2008-04-29

貝南奇誓保貨幣流速上升

　　4月28日，周一。恒生指數升149.51，收25666.29；成交737.42億元。4月期指收25660點，升17點；5月期指低水，升24點，收25542點。3月17日開始反彈會否5月結束？

　　去年進入中國外地遊客只有一億三千二百萬人次、消費490億元人民幣；反之，內地人本國旅遊卻高達十六億人次、消費7000億元人民幣！中國依家有一萬四千間酒店共一百六十萬個客房（美國有四百萬個客房、歐洲有七百萬個客房），由此可見中國經濟型酒店需求幾咁大！而錦江集團（2006）係內地最有名經濟酒店品牌，正努力拓展經濟型酒店。

經濟型酒店回報仍吸引

　　四星級及五星級酒店服務對象以外來遊客為主，經濟型酒店則以內地人為主，近年正進入爆炸性上升。隨大量四星級及五星級酒店落成，中國境內高收費酒店房間入住率好難達到70％或以上，從投資回報率睇吸引力正迅速下降。經濟型酒店近年競爭雖然亦漸漸激烈，再難達到100％入住率，但80-85％入住率仍唔太難，即投資回報仍相當吸引。

　　另一值得注意趨勢係十三億四千萬人口中國，近年國人開始到海外旅遊，唔再局限於港澳遊。東南亞、澳洲、日本已成為中國遊客熱門地點，例如泰國由於相對便宜，近年面對大量中國遊客湧到，令當地旅遊業一片興旺，相信其他東南亞國家亦漸漸受惠。又例如香港酒店價值由2003年下半年開始自由行至今升幅超過75％，今年香港酒店房租再升10％，估計入住率再升10-15％，至86％（因今年缺乏新酒店落成）。但上海情況有D令人擔心，由於2010年世博上海舉行，估計可吸引七千萬人次（2010年5月至10月），令國際品牌酒店房間數目由2006年一萬五千間上升到2010年三萬二千五百間，上海自今年起已面對五星級酒店供應過剩問題，部分已減房租去搶四星級及三星級客。北京奧運過後，相信亦面對五星級酒店房間供應過剩問題。

聯儲局將改弦易轍支持美元　　上周內地減股票買賣印花稅，令上證指數由低點回升15％、深圳指數升16.1％。今天上證A股指數跌2.34％、深圳A股指數跌1.27％，以O計由去年10月五十倍回落到依家二十四點八倍（如以今年估計純利計，未來O二十倍）。

　　2002年A股市價較H股高出80％，2005至06年低潮時A股市價只較H股高出20％。去年10月A股高出H股58％，家仍高出43.5％。如從呢點睇，A股未來仲有下跌空間。

　　滬深A股今天跌1.94％，收3729.15。中石化跌4.4％，因第一季淨利下降69％，面對原油成本猛升而政府對燃油價格實施管制。西部礦業跌6.7％，因第一季淨利降39％。國壽跌4.1％，因第一季淨利下降61％。雲南銅業下降6.8％，因去年淨利下降46％。紫金礦業跌10％停板。上海機場跌8.2％，因政府下令下調飛機起降費而令第一季純利跌17％。

　　今天油價繼續上升，成117.35美元一桶，因尼日利亞受襲擊；加上糧食價格上升，估計貝南奇4月30日只會減息四分一厘。美元今年兌歐羅已回落7％，令美國入口成本上升。為避免七十年代式通脹美國重演，未來聯儲局策略將改為支持美元價上升為主。

　　已故佛利民話我地聽：通脹係貨幣政策失誤後果！有時貨幣供應大幅上升，但通脹率並唔嚴重，因通脹率高低好多時由貨幣流速（the velocity of money）決定。1990年至今日本將出口賺返外用作購買美國政府債券，而唔係用於本土消費，係唔會刺激日本通脹率上升。反而中國人賺外卻用作購買汽車，汽車消耗石油，政府又興建道路，私人又投資房屋，令水泥、鋼鐵需求上升……，咁就會刺激中國通脹率上升。

貨幣流速太快產生通脹

　　各國央行只能控制貨幣供應速度，卻無法控制貨幣流速。換言之，央行對通脹率控制能力十分有限。

　　聖路易聯儲銀行提供貨幣供應速度（即現金加銀行儲備）2005至08年增長率由5％降至1％，2008年第一季才回升至1.5％，即美元供應速度過去三年係下降而非上升。因美國唔再公布M，我地只有睇MZM（Money of Zero Maturity），卻睇到另一回事，MZM由2005年接近零到依家接近18％。MZM上升反映美國貨幣呢幾年正加快流動；雖然美國政府增加美鈔速度由2005至07年正在下降，但貨幣易手速度卻大幅上升。簡單D解釋，如果你賺100元將佢存下來而唔消費，係唔會令通脹率上升；如你賺100元卻去買花送畀女朋友，呢100元由你轉到花商手中，花商用呢100元去餐廳消費，餐廳伙記又將100元用作買書……。因此產生貨幣流速，亦產生GDP。如GDP增長率追唔上貨幣流速，通脹率便出現。

　　再簡單D講，P=MV，P代表國民生產值（GDP）、M代表貨幣供應、V代表貨幣流速。政府可透過增加貨幣（M）去刺激貨幣流速（V）而令GDP增長率（P）上升。由於好難控制V，一旦貨幣流速太快而國民生產力追唔上，便會產生通脹壓力（例如國家只能生產九件產品，但需求卻係十件，競價結果必令物價上升，直到生產十件產品去滿足需求為止，或需求減少至九件為止）。

　　點樣減低貨幣流速方法？雪茄伏已搵到，就係將存款利率提升到通脹率2厘或以上。1980年通脹率16％，當佢將利率提升到21厘，高出通脹率5厘後，人們便乖乖地將錢存入銀行，減少消費（因為100元存款一年後變成120元，一年後今天賣100元產品到時只賣116元，除笨有精）。需求下降可令通脹率回落，代價係同時令GDP增長率回落，因而產生經濟衰退。各國中央銀行唔係唔知道點樣壓抑通脹，只係代價太高而唔會輕易採用。2001至04年美國增加貨幣供應，2005年美國貨幣流速才開始上升；雖然2005年起貨幣供應速度已下降，但至今貨幣流速仍未下降。由貨幣流速減慢令GDP增長率追上，到最後令CPI增長率回落，係需要一段時間。

GDP增長放緩先至係大問題　　佛利民研究發現，1918至32年美國貨幣流速減慢，由1918年1.95回落到1932年1.17，係引發當年大蕭條理由，主要係美國生產力大幅上升、貨幣供應升幅追唔上，而令貨幣流速減慢，引發通貨收縮。1946年戰後美國貨幣流速加快，帶來美國戰後繁榮。另一貨幣流速較快日子係1978至97年，初期貨幣流速加快，因美國生產力追唔上而產生通脹，其後因入口大量上升而令通脹率回落，帶來第二段繁榮期。1997年起貨幣流速又再回落，直到2002年才再回升。

　　貝南奇係佛利民信徒，佢上任時好擔心1997年起美國貨幣流速減慢可能引發2008年大衰退（一如1918年貨幣流速減慢而引發1929至32年大蕭條），因此佢寧可冒通脹率回升危險，都要設法令貨幣流速保持上升，此乃2007年9月起美國重新進入負利率時代理由。上述手段格蛇2001至03年6月亦曾採用，例如將利率壓至1％（當年CPI略高於1％），因而成功令經濟復甦，今次利率更低於CPI 2厘（估計CPI升幅保持4％以上，而利率降至2厘）。

　　過去九個月，雖然我地又再面對通脹壓力，但次按危機令金融界損失1萬億美元（IMF估計數字，至今只撥備2500億美元），美國樓價極有可能再跌15-30％。再睇睇貨幣流速，相信我地依家面對通脹問題好快便消失；反之，GDP增長率放緩先至係大問題，上述因素可引發經濟衰退！

中產階級壓力增冇人可憐

　　1980年起內地以深圳作為特區，令香港製造業開始內移。當年本港超過一百萬工人薪金開始進入收入負增長期，因製造業內移而令本港服務業興旺。1984至97年呢十三年，本港中產階級成為服務業興旺下受惠者。可惜1997年7月香港主權回歸後，香港服務業優勢亦漸漸被取代，只有D受高深教育、例如博士或專業水平相當高人士，薪金才繼續上升，普通大學生受惠有限，令香港社會朝向20╱80發展，即1997年8月起香港中產階級亦陷入收入負增長（情況較1980年工人階級更慘，如佢地不幸高峰期置業話，仲會成為負資產階級）。

　　1980年前工人，今天漸成為香港社會上25-28％貧窮階級，過住冇尊嚴生活；加上1980年至今來港新移民競爭有限低薪工作，令本港貧窮階級日益壯大。隨社會經濟模式改變，外國未能適應者向二線或三線城市轉移，但香港人冇路走！

　　問題唔單止咁，1997年8月起中產階級面對壓力亦漸增，過去十年同樣面對生活質素不斷下滑，佢地甚至難以獲得社會上關心及同情，因為論生活質素佢地仍較香港25-28％窮人好，例如兩夫婦加起來月入3萬餘元香港唔算差，但過去十年生活質素不斷下滑。呢點由香港中價食肆不斷消失、中價服裝品牌愈來愈少足以證明。

　　今天大學生打工食飯盒已係平常事！即香港經濟繁榮成果由愈來愈少人分享，財富愈來愈集中小部分人手裏，上述係二十一世紀面對最大危機。

　　今天香港社會問題係不患寡而患不均。一個金字塔形社會經濟結構又再香港出現。