2008-06-12

天氣難測人心易測

　　6月11日，周三。恒生指數跌47.92，收23327.60；成交629.1億元。6月期指仍係低水，跌6點，收23215點。華創（291）跌3.2％，收24.2元，係3月27日以來最低；中遠太平洋（1199）跌8.5％，見12.96元。不過，中信金融（183）升8.3％，見6.13元（6月3日停牌至今），因中信集團提出以每股現金1.46元另加一股中信銀行（998）作收購；中信銀行則下跌4.8％，收4.95元。

越南股市進入支持區

　　四十三隻恒指成分股，二十一隻回落、十九隻上升。

　　越南加息2厘，至14厘（銀行貸款利率高達21厘）；五年期債券息率升2.21厘，至19.51厘。越南盾跌2％，見16461兌1美元，市場價係16623.5兌1美元。越南股市連續第二十五天回落，不過370點企穩，估計進入支持區。

　　人民幣繼續上升至6.9184兌1美元，而且速度加快。5月份出口數字證明，人民幣升值對中國貨出口影響唔大。

　　滬深三百指數再跌2.07％，見3140.30。上海證券指數已重返3024點（跌1.57％），正下試4月22日低點2990點，亦即所謂政策底。滬深三百指數去年10月16日起至今已下跌46％，今年內跌幅亦達40％，係世界上最大二十個股市中跌幅最大股市，最小失去13100億美元市值，對實質GDP影響係點？暫時仍唔明顯。

　　最近中國國家外管理局同意將25億美元投放TPG基金，該基金有資產170億美元，乃係私募基金。

　　花旗、美林及瑞銀將須因Ambac及MBIA失去三A地位而為手上債券額外撥備多100億美元。冇Ambac及MBIA兩間公司為部分債券提供三A級擔保，令多達1萬億美元債券失去三A地位，而面對跌價威脅，其中唔少由上述大銀行或大證券行持有。

　　加國央行宣布將注意力由刺激經濟增長轉向對抗通脹，令加元回升至1.022加元兌1美元。估計加拿大9月份加息四分一厘機會好大。去年加元上升17％（因油價升57％），今年回落2.3％，因為美國經濟放緩。美國係加拿大產品最大出口市場。

　　債王格羅斯認為，過去二十五年美國CPI反覆回落期結束，今天世界已變，我地再次進入CPI上升周期。

　　美國精算師協會調查結果顯示，通脹係退休人士最大威脅；尤其食物及燃料真係避無可避。唔少人計劃四十五歲前退休，我老曹一直指為荒謬（除非你身家大把）。過去唔少人認為投資股票每年回報率可達10％至12％，投資債券每年回報率6％，而CPI升幅每年只有3％至5％，因此每年實質回報（扣除通脹）可達6.5％……。試諗，1973年擁有100萬元（當年已算係非常有銀之士），到2008年（如1973年四十五歲退休，今年剛剛好八十歲）今年生活質素如何？同樣理由，今天擁有1000萬元（購買力仍唔及1973年100萬元），現年四十五歲者，三十五年後又點？更何況香港黃金三十年（1967至97年）已結束。1997年投資股票至今十年升幅小於50％，1997年投資住宅樓至今仍較1997年低20％；存款收息更少得可憐，而過去十年CPI升幅平均每年3％……。

貝南奇叫醒隻熊

　　1950至80年美國樓價上升，但收入升幅更大，結果令資產值由負債十四倍到負債八倍。八十年代中期開始美國人收入升幅減慢、利率下降及供樓年期延長，由過去十五年漸漸延長到二十至二十五年甚至三十年。利率下降、供樓年期延長，令更多人可以負擔得起供樓；直到2006年年中，即使低利率、長年期，美國人亦供唔起樓，樓價開始回落，引發次按危機。去年9月至今年4月利率下降雖然對供樓者有些少幫助，但能否阻止美國樓價進一步回落？

　　據美國統計數字，退休後大部分人生活水平都只能維持工作時期70％（即大部分人都要節衣縮食），到去世之前仍唔使為錢而煩惱打工仔只佔退休人口4％（真係好少）！上述說話幾逆耳，但肯定係忠言。

　　Grould Asset Management創辦人Donald Gould認為，呢次通脹上升同七十年代唔同。七十年代係工資推動物價上升，呢次卻係四金磚國（BRIC）需求帶動全球CPI上升。長遠而言，四金磚國股市同地產可睇好。但短期而言，新興市場股市美國債券息率向上時調整幅度亦較大，係高風險、高回報率項目。

　　去年8月貝南奇認為挽救美國樓價較通脹率上升重要，去年9月開始到今年4月佢將利率由5.25厘降至2厘，但美國房屋市場及金融服務業過去九個月仍損失超過5000億美元。上周四開始佢突然認為通脹問題較美國樓價回落更重要，此一改變，令上周五道指急跌接近400點。美股分析員認為貝南奇重新叫醒隻熊（今年3月到5月熊去晏覺）。

　　根據康狄夫理論，經濟完成三十年黃金期之後，通常有十至十五年高原期，然後係十年回落期。1997年至今香港經濟就係處於高原期（上上落落），2008年開始係咪進入回落期？

見底前必然見血

　　在投資策略上，我老曹係陰陽學說支持者（即太極圖）。所謂陽盛極必衰，陰衰極必盛。任何項目見底前必須流少少血、流大量汗及大部分人感到恐懼。任何項目都係what goes up must come down and not the vice versa！1989年6月5日北京滿街鮮血，我老曹卻認為係港股入市良機，曾被已故泰盛主席香大俠來電大鬧我老曹「冇血性」！作為一個人，面對六四事件，的確應該痛心疾首；但作為一個投資者（或投機者），則係入市良機。1997年7月大部分港人敲鑼打鼓迎主權回歸時，我老曹居然賣掉香港樓改為投資英國物業……理由係我老曹乃陰陽學說支持者，見到香港盛極而衰。資本主義制度下社會從來很殘酷：一場森林大火將美麗景色盡毀，變成一片焦土，然後又焦土上由已死大樹留下種子萌芽，十年八載後又再大樹成蔭。生生死死循環不息，直到永遠。油價推上139美元一桶令人感到恐懼、流汗，部分國家甚至出現流血場面，係咪森林大火？我老曹木宰羊。1999年一桶石油只值10美元，當年有邊個相信油價可見100美元，更何況139美元？今天應否利用高油價去減持石油股？我老曹已冇資格畀意見，因為我老曹自油價高見100美元一桶後，已放棄分析油價矣。

大西洋颶風季節或左右油價

　　又到大西洋區颶風季節。上周五我老曹同天文台台長林超英腳（佢話佢正在放假，近日天氣預測係咪準確同佢無關也）。上佢認為，「天氣易測，人心難測！」我老曹睇法剛剛相反，認為「天氣難測，人心易測」（例如群眾心理，我老曹經常把握得幾好，去年10月股市見頂又一次睇中）。本周開始進入大西洋颶風季節，有多少個風會對墨西哥灣及加勒比海上石油設施造成破壞？去年美國認真好彩，十五個颶風中只有一個叫Humberto造成輕微破壞；但墨西哥便慘情，受五個颶風吹襲。甚至古巴、多明尼加及加拿大亦受颶風影響。今年又點？智利Chaiten火山爆發，對今年南美洲天氣影響十分大，亦會影響墨西哥灣石油設施及南、北美洲農產品。

　　人人皆話地球在暖化，但近年香港天氣卻反常，例如今年扒龍舟日，氣溫仍只係攝氏二十多度，幾涼爽。

　　古時人類畏天，今時今日唔少人以為人定勝天。睇睇近日大自然威力，原來人真係好渺小。我地不但冇能力阻止地震出現，連預測佢幾時出現能力都冇。有雷達、人造衛星後，或可預知颶風幾時到來，但現代科技對颶風所行軌卻無法預測。反而我母親出身農家，有幾招都幾威。例如「冬至那天下雨，年初一便晴」（大家睇靈唔靈）。如今年中秋熱死人，明年夏天唔太熱；如今年中秋涼如水，明年夏天熱死人。如果春天多雨水，便多種棉花少種穀（因為夏季較乾燥）。如果春天少雨水，便多種稻米少種棉（因夏季較濕）。民間智慧真係唔可以睇小也。

　　中國家具流通領域經十多年運作，已形成東西南北四大銷售中心同三個等級。呢四大中心係廣東樂從、河北香河、江蘇蠡口及成都武侯。廣東樂從總面積三百萬方米，年銷300億元人民幣，70％出口；江蘇蠡口總面積一百二十萬方米，年銷80億元人民幣；河北香河總面積一百二十萬方米，年銷60億元；成都武侯總面積一百萬方米，年銷60億元。

　　第二等級係面積十萬至八十萬方米銷售中心，分布全國二三級城市。如南京金盛五十萬方米、浙江義烏六十三萬方米、福建安南七十萬方米、上海國際家具村七十五萬方米、武漢金海馬八十萬方米、重慶巴南八十萬方米。

　　第三等級係十萬方米以下大賣場。例如上海金海馬就開十家十萬方米以下大賣場。

判斷房價合理與否看上漲成因　　家全國大、中、小家具賣場面積超過四千萬方米，按一萬方米年銷1億元計，依家全國家具賣場二千萬方米就足夠，即過剩近50％。出現咁多家具賣場，部分理由係地產商炒地皮現象，買入後以經營家具賣場為名、博樓價上升為實。賣家具蝕本，但樓價升值卻賺大錢！例如2006年內地家具市場銷售下降35％．但上海、北京一帶家具大賣場卻愈開愈多，其中相當一部分在炒房地產。去年樓價唔再上漲，估計全國家具賣場30％蝕本經營。

　　以廣東省為例，2006年家具產值1280億元，490億元出口了，500億元廣東家具市場出售了，仍有200幾億元尋求市場。如今廣東家具賣全國機會亦低，因為江浙、四川家具紛紛崛起，不但佔據本銷市場，亦度爭出口及入侵廣東省。

　　樓價不升反跌2008年，中國家具市場已進入火併期，有D商場掛出「誰家比我賤，差價雙倍還」口號！估計今年經營家具者60％蝕本，有D更係兩頭蝕（即經營家具蝕本，大賣場樓價下跌亦蝕價）。

　　判斷一個城市房價係咪合理，主要睇上漲成因，而非漲幅多少。如果只因居民收入上升刺激樓價上升，因購買數量十分有限，房價上升比較緩慢，唔會造成房價突然狂升。樓價急升大部分係外來資金，外來資金又分投資性、消費性及投機性。例如北京、上海、深圳等大城市，外來資金充足，即使一部分熱錢撤走，影響亦唔大，因為投資性及消費性資金可迅速填補呢片空白。反之，二三線城市情況則唔一樣，去年開始湧入二三線城市房地產資金以投機性為主，樓價在大量資金湧入下急升，但缺乏投資性及消費性資金支持，一旦冷卻下來，當地人唔肯（或冇能力）高價接貨，情況便令人擔心。

　　作為港人進軍中國房地產市場，應該以一線城市為主，二線已經好勉強；至於三線除非閣下十分了解，不然易買難賣，好容易一下子被套住。