2008-06-07

行業盛衰的投資方法

6月6日，周五。恒生指數升146.89，收24402.18；成交586.2億元。6月期指升207點，收24437點。

世界銀行東亞及太平洋區副行長詹如斯．亞當斯認為，依家越南困難不久將來可獲解決。

美國聯儲局宣布，2008年第一季美國家庭手上淨財富減少1.7億美元至55.97萬億美元（2007年第四季減少5300億美元）係2002年第三季開始連續兩季手上財產負增長，其中房屋跌5560億美元，基金跌價3990億美元，金融市場工具跌價1630億美元。物業佔家庭財產總市值46.2％（上季佔47.5％、一年前佔49.9％、五年前佔53％及2001年佔57％）。

MBIA及Ambac不獲三A評級將影響D由上述兩公司擔保三A級債券市值。估計債券有拋售壓力。

中國4月份外儲備1.76萬億美元，係G7外儲備加起來總和，比日本、台灣、南韓同香港加起來仲多。單單4月已增加745億美元（平均每小時1億美元），估計今年至今流入熱錢已高達500億美元。中國境內咁多熱錢，令經濟變得十分唔穩定。

滬深三百指數今天跌0.64％，收3489.5。根據《21世紀經濟報道》指出，國家有關部門正研究電價調整措施，以彌補發電企業損失，緩解夏季用電高峰期緊張局面。依家山東及陜西兩省宣布對電煤價格實施限制，以確保電力企業正常運行，安全度過夏季高峰期。

OECD估計美國2008年GDP增長率得1.2％、歐羅區1.7％，以及日本亦得1.7％。

美政府唔願加息遏通脹

印尼及菲律賓已宣布加息0.25厘。菲律賓5.25厘係近三年內首次加息，因CPI上升9.6％；印尼8.5厘係2005年12月以首次加息，因5月份通脹率10.38％。分析界估計，7月份印尼及馬來西亞將宣布加息，甚至歐羅區7月份亦有加息需要。今天新加坡、中國、香港、台灣、泰國、菲律賓及印尼等國家仲係負利率（利率低過CPI增長率），佢地皆有加息需要，唔係通脹率將長期化。

美國信貸壓碎（credit crunch）係咪3月18日結束？仍未肯定。油價爆炸性上升令人擔心七十年代歷史重演。政府必須對付通脹，如果唔係會逐步演化成政治事件，控制通脹就係加息（例如將利率提升到CPI升幅2厘或以上），只係咁做可引發短期經濟衰退，因此如非必要，政府都唔願咁做！

油價可升幾高？除中國及印度因素外，就係投機因素。其次係OECD國家人民幾時放棄SUV，改豐田Priuses或Mini Coopers；波音787飛機幾時大量取代耗油量大波音747，同埋美國人唔再係攝氏零下24℃時全屋保持攝氏24℃；加上太陽能熱水器普及、風力發電及建築物改用環保玻璃（太陽光熱力90％反射及室內溫暖90％唔會流失）；中國政府只要取消汽油價補貼，估計全國用油量可節省5-10％。5月一億三千萬美國人收到600美元退稅支票，對消費市場開始產生作用，令低價百貨店如Costco Wholesale Corp及沃爾瑪百貨營業額上升。其他如Children's Place Retail Stores Inc及Cache Inc表現不俗。

貝南奇認為，二十一世紀唔會係七十年代石油危機翻版（佢1975年哈佛大學第一個學位），呢點我老曹同意。七十年代打工仔討價能力強，油價同食品價格上升，佢地便要求加薪；2008年打工仔討價能力弱，油價同食品價格上升，打工仔反而驚裁員。1973年石油危機後全球發電廠皆轉用煤、核電或其他（只有少數國家如中東等例外）。美國、歐洲甚至日本經濟亦由以製造業為主轉為服務業，GDP對石油依賴度減少。相反中國同印度正處七十年代美國、歐洲或日本當年處境，受石油影響甚大。七十年代美國加息阻止唔倒CPI上升（因為加幅唔夠大），2007年9月至08年4月減息同樣阻唔倒GDP增長率下降。理由係GDP已連續上升五年，加上依家油價已100美元一桶之上，政府似乎無力令佢跌至100美元以下。

內地房產升勢可期

2008年係重要一年，OECD國家人口大量步入退休期（日本過去好少接受新移民及生育孩子少，1990年起已步入大量退休期）；第二係中國及印度中產階級興起，令食物、能源及金屬供應進入緊張期。七年後OECD國家六十歲以上人口將增加20％或二千三百萬人；相反十四歲以下兒童將減少五百萬。二十年後連發展中國家亦面對同樣問題，即人口老化及新生嬰兒大量減少。2020或2025年起全人類人口將進入停滯不前期。

2008年美國同歐洲經濟是係咪入日本1990年代式經濟？2020年（或2025年起）連中國同印度亦步入上述情況？

日本經濟一向由出口帶動，故1990年起陷入衰退並冇影響其他國家（好少其他國家透過出口產品到日本去維持GDP增長率）。美國同歐洲唔同，尤其是美國係全球最大產品及服務入口國，佢一旦經濟停滯不前，必定影響其他將產品出口到美國國家如中國同印度。

人口老化首先影響係汽車業，例如由家庭汽車改為小型汽車；其次服裝方面減少購買次數；對金融服務需求上升（投資）；地產方面由熱鬧地區搬去較寧靜地區及醫療需求上升等。上述改變1990年起日本出現，2008年起亦美國同歐洲出現；相反中國同印度經濟由過熱期漸漸冷卻落，尤其係中國經濟，正由出口帶動漸漸走向由內需帶動。

2005年人均收入（美元計）：香港係16470美元、中國2402美元、印度459美元、菲律賓1103美元、印尼838美元、柬埔寨840美元及越南531美元。從上述收入數字可睇到中國低工資優勢正漸漸失去。

中國改革開放政策過去三十年，令最少四億中國人脫離貧窮，進入小康。新一代中國人普遍接受良好教育，漸漸令中國中產階級人口大幅上升；情況有如1951年我老曹母親帶我香港（父親早1938年來港做），由於上一代教育水平問題及語言問題（母親死前仍只曉講上海話）；五十及六十年代家境十分貧窮（另一因素係1957年父親爆血管，1960年逝世）。到我老曹中學畢業出社會做七十年代，我老曹屋企生活水平才迅速晉升為中產階級。1978至98年中國人唔係農民就係工人，受良好教育者少；1998年起改革開放後新一代開始加入社會，一如七十年代香港，中產階級在形成中，為香港帶來二十七年經濟高速成長期，即香港黃金三十年（1967至97年）。有人認為，中國黃金三十年由1989年六四事件後開始，至今已完成二十年，即仲有十年黃金期。1998年內地房改政策有如1985年4月1日生效中英聯合聲明，為香港房地產帶來十二年爆炸性上升。去年10月物權法相信為中國鄉村房地產帶來另一段繁榮期。

城市發展三部曲：工廠林立期，人口由鄉村地區向城市轉移，形成城市房地產價格急升。城市人口過分擠逼，加上製造業由全盛期漸漸走向微利期，工廠向郊區轉移，市政府有大量稅收後，大搞基建令交通四通八達，人口亦向近郊擴散，城市變成down town，即提供高消費及購買高級服裝，即賣貴價地方。日常生活所需自己居住星城市已可獲滿足。呢段日子叫做挖空城市期，大量中產階級向近郊轉移；第三階段係金融業興起期，城市變成不夜城（即二十四小時操作），唔少高薪人士又住城市，形成城市屋（town house）及樓頂住宅（pent house）勁貴。香港已進入第三階段，即城市屋及樓頂住宅勁貴期，反觀內地開始進入第二階段，即中產階級大量向近郊外移，所謂挖空城市期（hollow out）。

蘇海文勸外父賣船隊

蘇海文（Helmut Sohmen）接受英國《金融時報》訪問，提到七十年代一個重大決定──就係游說外父包玉剛爵士出售船隊，投資九倉（004）。1980年起包爵士開始將當年全球最大私人船隊（超過二百隻船，大部分係乾貨輪及運油輪，載重二千萬噸）逐步出售，五年內共售出一百四十隻船。上述資金用於購入九倉控制權。

1949年包玉剛由上海來到香港加入會德豐旗下負責航運業務；1955年成立環球船隊公司購入第一隻船；1956年蘇彝士運河宣布關閉令船租狂升，令包玉剛賺第一桶金；1970年蘇海文加入協助包玉剛發展航運業；1980年成功游說外父將手上二百多條船出售。1986年包玉剛退出環球航運公司，因當年航運業已走下坡，由蘇海文接手，結果要到2001年航運業才正式復蘇。前後二十年，集團亦冇錯過機會2000年購入N&T Argonaut（瑞典運海輪公司），2003年再購入Bergesen（運天然氣及乾貨輪公司），依家環球船隊已有一百五十隻船！

蘇海文一生從事航運業。1980年前睇淡航運業，可能只係運氣，但能忍手二十年絕對唔係運氣。2000年起重新睇好航運業，更加唔係運氣。希望大家能從蘇海文身上學曉乜係投資之道。利用一個行業盛衰循環期去壯大自己。