2008-03-29

貝南奇如何名留青史

我老曹第二次提醒各位：唔好喺熊市二期拋空，因為股市隨時反彈；亦不要過分介入，因為反彈隨時結束。熊市二期大部分日子應喺2月4日（25101點之下）到3月18日（20572點之上）上落好幾個月，直到大部分購買力被消耗掉為止。

　　3月28日，周五。恒指升621.73，收23285.95；成交975.3億元。3月期指升225點，收23016點；4月期指升526點，收23290點高水。

　　滬深三百指數升169.2，收3918.16，係2月4日以來最大升幅，主因係RSI跌至30低位反彈。招商銀行A股升6.9％、工商銀行A股升7.8％、萬科A股升8.1％及中石油A股升5.2％。

　　花旗開始推介中小型股如比亞迪（1211）、民安（1389）、美維（3313）及東方海外（316）。比亞迪2008年估計每股獲利99.9仙，升27.1％，O十二點五倍，目標價16.8元；美維2008年每股獲利30仙，升74.9％，O六點一倍，目標價11.6元；民安2008年每股獲利8仙，減少67.7％，O十六點二倍，目標價2.25元；東方海外2008年每股獲利57仙，減少86.1％，O九點四倍，目標價60元。

　　花旗亦推介長實（001）目標價134.19元、中海油（883）目標價16.33元、中聯通（762）目標價22元及合景泰富（1813）目標價11.6元。估計今年長實每股獲利6.08元，減少37.5％，O十八點一倍；中海油今年每股獲利87.5仙，升22.1％，O十一點五倍；中聯通每股獲利71.1仙，升36.6％，O二十二點三倍；合景泰富今年每股獲利59.8仙，升37.2％，理由係手上現金高達34億元人民幣較負債27億元人民幣多，响內地樓市出現「拐點」後，持現金多者勝持土地多者。花旗同時建議吸納中國海外（688）、華潤置地（1109）及世茂房地產（813），上述公司都係資金充足兼有良好品牌者，策略係「Buy on dips」。

通脹影響樓市

　　內地高通脹加股災正令樓市向下。通脹處於唔同階段對房地產市場嘅影響唔一樣；通脹初期，企業可透過產品加價而增加利潤，公司盈利上升及加薪令整個社會出現一片繁榮景象；中央銀行亦只係溫和地加息，此時樓價及股價不斷上升。但好景不常，當通脹拖動原材料價格大升，升幅較產品價大，企業無法將成本升幅完全轉嫁，令企業利潤開始回落，央行加息幅度擴大及採取緊縮性貨幣政策，到某一水平股市便出現逆轉，但樓價仍上升，因資金由股票市場流向實物投資，時差大約三個月至九個月。即股市回落三個月至九個月後，樓價才逆轉；隨着樓市逆轉，人們減少消費，通脹率又漸回落。成熟市場如美國或英國，樓市往往走喺股市之前三至九個月出現反領導作用（即樓價走在股價之前）其他市場如日本及香港等，股市走喺樓價之前三至九個月。

　　周四滬深A股下跌5.4％確認熊市（50天線低於200天線），一如恒生指數進入熊市二期大反彈，理論上可重見50天線甚至250天線水平才完成反彈。响走勢學上叫做吻別（Kiss me good-bye）。熊市二期第一隻腳通常強而有力，喺出現死亡交叉後短期股市係不跌反升。

　　2005年前上海與深圳兩個市場流通股總值12000億元人民幣，佔GDP 10％左右，因此未見兩者關係。到2007年年底兩大股市流通股總市值超過30萬億元人民幣，相等於GDP 130％。其他國家出現嘅現象（股市走喺樓價之前三至九個月）亦响內地發生；滬深A股指數由2007年10月17日5891點回落到近日3918點，跌幅接近35％，有幾多資金被綁？自然影響內地人民買樓能力，成為抑制今年房價最重要嘅因素。中國民生銀行旗下一隻QDII基金發行一億份，每份1元人民幣，由於基金資產較成立價低50％，宣布自動清盤，資產出售後將資金還畀投資者。至於工商銀行、中國銀行、交通銀行及招商銀行旗下QDII基金亦有唔同程度損失，由15％以上到40％以下，一旦多於50％亦要自動清盤；中國民生銀行旗下嘅QDII成為「港股直通車」延期開出下第一個受害者。

　　貝爾斯登前主席及妻子周四宣布本周二共售出五百六十萬股、平均價10.84美元，合共6130萬美元。凱尼早於今年1月辭去CEO之職，呢次拋售股票後將結束同貝爾斯登嘅關係。1984年聯儲局挽救Continental Illinois銀行；1994年挽救墨西哥披索危機；1998年長期資金管理公司危機事後都證明係美股嘅底；2008年貝爾斯登危機會唔會係美股另一個底？Mortgage Bankers Association宣布迄至3月21日止最近一星期，申請二按貸款者較一年前上升41.1％，申請買樓者多10.7％。

　　Wilbur Ross、畢非德及Bill Gross都係世上知名嘅投資家，佢地本周不約而同認為市場已到咗可以投資水平。

美國或再現大蕭條

　　Irving Fisher係美國著名經濟學者，雖然因睇錯市1933年接近破產，但佢所出嘅書The Debt-Deflation Theory of Great Depressions卻十分有參考作用。佢認為1929至33年美國大蕭條係聯儲局過分緊張通脹結果，反而英倫銀行因冇過分抽緊銀根，三十年代英國經濟仍然良好。佢嘅爭論點係1929年美國已負債纍纍，千萬唔好「Rock the boat」，不然一旦傾覆便不可收拾。到1933年3月美國負債減少20％，但美元購買力卻上升75％，即以商品價格計負債反而上升40％！換言之，減債行為加上價格下跌引發大蕭條。今天美國負債纍纍，如任由股票及樓價下跌，一樣可引發1929至33年嘅情況，樂觀點睇則會出現1990年日式衰退。阻止辦法係設法停止樓價及股市回落，一如1966至82年，讓美元購買力慢慢地失去；睇嚟貝南奇正採用咁嘅手法。現年五十四歲嘅貝南奇首次對貨幣政策有興趣，係三十年前閱讀佛利民得諾貝爾獎文章，當時佢剛從麻省理工畢業。其後致力研究中央銀行問題，2005年年底獲布殊委任時相信係全球對中央銀行此一項目最有研究嘅人，尤其係點樣防止「通縮恐慌」（deflationary panics）及聯儲局如何影響股市價格，喺呢方面佢曾寫過多篇討論文章，相信亦係對大蕭條最有研究嘅人，佢係阻止金融危機失控而威脅一般經濟方面嘅專家，包括如何規範銀行危機殃及正常信貸流動；似乎佢嘅一生就係為咗應付當前發生嘅次按危機一樣。只係佢無法令公眾人士對佢產生信心，而佢相信嘅現代預測模型亦未能預見樓按者大量不履行責任先兆而引發次按危機，响次按危機出現時亦低估其影響力。

阻止次按威脅經濟

　　佢心目中嘅英雄佛利民又點睇佢？佛利民認為貝南奇嘅優柔寡斷有如花灑內嘅傻瓜（like a fool in the shower），亂開熱水掣後又開冷水掣，總之不知所謂。美林證券北美洲分析員形容他佢係「seriously behind the curve」! 上述亦係一般學者常犯嘅錯誤，便係冇足夠證據前不作決定，不過股市往往走响證據之前。佢亦不乏同情者，認為今天樓市泡沫及次按危機係由2001年格老過分放寬銀根造成；格老在任十八年攞盡光彩卻留下爛攤子畀貝南奇去收拾。佢亦面對1972年前聯儲局主席Arthur Burns問題：當年尼克遜認為冇一屆總統因高通脹而不獲連任，卻可因高失業率而競選失敗。今年大選年佢努力阻止失業率上升而暫時忘記高通脹問題。另一前聯儲局主席伏爾克（1979至87年）認為依家聯儲局面對太多泡沫已漸失控。佢喺麻省理工讀博士時嘅老師即前以色列銀行行長Stanley Fischer認為，每個央行行長都必須經歷過考驗，成功後才可建立權威性，通常愈早出現愈好！

　　格老嘅權威來自1987年10月股災嘅處理，貝南奇如能度過次按危機呢關，一樣可獲世人信任。伏爾克亦以打擊通脹而留名，佛利民認為三十年代大蕭條成因係聯儲局處理失當，冇及時提供足夠信貸協助銀行度過難關。上述係貝南奇嘅核心思想，以佢喺學識能否阻止呢次次按危機威脅正常經濟？