2008-06-10

油價已經瘋瘋癲癲

6月9日，周一。睇完扒龍船，周二股市又如何？會否五窮、六絕、七翻身？

快退休聯儲局委員Frederic Mishkin認為，資產泡沫並非聯儲局製造出來，而係經濟發展結果。資產泡沫先至係令信貸出現寬鬆局面理由，而非信貸寬鬆引發資產泡沫。利率加減對資產價格升降影響亦唔確定；換言之，加息並不能阻止資產價格上升，減息亦不能阻止資產價格回落。上述理論講同冇講差唔多！房地產回落係咪「The Mother of All Financial Disasters」？日本係咁，香港係咁，英美又會點？到今年7月止美國樓價已跌兩年，英國樓價跌一年，展望未來兩年相信仍會繼續下跌。有人認為冇事，因為貝南奇去年9月至今已將利率由5.25厘降至2厘，美元價最少失去四分一。但美國房屋建築公司KB Home創辦人Eli Broad接受電視台訪問時認為，美國樓價未來最少會再跌10％（S&P╱Case-Shiller指數3月份較一年前跌14％，係近二十年內最大跌幅）。KB Home係美國最大房地產建築商之一，創辦人公開睇樓價再跌10％，擔心未來跌幅唔止10％也。

英國樓價跌幅或甚於美國

美國家庭今年首季失去17000億美元財富，你話對經濟有冇影響？

英國今年1月至今樓價平均下跌6.6％或13000英鎊。1995年英國樓平均賣61115英鎊一間，去年最高曾見198664英鎊一間，上升225％，至今回落至178555英鎊一間。英國人年均收入30000英鎊，依家樓價等於六年收入（過去三十年平均數係三點七年）；利率則由2003年3.4厘上升到2007年7厘，美國次按危機後又回落到5.8厘。英國樓價後市點睇？如英國樓價重返英國人年收入三點七年，即後市樓價仍再跌30％。索羅斯警告指英國樓價未來跌幅將大於美國（5月英國樓價較4月跌2.5％，係1991年1月Nationalwide Building Society有指數以來最大跌幅，但較一年前只回落4.4％）！

上周貝南奇終於明白，去年9月到今年4月七次減息，不但救唔到美國房地產，反而引發長期通脹預期，令長債息率上升。上周三佢對哈佛大學生發言，跟住西班牙IMF會議上發言，皆證明佢已把注意力再次放回通脹問題。上述因素係上周五美股大跌部分理由；加上失業率上升至5.5％（二十二年內最大升幅），油價亦直指140美元，而且退稅所帶來刺激唔及標普將雷曼兄弟、大摩、美林、法興、瑞銀、瑞信等信用評級降級威力，令費城銀行股指數一下子跌8％。

過去部分人以為可以趁低吸納金融股。請問問D持有Washington Mutual、Nat City、Ambac、MBIA、Wachovia、花旗、美國銀行小股東，證明太早睇好銀行股亦係死罪！

2003至06年美國財長斯諾認為，美國信貸市場漸漸平靜下來，但信貸萎縮期已開始。美國經濟太依賴信貸，長遠而言對美國經濟不利。他唔認為未來美國經濟會出現嚴重衰退，但一段較長低GDP增長期難免，因為美國金融機構需要時間去增加資本（recapitalize）。雷曼兄弟計劃集資50億美元，估計第二季虧損超過20億美元（分析員事前估計只有3億美元）；克萊亦計劃向中東或亞洲地區集資，擔心次按危機開始進入第二階段。大摩股價見41美元，即3月18日低位；JP摩根大通見40美元，即3月17日低位。情況幾令人擔心。

聯儲局傾向加息一方佔上風

今天韓國航空股價跌6.7％、紐西蘭航空股價跌5.1％，因上周航空油價升3.8％，至162.15美元。美國油價已有D瘋瘋癲癲，上周四一度見121.61美元，上周五又升至139.12美元。油價狂升（大摩預測下半年油價可見150美元），擔心6月底聯儲局會宣布加息，因為通脹又再成為頭號敵人。

油價見139美元新高，令道指上周五下跌接近400點。兩位聯儲局政策決策者警告聯儲局快將加息……。貝南奇原先希望透過減息去挽救次按危機，結果卻令通脹肆虐。No pain no gain，世上冇真正不勞而獲呢回事。雖然貝南奇一再否定1970年代到1980年代初期滯脹唔會重演，但食物同能源價格漸漸唔受控制，理由係去年9月聯儲局將美元利率由5.25厘降至2008年4月2厘，令通脹呢頭猛獸有如食大量興奮劑，肆無忌憚進行破壞。今年5月退稅措施更加係火上加油，部分分析員估計美股將出現double-dip，即5月5日完成反彈後，又再次下試今年3月18日低點！

聯儲局政策決策者本應有七位，今年其中兩位退休後，殊仔新委任兩位不獲國會通過，變成依家只有五位，Frederic Mishkin 8月31日退休後更將變成只有四位。Mishkin一直支持貝南奇，佢退出後，決策者中有兩位並唔同意貝南奇黃金歲月論，即日後傾向加息一方將佔上風！

1971年自從美元同黃金價脫後，美國貨幣供應到2005年共上升十倍，美元購買力下跌96％，即今天100美元購買力只相等於1971年4美元！如同1950年比較，美元供應上升三十倍，今天美元購買力較1950年下跌99％，即今天100美元購買力相等於1950年1美元！美元供應上升最快日子係1987年格蛇出任聯儲局主席開始，至今共增加三點六倍！2005年12月28日已出現利率倒掛（即二年期債券孳息率高於十年期），代表未來經濟有問題，但一直冇人相信。2007年8月次按危機後，貝南奇更人為地將短息壓低，典型「殺死信差」行動（殺信差唔代表災難唔會發生）。

油價短期睇好長線看淡

上周聯儲局已批准美國銀行收購Countrywide Financial。6月25日股東大會投票後，7月份相信可成事。分析員認為，美國銀行CEO劉易斯咁早便吸納Countrywide Financial，令美國銀行呢場房產市場低迷環境中出亂子。今年1月傳出美國銀行收購Countrywide消息後，股價至今已經下跌17％。

不但油價狂升，玉米價格亦升上6.63美元一蒲式耳。今年中西部面對太潮濕春季令四百萬公頃農地（佔八千六百萬公頃其中5％）本周決定改種其他穀物，例如大豆而非玉米，令未來玉米供應較估計中減少5％。

上周五石油股繼續急升。2004年高盛分析員Arjun N. Murti曾認為油價可急升，今天佢又點睇？佢認為油價下半年已可見150美元、明年見200美元，然後需求急降令油價又再回落，長線而言甚至可回落到75美元！即油價短期睇好，長期睇淡。

中國鋼管出口美國，將面對反補貼稅615.92％及反傾銷稅85.55％，會否生效？7月14日將決定。中國企業可以提出一次抗辯機會。中國方面認為，鋼鐵產品出口退稅已一降再降，而且政府對呢D產品並冇補貼，所以美國商務部上述宣布為唔合理；中國企業面對上述稅率，只有放棄美國呢個市場（去年中國輸美鋼管共二百二十萬噸）。如7月14日上述決定生效，上述稅率將維持五年！美國商務部調查顯示，中國標準鋼管美國售價較正常售價低69.2％至85.55％，有理由相信只有補貼下才可用上述價格出售產品。如中國政府採取報復行動，中美貿易戰一觸即發。

繼上周美元兌越南盾買入價17900、賣出價18200後，本周一越南央行將官方率訂16832越南盾兌1美元，越南金融業開出買入價16300越南盾、賣出價17000越南盾。交易員流動性非常低，因擔心政府禁止民間進行美元╱越南盾交易，由官方統一辦理。越南金融危機同十年前亞洲金融風暴係咪相似？國泰君安分析師章秀奇認為，越南金融危機唔會及不應影響內地A股市場，唔認為會產生蝴蝶效應。

內銀及內房股容易受傷的股份　　

上證贏富（TopView）指出，上周基金再度淨減持63.91億元滬市A股，出現抄底以來首次全周淨賣出三大板塊有通訊服務、煤炭、鋼鐵，淨買入三大板塊有證券保險、銀行、石油化工。

中國經濟過熱，情況有如吃燒牛肉時侍應話你聽「the plate is hot!」（塊鐵板好熱）。如你一定要沾手而令手指起泡話，閣下自理。油價升上139美元一桶，作為全球第二大石油入口國（中國）又如何應付？更何況銅價過去五年已升460％、小麥價過去兩年升300％、米價過去六個月急升300％！

為冷卻經濟，內地存款準備金率由2007年初9％上調至近期17.5％，即銀行每吸收1億元存款便需將1750萬元凍結央行，央行只付1.89厘息，而吸收存款銀行卻須向存款付4.14厘！呢次一次過宣布上調1個百分點（6月15日調升0.5％、6月25日調升0.5％）。今年4月底已有七家股份制銀行突破存貸比上限75％，令人擔心減印花稅所產生利好缺口性上升亦難保。周二銀行股同地產股成為最易受傷股份。

5月份基金新開戶數目創兩年新低，只有十萬六千八百戶；今年1月至4月新增開戶數目分別為八十一萬五千、三十萬九千、三十二萬九千、十三萬五千戶，明顯減少。

繼陜西及山東省後，湖南省亦宣布對電煤價格進行干預，煤價定5月19日前價格上。至於主要產煤省如山西、河南、蒙古自治區仍未有表示。中國發改委宣布，成立煤、電、油、運領導小組，明確表示嚴打煤炭任意漲價、摻雜等行為，但冇指令地方政府進行價格干預，各省政府決定係各省政府事，與中央無關。中國煤炭運銷協會秘書長楊顯峰亦認為，限價行為唔會推行到全國，不然中國便重返計劃經濟時代，此為政府所唔希望發生。渤海證券分析員認為，陜西、山東省煤產大省，亦係消費大省，上述行為可確保省內市場穩定；反而山西、河南及內蒙古係煤產大省，但唔係消費大省，自然唔會推出限價措施。

廣東廣西電廠缺煤問題惡化　
　
越南煤過去二十多年來一直供應廣東、廣西省發電廠。6月1日起越南取消煤炭邊境貿易，改為國貿，令廣西電廠可能陷入無煤供應局面。去年廣西進口一千四百零四萬噸煤，其中九成以上係中越邊境小額貿易；取消邊貿改為國貿後，可令未來煤價大幅上升。廣西距其他產煤區甚遠，運費高昂，去年廣西從越南進口煤一千三百三十三萬噸，廣東進口越南煤一千四百五十六萬噸。從前係邊貿，由越南運二十多噸煤到廣西，一船便可獲利幾百塊錢；一旦轉為國貿，多關稅及要大批交易，小商人負擔唔起。睇廣西及廣東省今年電廠將面對缺煤影響，廣東仍能從東南亞國家入口，只係成本高D；廣西則麻煩矣。

聽講國家計劃將紡織出口退稅由11％上調13％，服裝出口退稅由11％改為15％，進口紡織機械免除部分關稅，協助中國紡織業度過危機。

基建項目有助GDP增長，有利一個國家經濟走向現代化之路。1840年代英國鐵路佔當年GDP 5％，美國則1920年代建立超級公路網。中國2008至2017年計劃大量投資基建（去年佔GDP 12％，過去五年中國基建項目上投資超過過去中國一百年基建投資），其中又以機場佔最大比重，估計未來十年中國空中旅客數字可上升350％。十年後中國基建方面唔再落後於任何國家，亦代表未來十年原材料需求仍十分大。