資本主義應受道德約束
4月1日，周二。恒指升288.26，收23137.46；成交780.33億元。4月期指升600點，收23230點。長實（001）升2.8元，收113.3元；新地（016）升2.4元，收報123.8元；滙控（005）升2.2元，報129元。
滬深三百指數跌5.48%，收3582.85，自去年10月16日至今下跌39%；內地股市進入恐慌性拋售。
瑞銀宣布集資150億瑞郎（已向新加坡及中東集資130億瑞郎），因第四季虧損125億瑞郎。消息公布後股價升1.82瑞郎，成30.68瑞郎，因今年股價已跌咗41%。
德銀宣布第一季虧損25億歐羅，但股價升0.9%，至72.31歐羅。
次按危機到底係見咗底抑或係正進入風眼？冇人知道。由於出口佔GDP36%（七年前佔20%）嘅中國漸受美國次按風暴吹襲，今年第一季滬深A股跌幅超過美國、英國同歐洲股市。
今年首季本港地產股下跌25%，但樓價卻上升9%。最後係地產股拖低樓價，還是樓價撑起地產股？
4月1日愚人節，股市卻出現V形反彈。後市好友係傻佬，定係淡友係愚人？
金價上升軌已失守
花旗推介澳科控股（2300）、中國通信（552）、中海油田（2883）及新濠國際（200）。澳科控股今年估計每股獲利57仙，升42％，未來O十三倍，目標價12.5元；中國通信今年估計每股獲利28.6仙，升25.7％，O十七點七倍，目標價8.7元；中海油田今年估計每股獲利66.5仙，升22.8％，O十七點三倍；新濠今年每股獲利22仙，O四十九點三倍，目標價為15.5元。
ING國際增長機會基金過去六年表現皆優於標普五百指數，負責管理50億美元資產嘅Uri Landesman認為，3月18日開始嘅美股上升只係熊市二期反彈，係死貓式反彈，否定股市見底論。佢認為近日上升只係淡友平倉做3月結，情況有如1月22日嘅反彈。類似反彈，响熊市二期好常見；估計標普五百今年首季純利可能跌9.9％、第二季再跌3.1％。Landesman認為，响企業純利走下坡及銀行信貸萎縮下，股市只能上上落落，上述走勢極有可能維持到年底。
熊市二期以choppy出名。响抽上抽落嘅市況中點樣獲利？金價由3月17日1034美元急跌至907美元，反彈至956美元又回落，2008年上升軌已失守【圖】，進一步確認3月17日係短期高位，未來支持位响855美元。
後市展望，恒生指數最大可能性係出現長方形走勢，即喺20500至24000點之間上落。
UBS Constant Maturity Commodity指數（代表二十六種原材料）响過去四個交易天（或由3月20日至今）急跌8%。今天大豆一天之內回落5.9%，成11.27美元╱蒲式耳，係第四天回落；金價亦大跌，仲有白銀、白金同鈀金，金價跌至896.75美元，銅價跌至8200美元一公噸。值得注意係美滙指數在回穩，商品價格泡沫係咪已响上月爆破？
美元滙價方面，短期睇1.6美元兌1歐羅，明年3月則睇1.45美元兌1歐羅；估計2008年下半年起美元進入反彈期。2008年首季美元兌歐羅回落7.6％，兌日圓回落10.8％，估計第二季進一步轉弱，第三季才回升。
越南證交所指數今年首季跌44％，係全球九十個主要股市指數中跌幅最大，亦係2002年9月以來表現最差嘅一季。中國滬深三百指數跌29％，係2005年該指數成立以來表現最差嘅一季。恒生指數跌17％，係六年內最差嘅一季。日經平均指數跌18％，係1990年以來最大跌幅。上月滬深三百A股指數出現50天線跌穿200天線，確認熊市訊號，代表熊市由去年10月17日嘅5891點開始，理由係大小非流通股解禁，改變咗A股市場嘅供求關係。依家A股總市值27.48萬億元人民幣，流通股市值只有8萬億元，未來三年即使冇任何新股上市或再融資，中國股市亦面對大小非流通股約值19萬億元變成全流通。今年2月中國城鄉居民總儲蓄存款亦只有18萬億元，即使全部入市，亦接唔住新增嘅大小非流通股。今年大小非流通股轉為全流通共32000億多元、明年73000億多元、2010年86000億元，雖然大部分唔會响市場拋售，但2007年之前A股因為供不應求而造成O偏高嘅局面就肯定要改變。2010年相信中國A股O極可能同國際接軌，結束過去嘅高O時代。
內地股市同香港唔同，香港投資者較成熟，一旦發現股市下跌，唔少人都唔再接貨（明白溝上唔溝落道理），購買力獲保存。反而內地人响去年第四季仍大手接貨，大跌市今年1月才開始，形成2008、09及2010年內地股市承接力唔大，相信內地投資者將付出沉重代價，才明白到股市有牛熊。一旦熊市形成，應以保存購買力為主。依家H股O仍較恒生指數O高（過去係較恒指O低），未來日子H股將有較大跌幅；日前A股O又較H股高，因此第二季A股仍不能睇好。
《金融時報》4月1日報道，今年首季約980億美元資金由新興市場淨流出（去年同期有190億美元淨流入），同期從美國、日本及西歐淨流出嘅資金只有700億美元。今年淨流入嘅只有俄羅斯、中東及非洲。
今年首季全球放棄IPO或推遲IPO共九十家，其中又以歐洲、中東及非洲最多。
第二次世界大戰結束後，美國經濟雄霸天下，到1971年美元危機後變成三頭馬車（即美國、日本同西德三分天下），1990年再加入金磚四國（巴西、俄羅斯、中國同印度）。《紐約時報》3月31日文章更擔心「指揮棒」呢回真正交到亞洲，西方經濟繁榮期終結。美國經濟正步入衰退，西歐同日本亦步亦趨，但唔包括中國、印度、俄羅斯及中東。响中國，GDP上升8％仍叫做「低增長」！十七世紀中國同印度佔全球GDP一半有多，1950、60年代美國GDP佔全球60％，但鐘擺正以飛快速度擺向東方，速度之快，令西方想抓都抓唔住。今天美國GDP只佔全球25％，估計二十五年後全球GDP最大係中國，其次係印度，美國極有可能跌到第三位。
睇吓邊個死得快
4月2至3日美國財長保爾森訪華，估計將加快人民幣上升速度（第一季上升4％），未來九個月仍然可上升10％甚至15％！如此一來，將改變中國出口、流動性、通脹、股市甚至GDP增長率。如未來九個月人民幣升值10％，出口企業利潤將進一步調低，進口企業利潤可能大幅上升，令CPI升幅收窄，甚至令GDP增長率下降到8％，而股市將進一步受壓。
廣東省最低工資4月1日起再提高12.9％，令勞動密集型企業嘅人力成本負擔再升，例如家具、服裝、塑膠製品、玩具甚至家電都面對壓力。今天珠三角工廠老闆之間嘅「笑話」係「睇吓邊個死得快」（上述唔係愚人節笑話）！春節之後，工廠大規模遷移或倒閉已出現。廠商認為，有邊個唔想造飛機、原子彈？但家吓只有生產襯衫同玩具嘅技術咋。如要產業升級，人才能跟上嗎？資本能夠跟上嗎？中國近半數人口仲係農民，知識水平係小學到初中三，點樣生產飛機、原子彈？勞務法規嘅初衷係保護下層勞動者，擔心最終反而害到佢地失業。
今年中國經濟正進入周期調整，上述係解決自身矛盾、經濟結構轉型嘅必經階段。過去三十年改革開放政策下嘅周期規律，加上外部經濟環境變化，情況又如白天與黑夜交替，乃典型盛衰循環期，唔使過分悲觀，只須順勢而行。
危機不斷皆因罔顧道德
阿當史密斯1776 年出版嘅《原富論》（The Wealth of Nations），被視為資本主義嘅聖經；但早一步出版嘅The Theory of Moral Sentiments卻鮮有人提及。資本主義如不受道德觀念限制，係十分可怕嘅事。响西方，制衡資本主義嘅背後有大憲法（constitution）及基督精神（christianity），亦即資本主義鼻祖阿當史密斯所講嘅道德觀念。次按危機嘅出現，就係因為西方國家忘記咗道德觀念，當人人忙於追求短期利益而背棄道德觀念時，便引發呢次金融市場瓦解！世界經濟正加快由實質（tangible）走向虛擬（intangible），大量衍生產品出現及大量金融產品，已非法例可以規限，今時今日更加需要嘅就係道德觀念，一如十五世紀西方發展企業時所強調嘅企業文化。例如《信報》一直強調「理性分析」，上述就係《信報》嘅企業文化。面對政治、經濟、社會民情，《信報》都從理性一面去分析，從不煽情、激情或感情用事，因為此乃本報嘅企業文化。資本主義源自西方，踏入二十一世紀，西方國家漸漸忘記道德觀念，形成危機一個接一個，有違阿當史密斯教導。
今天中國社會亦漸漸接受資本主義，中國人過去一直強調嘅道德觀念現今卻走下坡，希望能夠喺未惡化前加以糾正，不然人類社會點樣進入虛擬經濟（Intangible Economy）？次按產品嘅槓桿比率達三十比一，風險比俄羅斯輪盤仲高（六分一機會有子彈）；對沖基金槓桿比率達十比一（甚至十五比一）亦太高，只要降低槓桿比率，安全性自然提高，但同時令全球流動性消失。令人擔心未來將進入還債通縮期（Debt-deflation），情況有如1990至2003年日本或1997年8月至2003年4月香港。點樣逃過還債期通縮嘅影響？貝南奇唔知有乜奇謀妙計？
後市以唔蝕本為首任
西方國家既面對原油及食物價格上升，同時面對資產價格下跌（由股票到房地產）。以美國為例，去年住房失去12％市值，相等於24000億美元財富，上述未計股票損失。美國人一方面面對手上財富消失，另一方面又面對油價及食品價格上升壓力。2008年唔係七十年代式滯脹，而係經濟同時面對通脹及通縮。
「黃金歲月」係指物價穩定但樓價同股價上升，依家情況剛剛好掉轉。今天我地面對嘅係assets deflation加能源及食品危機。澳洲不動產協會國際與資本市場部執行總裁Trevor Cooke認為，最終係資產價格下跌拖低能源及食物價格。經常往美國考察嘅中國人民大學房地產研究中心主任袁關亦認為，資產價格下跌嘅影響力在慢慢釋放出來。高緯環球大中華董事總經理麥道勤認為，美國次按危機影響正擴散到中國。
沒有留言:
張貼留言