2007-11-21

日本師奶落雨收遮 　　

11月20日，周二。恒生指數開市下跌過千點，見26404點後，日本傳來美國聯儲局將調高未來GDP增長率預測，引發全面平倉潮，收市指數 27771.21，倒升311.04；成交1464.1多億元。11月期指低水，升275點，收27445點。　　

今天中海油（883）勁升5.9％、中石油（857）升2.2％、中移動（941）升2％、東亞銀行（023）升4.8％，反而中銀香港（2388）跌2.8％。

港股開始進入超賣區　　

恒生指數由8月17日19386點上升到10月30日31958點，回落至今天低點26406點，已回落555點，跌幅17.37％，略略超過前升幅三分一，又唔及前升幅嘅二分一，承接力响25672點附近。從RSI睇，港股開始進入超賣區，令今天出現一次V形反彈。日經平均指數升1.1％、滬深A股指數亦升1.5％。　　

美元兌歐羅跌至歷史新低，估計商業部將公布10月份房屋新動工合約跌至十四年低價，令1歐羅兌1.4766美元，係1999年1月歐羅成立以來新高，因六大產油國下月商討讓自己國家貨幣升值，取消同美元掛鈎，相信短期將令美元滙價進一步回落。　　

1980至81年油價升上45美元一桶，引發全球經濟衰退；2007年油價一度接近100美元一桶，點解全球經濟仍一片繁榮？分別係七十年代產油國唔信美元信黃金，將石油出口賺番嚟嘅蚊年用作購買黃金，形成七十年代金價狂漲，而1980年油價回落亦令金價長期不振。　　

2000年呢次唔同，產油國將出口石油賺番嚟嘅美元大部分回流美國債券市場，令債券價格上升及長期利率下跌，油價上升反令長期利率向下，一直支持美國經濟繁榮，所以經濟未因油價升至接近100美元而受影響。至於近日金價接近850美元，同產油國無關，2000年至今黃金冇產油國支持，升幅大大落後於油價。　　

不過，近日發生嘅事件卻令人擔心，就係中東國家嘅主權財富基金漸漸放棄美元債券，去找尋其他較高回報嘅項目，中國政府亦咁樣做，結果令美國再次面對七十年代嘅問題，就係購買石油及中國產品所用去嘅美元唔再回流美國，美國將面對類似七十年代嘅高通脹（或滯脹期）。為保障美元購買力，連美國人自己亦出售美元資產，如果愈來愈多人咁做，最終可引發1981至82年式衰退。上述係近日美股回落嘅底因。

明年係美元尋底年　　

溫家寶亦對美元滙價表示憂慮。參考美滙走勢，上一次美元滙價轉弱由1985年開始，到1992年結束，前後七年多D。呢次美元滙價轉弱由2002年開始，至今亦六年，2008年應係美滙指數尋底年【圖】。再上一次美滙自1971年浮動後跌至1978年，亦係前後七年。同1978年低價比較，美元只係上上落落而非大跌，溫總理毋須對美元後市過分憂慮。從美滙走勢睇，美元已進入尋底期，因為次按危機結果係引發信貸收縮，信貸收縮可支持美元滙價上升（例如九十年代至今日圓）。　　

到底次按結構性投資工具（Subprime Structured Investment Vehicle，簡稱SIV）及次按債券組合（Collateralized Debt Obligation，簡稱CDO）需要幾多撥備？我老曹唔係呢方面專家，策略只係避開。近日跌市係牛市調整抑或熊市開始？木宰羊。只知恒指自11月起大趨勢係向下。以O計，國企股跌幅仍未足夠；以香港GDP增長率及明年GDP增長率睇，香港經濟既非boom亦非bust，可以話唔太熱亦唔太冷，令今年下半年起股市極度volatilite。至於點樣喺極之波動嘅股市中賺錢，便八仙過海各顯神通矣。　　

假設8月17日聯儲局唔減貼現率及唔注資入金融市場，美國信貸收縮可引發明年出現衰退。經聯儲局兩次減息（估計仲有第三次，問題只係喺12月11日或明年第一季），美國經濟極大機會出現滯脹。响滯脹期，基金投資更集中响個別股份，而非整個股市、行業甚至地區上。增長股（growth stock）取代價值股（value stock），高科技股取代消費股，跨國投資取代地區性投資。上述都非一般散戶可應付，因此轉為買基金較為上策。至於長短棍（同時買入及拋空股份），更非一般散戶可以做到。明年前景展望，投資市場愈來愈專業化。　　

8月份次按危機爆發，令股市極之波動，投資策略傾向保守，最終令流動性過剩消失。依家金融市場正進入第二階段（即投資策略漸傾向保守），仍未出現第三階段令流動性過剩消失。例如周一花旗下跌5.9％，美林、大摩跌3.4％；瑞士再保為次按撥備11億美元，响歐洲下跌11％、Countrywide Financial再跌12.4％，見五十二周低位10.57美元。不過，周二金融股已反彈。次按危機進入第二階段，由於花旗集團同美林證券CEO已離職，令750億美元Superfund計劃停止，即金融機構第四季無法將次按賣畀Superfund，而將虧損暫時隱閉起來，並須响第四季做撥備或喺市場拋售。上述對三A級次按債券（約值2.5萬億美元）有即時影響。　　

中國核心通脹率只有1.1％，但食品同能源價格8月份升幅18.2％、 7月升幅15.4％、6月升幅11.3％，令中國9月份CPI高企。呢類結構性通脹相信要明年春節過後才回落，即中國負利率環境唔會維持太耐。中國出口佔 GDP 37％（日本佔15％、南韓佔37％、台灣佔59％，亞太區十個國家佔73％），可見出口業務對中國GDP嘅影響並冇想像中咁大。美國市場只佔中國總出口 21％，同亞洲其他國家唔同，佢地過去太依賴出口，一旦出口量減少，便引發亞洲金融風暴。但中國係另一回事，可以唔受美國經濟增長率放緩影響。今年中國 GDP增長率估計達11.5％、明年10％、2009年9.5％。中國通脹率今年第四季估計見高潮、明年起回落（估計明年全年CPI升幅只有4％）。新興市場今年至10月止平均升幅50％（同期標普五百指數只升6％），一旦出現獲利回吐，拋售將十分激烈，最近連50天移動平均數亦失守，令拋售進一步惡化。不過，新興市場股市上升軌仍然良好，只要未來跌幅少於15％，上升軌仍完整。最近滬深A股回落，到底係牛市結束抑或係一次較大調整？亦係木宰羊，但必須躲避其短期殺傷力。

今天泡沫在中國　　

1990年港元滙價偏低，但香港金管局唔肯放棄聯滙制度，引發本港資產泡沫。市場嘅非理性行為往往矯枉過正，响資產價格狂升後，到1997年7月港元滙價不但無偏低，反而偏高，但金管局再次決定港元唔貶值，引發本港六年通縮期。如非美元响 2002年起貶值，呢次香港通縮期真係不知何時了。　　

2002年人民幣滙價偏低，但人行決定唔升值，結果豬肉價、雞蛋價、全球油價、原材料價、內地樓價、滬深A股皆升值，鐘擺要到哪個極端才擺回來？10月17日滬深A股開始回落，有D令人擔心。　　

環球化令全球GDP增長率上升。人望高處，水向低流，環球化嘅結果必然引發全球工序重新分配。高工資國家面對工序流失，別國便宜貨則大量湧入，結果產生貿易不平衡、收支不平衡。呢個不平衡最終引發大調整，此乃1980年起全球經濟進一步環球化後金融市場極度波動嘅理由。環球化另一惡果係中小企業漸漸失去生存空間，全球市場由大企業壟斷，令社會收入進入20╱80情況（20％人口收入大幅上升、80％人口收入呆滯不前）。最近西方金融市場面對次按危機，估計中嘅大調整係咪今年10月開始？銀行係一個地方經濟嘅脊骨，一旦銀行股出事，呢個地方經濟又可以好得去邊？何況銅價近日跌幅亦唔係小嘢。今年第四季美國 GDP增長率估計只有1.5％、明年全年只有2％。美國經濟增長率放緩已好肯定，至今為止對中國影響十分細，但日本已感受壓力。日本家庭主婦減少利差交易，令澳元、加元、紐元滙價回落，日圓上升；日本呢個全球最廉價資金供應國開始落雨收遮，影響又係點？日經平均指數因為冇泡沫唔會大跌，今天泡沫喺中國。例如中石油A股上市後當天股價已上升三倍，令中石油成為全球市值最大嘅公司，媲美1989年日本嘅NTT，上市立即成為全球市值最大公司。香港受港股直通車計劃鼓舞，亦加入A股瘋狂行列，國企指數由8月20日至10月30日响十星期內上升超過100％。11月份溫總發言，證實港股直通車今年未能開出……。

有D人有搭沉船命　　

瑞士信貸銀行贊助嘅「鼠年投資天機」由新城財經台執行總編輯郭艷明主持，由玄學專家教你投資，屬另類投資法。所謂「命裏有時終須有，命裏無時莫強求」、「落地喊三聲、好醜命生成」；有D人真係好奇怪，有「搭沉船」命，一有佢參與，件事便唔成。我老曹一向認為「三分努力、七分天意」，「謀事在人、成事在天」、「盡人事、順天意」。人係鬥唔過個天，一如張立兄話「術」易學、「數」難掌握。玄學家點睇鼠年投資運程？各位可致電新城財經台攞飛。任何分析都可參考，至於信不信則自行決定，何況今天連電視藝員森美亦可以講股。今時今日講股專家已到咗泛濫嘅田地，極之唔值錢，四叔講股、燊哥講股，係人都講股，而且唔收錢添。　　

中國創新（1217）、洪橋集團（8137）、昌興國際（8139）停牌。