2008-04-25

陳寶珠嚟喇！

4月24日，周四。恒生指數升391.54，收25680.78；成交一千三百零二億五千七百多萬元。4月期指升339點，收25618點；5月期指升347點，收25474點，大低水。

　　滬深A股升9.29%，收3774.50；人民幣升至6.9837兌1美元，一年期合約成6.337兌1美元。米價再創新高，睇嚟全球糧食危機仍在不斷惡化。

　　後市展望相信，仍離唔開熊市二期大反彈。

　　去年12月奧瑪仕（959）願意提供大豪客營業額1.35％作為回佣，引發賭場間激烈競爭，因為VIP客戶增長率追唔上澳門賭場增幅。今年賭場間早已爆發回佣戰，明年情況估計進一步惡化，雖然政府已宣布暫停批出新賭場經營。澳門賭場股早响去年大幅滑落，例如新濠國際（200）、銀河娛樂（027）等。

澳門賭業不如房地產

　　澳門賭業30％收入來自公眾，但提供60％ EBITDA，因邊際利潤較VIP客戶大四倍。今年第一季公眾市場營業額急升36％；反之，VIP客戶方面，銀河娛樂為搶大客，願將收益45％分畀掮客，而非其他賭場般將營業額1.3％至1.4％作為回佣。VIP客戶邊際利潤已由去年14％降至依家8％，賭場扣除開支後，擔心已無利可圖。雖然新賭場興建已暫停批出，但情況到明年仍會進一步惡化。反而澳門房地產卻因大量賭場落成導致需求上升，估計需求每年達八千到九千個，落成量每年只有五千個，即2010年前供應仍緊張。大摩認為，投資澳門賭場股不如吸納保利達（208）或信德（242），相信更能受惠；賭場股要到2010 年才再睇好。

　　瑞銀估計，今年全球新船訂單減少33％，明年再減少17％，2010年航運市場進入供求平衡期，相信造船股純利高潮响去年。其中乾貨輪訂單估計今年減少50％、明年再減少23％；反而貨櫃輪訂單仍可上升8％，而LNGC（天然氣運載輪）訂單仍看俏。基於中國造船業成本最便宜，影響應唔及新加坡、南韓等大；但由於技術差距，中國船廠又以乾貨輪訂單為主，瑞銀估計今年鐵礦石價格將上升65％，再加上煤價上升，令全球造船業面對材料大漲價。

　　花旗推介內房股如合生創展（754）、合景泰富（1813）等，估計今年第二季內地房地產價格進入反彈期，因鋼鐵價格同勞工成本上升及政府出面救股市，將有利內地房地產；加上家吓內房股價已低於NAV好多，例如合生創展低NAV 48％、合景泰富低37％、深圳控股（604）低52％。另推介方興地產（817），估計今年每股獲利26仙，升79.8％，目標價5.39元。

　　瑞銀亦認為內地樓價進入止跌回升期，雖然估計升幅有限，但亦推介內房股。卻擔心香港通脹率進一步惡化將蠶食港人收入加幅。雖然香港進入類似1990至 97年嘅負利率期（即CPI升幅大於利率），但與1990至97年唔同係本港亦進入負收入期（1990至97年港人薪金升幅跑贏CPI升幅，但2008年卻跑輸CPI升幅）。

內地分析員繼續揣摩上意

　　美國截至4月18日止呢個星期申請樓按者減少14.2％，令指數回落至637.6，理由係三十年期樓按貸款利率微升0.3％，至6.04厘。按揭銀行家協會購買指數跌6.4％，至357.3；再按揭申請減少 20.2％，指數見2286.3。由聯邦住房管理局製作嘅買樓申請貸款指數跌2.7％，見216.6。美國全國房地產經紀協會指出，3月份二手樓買賣減少 2％，至年率四百九十三萬個單位（2月份係五百零三萬個）。一連串數字話畀大家知，美國樓市將繼續放緩，4月30日美國可能再減息四分一厘。

　　4月24日起內地股票交易印花稅率由千分之三減至千分之一。消息未公布，滬深A股已連升兩天，今天升幅更加不得了。內地再一次以政策指導股市方向，令內地股票分析員繼續猜測領導嘅意思，而非分析客觀因素。中國股票市場幾時才擺脫政策市？

　　人生大概分為三個階段：一、長肉不長腦期，從嬰兒到十九歲（英語叫Teen age），大部分人呢段日子都係四肢發達、頭腦簡單。二、吸收知識時段，例如二十歲到二十五歲（有D人到二十八歲）。呢段日子再唔係老師教乜、自己學乜，而係憑自己興趣有系統地吸收知識，唔少人進入大學開始選科，決定將來人生之路；唔入大學者亦開始選擇自己嘅職業。人嘅一生好多時便响二十歲到二十五歲呢段日子（部分人到二十八歲）決定。有D人選擇成為專業人士，有D人從商，有D人喜歡做公務員，總之各適其適……。呢段時期開始形成自己獨特嘅見解，有自己嘅世界觀同人生觀。三、早熟者二十五歲、遲熟者二十八歲便進入思想型，部分人離開學校進入社會做事，之後往往停止學習，即使學習都傾向機械式學習，即照搬照抄而唔思考，只有小部分人繼續成長，有D成為政治家、學者、企業家，成為各行各業嘅精英，推動整個社會甚至國家向前。

　　經濟何嘗唔係咁？第一發展期出賣體力為主，形成農業社會。大部分人知識水平低，依靠出賣勞動力搵兩餐。中國經濟停留响呢段日子幾千年，直到1978年鄧小平提出改革開放政策後才進入第二階段，即吸收知識期，技術、知識產權由外國引進，別人教乜嘢，我地就學乜嘢，大量人口轉型為工人，工廠卻係OEM（照訂單生產）。第二階段相較農業嘅生產力大約可提升十倍，响經濟學上叫做「起飛期」，喺歐洲同美國大約可維持一百年，喺日本只維持四十五年（1945至1990年），相信中國亦唔例外，即由1978年起計响2023年前見頂。至於能否進入第三階段，即透過創新去保持經濟繁榮，不但响產品上創新，亦要服務上創新、思想上創新，今天西方經濟就在此階段。反觀日本1990年至今似乎仍無法進入第三階段，理由係過去幾十年經濟發展皆由政府指導。

政府扮大俠必獲掌聲

　　國務院呢次救市決定，令人擔心中國未來經濟發展點樣由吸收知識型經濟進入以知識產權為本嘅經濟？東方國家經濟發展、由農業社會進入來料加工嘅OEM型工業十分順利，但進入技術創新、擁有自己知識產權型工業卻困難（或叫做後工業時代），因為大部分人都喜歡照辦煮碗，唔想深思熟慮。

　　兒時睇粵語殘片，石堅叔經常扮壞人蝦蝦霸霸，陳寶珠則扮大俠，每到危急關頭必定係陳寶珠出現警惡懲奸，全場鼓掌。作為政府扮演「陳寶珠」必獲全場鼓掌，只係如此一來，整個社會、國家就無法進入獨立思考期，永遠停留喺等「大俠打救」階段。

　　呢次中央救市，對我老曹而言早在估計之中，並唔意外（唔救市先至奇）。No pain No gain，人往往從失敗中學習，從挫折中站起來，溫室嘅孩子經唔起風浪。

　　研究雙胞胎嘅性格結果，證實快樂有50％同基因有關、10％外來因素、40％同你想法有關。換言之，金錢對快樂嘅影響力只有10％，反而改變一個人嘅想法卻佔40％。著名嘅尼布爾（Reinhold Niebuhr）教我地：「以平常心接受不可改變嘅事物，用勇氣去改變自己可改變嘅一切；以及有智慧知道哪些可改變哪些不可改變！」1973至74年我老曹學曉自己冇能力改變股市方向後，學曉接受現實，但有能力控制自己嘅投資組合，努力將虧損減至最細、將利潤放大。受挫折時盡量諗D開心嘅事。希望各位可透過改變自己想法，做一個開心快活人！不如意事十常八九，受挫折係無可避免嘅事，到時盡量諗D開心嘢令自己開心番，因為你愁眉苦臉，亦令周圍嘅人唔開心；如果你開心，接觸你嘅人亦開心。請學習做人要快樂！