2008-04-03

吻別250天線？

4月2日，周三。恒生指數一度見24195.32，略高於250天線。响熊市二期，呢種情況叫做「Kiss me good-bye」，通常响確認熊市後（例如出現死亡交叉點後），股市不跌反升，反彈市最高可接近或略破250天線。今天恒指係咪同250天線吻別？事後才知道。但收市指數只有23872點，只升734.97；成交1146億元。4月期指更只升571點，收23801點低水。投資者宜小心。

　　滬深三百指數跌0.97％，收3547.98。大秦鐵路跌停，因市場猜測內地運輸需求將下降。寶鋼亦跌至八個多月來最低，市場擔心建築活動將減少。

太早睇好亦係死罪

　　瑞銀宣布撥備180億美元及集資150億美元；德銀宣布撥備39億美元。有人認為次按危機到此已見底，引發道指狂升（尤其係金融股）。今天瑞銀市值只有680億美元，可能成為別人收購對象，亦係股價急升嘅理由。高盛分析員William Tanona估計，花旗將進一步撥備120億美元、美林再撥備20億美元，兩間企業亦需集資，新一輪撥備又再開始。至於係咪黎明前嘅黑暗？依家言之尚早。危機往往响過去後才知係咪已結束，一如去年10月牛市要到今年3月才知道已結束一樣。

　　淡市莫估底，1999年才子蕭若元兄當年認為1998年8月係香港經濟低潮，因此決定大舉投資，點知2000年科網股爆破……。今天人人皆知2003年第二季先至係香港經濟低潮，蕭兄1999年開始全力擴充，卻遇上2003年低潮，損失慘重，今天旗下上市公司總市值已好細。九十年代亦有唔少朋友估日經平均指數見底而去日本投資。今天人人知道日經平均指數响2003年4月才見底，九十年代投資日股嘅朋友，不但錯過1990至97年香港經濟狂潮，亦錯過1997至2007年英國十年房地產狂潮。2006年有朋友邀請我老曹去東京投資房地產，才想起某君點解十幾年冇見？原來早已失去聯絡。

　　去年年初唔少人認為內地A股係泡沫，我老曹曾經寫過：「太早睇淡係死罪」。今天人人知道A股牛市响去年10月16日才結束（如你响去年1月已睇淡，係咪錯過好多？）今天應該講：太早睇好可能亦係死罪！

救市成聯儲局責任一部分

　　瑞銀推介滙源果汁（1886）、華潤創業（291）、武夷藥業（1889）及香格里拉（069）。滙源果汁估計今年每股獲利29仙，未來股價升幅可達49.2％；華潤創業估計今年每股獲利93仙，O二十七倍，未來股價升幅可達24％。武夷藥業今年每股獲利14仙，未來O八點二倍，未來股價升幅可達32.3％。香格里拉估計今年每股獲利87仙，O二十八點九倍，未來股價升幅有11.1％。

　　花旗推介信義玻璃（868）、美蘭機場（357）、華潤電力（836）及敏實集團（425）。信義玻璃今年估計每股獲利57仙，升40.2％，O九點五倍，目標價10.3元。美蘭機場今年每股獲利53.8仙，升83.5％，O十三點五倍，目標價11.15元。華潤電力今年每股獲利93仙，上升19.6％，O十六點四倍，目標價23元。敏實集團今年每股獲利53.9仙，升34％，O十三點二倍，目標價10元。

　　美國財長提出改革聯儲局嘅方案，其實1987年10月股災後格蛇早已經做咗，依家只係將上述行動納入聯儲局監管範圍而已，即穩定市場已成為聯儲局責任嘅一部分，例如提供資金畀JP摩根大通協助收購貝爾斯登。1930年代起至今，聯儲局直接參與私人機構提供290億美元資金，目的係穩定市場，同格蛇唔同，格蛇係向市場直接注入資金，去應付1987年股災、1998年長期資本管理倒閉及2001年科網股泡沫爆破，並無新意。

　　觀察美股係咪見底另一方法，就係美國人近年生活係入不敷支（將物業加按借錢消費），如股市見底，則代表美國人進入收支相抵期。要出現上述情況，除非：一、美國人收入急升；二、物價大幅回落。依家兩者皆未出現，因此3月18日見底論冇乜基礎因素支持。

　　金融業仍面對大量撥備，美國GDP第二季極有可能出現負增長，但股市技術走勢進入超賣局面；博反彈需要好大勇氣。

　　香港熊市二期第一隻腳，由3月18日恒指20572.92上升至今天略破250天線24122點，理論上反彈已近尾聲。道指仍距離200天線13154點有500點，唔排除美股有條件進一步上升，亦唔排除港股有overshoot現象。不過，如閣下相信家吓係熊市二期，一旦見恒指响24000 點以上係可以減持；反之，如閣下認為熊市响3月18日完成（因恒指同RSI背馳），當然仍可繼續睇好。我老曹傾向相信熊市第二期論，但任何人都可以睇錯市；森池兄則支持3月18日熊市見底論。君子和而不同，我老曹同森池兄磨嘴已有三十多年歷史，見解可以分歧，但從不影響彼此間嘅友誼。最後市場會證明其中一方睇啱及睇錯，然後某方立即修正，呢D叫做摸着石頭過河。世上無先知，我老曹亦從來唔扮先知；世上最後一個先知係施洗約翰，响為耶穌洗禮後，世上再無真先知（假先知則多如恆河之沙）。

　　由1952年第四季至今，美股回落期有短至一季，亦有長至十三季，平均數係五季；跌幅最小11％、最大54％，平均跌幅25％。呢次由去年10月開始嘅熊市又點樣演繹？3月18日係熊市結束抑或熊市二期反彈？

　　港股1月22日及3月18日兩隻熊腳皆強而有力，確認長方形走勢形成；1月22日至今最強而有力嘅股份係電力股如港燈（006）、中電（002）及長江基建（1038），不過近日股價已在尋頂。至於3月18日反彈，金融股表現不俗，到底係之前跌得太重還是次按危機見底？仍未清晰。貝爾斯登事件證明過分利用槓桿比率者，企業資本可以一夜之間消失，由此引發嘅「反槓桿」（de-leverage）行動需時幾耐？聯儲局嘅責任唔係托市，而係讓「反槓桿」行為有秩序地進行。只係如此一來，市場流動性必然減少。過去因泡沫化而被推高嘅股價、樓價甚至油價、金價，都會一個隨一個泡沫爆破。我老曹十分相信金價泡沫已响3月份爆破！

「起點平等」的機會

　　阿當史密斯The Theory of Moral Sentiments（1759年出版）早已強調，社會如過分羨慕甚至崇拜有錢人及有權勢嘅人，而鄙視或忽略窮人，最後社會一定走向混亂甚至傾覆！六十年代香港社會貧窮，嗰陣時強調發達係有社會需要。1997年香港經濟已進入富裕社會，係咪應該強調社會和諧，不讓20╱80情況進一步兩極化？中國亦一樣，响1978年係一窮二白，先讓部分人富起來係社會需要；三十年改革開放後嘅中國，應追求公平、公正、公義，以社會和諧為發展大前提，因此而令GDP增長率慢一D亦值得。經濟繁榮嘅成果應讓社會上絕大部分人分享得到，而非只局限20％人口。我地不應追求「終點平等」（因每個人資質唔同），但社會應提供「起點平等」嘅機會，讓每個孩子「起步」時接近一樣，先至係阿當史密斯嘅精神，亦係資本主義最高境界。資本主義精神唔係剝削廉價勞工，反過來係協助社會上人人可以過舒適生活。次按危機爆發後，全球資本家應開始反思：財富到底有乜意義?!不然人類社會如何由實質（tangible）走向虛擬（intangible）？金融市場發生嘅事，遲早影響實質經濟活動，只係兩者有時差。

　　過去十二個月金融市場情況係，如果你投資方向正確，你可以賺取巨利（例如回報係資本一倍或以上）；如果你方向錯誤而唔及時止蝕，損失亦可以好巨大，例如8月至10月股市狂升、11月到1月嘅暴跌，例如今年首季金價同油價狂升，以及3月17日後金價暴跌。

　　金融市場方向改變嘅速度之快有如電光火石，已非普通人可以適應。今天响金融市場投資必須射中牛眼，再唔係長線持有。

　　點樣運籌帷幄、決勝千里？《論戰》一書可以幫到你，例如點樣制訂投資策略、點樣攻守有據、幾時進軍、幾時撤退。該書寫於農曆新年，並喺3月付印；復活節前面世，兩星期內銷出一萬多本，成為全港最暢銷嘅金融書。該書由加拿大回港度假嘅妹妹負責校對，佢話呢本書連唔懂金融嘅人都睇得懂，佢誠意向唔懂金融嘅人推介。

台灣困局不能只怪民進黨

　　今年首季中國响工廠及基建項目投資方面進入放緩期，內地地產發展商亦開始面對財政壓力，因為滬深A股由去年10月至今已回落46％，中國出口增長率出現近五年內首次低於20％，加上原材料價格急升、工資成本急升，以及出口退稅減少或取消、環保法例收緊等，都令中國內地無論輕、重工業嘅壓力均在上升。

　　如人民幣加快升值，中國經濟不得不加快轉型──由過去三十年一直以來由出口帶動改為內需帶動，情況有如八十年代香港。所不同者係八十年代香港巧遇中國改革開放政策，令香港經濟轉型咁成功，係世上僅見；反觀1992年至今嘅台灣面對製造業大量移向長三角，但內需卻冇大幅增長，呢次復活節台灣之行，睇到台灣經濟幾令我老曹失望。今天台灣經濟困局不能只怪民進黨，能否因馬英九上台而完全改變？我老曹並唔樂觀。

　　美國商業部宣布2月份建造業下跌0.3％，其中住宅部分更下跌0.9％，係2006年3月以來連續二十四個月回落；總建築開支年率達1.12萬億美元（私人佔8266億美元，政府佔2949億美元）。睇嚟美國第一季GDP增長率將不足1％。

　　擒晚道指上升3.2％或391.47，納指升3.7％或83.65，標普指數升3.6％或47.48。其中金融項目升幅最大，達7％；瑞銀升14.6％（壞消息入貨？）、雷曼兄弟更升17.8％、花旗升11.3％、高盛升6.9％，係咪April Fool嘅惡作劇？美國各銀行開始公布今年第一季次按虧損，部分可能會減少派息甚至唔派息。呢次升市係次按風暴已經過去抑或係風眼？事後才知道。

　　世界銀行調低今年東亞發展國家GDP增長率1-2個百分點，降至8.5％（去年為10.2％）。中國係持有次按債券最多嘅東亞國家，估計高達2600億美元，相信唔少仍然未正式公布。

港人怕租貴多過怕米貴

　　奧運會之後，中國基礎設施支出將放緩，相關活動退潮，中國GDP增長率進入減速期（部分已喺奧運會前出現）。例如為咗減少北京污染，周邊地區唔少工廠被停工或搬遷，燃煤發電廠、水泥廠同化工廠今年7月起將關閉，直到奧運結束為止。北京及東北地區工業產出佔全國總產出30％，上述行動令中國出現「奧運會前效應」，即唔使等奧運會結束，中國經濟增長速度已進入放緩期，可能對全球商品市場構成通縮衝擊，例如觸發全球商品價格突然下跌嘅情況；中國政府希望8月8 日奧運會開幕前淨化全國空氣。

　　各位要小心今年中國GDP增長率可能出現「突然減速」嘅現象。

　　港九粉麵製造業總商會名譽會長李廣林估計，未來兩個月米價將大漲30％。過去一年全球米價上升咗一倍，香港部分居民已開始囤積。

　　根據政府數字，香港月入15000元以下嘅家庭，花响食物（唔包括出外用膳）只佔總支出12％，即每月1250元，大部分係買餸錢。至於月入5萬元以下嘅家庭，花响食物（唔包括出外用膳）只佔總支出6.5％，約3250元。至於花响食米方面更係微不足道。好坦白講，我老曹的確唔知白米賣幾錢斤（反而恒生指數每天升降卻知道）。响酒樓叫白飯經常遲遲都冇，因為酒樓白飯只賣15元一碗，反而蝦餃賣32元一籠。你叫一碗白飯，酒樓伙記唔得閒招呼你，如唔係去慣嘅酒樓，我老曹經常冇飯食（例如叫咗白飯一碗，半小時仍未送到，為咗趕返工只有唔食）。今時今日港人已經唔怕米貴、只怕運滯，日常開支中最大一項支出係租金，絕對唔係白米。