2008-05-31

天下因利分合

　　5月30日，周五。恒生指數升149.13，收24533.12；成交855億元。6月期指低水，升108點，收24460點。中石化（386）升 5.5％，見7.86元；中石油（857）升4.5％，至11.22元；國泰航空（293）升3％，見16.4元；南方航空（1055）升9.7％，至 5.07元；太平洋航運（2343）升7.3％，見13.12元；李寧（2331）跌4.2％，至21.95元。

　　今天下午四時開始收市前競價，令唔少二線股或交投少咗D，而指數成分股响收市前股價皆急升。新制度令股價更易被人為地操控，令一般投資者處境更惡劣。

　　花旗推介電盈（008），估計重組後今年每股獲利25仙，升13.8％，O二十點二倍，目標價5.6元。亦推介冠捷科技（903），估計今年每股獲利 9美仙，升2.4％，O八點一倍。興達國際（1899）今年估計每股可獲利30.5仙，升62.9％，目標價3.25元。

　　滬深三百指數升0.85％，收3611.33。

　　日本失業率升至4％即七個月新高。日本4月份家庭開支跌2.7％，係2006年9月以來最大跌幅，令日圓回落到105.66兌1美元。睇嚟日本經濟仍擺脫唔到1990年起時好時壞嘅狀況。

越南地產商大嗌救命

　　越南股市今天因電腦問題而暫停三個交易天。越股今年跌幅已達55％，响過去連跌十六個交易天，係2003年10月以來最長嘅一次下跌。越南VN指數 2000年開始，2005、06年上升五倍，之後响去年3月12日見頂，便一直回落至今。越南股市一百五十一間上市公司嘅平均O已由去年超過三十倍回落到最近低於十倍。越南5月份CPI升25.2％，令利率升至12厘。惠譽將越南評級由BB-改為負面。今年越南地產發展商已大嗌救命，因為樓價下跌及利率上升，唔少上市地產發展股已大跌80％。部分外資投資者認為越南股市快見底，開始趁低吸納。

　　英國消費信心响5月底跌至鐵娘子1990年離任以來最低，為負29，大部分人認為英國經濟快將陷入衰退。

　　澳元及紐元亦開始回落。澳元成95.49美仙，估計下周可見92.5美仙；紐元成77.93美仙。兩隻貨幣都係日本人利差交易嘅至愛，但响日圓轉弱下齊受影響。

　　銀髮一族大概記得1973年石油禁運後，令OPEC漸漸成為強而有力嘅卡特爾，而第二次石油危機出現係因為伊朗皇朝倒下，兩次都包含政治因素。但呢一次油價高企主要由需求推動，並因此令食物價格亦上升。石油同糧食都係戰略性物資，所有民族都需要，佢地嘅價格變動可以影響好多事物，甚至國家民族興衰。

　　1975年開始糧食價格便一直走下坡（扣除通脹計），令全球農民生活水平下降（穀賤傷農）。八十年代至2000年油價回落，亦令中東國家經濟陷入衰退期。上述情況出現嘅理由係美蘇兩大國冷戰結束，注意力由軍事競賽轉回經濟發展嘅結果。1978年中國改革開放政策到1990年柏林圍牆倒塌，呢場競賽證明資本主義制度鬥贏共產主義制度，全球經濟由二元化重新走向一元化……。直到「九．一一慘劇」發生，民族之間嘅矛盾又再表面化，美國人一直信奉嘅多黨民主政制及單邊主義又再面臨挑戰。金錢與權力結合嘅制度係咪適合全人類？例如中國人便一直認為強大政治及軍事力量才能產生良好嘅經濟效益。中國人常常強調治國才能平天下，長治才能久安；良好嘅政治配合強大嘅軍事力量，才能確保國家經濟繁榮，而非相反。回教國家則認為，宗教係在人生中最重要，甚至可以為宗教放棄生命（聖戰）！今天嘅世界矛盾已唔再係資本主義與共產主義之爭，而係民族間唔同理念隨着「資共」之爭淡化而激化，呢次次按危機更加暴露美國响制度上嘅弱點。

　　如油價長期保持响120美元或以上，可改變全球財富分配情況，財富漸漸由石油入口國流向石油出口國，資源豐富國如巴西、俄羅斯、中東、委內瑞拉，甚至印尼、馬來西亞、尼日利亞等都在興起，其次係製造業中心國家如中國、印度等。反而消費性經濟國家如歐洲同美國將漸漸失去財富……，日本雖然係石油入口國，但同時係重工業國，有得有失。

中俄趨近中美漸遠

　　中國正迅速工業化，但本身缺乏天然資源，當歐美國家經濟陷入低增長環境，產品出口無法加價，面對出口增長率下降，必引發經濟調整，相信已經開始。工廠倒閉最終令失業率上升，情況有D似1973至74年香港或1981至82 年香港面對石油危機時嘅情況。比較幸運係中國喺糧食方面仍自給自足，但面對嘅衝擊仍然唔細，不可掉以輕心。俄羅斯同巴西繼續係受惠者，至於印度面對嘅問題一如1997年前東南亞，印度經濟係繁榮建基於外資流入，一旦外資流走，影響會幾大？歐洲同美國恐怕陷入沒完沒了嘅低增長期，情況有如九十年代嘅日本。至於中東雖然財富增加咗，但政治上唔穩定（回教思想與現代西方思想矛盾在激化中）。

　　天下因利而合，亦因利而分。珍寶島事件後，美、中有共同敵人（蘇聯），因此有尼克遜訪華。鄧小平上台後，美國更立即給予中國最優惠國地位，因美國需要中國廉價產品入口去壓抑八十年代通脹，中國則需要美國呢個市場……。時至今天，中國最需要嘅係原材料而非市場，呢方面俄羅斯可提供，同時俄羅斯亦極之需要中國嘅產品。今天形勢令中、俄走在一起；反之對美國態度漸漸冷淡。美國眼見中國過去三十年嘅經濟成就，但政治上卻唔肯接受美式政治（多黨制民主），已漸漸由愛變恨，改為推銷「中國威脅論」，逼人民幣升值去削弱中國貨嘅出口競爭力，同時扶助多黨制民主國家如印度去牽制中國。世界形勢又再出現微妙變化，即中俄漸漸走近，中美關係則淡化。

　　美國雖然係石油入口國，今天情況同1973年大不同，甚至同1980年亦唔同。今天美國製造業只佔GDP 18.5％、服務業佔80.5％；加上美國係食物出口國，呢次美國不但冇全力壓抑油價，反而協助推高油價（大量美國資金炒高油價，而美國政府則增加戰略油儲及簽訂生物燃料法案）！美國咁做，係因為高油價對中國打擊大於美國！高油價可以拖慢中國GDP增長率，同時可討好中東及俄羅斯。

　　大氣候與小氣候。今天嘅大氣候，已同三十年前鄧小平提出改革開放時大不同。中國點樣喺人民幣升值、原材料漲價及缺乏能源之下，繼續「大國崛起」？香港經濟只維持黃金三十年（1967至97年）；日本多一D，約三十二年（由1957至89年）；中國改革開放三十年後又點？三十年一大變（中國1949年立國，1978年宣布走改革開放路線，前後二十九年）！未來唔一定係過去嘅延續，未來三十年會否一如高盛預測般成為全球最大GDP國？1990年前日本第一論，今天回望得啖笑。西方人相信經濟係S形（即一浪高於一浪），東方人卻相信太極圖（盛極必衰，衰極必盛）。

　　1989年六四事件後人民幣大貶值，直到1994年1月同美元掛鈎。由人民幣貶值所引發嘅出口高增長期會否進入退潮期？

　　過去十年中國經濟係一個唔太規則嘅V形。1997年中國經濟開始進入退潮期，到2002年見底，共五年；2003年起至今已出現五年高增長期，可以講係國家改革開放三十年來增長最快期，每年GDP都有10％以上增長。如今10％ GDP增長率，同改革開放初期唔一樣，因為基數已大咗好多，由2002年12萬億GDP上升到2007年24萬億元人民幣，佔世界比例由2002年 4.4％上升到2007年6.2％（即升幅較全世界更大）。今年中國GDP已居全球第三位，僅次美國同日本。社會消費品零售總額升幅更大，由2003年至今分別每年上升9.1％、12.9％、13.7％及16.8％，今年首季更達到20％（部分因素係CPI上升，誇大咗零售額升幅）。經過五年高速增長後， CPI升幅已經好大；反之，今年第一季GDP增長率10.4％，略低於過去五年平均數 10.6％。中國會否進入增長放緩期？機會好大。以中國2007年GDP達24萬億元人民幣，能繼續保持10％以上嘅年增長率，喺世界上亦少見。依家只有希望未來嘅減速期唔引發太大震盪。

商品價格最後見頂

　　印度政府昨天表示將放寬燃料費管制，相信不久將來中國政府亦會咁做。讓柴油價格升上去，總較貨車日日夜夜排隊等入油好。

　　我老曹入行四十年，睇到嘅事物的確唔少。乜嘢係真確、乜嘢係假象？例如依家到底係石油泡沫抑或係美元危機？如石油真係短缺，咁德國納粹組織响第二次世界大戰期所用嘅油都來自「人造石油」，點解今天唔得？如果係對沖基金嘅傑作，1980年亨特兄弟白銀一役又如何？如果係美元貶值，責任便不在OPEC而係聯儲局，你不能將美元滙價貶低30％後又指摘石油漲價。

　　長期債券孳息率上升，到底反映未來通脹，還是估計未來銀根將收緊？弱勢美元鼓勵投資者找尋「隱藏財富」，形成商品價格上升。一旦美元滙價上升，上述行為便停止，資金又由商品市場流走。美國樓價回落及消費能力在削弱，油價能企响120美元以上幾耐？上兩次油價狂升，油價一旦拋離上升軌兩個標準差（two standard derivations），回落跌幅可達28％，睇吓呢次又如何。

　　美國約七千八百萬戰後嬰兒正踏入退休期（平均每天八千人），令美國房價開始回落，股市亦出現退潮，最終令商品價格回落，並出現長期拋售壓力，而且係有秩序地拾級而回。美國經濟2000年已見頂，2002年 10月至07年10月股市上升只係因為黃金歲月，藉利率下降、美元貶值所製造出來，相信亦已完成，今後進入漫長回落期。最後見頂嘅相信係商品價格，尤其係油價。最近三十年期債券孳息率已由4月低點4.2厘升上4.78厘，各位要小心。

　　■招商銀行（3968）、永隆銀行（096）、TCL（1070）、嘉禾娛樂（1132）、榮康（745）停牌。