貧富透過金融危機重新執位
4月15日，周二。恒生指數升90.13，收23901.33；成交714.5億元。4月期指低水，升17點，收23852點。中海油（883）升3.3％，但中國海外（688）跌2％，因周小川話存貸款利率有上調空間。睇恒生指數正進入拉鋸戰。
美檢討糧食轉能源政策
滬深三百指數升1.33％，收3583.30，大眾公用升9.9％，焦作萬方升9.9％。中國第一季GDP升10.4％，通脹率估計升8.2％。G7壓力下，人民幣見6.9925兌1美元。
小麥、玉米、大米價格過去六個月上升41％，令貧窮國入口糧食方面多畀35％或331億美元（而入口減少2％）。海地、埃及、喀麥隆、科特迪瓦、塞內加爾、衣索比亞、巴基斯坦、馬來西亞皆出現騷動。OECD國家用糧食生產燃油令全球缺糧，華盛頓已同意本周末重新檢討呢項政策。低利率、美元價下跌加上燃料價格高企，令食物價格急升。
大摩估計，美國企業今年純利將升3％，歐洲跌16％、亞洲升6.3％。估計能源股純利升20％、原材料股升6％、地產升6％、科技同電訊股純利升13％，相信最惡劣日子已成過去，不利因素已股價上反映。
花旗認為，美元雖然月底減息，但港元係咪跟減仍係未知數。
英國3月份房價進一步回落，銀行收緊信貸後已唔易搵到買家。
美國第四大銀行Wachovia除計劃集資70億美元外，亦警告美國經濟前景在轉壞中，未來兩年計劃裁員五百人。
高油價、高糧價相信會持續好一段日子。今天一隻牛平均售價1900美元（去年1000美元）。無論泰國或印尼、紐西蘭或加拿大，農夫都面對高油價及高肥料價壓力。例如磷酸鹽一年前450美元一噸，今天1200美元，由除蟲劑到除草藥平均升幅達50％，農產品又點樣跌價？除上述外，農民流失亦令農夫近年工資急升，例如今年紐西蘭農夫就獲加薪20％。
進入後資本主義時代
由於食物只佔高收入家庭總開支6％，但佔低收入家庭總開支60％，食物價格大升結果令全球貧富懸殊進一步兩極化。1980年起美國社會走向兩極化，1990年起日本社會亦走向兩極化，1997年起香港社會亦進入兩極化時代，亦即後資本主義時代。
1980年美國成功控制通脹，到1982年進入另一繁榮期；1990年日本不但成功控制通脹，甚至進入通縮，令經濟陷入長期不景氣；1997年香港亦面對通縮，幸好中國因素發揮作用，2003年下半年起香港成功擺脫通縮。隨2007年次按危機出現，全球經濟會否先行通脹繼而通縮？抑或通脹通縮一齊出現（油價、糧價通脹，樓價、股價通縮）？作為投資者，Better Safe Than Sorry，保本第一。
1979至2005年美國最低收入25％人口每年收入僅升1.3％，到2005年係15300美元（唔使畀稅）一年；同期中產階級每年收入上升1％，到2005年稅後收入50200美元一年。至於最高收入溫巴仙，呢段日子仍然保持高速增長，依家已達200萬美元一年！
1979年最高收入溫巴仙人口佔去全美收入20％，到1998年已佔去全美收入38％，今天相信超過40％全美收入由溫巴仙人口佔去！有關CEO薪金太高投訴已社會出現，係咪出現改變時刻？
資本主義優點在於創造財富，如不加控制，最後結果係贏家獲得一切（The winner takes all）。共產主義優點在於財富分配。戰後兩大主義競爭結果，共產主義輸畀資本主義，帶1982至2007年美國長達二十五年繁榮期。隨之而來兩極化現象出現，以1979年為例，美國最高收入溫巴仙人口係中產階級收入二十三倍，到2005年兩者差距係七十倍。上述情況1990年日本開始，1997年亦香港開始。2008年香港中產階級收入水平同1997年比較未見大幅改善，但有溫巴仙港人財富卻翻兩番；有銀士住屋郁D就億億聲，中產階級任憑一生努力都無法達到呢個水平。當資本主義發展到呢個階段（貧富兩極化），通常社會便會動盪不安，最後出現重新執位現象。現代社會例如美國，社會制度十分穩定，睇只有透過金融危機，或可產生重新執位效應。Wealth Contraction係咪由2007年11月開始？
美國戰後嬰兒潮，唔少人置業目的係為退休時將層樓出售，大大賺一筆！當去年戰後第一批嬰兒六十歲開始賣樓退休嘆世界，問題立即來了，就係呢D屋賣畀邊個呢？估計2007至2020年係戰後嬰兒退休高峰期！1981至2006年美國人財富淨值（即扣除負債）由10萬億美元升上57萬億美元，即每年平均上升7.2％。2001至07年，美國為進一步刺激人人買樓而產生大量CDO及SIV，美國金融市場係咪已竭澤而漁？我地係咪已進入財富收縮期？
唔少人仍相信企業純利平均每年都以雙位數字上升，而冇思考戰後嬰兒進入退休潮，不但影響房價，仲有就係消費態度，將可令全球GDP進入低增長期（例如3.5％一年），因此股市亦將進入低O時代。1982至2000年1月道指由875點升上11750點，上升十二點五倍，平均每年上升15％；2000年1月至08年4月道指由11750點升上12302點，只上升4.6％或平均每年升0.13％（上述未計美元價回落影響）。2000年1月至今，道指走勢可分為2000年1月至02年10月回落期，以及2002年10月至07年10月上升期。投資專家Robert Shiller認為，未來十年唔再係投資股票時期，更加唔係投資房地產時期，理由係2000年標普五百指數O已接近四十倍，較平均O十六倍高出太多；今時今日平均O仍接近二十倍，較歷史O高出20％，更何況未來十年美國GDP進入低增長期。2006年美國企業純利佔GDP 9％；而非歷史上只佔GDP 3-4％（因為高邊際利潤）。畢非德最近巴郡年報中話，如股市每年上升10％，到2100年道指將見24000000點！各位應小心成長極限！
發達唔容易搵食更艱難
過去四十年句話：「發達容易，搵食艱難。」亦有修正必要。欲退休時富有，已漸由理想變成夢想。由Jeff Harris所著Retire Rich and Happy十二法承認，2000年至今道指平均每年只上升0.17％，要退休時富有兼快樂愈愈難。
根據芝加哥金融顧問公司Spectrem Group所做一份報告，2004年美國擁有500萬美元富翁數目增加21％，2005年增加11％、2006年8％，2007年只有2％，可以講產生500萬美元富翁增長率，一年比一年少，擔心2008年出現負增長亦唔奇。
JMC Wealth Management主席Julie Murphy Casserly認為，退休時財富如不足500萬美元，低利率時代已無法擁有10萬美元一年收入，結果被迫去冒較高風險，往往連本金亦蝕埋。當然，你毋須擁有500萬美元亦可以退休，不過如你希望退休後生活富有兼快樂，500萬美元家財先至可產生10萬美元一年收入，呢點要記住。如冇500萬美元便諗退休，你可以幾快樂，但肯定唔富有（上述銀碼唔包括自住物業價值）！2003年投資香港房地產隨時可double your money，今年4月投資香港房地產又點？唔好話獲利一倍，甚至獲利10％亦有困難，因形勢在惡化中。
中美小心玩出火
中美兩國關係自2006年夏季開始惡化。7月4日當美國慶祝獨立日，北韓卻贈慶發射七枝火箭，其中一枝距離日本只有二百公里跌落海，美國十分不滿，要求中國阻止北韓咁做，同年10月北韓卻進行一次地底核試。美國從夏威夷開出航空母艦小鷹號到沖繩島，以及將間諜衛星移到北韓上空進行二十四小時監視，中國政府卻地面發射鐳射激光，令美國間諜衛星無法監視北韓。去年中國更兩次拒絕小鷹號來港度假，第一次因雙方冇發聲明，知道事件只有軍方人員；第二次因為去年感恩節，小鷹號開出後，四千五百個海軍人員通知香港家人準備過節，突然接到中方通知唔准入境，小鷹號中途折返而令事件曝光（本港傳媒亦有報道）。
不過，事情仲未完結，今年中方更宣布其中一枚氣象衛星出現損壞無法操作，由軍方發射一枚固體燃料火箭上太空將之摧，擺明向美國顯示太空實力（中國已可摧毀任何地球上空衛星）！美國伊拉克戰爭作戰力量有賴人造衛星為巡航導彈導航，隱形轟炸機亦由衛星導航，甚至保護日本及台灣上空亦有賴間諜衛星！中國卻用火箭打下人造衛星，擺明剃美國眼眉也。唔單止咁，中國更同俄羅斯眉來眼去，組成「Shanghai Co-operation Organisation」，兩國進行「軍事合作」。美國政府因此還以顏色，宣布一枚人造衛星電池可能跌落地面造成污染，由海上船隻發射愛國者導彈將之擊落。其後外傳中國非軍方民間組成黑客入侵美國國防部電腦，並成功令部分電腦hang機。今年3月西藏出現騷動，北京政府立即指摘達賴係主腦人，更認為背後有強大集團支持；試諗，十四萬追隨者生活費由邊個支付？隨之而來係全球搶聖火事件。中國民間則宣布組成護衛隊，計劃到全球各地捍聖火傳送。
中美雙方暗鬥已由太空落到地面，奧運前後可能出現明爭，尤其係台灣大選後國民黨5月重新執政。馬英九推行親北京政府路線，美國呢一局失去一隻重要棋子（阿扁），點樣玩法？美國除軍事上一向推行霸權主義外，戰後經濟上亦雄霸全球。最近夠分量挑戰美國就係中國，美國政府會否利用呢次次按危機推低美元價（因中國係損失最大國家），再利用G7會議逼人民幣升上六算，大大削弱中國出口能力，以報復中國軍事上挑戰？呢次G7宣布支持美元價，係2000年以來首次，同時要求人民幣加快升值。2005年7月至今人民幣已愈升愈快，由2005年上升2.6％、2006年升3.4％、2007年升6.9％，2008年至今已上升4.5％。如1美元兌6元人民幣，到呢個價水平將大大削弱中國出口能力，中國點樣化解呢招？睇落唔容易，因歐美聯手隨時可指摘中方利用率優勢協助產品出口而抽懲罰性關稅。中國政府會否停止購買美國債券，令美國長期利率上升去報復？咁就大件事，因為可引發美國經濟陷入衰退。中美雙方小心玩出火！
沒有留言:
張貼留言