2008-04-22

寄望救市屬病態

　　4月21日，周一。恒生指數升523.89，收24721.67；成交813.95億元。4月期指升386點，見24618點。

A股已元氣大傷

　　中國證監會宣布「上市公司解除限售存量股份轉讓指導意見」，未來一個月內，賣出超過1%限售股份要到大宗交易平台轉讓；但A股元氣已大傷，滬深三百指數跌4.95，收3267.55。

　　花旗推介洛陽鉬業（3993），估計今年每股獲利71.9仙，升43.7%，目標價9.1元；雅居樂（3383）今年每股獲利79.9仙，升28%，目標價11.38元；東方海外（316）今年每股獲利57美仙，減少86.1%，O九點七倍，目標價60元。

　　豐銀行認為，亞太區股市由今年3月低點至今反彈幅度已多出15%，但仍然相信係熊市，因為今年每股純利估計較去年下降4%；其次係熊市中反彈如超過15%，通常反彈市已完成，因此建議減持。

　　美元價亦唔見得好，成1.5834兌1歐羅、103.75日圓兌1美元。估計美元仍會回落到1.62到1.63兌1歐羅，才止跌回升。

　　《廣州日報》報道，上世紀日本股市由1989年12月38915點回落到1992年8月14309點，跌幅高過63%，日本政府決定救市，令日經平均指數一度重返20000點以上。依家睇，證明好難用政策力挽狂瀾。日經平均指數雖然由14000點重返20000點，但日本房價回落，銀行融資都以土地為擔保，因此出現壞賬呆賬，其後銀行收縮貸款，令地價進一步回落，結果擾攘十年，到2003年日本經濟才見底。

資金持續流出中國股市

　　股市回落後，日本國民資產管理方式更偏向儲蓄，寧可冇利息，亦以保住本金為主。依家中國股民從一夜暴富到突然破產，呢種資產效應出現一百八十度轉變，好容易形成惡性循環。

　　當然冇人認為2008年中國等於1992年日本，如今中國股市暴跌原因同當年日本股市暴跌原因有D相似，亦有好多地方唔同，但起因都跟美國經濟出現衰退（或軟陸）有關。股災未出現前，兩者皆面對「信貸創新」被濫用。依家中國較1990年代日本優勝地方係，中國仍未實現「資本專案」可兌換，即外資金流入中國易、流出中國難。

　　大摩認為，中國證監會救市方案，除安撫投資者情緒外，冇乜實質支持。

　　花旗指出，上周中國基金淨流出4.21億美元（第二係南韓淨流出1.46億美元），台灣資金淨流入2.02億美元。睇資金仍在離開中國股票市場。

　　家中國有股民一億三千萬，或佔城市人口22％。A股指數較去年10月已跌50％，近日內地電視台財經節目內專家最熱門討論係政府救唔救市？A股股民只寄望政府救市，係咪幾病態？擔心內地A股跌市仲未完成。

　　呢幾天回國參觀昆山及蘇州工業園，建得美輪美奐，同外國任何工業園比較毫不失色。只係今年中國實施勞動合同法，維護勞動者權益，亦加重企業勞工成本；內地土地價格亦升唔少，外資稅務優惠按年減少（五年內同內資睇齊），油價高企亦令運費上升，公路亂收費情況未見改善；再加上政府對各類資源開徵和提高資源稅，並減少或取消出口退稅，人民幣升值壓力則加大。中國製造業早已進入高成本時代！

　　中國改革開放三十年，靠係三廉政策（廉價勞動力、廉價土地再加上廉價資源），先至獲得世界工廠美譽。依家一下子推行三高政策（高勞動成本、高地價及高資源價），內地人擔心今天美輪美奐蘇州工業區及昆山，會否變成1992年台灣新竹園（往日亞洲四小龍之一，變成明天亞洲小蟲！）？

　　經濟學博士傅勇《上海證券報》提出，中國可以承受出口長時間萎縮嗎？出口業係中國經濟近三十年起飛最主要引擎，出口佔中國GDP比重接近40％，貿易依存度（進出口之和與GDP之比）接近70％；呢兩個數字較1992年台灣仲高。台灣失去出口呢個帶動經濟上升引擎後，過去十五年客氣D講係經濟停滯不前，唔客氣D講就係倒退。上述情況單單只係阿扁引起咩？1992年邊個執政？

　　香港1980年起出口製造業內移，其後香港經濟成功由內需帶動轉為服務中國金融中心，但台灣出口工業1992年起移去長三角後，台灣卻不能由內需取代出口（日本亦一樣），而令過去十五年經濟停滯不前。未來中國經濟到底係另一個香港抑或係另一個台灣？

　　農產品漲價，農民得益有幾多？中國農業部組成調研組，赴北京、山東、河北、黑龍江、吉林、河南、湖南、廣東、海南等九省市研究糧食、副產品、蔬菜三大類九個品種，由「生產→收購→加工→運輸→批發→零售」各環節全程跟蹤。一斤油菜山東省聊城市東昌俯收購價每斤4角，較去年上升60％；今年生產成本3.51角，較去年上升50.6％（二銨每袋由140元漲到230元，有機肥由每斤75元漲至100元）；農民每斤油菜獲利4.9仙，較去年僅多賺0.3仙！呢斤油菜到北京超市可以賣2.2元一斤，唔好以為中間剝削，理由只係運費上升。由山東聊城到北京批發市場每斤油菜運輸成本8.3仙，因油價上升，過橋費、路費亦上升，令運輸成本大增。北京新發地批發市場以每斤7角批出，再運到超市；運費加上超市租金上升，超市利潤亦只較去年微升。

　　一頭豬去年生產成本1005.76元人民幣，今年1532.98元，再加上運費，即成本共升52.4％。肉價上升60％，豬農收入亦唔見得大好，會否刺激豬肉供應大升？仍未肯定。

　　鐵道部副部長盧春房宣布由北京南站到上海虹橋站，雙線鐵路全長一千三百一十八公里，係世界上一次建成線路中最長高速鐵路，共二十一個車站，時速三百五十公里，每年單向運輸能力八千萬人次，總投資2209.4億元。所經過七個省市，人口佔全國四分一，GDP佔全國40%。

　　上海（尤其浦東）仍係地盤處處，無論周六或周日，仍在二十四小時趕工（建築工人分兩班制）。我老曹冇返上海半年，又多唔少高樓大廈。隨上海地鐵建成，物業向浦東全面擴散，最普遍住宅單位係一百平方米，賣160萬元人民幣，由男女雙方家長各付20萬元（合共80萬元），另向銀行貸款80萬元，餘款由新婚男女負擔，供樓利息每月7000元。如以男女雙方各賺1萬元計，供完樓交完水電費、交通費等，已唔見1萬元，而內地入息稅25％（一年5000元），兩夫婦每月只用5000元生活，即一個住宅單位由六人負擔（男女雙方家長加埋新婚夫婦），上述情況可維持幾耐？木宰羊。一般情況下，雙方父母早已獲「分房」，所以唔使子女養，亦唔同子女住。內地樓價近年可以高漲，理由係受惠於一孩政策。

14%英國業主料成負資產　　深圳新房降價潮再起。例如南山區鼎太風華六期六百零六套單位，去年平均售價1.3萬元平方米，今年推出「特價房」，平均每平方米9088至10088元。福田區景田片區華盛領寓，去年推售價16000元一平方米，今年推出「特價房」13000元一平方米。「特價房」用料方面唔及去年，兩者不能直接比較，但同一個樓盤，售價以每平方米計的確平好多。

　　《新聞晨報》報道，今年3月31日止，國家稅局統計全國去年收入12萬元人民幣以上共二百一十二萬六千七百八十六人。其中以上海最多，達一百六十三萬；深圳第二，共三十四萬七千人；北京第三，共三十四萬一千人。全國平均工資24932元，較去年升18.7％。上海十個打工仔中便有一個係月入1萬元人民幣以上。今天上海人都幾富有。

　　英國係全球第五大經濟體系，大摩估計已有14％英國業主成為負資產，估計到明年底英國樓價再跌15％。睇全球信貸壓縮仍在進行中，並由美國擴散到英國及歐洲。英倫銀行呢次出手作用有幾大？英倫銀行發500億英鎊政府債券，交換D低信用評級按揭證券，減少英國金融市場信貸收緊壓力。英國樓價3月份較2月回落2.5％，4月份進一步回落（我老曹倫敦仍有一個單位至今未賣出，已較去年9月高價減10％，仍搵唔到真正買家）。

國內地下錢莊水緊

　　中國人行上調存款準備金率0.5％，至16％。《上海證券報》調查發現，民間借貸已十分緊張，利率不斷飆漲，浙江溫州地下錢莊首當其衝。依家借款一個到兩個月月息10厘，借一年到兩年年息20厘左右，兩年以上要看雙方關係同信譽而定；其次睇銀碼幾大而定。500萬元以下20厘仍可借到，1億元以上有人出價36厘！貸款戶通常都係地產開發商。由此可見，地下錢莊幾咁水緊！

　　我老曹近日從內地學番順口溜：結婚是錯誤，離婚是覺悟，離婚後再結婚是執迷不誤！