2008-03-31

唔做媒人三代好

3月30日，周日。道指出現50天線跌穿200天線（死亡交叉）後，熊市二期反彈只能略高於50天線，卻無法接近200天線（13165點）。恒指50天線跌穿250天線（死亡交叉）後，至今為止熊市第二期反彈最高 23923點，略破50天線23456點，至於能否接近250天線24078點？木宰羊。再睇RSI，3月18日恒指低點略低於1月22日低點，但RSI 卻出現背馳，引發「春之反彈」。但恒指24000至25000點之間阻力唔細，每一步上升都好難行。

恒指有條件見中期底部

　　呢次反彈由JP摩根大通提高貝爾斯登收購價引發，而非客觀環境有改善，相信只係一次反彈。有八十五年歷史貝爾斯登將成為JP摩根大通一部分，股價由一年前125美元下跌，即使以10美元計，跌幅亦超過九成。De-leverage係醜陋行動，一旦開始便血流成河、尖叫處處。

　　「唔做中，唔做保，唔做媒人三代好。」程翔希望做中國大陸與台灣之間「中間人」，結果自己坐牢；銀行為次按債券提供擔保，搞到自己壞賬纏身；貝爾斯登做媒人，結果被人捉上轎。

　　從另一角度睇，道指由今年1月至3月形成一個倒轉頭肩底。未來恒指如唔低於21000點，亦可進一步睇好。3月18日恒指20572點有條件成為中期底底部。

　　後市展望有兩大思潮：一、Jim Cramer股市見底論。技術上睇，道指在形成倒轉頭肩底，如能升穿頸線，便可確認3月18日股市見底。二、Hugh Johnson風眼論，認為JP摩根大摩收購貝爾斯登，令金融市場暫時穩定下來，加上聯儲局一連串行動，令過分緊張投資者暫時恢復信心，但問題未解決，一旦經濟陷入衰退，另一場拋售又再出現，因為除樓按外，仲有信用卡及汽車貸款，甚至商業樓按、企業負債……。建議大家利用反彈減持。

　　今天局面，令人諗起英隆事件及世界通訊事件，令投資者唔再相信上市企業CEO而引發拋售潮，直到2002年10月開始再陽光普照。熊市二期變幻莫測，當公眾人士睇淡時上升，當公眾人士睇好時又回落，既有暴雨亦有驕陽。山窮水盡疑無路，柳暗花明又一。

炒家絕對唔易做

　　我老曹1997年8月起便叫大家做trader唔再做投資者。過去十年金融市場只係波動而非上升，但作為一個mark-to -market trader並唔容易。恒生銀行前董事長何善衡講過，會考狀元年年有，市場炒手最難求。炒家絕對唔易做，審時度勢，控制自己情緒，一唔小心便會變成賭徒。炒家與賭徒之間只係一線之差。炒家第一招「止蝕唔止賺」，我老曹學四十年仍未充分掌握。至於第二招「狠、忍、準」便更難學，形勢有利時狠狠地賭一鋪，你可以咩？形勢不利時則忍手（去年11月至今有幾多人忍得住？）至於準確分析，我老曹每天十二小時、每星期七天工作，仍無法準確分析。第三招係Think like a bull, act like a bear! 最佳策略配合最壞打算，更係人格分裂。進攻之時如拿破崙勢如破竹，形勢不利又有如英國首相邱吉爾，德國恥笑英國「Run Away Fast」（Royal Air Force）下，仍然下令英軍急速從歐洲大陸撤退。一個成功trader而非一個賭徒，才能應付今天瞬息萬變金融市場。

　　美國去年第四季GDP增長率0.6％；1月份個人消費升0.4％、2月份升0.1％，係2006年9月以來最細升幅；2月份收入上升0.5％（1月份升0.3％）。美國個人消費佔全國GDP三分二，係經濟增長主要動力，唔排除今年第一季GDP增長率進一步下降。

　　熊市二期，個別股份或行業表現出色，但不能阻止經濟步入衰退。例如食品股、零售股、能源股、農產品股抗跌能力較強。美國GDP1971年前佔全球 60％，到2007年只佔25％；1971年出現三頭馬車（全球經濟由美國獨享，到分為美國、日本、德國），今天再加入金磚四國（巴西、印度、俄羅斯及中國），美國經濟對全球影響力在萎縮中，不過仍不可忽略。今天美國已非當年，即使美國經濟陷入衰退，全球經濟唔一定跟隨（受影響則難免）。過去六年美元價一貶再貶，今年美國經濟有可能出現七十年代式衰退（美元價大幅回落、GDP爬行，但其他國家經濟仍繁榮）。

　　油價似乎105美元水平上落，金價進入905至955美元框框內。對沖基金（包括小投資者）去年8月受次按危機刺激，到今年復活節前商品市場好友佔65％，係少見情況。據十七種商品組成Continuous Commodity指數，上周職業者淨拋空較2004年3月高出30％，可見行外人睇好程度。最後贏家係職業人士抑或係大眾？單係美國商品市場，對沖基金睇好一方投入資金達2110億美元，商品市場肯定出現泡沫，但幾時爆破則木宰羊。上周CRB商品價格指數（包括原油在內十九種商品）一周下跌10％，創下近五十年來最大一周跌幅。

　　艾克森石油今年內股價跌9％、雪佛龍跌10％、Conoco Phillips跌15％、荷蘭皇家殼牌跌22％。點解3月份油價創新高環境下，石油股不升反跌？有乜玄機？去年9月到今年復活節前，CRB指數共升 40％，農產品升幅更大。紀律告訴我老曹，經過去年9月至今商品價格狂升，出現調整係遲早事。上周聯備局肯為次級債券提供抵押，令信貸利差收窄。商品市場作為資金避難所作用失去，因此上周出現暴跌，資金明顯回流債市及股市，引發上周股市急升。

　　今年3月止美國約八百八十萬業主面對資不抵債，至今為止30％次按債券已出事，三百萬供樓者在延期供款，其中一百萬面對接管。美國家庭手上equity（流動資產）唔及樓按貸款50％，係 1945年以來最低，未來美國樓價極有可能進一步回落。加州GDP佔美國總GDP七分一，至今加州樓價失去6300億美元市值，令加州經濟陷入衰退、美國則陷入De-leverage期，展望下半年美國經濟仍無法好起來。樓價下跌、油價上升，大大削弱美國人消費力。3月份消費信心指數69.5（2月份 70.8），即使4月份利率回落到1.75厘，幫助亦唔大。

樓市少資金湧入買賣兩閒　　去年11月起香港有D投資者無法承受股市大上大落壓力，選擇退出股市轉攻房地產，樓市成為股市避風塘，形成去年11月至今股市同樓市出現此消彼長局面。踏入3月香港樓價亦開始下滑，跌幅5％至10％之間，而且成交大幅萎縮。當恒指跌至21000點水平後，退出者漸少，香港樓市少資金湧入，單靠用家支持，自然出現買賣兩閒局面。

　　廣州房管局統計訊息顯示，今年2月全市十區新建商品住宅房交易價9303元一平方米，較去年12月跌4.7％，較去年2月升19.7％。今年只有花都、南沙、黃埔三區仍在上升，花都升571元一平方米。過去四個月下跌幅度最大為海珠區，羅崗跌1687元，白雲區跌878元，其他區降幅只有200、300 元一平方米。

　　反而珠海樓價今年卻急升30％，平均作價6933元一平方米，較12月份5332元大升，成為今年廣東省內唯一樓價上漲城市。主因係港珠澳大橋開工在即，日後成為唯一陸路同時連接香港及澳門交通樞紐。其次係澳門與珠海計劃短期內實行二十四小時通關，令澳門人可往珠海置業；依家澳門房價係珠海六倍。去年珠海物業42％係賣畀外地人（澳門人佔一成多）。

中國人後使過去錢

　　中國一線和沿海城市樓價已進入易跌難升局面，想繼續房地產開發中發大財並唔易。炒樓資金亦轉戰中西部及二線城市，例如廣西南寧，由去年初2700元一平方米升到近期3400元。其他上升者有烏魯木齊、北海、蚌埠、蘭州。

　　謝國忠認為，中國經濟問題唔大，但地產問題則好大，因為銀行收緊貸款令房價下滑，地產商面對資金不足。如果GDP增長率由去年11.5％回到8％，經濟將大幅放慢，不過中國基建唔會放慢，中國呢方面發展空間仍大。仲有零售，中國人係「後使過去錢」，美國人係「先使未來錢」；中國人今年仍在使去年賺番錢，因此零售唔會放慢。其次係同發展中國家貿易亦會加快，減少對美國貿易依賴。