2008年3月25日 星期二

26-3-2008

最黑暗唔係黎明前

  3月25日,周二。恒指升1356.30,收22464.52;成交1005.9億元。3月期指高水,升1649點,收22470點。華潤創業(291)升11%,見23.55元;九龍建業(034)升24%,見15.68元;首都機場(694)升21%,見7元;中國海外(688)升 9.7%、恒隆地產(101)升8.1%、工商銀行(1398)升8.6%、東亞銀行(023)升9.4%、裕元(551)升10%、網通(906)升 9.6%、中國電信(728)升9%、中移動(941)升8%、中國聯通(762)升9.8%、國航(753)升15%、比亞迪電子(285)升10%、國壽(2628)升9.2%、中芯國際(981)升16%。

  滬深三百指數升1.26%,收3905點。

反彈可重返50天至250天線  3月18日恒指見20572.92,根據VIX指數已進入嚴重超賣區,反彈隨時出現,情況有如1月22日(熊市一期第三隻腳);呢隻係熊市二期第二隻腳,反彈力幾大。每次50天線跌穿250天線後通常出現反彈,呢次亦唔例外,反彈幅度可以重返50天線(23699點)至 250天線(24035點)之間。上述亦係點解咁多人博反彈嘅理由,各位請好好享受呢次反彈帶來嘅樂趣。至於呢次反彈見23700點抑或24035點,只能做事後孔明。

  Jim Cramer本周一响電視show Mad Money中認為熊市已經完成,次按危機發展到貝爾斯登事件已淋漓盡致,佢認為一般分析員太悲觀。

  「Volatile」並唔足以形容近日嘅股市波幅,一天之內上落千幾點已成為家常便飯。Trader一旦睇錯市,分分鐘左一巴、右一巴。例如上周二唔信恒指超賣會出現反彈,今天補倉又補到氣咳。如你認為3月18日已見底,事後可能證明又一次睇錯市。一如上周三金價破1000美元時,我老曹指出係黃金泡沫,不但唔好追貨,反而應大量減持。本周金價响美國最低價同上周三嘅差距超過126美元一盎斯。我老曹一再認為經濟並非進入滯脹期(stagfation)而係泡沫期,由黃金到小麥、由原油到黃銅。去年8月至今,聯儲局只放寬信貸,而非增加貨幣供應,因此2007年唔係七十年代。幾天之內,金價跌12%、原油跌10%、白銀跌20%……。上周係原材料市場內另一場牛熊爭霸,勝方才可企英雄地,接受下一次挑戰。

  去年9月開始減息,10月股市便開始回落。今天1000萬港元存款只有1.3厘(即13萬元一年),再次進入千萬富翁只可食菠蘿包嘅時代!以每月利息收入1萬元多D,以今時今日物價,想唔節衣縮食都唔掂。雖然係咁,請唔好忘記畢非德嘅教訓:唔好蝕本!

  去年10月30日至今年3月18日,恒指已下跌三分一,平均O跌至十四倍,已經唔算貴,但經濟正步向衰退期,即企業邊際利潤見頂,面對回落。唔算貴並唔係入市買嘢嘅理由,例如呢次次按嘅Great Unwind係咪完成?經濟係咪已進入通縮期?科網股泡沫爆破,股市十九個月後才見底;呢次次按危機,股市五個月後便見底?西方中產階級正面對身家縮水,中國年輕一代卻開始躋身中產行列,形成西方物業市場出現通縮,東方由原材料到食物卻出現通脹。西方經濟步入九十年代日式經濟,東方經濟卻類似八十年代日本。

  呢次港股反彈,相信只係3月結前嘅櫥窗粉飾活動而已。

  中國商務部宣布上周(3月17日至22日)食物價格回落;此乃3月份首次。內地CPI响3月份見頂機會好大。

  CPI壓力雖然下降,隨着美國經濟增長率放緩,溫家寶估計2008年中國將面對艱辛嘅一年,無論內在、外在壓力都十分大。中國係一個十三億人口嘅國家,就業問題一向係大問題,亦係唔穩定嘅主要因素。中國CPI升幅將由今年2月嘅8.7%下降至年底嘅4.8%,中國GDP增長率放緩已好肯定。

  人人都話黎明前嘅黑暗係最黑嘅。根據氣象學研究,最黑暗時刻唔係黎明前,而係深夜二時。因此,JP摩根大通出價收購貝爾斯登係咪黎明前嘅黑暗?我老曹木宰羊,亦唔想猜測。過去四年,中美兩國GDP已佔去全球GDP增長率60%;展望2008年,兩國GDP增長率皆進入放緩期。中國經濟奇迹係建基於政府刺激出口政策及中國企業家嘅努力。2008年起中國政府對廠商嘅態度漸漸唔友善。今天東莞厚德街唔再人頭湧湧,早已變得冷冷清清。人民幣升值、勞工成本上升、柴油價上漲,電力供應更面對供電部門嘅錯峰用電預配要求,令企業每周有三至四天必須自己發電。3月份東莞缺電達三百萬千瓦,缺電情況已影響深圳、廣州、佛山甚至揭陽、潮州。因為貴州、三峽、湖南鯉魚江和橋口減送電力六百三十萬千瓦,主因係本土電力需求上升,點解要賣電畀廣東省?加上廣東省電力需求年年上升,今年未到炎夏,廣東省已出現電荒。

滿城盡是打折盤

  中國房地產發展企業超過六萬家,估計幾年內將減半,最後可能十家企業中只有一家存活下來(香港1973年上市地產發展公司多達二百家,今天香港大地產商十隻手指數晒)。1998至2007年係內地房地產發展公司最賺錢嘅十年,未來十年係汰弱留強時段。大方向係咁,打小折能救得幾條命?

  繼製造業之後,內地房地產亦令人擔心。北京市鏈家房地產經紀公司話「滿城盡是打折盤」。八十三個樓盤,九點八折者佔36.1%,九點六折佔 33.3%,九點四折佔22.2%,即80%樓盤都打折。一線同沿海城市樓盤已到咗無法再升嘅地步,大量炒樓資金移向中西部城市「跑馬圈地」,形成東冷西熱。踏入2008年,北京、上海、深圳、廣州等一線城市不斷出現樓盤打折、中介崩盤嘅消息,但中西部省區城市房價卻不斷上漲。今年2月漲價嘅城市有烏魯木齊、南寧、北海、蚌埠、蘭州等,例如南寧由去年初每平方米2700元升到家吓3450元;快速環道一帶民族大道由3800至4200元升到6000至 8000元一平方米。

  美元再回落到1.5586美元兌1歐羅及1.9936美元兌1英鎊。擔心由JP摩根提升貝爾斯登收購價到10美元所引發美股反彈已完成。德國銀行估計,美國今年首季經濟已進入衰退,歐羅將睇1.6美元,然後跌至年底1.45美元。根據S&P╱Case-Shiller二十個城市住房指數,美國今年1月樓價較一年前已下跌10.5%。

  另一投資界泰斗Joseph Granville今年已八十四歲。去年10月9日發出美股熊市訊號,認為道指最少下跌2200點,依家已證明準確。佢今天又再作驚人預測:道指將見 9000點,低潮响今年10月左右(或年底)!Van Kampen主要投資策略員Rob Schumacher則完全唔同意上述睇法,認為年底標普五百可見1600點,升20%。一淡一好,誰對誰錯?投資市場無專家,只有贏家同輸家。

  商品價格回落,油價見100.86美元、金價見918.7美元,擔心商品泡沫上周爆破。2月份美國二手樓出售減少3%,至四百零三萬間(年率),代表九點六個月供應量,雖然較估計中嘅四百八十五萬間好,即地產放緩速度冇估計中咁快。OECD組織估計,美國、歐洲及日本今年上半年經濟進入徘徊區,美國 GDP只升0.1%、歐羅區升0.5%、日本升0.3%。

  馬英九承諾兩岸直航,估計南方航空(1055)、東方航空(670)及中華航空、長榮航空受惠;最受影響係澳門航空同國泰航空(293)。受惠機場有廈門高崎機場、廣州白雲機場,估計運量將分別上升25%及15%,浦東國際機場反而影響唔大。

台灣民主制度漸成熟

  國民黨以58%支持率勝出,較民進黨多17%選票,可以講係壓倒性優勢,可惜事前已太多人買定股票等馬英九勝出獲利回吐(好消息出貨),形成周一台股高開低收,睇嚟台股9000至10000點阻力幾大,尤其係航空股對直航有過高期望。例如由台北飛上海只需兩小時,由台北飛香港再轉機到上海卻需八小時。不過,要落實直航仲有排傾,5月22日前能否搞掂?似乎高興得太早。

  從呢次選舉,可見到台灣民主制度漸成熟。輸贏雙方事後表現克制,冇人做傻事。

  所謂馬英九效應已由今年1月23日台股7384點開始,到3月22日9049點結束,升幅共22.5%。上述升幅係由希望台灣加強同中國大陸聯繫所引發。2003年7月透過自由行、CEPA、QDII等,令香港經濟復甦,唔少人認為上述事件可以喺台灣重演一次。呢幾日我老曹踏足台灣,所有响台灣嘅朋友都告訴我老曹只要藍營贏出,台灣經濟就有救。真係咩?1949年國民黨退守台灣,蔣介石實行勵精圖治,到蔣經國時代建立一個清廉政府。1971年台灣雖然失去聯合國地位,但經濟卻蒸蒸日上,可惜漸漸又故態復萌,又出現貪污腐敗,令2000年政權落入民進黨手裏。阿扁上台後,扁嫂由一位為「民主」而搞到自己坐輪椅嘅鬥士,漸漸變成貪污嘅小婦人,民進黨又走上國民黨嘅老路。今天喜見馬英九太太仍坐公共巴士上班,但八年後又點?菲律賓政治現象會否响台灣重演?(馬可斯因貪污下台,阿奎諾夫人上台,政府唔使三個月又再貪污……每個政黨掌權後,便由清廉逐步走向貪污,再由貪污走向腐敗、下台;另一政黨上台後又再重演一次……。)  中國晚清時代因政府貪污而國力日衰,讓列強割據,最後被國民黨取代。國民政府上台不久亦變成貪污腐敗,1949年政權由共產黨取得; 1978年實施改革開放政策後,連共產黨亦走向貪污腐敗……。馬英九上台後,點樣保證國民政府唔再貪污腐敗?邊個話民選政府唔貪污?睇睇印度、菲律賓、泰國、印尼及南美洲各國唔係民選政府咩?佢地唔貪污咩?呢幾日响台灣嘅酒店內,我老曹天天睇台灣電視猛人辯論,講來講去卻冇一位有識之士可以提出防止政府貪污嘅方法。恐怕馬英九政府最終亦走唔出由清廉走向貪污嘅老路,然後由另一個黨上台,再來一次由清廉走向貪污。一如東南亞國家政府,輪流上台貪污!

馬英九難擺脫清廉走向貪污?

  台灣經濟由1992年走下坡,至今已十五年,前八年由國民黨掌權,結果又點?馬英九上台須面對嘅問題一籮籮,例如未來八年欲投資4萬億元新台幣响基建上(但錢從何來?不但政府已負債纍纍,如發債,台灣通脹率會狂升;連國民黨亦窮了,近年連蔣介石嘅居所亦切出八分一土地,賣畀地產商興建豪宅)。搞好金融、旅遊、醫療、文化及創新服務在在需財,但台灣政府卻十分窮。十五年不景氣,已令台灣經濟陷入低投資、低消費嘅惡性循環。過去六年台股每次當市價高出賬面值二點四倍便見頂,呢次能否例外?面對美國經濟放緩及環球經濟活動減少。大氣候、小氣候不因人嘅主觀願望而改變。呢次台灣之行,可以講滿懷希望地去、心灰意冷地回。四天觀察所得,台灣經濟有排搞,暫時睇唔到乜嘢理由可打破過去十五年嘅兜兜轉轉(假設大陸赴台遊客由去年三十六萬升至今年一百零八萬,消費一如來港自由行,亦只可令2008年台灣GDP多0.15%。2009年大陸遊客增至三百六十萬,亦只可令台灣GDP多0.5%)。周一台灣QFII證明外資响度出貨而非入貨。估計2008年台灣上市公司純利平均上升8%(因電子業走下坡),今年O十六倍,唔見得特別吸引。

  馬英九上台後,可結束與北京嘅互不信任關係,進入和平發展咩?北京唔反對台灣加入東盟自由貿易區,結束經濟被邊緣化局面咩?兩岸在「九二共識」大前提下,能進一步發展咩?話易唔易。兩岸主權之爭,我老曹嘅睇法係無法解決。馬英九強調台灣係「主權國家」,以「不獨不統」為大原則(既唔獨立亦唔統一;台灣前途由台灣人民決定)。上述兩點同北京政府嘅立場有很大差距;北京政府嘅立場係响「一個中國大原則下」才能恢復談判。睇嚟兩岸距離和平統一之途十分遙遠。台灣之行,進一步證明我老曹嘅信念:經濟繁榮與衰退,同係咪實施民主制度無關。台灣已進入第四十一屆總統年代,但講經濟水平,仍唔及冇民選制度嘅香港。今天香港人均收入係台灣人一倍或以上!

沒有留言:

張貼留言