美國同歐洲消費需求過分依賴；亦唔睇好澳洲，因該國利率仍在上升。MSCI亞太指數今年上升16％，係MSCI全球指數近兩倍漲幅。估計新加坡海峽時報指數明年可上升33％，香港上升22％。　　

高盛則睇好明年人壽業務，例如平安保險（2318），估計十二個月內見118元。UBS睇好明年煤價及內地電力股如大唐發電（991）、華能電力（902）、華潤電力（836）等。花旗推介峻凌國際（1997）呢類高科技股，因LCD產品需求十分大。　　

今時今日股市極度volatile，呢分鐘仍睇好人，下一分鐘可以改為睇淡。控（005）公布第三季為次按撥備34億美元，股價微跌。　　

恒指形成頭肩頂後破線，周三出現後抽，周四又再開始回落（恒指形態分析準確度一向唔高，個別股份準確性高一D）？恒生指數上升浪會否10月30日完結？美國信貸市場及金融市場繼續惡化，因為樓價不斷失去價值，估計高潮明年上半年，家估底仍然太早，最後結果係唔少美國大城市樓價跌幅10％以上，令信貸進一步收緊。每次金價低於800美元可吸納，油價低於90美元可睇好；至於美元價跌幅幾時終止？木宰羊。

睇邊個冇穿泳褲　　

滬深指數較高峰期回落13.75％，亦進入調整期【圖】。中國經濟正融入全球體系。一如過去日本、台灣、南韓、泰國、印尼等國家，同國際接軌過程中必出現泡沫，中國亦唔例外。股票市場必然有一段鬥傻日子，一旦退潮便睇到邊個冇泳褲。上述情況香港已經歷好多次，例如1973、81、97及2000年。最近有股票經紀一個月內賺100萬元佣金，可見股市牛氣沖天。再以IFC二期為例，2003年落成之時每呎月租18元；今天升三十八倍，每呎月租150元，試想想一間三千呎寫字樓每月交租45萬元，短短四年內IFC租金上升八倍，升幅超過1994至97年香港私人住宅售價，當時以不足四年時間由3000元一呎升上12000元，上升四倍。1997年香港泡沫由紅籌股造成，2007年則係國企股。1994至97年全港住宅樓價皆狂升，呢次則集中豪宅及甲級寫字樓方面。最近美聯（1200）公布九龍擎天半島一個一千八百呎低層單位以每呎10028元成交，較2004年上升72％。至於豪宅級住宅已升至每呎4萬多元，但唔少九龍、新界中下價樓售價仍只及1997年60％。　　

10月30日港股總市值23萬億元，較去年12月31日13.34萬億元，上升72％。公司上市、發行新股等，共集資3000多億元。一般情況下，推動市值上漲相等於10％左右資金，即令港股上升10萬億元大約需要1萬億元資金，估計半數由外面流入（其中七成係海外、三成係內地），半數係本地資金。來自海外資金約3500億元、來自內地資金1500億元，港人自己投入資金5000億元。11月如外資、內地資金唔再流入，10月30日總市值23萬億元便保唔住。從恒生指數睇，相信約有1000億元由股票市場流走，可能因港股直通車遲遲未開出，有人等得唔耐煩套現，亦因新股大量上市從市場吸走資金，更多人賣股票去買樓。亦有外資如畢非德、新加坡淡馬錫基金等套現及將資金走，李實發等超級大戶亦套現。　　

十年人事幾番新，1997年唔少身家過億小富翁，今天為普通公司做文員，亦有人去的士或做看更，留下「永遠的痛」。最悲慘一個身家曾經數十億元大富豪走去燒炭而死唔去。今年股票市場又製造新一批身家億億聲富翁，歷史會否重演？香港人總算見過世面，以我老曹為例，有四十年投資經驗，見盡唔少浪淘沙。內地A股新丁太多，真正面對退潮時，又有幾多人冇穿泳褲？　　

中國工業生產10月份升17.9％（9月份18.9％），開始出現增長率放緩，其中汽車產量升24.3％、水泥升9.8％、電機及設備升23.7％。今年首十個月工廠及物業投資仍上升26.2％。雖然工業生產增長率放緩，但中國經濟仲係過熱，政府GDP目標增長率係8％。　　

世界銀行提升東亞經濟增長率到8.4％（4月估計7.3％）及明年增長率8.2％，主要係中國經濟增長十分強勁，今年增長11.3％，明年仍達10.8％，唔受美國次按危機影響。　　

IMF高級代表Stephen Schwartz表示，IMF已修訂明年全球GDP增長預期0.5個百分點，由5.2％下調至4.7％，主因係美國經濟持續放緩，估計美國GDP增長率只有1.9％，中國回落至10％。佢認為，今年亞太區唔會重演1997年金融危機，因企業負債水平已有所降低，財務狀況較1997年穩健，區內銀行及金融機構不良貸款比率有所下降，股票市場對外來衝擊抵禦能力已大大提高。　　

我老曹認為，美國樓價回落及次按危機影響日子將十分漫長。美元回落已令美國入口需求增長率下降，今年好大程度上仍依賴歐洲繼續帶動中國及東南亞經濟保持高增長；加上資源價格已大幅上升（帶動澳洲、紐西蘭、非洲、加拿大、巴西、俄羅斯經濟保持高增長）。對於明年投資策略，我老曹主張保守（今年下半年已開始轉為保守策略）。

賺快錢心態已形成　　

香港已回歸中國十年，回想1997年7月前唔少人感慨係older, wiser, but poorer。回憶1997年8月前80％投資者面帶苦澀或一種無奈，部分有D後悔。雖然今天恒生指數已較1997年8月上升超過一倍，但家財增加一倍投資者人數不足20％。老一輩投資者如果因此叫新加入投資者小心，你估反應係點？今年8月20日港股直通車決策刺激下，賺快錢心態已形成。理性回歸需時，大家都知道不足三個月內恒指由19000點升至31000幾點係非理性，但唔少投資者已愛上開快車感覺，直到撞車失事為止。過去A股泡沫愈吹愈大，依家已加入國企股，但O仍高達三十一倍。　　

人行11月15日宣布以利率招標方式及價格招標方式公開市場發行兩期票據，吸收140億元人民幣。其中三年期利率4.43厘，三個月期利率3.2347厘。　　

參考台灣股市泡沫歷史。1989年2月台灣政府曾宣布選擇性管制房地產信貸，1989年3月1日起大幅調升存款準備金率及存放款利率，但股市仍由6680點升至1990年2月10日12495點，上升接近一倍後，才狂瀉到1990年10月，八個月內股市回落80％才見底反彈。由於台灣政府及時管制房地產及銀行貸款，股市狂瀉對台灣房地產及銀行冇造成太大傷害，唔似日本因股市大幅下滑，令房地產泡沫1990年7月爆破，拖累日本銀行至今未能復元。睇北京政府正採用1989年台灣政府手法，大力限制房地產信貸，以及將銀行存款準備金率一再提升，存貸利率升完再升。只要保住地產及銀行，至於股市便任由佢升升跌跌。　　

第三世界國家貧富差距擴大已到可引發動亂時期，美國宣布玉米生產汽油計劃，令上述情況進一步惡化。有錢人家每月開支少於10％用於食物，貧窮人家每月開支超過60％食物方面。食物加價令貧窮階級怨聲載道，上述情況美國亦發生。美國南部唔少人來自南美洲組成美國下層社會，佢地美國賺取金錢，接濟南美洲家庭，食物價格高漲壓力下，呢D來自南美洲美國人，對殊仔極之不滿，認為玉米生產汽油計劃係有心靠害；相信2008年大選共和黨失去執政黨地位機會甚大。

外資赴台買樓博民進黨下台　　

2008年台灣選總統。愈來愈多外來人士到台灣買房地產，今年首三季非台灣人共購入土地三十四萬坪。六年前立法院已三讀通過《土地法部分條文修正案》，不但外來人可到台灣買不動產，連大陸人亦可到台灣購房子，但未見成績。今年點解咁多外人到台灣買房子？答案十分有趣：博小馬哥上台開放三通！今天台北、台中房子售價唔及中國上海、北京，更加唔好話同香港比較。如小馬哥上台宣布兩岸三通，相信台北及台中房子有機會進一步上升（換言之，今年去台灣買房子者，正在賭民進黨明年下台）！　　

畢非德老師葛拉咸，雖然七十年代已逝，但佢諗法至今仍然有效，就係購入D股價已低沉很耐股份。佢想法係如該公司情況略為改善，股價便會大幅上升；如該公司情況未見改善，反正股價早已低沉，未來跌幅亦唔大，首要條件係該公司負債唔多，即不會破產公司。踏入11月投資者將面對bad market，上述啟示能否協助大家做good pickings？