2008-06-02

中國下半年通脹不容樂觀

　　6月1日，周日。四川地震後創造出超過三十個堰塞湖，其中最大一個已貯水一億七千三百三十萬立方米（四百五十七加侖水），隨時泛濫成災，因此必須疏散一百三十萬人口。財政部已額外撥款10億元人民幣去加強堤壩及疏導湖水；另派出十三萬三千軍人協助阻止水災出現，不然繼地震之後將會係水災，四川省至今仍未脫離災情。

災害頻發火上加油

　　雖然中國政府一直希望抑制通脹，但國內外總係不斷發生不利通脹事件；繼年初發生百年一遇大雪災，直接經濟損失達1500億元人民幣，令內地通脹率火上加油，CPI多升1.2個百分點。5月12日中國四川汶川發生八級大地震，死亡人數接近七萬，三十幾萬人受傷，失蹤人口二萬多，經濟損失超過2000億元人民幣，估計可推高CPI 0.3個百分點（申銀萬國證券研究員李慧勇估計實際損失數字較官方數字大，相信達5000元億人民）。2008年1月雪災，人行增加信貸投放8036億元，令2月、3月同4月CPI升幅分別達8.3%、8.7%及8.5％；5月地震，信貸投放增加1000億元，6月、7月同8月份CPI又如何？之前估計今年下半年中國CPI增幅放緩講法又被推翻。

　　外圍方面，上周油價一度見135美元一桶，以此數計，中國境內石油業損失可達2358億元人民幣，國內進行補貼政策將難以為繼，一旦汽油價格上升，對CPI影響又係點？煤價上升，火電企業壓力加大，一旦電價上升，對CPI影響又點？仲有糧食價格問題……，睇下半年中國CPI仍不容樂觀。

　　上周通用汽車宣布裁員一萬九千人。今天通用汽車市值少於100億美元（只及豐田汽車十六分一），六十年代通用汽車係美國經濟領頭羊，但四十年後今天居然只及競爭對手豐田市值十六分一，世界變化之大可以想像。通用汽車生產SUV汽車油價高企後變成流血部門；反而豐田汽車美國市場佔有率不斷擴大。四十年前曾雄霸全球通用汽車，今天卻變得如此渺小，因此唔好以為今天財雄勢大便不思進取。

CEO被迫起身跳舞

　　花旗前總裁普林斯（Chuck Prince）《金融時報》話：當音樂響起時，你便必須起身跳舞，這是從事金融業悲哀，九十年代至2007年次按危機出事前，邊個可以唔跳舞？但當音樂停止而你搵唔到座位，你便要出局！普林斯就係位音樂停止前冇為花旗銀行搵到座位前CEO，所以佢已出局。幾時跳舞、幾時坐低？處理得唔好要出局。

　　今天推動美國（甚至全球）經濟增長動力係消費者。雖然愈來愈多來自中國、印度、巴西及俄羅斯新興中產階級加入消費行列；反之，舊有消費者例如日本、歐洲甚至美國已十分疲倦。當新舊力量交替，便產生今天崎嶇不平局面。例如推動美國經濟向前衍生工具市場出事，結構性產品出問題；美國人過度消費、中國人過量生產情況正開始調整。呢段日子，投資好困難，人民幣升值及勞工成本上升，對中國出口工業影響十分大。美國人面對美元貶值及通脹率日升，消費信心又如何？有D事件調整係溫和，但有D事件卻如四川汶川大地震話就，事前冇訊號，而且破壞力極大。以恒生指數計，由去年8月17日19386點上升到10月30日31958點，上升64.8％，再跌至今年3月18日20572點，下跌35.62％。以指數計雖然仍較去年8月略高，但一次地動山移，每個人得失無法計算；美國，貝爾斯登股東虧損之巨更加無法計算。上述情況金市、米市同樣出現，會否油市重演？上周能源股紛紛回落，天然資源股亦唔例外。到底係另一次地動山移抑或係餘震？ConocoPhillips行政總裁認為，合理油價應90美元；荷蘭蜆殼石油公司行政總裁認為，油價應35至65美元……咁上周135美元高價入貨者，到底係天才還是傻瓜？

油價135美元或是轉角位　　上兩周我老曹已提及唔少運油輪被用作存油之用，目的係等油價上升……當人人相信油價必升時，油價卻回落。上周油價見135美元後回落10美元，但消息對油價利好，例如美國存油減少八百八十萬桶。油價係咪見頂？未能肯定，但市場氣氛有D似見頂。油亦一如其他產品，不可能只升不跌。金價可以跌、小麥價可以跌、銅價可以跌、糖價可以跌、米價可以跌、棉花價可以跌，油價一樣可以跌。

　　期貨市場有句術語——產品價格下跌前，必須先升到極唔合理高價！上周末期貨指數基金共值1800億到1850億美元（去年底1450億至1540億美元），其中800億到850億美元係GSCI基金，即同油有關。換言之，135美元一桶可能係油價轉角位亦唔奇！

資金由印度撤退

　　展望6月，分析員相信美國經濟已步入低增長、高通脹期，企業盈利前景並唔樂觀。股市進入冰火二重天，有D股份5月5日後仍上升，但更多股份已開始回落。中國澱粉（3838）今年股價升幅183％、卡森國際（496）升52％、大成生化（809）升48％、超大現代（682）升47％，但東方電氣（1072）今年股價跌61％、保利協鑫（3800）跌60％、玖龍紙業（2689）跌56％、東方航空（670）跌55％。唔同股份今年首五個月命運可以完全兩樣。上述情況6月持續，繼續炒股唔炒市。

　　去年8月次按危機後，人民幣繼續升值，但印度盧比卻大幅回落，今年資金似乎由印度撤退。今年首五個月印度盧比下跌8.7％，達十三個月內低位。印度孟買股市指數去年上升47％，今年首五個月回落16.4％。人民幣與盧比出現此長彼消，將加快中國輕工業移去印度，十一億印度人口中有超過一半每天收入只有2美元！加上中國政府進出口政策改變，令今年出口增長率下降、入口增長率保持，對香港服務業需求增幅亦下降。

　　內地CPI上升壓力漸大，而且人行從緊政策漸見效，再加上四川地震造成重大損失，估計可令中國今年GDP增長率減少0.2％。

　　按國家政策，港人每人每天只可存2萬人民幣入銀行，或向內地銀行款8萬元人民幣。大部分人都相信人民幣兌美元可升至六算，一旦接近六算，流入資金便減少，到時內地可能面對資金流出。

　　美國次按危機下，受影響只係房地產及金融業，因利率由去年9月5.25厘跌至今天2厘；加上美元價貶值，令美國保持GDP增長（雖然升幅愈來愈慢），5月開始退稅亦可令美國GDP不致出現負增長。但下半年又點？2009年又點？美國銀行信貸仍在收緊，美國人房地產及股市失去財富，會否影響消費？油價及食物價格高企影響又係點？今天有銀者等候更低價，擁有資產者則等候更高價，期望明天會更好。相信雙方都有排等，直到一方失去耐性為止。

　　高通脹、低GDP增長率已成為全球各國面對困難。1973-74年及1981-82年兩次最終都以衰退結束呢段高通脹、低GDP增長率期，呢一次又如何？5月份密歇根消費信心指數已跌至59.8（4月份係62.6），為1980年以來最低。雖然美國經濟未進入「官式」衰退，但係好多人認為美國已陷入衰退。

　　標準普爾銀行股指數正下試3月及4月低點，代表美國銀行股仍未企穩，美國銀行、花旗集團等仍有下跌壓力。

　　閣下制訂投資策略上，有冇做好經濟陷入滯脹期（stagflation）心理準備？例如日用品售價愈來愈貴，做生意者邊際利潤收窄（profit margin squeeze），而樓價、股市卻在回落。

　　美國4月份個人消費升0.2％（3月份升0.4％），收入升0.2％，因政府退稅；但消費未因退稅而上升，因今年美國人汽油上多花900億美元，已用去政府退稅1100億元80％矣。

年輕人追求財富係應有態度　　一個剛大學畢業年輕人對我老曹話：「富貴於我如浮雲。」我老曹忍俊不禁，上述名句出自李實發，因為佢已好富貴，唔使再每天追求財富，因手上財富每天都自動增長。反而呢位年輕人連份工都冇，已視金錢如糞土，我老曹擔心佢日後一事無成。

　　年輕人初踏足社會，必須孜孜不倦地追求財富，只要唔犯法、唔違背良心，追求財富係年輕人應有態度！努力搵出市場空檔，然後出奇制勝地跑出來，唔好怕別人冇做過而自己唔敢試。七十年代我老曹同山木兄就係睇中本港缺乏一份有分量財經報紙，便利用呢個空檔創立《信報》。地產商亦因發現香港中產階級逐漸形成，對改善居住環境渴求殷切，因而發達。八十年代香港廠商利用內地改革開放政策回國開廠，亦賺大錢。正是條條大道通羅馬，睇到金光大道，便應毫不猶疑地啟程吧！今天蒙牛（2319）、康師傅（322），都係睇到內地市場空檔便立即上路，才有今天成就。碧桂園（2007）見到港人回國置業機會，亦因此成功了。上述才係剛大學畢業年輕人學習對象，當有一天名成利就之時，才可以講呢句「富貴於我如浮雲」，學習李實發捐獻文化。

　　年輕時，金錢有如種籽，必須好好播種才能有收成。五十五歲後，金錢係果實，自己吃不完，點解唔同別人分享？年輕人應多做義工，而唔係將自己種籽（金錢）捐畀別人。五十五歲後如自己有能力便應捐多Ｄ錢，有如將自己種出來果實同別人分享道理一樣。