2008-04-11

越南隨時變世界工廠

4月10日，周四。恒生指數升202.53，收24187.1；成交748.13億元。4月期指升64點，收24061點低水；擔心今天港股又再跌。

　　滬深三百指數升1.81％，收3754.72。相信只係大跌後嘅反彈。

　　3月份只得台灣指數升1.9％、南韓跌0.45％、香港跌6.09％、日經跌7.92％、馬來西亞跌8.09％、印尼跌10.09％、印度跌1％，以及滬深A股跌20.14％；今年首季亦只有台灣股市升0.78％、南韓跌10.18％、香港跌17.85％、日本跌18.18％、馬來西亞跌13.67％、印尼跌10.87％、印度跌22.88％，以及中國跌34％。好景不常，台股由3月24日9049點起亦開始跌落嚟。

人民幣升勢難停

　　索羅斯認為，全球信貸市場受次按影響，短期仍將惡化，CDS最近六個月升咗49％，為43萬億美元債券提供擔保。根據國際結算銀行資料今年上半年有機會出事嘅債券較去年同期上升145％，至7210億美元。

　　人民幣滙價已升至6.9907兌1美元，估計未來十二個月再升11.2％，見6.288兌1美元（今年年底見6.7兌1美元）。人民幣升值壓力仲係好大，因2005年7月至今，人民幣兌歐羅跌咗10％，未來上升11.2％亦只係追番過去兌歐羅嘅跌幅。

　　英倫銀行今晚或者減息0.25厘至5厘，將係去年12月以來第三次減息。去年9月至今英鎊兌歐羅跌咗19％；IMF估計，今年GDP只係升1.6％（2007年上升3.1％）。

　　瑞信推介中煤能源（1898），中煤能源今年每股獲利估計92仙，升69.4％，O十四點四倍。

　　高盛認為，滬深A股雖然經大幅調整，但係大幅反彈嘅機會唔大。官方政策唔會增加流動性，以免刺激CPI上升，過去四次減印花稅（1998年6月12日、 99年6月1日、2001年11月16日及05年1月23日）都只係刺激股市短暫上升，唔可以改變股市大方向；以依家A股嘅O，未到可長線投資水平。

　　花旗推介華潤電力（836）及雨潤食品（1068）。華潤電力今年估計每股獲利93仙，上升19.6％，O十八點四倍，目標價23元；雨潤食品今年估計每股獲利53.2仙，上升19.4％，O十七點六倍，目標價15.3元。

　　4月8日至18日，內地魚躍醫療、金鉬股份、濮耐股份、三力士及紫金礦業五隻新股陸續開始網上發行。不過，近日新股上市獲利嘅空間收窄，例如中國太保、中海集運及中煤能源三隻股票已齊齊跌破發行價，部分產品收益甚至不如存款利率，令認購新股熱潮在下降中，更打破新股唔會賠錢嘅神話。

QDII表現失望

　　本周深圳五幅土地拍賣只有一幅以6.9億元賣出，建築面積二十四萬多平方米，樓面地價2836.48元一平方米，僅比2006年9月該地段一幅出讓地樓面價高出319元一平方米，即深圳地價已重返2006年水平。為何去年12月起賣地一直冇人競投？以去年12月17日三幅寶安觀瀾地塊，底價樓面地價 3582元、4587元及4881元，加埋2000元建築費，成本已喺5600到6880元之間。家吓關外樓盤已跌至7000元一平方米，即開發商係白做（甚至未來樓價唔再回落）。此乃去年12月起深圳賣地冇人承接嘅理由。今年1月16日，北京七幅土地拍賣亦只有三幅有人承價；上海市楊浦區新江灣城F地以 67.5億元賣出，折合樓面地價7502元，亦大大低過預期；南京市江寧區去年底一幅地以3.86億元賣出，平均樓面地價2618元，皆證明內地樓價去年年底開始進入拐點。

　　去年第四季，內地新批出四隻投資海外基金。喺今年第一季平均跌咗20％，令內地人士失望。QDII基金申請熱潮在冷卻中，因為表現較投資本土二百三十三隻基金平均跌咗19％更差！唔少人曾經認為，海外股市O較A股低，甚至唔升亦唔應該下跌。點知QDII基金表現咁差，今天內地甚至批准港股直通車計劃，嚟港資金亦唔會多。

　　好多人擔心負利率令2008╱09年本港樓價狂升，但2008╱09年唔係1990至97年。因為美元回落期快結束，同1990至97年唔同，係呢次本港工資及租金並冇大幅上升，冇法刺激本港CPI大幅上升。聯滙制度產生嘅負利率環境只係外在因素，冇內在因素嘅支持。美元滙價跌令入口成本升，將本港嘅CPI升幅推高至 5％到6％；食品價格升，而燃料成本上升令交通費跟住升，卻唔可以推動資產升值，因為工資升幅唔大。反而擔心香港GDP增長率2008年下半年會跌。雖然港元一星期利率只有0.998厘及三個月1.9186厘，但港人冇信心借錢買樓！去年10月至今年3月利率由5.5厘跌至1.9186厘，一度推高本港樓價，依家更出現獲利回吐，因3月18日減息後，相信4月底可能係最後一次嘅減息。3月18日起資金反由地產回流股市，支持近排恒生指數嘅反彈。零售業增長率亦有可能見頂，今年第一季升幅16.4％已不及去年第四季嘅17.7％。關心2008年下半年GDP增長率放緩漸成主流，不但令股價下跌，同時令本港房地產價格面對調整。港人明白廉價借貸背後係暗藏殺機，已唔會輕易再嘗試。

　　美國同歐洲金融市場反映投資者對銀行股信心不足，未因貝爾斯登被收購而恢復番信心。呢點可由銀行股息率一般高出三個月存款利率睇到。近日美國三個月國庫債券利率同十年美國政府債券利率差又再擴大；有人認為係擔心通脹率上升，令依家嘅低利率時代好快改變。存放三個月者可迅速轉為存較高利率，揸十年期債券者則無法改變自己嘅命運而面對虧損（債券跌價）。過去嘅例子係人們面對通脹率可能上升時，只係增加債券波幅（Volatility）而唔係擴大二者利率差；例如伏爾克時代，二者利率差2.187厘，而波幅卻達3.695厘【表】；格老嘅時代二者利率差已減少至1.689厘，而波幅亦減少至1.296厘； 2006年2月貝南奇接任後至2007年7月，平均波幅更跌至0.747厘，利率差減少至0.036厘。

　　2007年8月起二者利率差擴大，唔係反映擔心通脹率上升，而係反映擔心GDP增長率下降。例如1981年8月至94年12月，二者利率差達2.129厘，呢段日子GDP係低增長期； 1995年1月至2007年7月二者利率差降至1.22厘，GDP平均增長率有3％；2007年8月開始，三個月期利率同十年期利率差距擴大，代表美國 GDP再度進入低增長期。格老已向全球預測美國未來十年GDP進入低增長期，如上述預測真係正確，美股亦將步入低O期，即依家標普五百指數O十八倍係企唔住。
聯儲局職責要變

　　格老亦為自己2003至05年低利率時期辯護，但聯儲局前主席雪茄伏卻話聯儲局要為近期次按危機負責，並指摘聯儲局為Mother of All Crises。睇番1987年至今過去二十年嘅美國經濟的確係一個泡沫爆破後又出現另一個；全球金融亦係一個危機後又另一個。根據雪茄伏嘅理論，係因為中央銀行職責上改變，唔再成為監管機構及忽視咗金融安全網，改而成為商業銀行資金提供者，造成全球資金泛濫嘅結果。雪茄伏建議唔係增加聯儲局權力，而係將聯儲局放回過去地位──監管者及金融機構最後安全網而唔係資金提供者。但聯儲局唔再成為資金提供者，依家流動性過剩立即變成流動性萎縮，美國經濟好易陷入通縮期。過去格老每次面對危機都依賴增加流動性去應付，為美國經濟帶來最長繁榮期（1982年起至今冇出現衰退，1990╱91年有一次軟着陸、2001年又一次軟着陸）。係咪從此美國經濟冇衰退定係一旦陷入衰退便出現humpty dumpty現象（甚至出動所有皇帝嘅兵馬都冇法拉番佢返上牆上？）。

　　道指短期响11700至12800點上落；恒指响20400至24500點之間上落；但標普五百指數及恒指3月18日低點卻較1月22日低點略低，最後後市係升穿上阻力抑或跌穿下支持？各有各嘅睇法。過去六個月聯儲局已減息3厘及美元滙價亦大幅回落，未令股市上升反令CPI上升。OPEC表示，响今年9 月前唔會增產，認為油價上升係由美元滙價回落造成。2006年8月至今美國MZM貨幣增長率已由年率4％升到15％，美國貨幣供應增幅咁大情況下仍出現經濟放緩，前景真係未能樂觀。

　　美國樓市泡沫爆破、美元滙價一跌再跌、油價保持高位，以及信貸壓碎在進行中，股市炒上炒落；2008年金融市場的確可令人沮喪！

　　IMF估計，全球信貸因次按危機影響而唔見咗12000億美元甚至更大！情況更甚於九十年代日本，因為當年係單一國家，美國次按危機卻影響全球。希望上述只係危言聳聽唔係事實，如果唔係就慘啦。

　　越南人口八千四百萬，較成個廣東省仲多，70％都係戰後嬰兒（越戰响1975年結束）。全國人口平均年齡二十四點五歲，公民識字率94％，越南嗰邊英文程度好高。家吓一個越南工人月薪响50至80美元，只及珠三角一帶嘅人工一半。自從越南加入WTO後，一排排灰白色廠房喺城市郊區建起嚟，成為中國珠三角工業最佳嘅轉移點。台灣商人更早喺1998年已响越南開始投資，例如造鞋、家具及成衣，依家估計已達四千家左右；今天台商對越南嘅興趣大過中國大陸。除咗工資夠平外，仲有豐富嘅天然資源及國內市場。今天胡志明市（往日西貢）到處都係建築工地，情況好似九十年代嘅珠三角。越南起步大約遲中國十多年，1986 年先實行革新開放政策（中國喺1978年宣布改革開放），中國1992年已宣布建立有社會主義特色嘅市場經濟體制，越南喺2001年先提出以社會主義為方向嘅市場經濟。2003年高盛證券首次發布以越南為核心嘅研究報告，佢地估計不出十年，越南將超越印尼同菲律賓，成為東盟十國中經濟實力最強勁嘅經濟體。

　　2007年越南GDP上升8.5％响全球中僅次於中國。自1986年宣布革新開放後，越南國內人口每日生活費唔足1美元嘅人口比例由51％降至2007 年8％，速度較中國快。過去二年越南股市總值由10億美元升至146億美元，但去年8月起又大幅回落，外國投資者以中國人為主。越南房價已直逼東京同紐約，例如胡志明市商業中心濱城市場商舖，每平方米賣17.3萬美元；胡志明市城郊房價，每平方米賣2000美元。越南基建至今仲好落後，電力缺口達十億度一年，道路仍以泥路為主，高速公路只得一條。

　　依家投資越南應以建廠為主，不宜涉足股票及房地產；相信越南可成為另一個世界工廠。

為甘泉航空可惜

　　甘泉航空董事李國源係我老曹讀者，過去經過多次通話交換投資心得後做咗好朋友。我老曹為呢次甘泉航空清盤感到可惜，群眾唔應該過分苛責。Do the right thing係大部分人都希望做嘅事，甘泉成立時唔係人人都讚咩？當時反而我老曹有微微哀愁。因為特區政府仍未開放香港天空，廉價航空公司點競爭？雖然Do the right thing, but not on the right time如何Make a fortune？有如買股票一樣，如2007年8月入市則賺大錢，2007年10月入市則蝕大本，由此可見timing嘅重要性。特區政府至今未肯開放香港天空，加上油價進入上升期及美國經濟開始轉弱，及早止蝕成為唯一辦法。證明今時今日老闆唔易做，無論創業守業都咁難。