2008-03-18

21000點有得守

3月17日，周一。恒生指數最低見21041.26，收市21084.61；成交943.72億元。3月期指跌796點，收21336點。雖然前低點21700點失守，但相差不足3％，有機會形成高低腳；再加上3月份期指高水，21000點仍有得守。

　　今天滙控（005）跌3.9％、建設銀行（939）跌6.5％、東亞銀行（023）跌8.8％、神華能源（1088）跌8.9％、中煤能源（1898）跌8.2％、兗煤（1171）跌8.9％。玖龍紙業（2689）暴挫40％，成6.39元，因半年純利升11％，至10.6億元人民幣，而非分析師估計嘅14.3億元。理文紙業（2314）亦急跌27％，成12.2元。中國電信（728）下挫10％，至4.73元。

熊二第一隻腳

　　美國經濟進入衰退已愈來愈肯定，剩低嘅問題係呢個衰退期有幾深及有幾長？2006年第三季開始嘅衰退期唔會响2008年結束，而係一直伸延至2009 年。至於1973至74年嗰次，係第一次石油危機，可以講又深又長，1980至82年嗰次係第二次石油危機，已冇1973至74年嗰次咁深，但一樣好長。至於2000至02年係科網股泡沫爆破，而非石油危機。呢次由2007年10月11日起回落，應該係第三次石油危機，理論上應較1980至82年嗰次更溫和先啱。

索羅斯：最高潮應滿街鮮血　　熊市一期（恒指計）去年10月30日開始，今年1月22日結束，進入漫長熊市第二期。受美國次按影響，信貸市場漸收縮，外滙市場開始回應經濟增長放緩。由2007年9月起美元滙價急跌，到近期日圓急升。

　　再睇番1973至74年及1980至82年油價，最終油價係止升回跌，即石油危機之後係油價萎縮期，即通脹到後期變成通縮；至於引發嘅係邊一點及邊一日就木宰羊。

　　索羅斯估計，呢次金融危機係美國近六十年內最惡劣嘅一次，最高峰期應會「滿街鮮血」！我地暫時當索羅斯危言聳聽（根據另一知名分析員Joe Granville分析，當報章上大部分人皆睇淡及已沽咗貨，亦即大部分人開始睇錯嘅日子）。

　　換言之，採取防守策略有其需要，過分睇淡則無必要，請保持平常心，耐心等候股市嘅演繹。

　　滬深三百跌破4000點大關，市場預期政府將加息以遏制通脹；滬深指數收3965.28，下跌4.63％或192.59；兩市有近四百家股份跌停，跌幅响8％以上嘅股份數不在少，市值一天之內最少失去5000億元人民幣。

樣樣唔准加價仲衰

　　廣州柴油全面告急，唔少加油站掛出暫無柴油供應嘅牌，只限量供應畀個別老客戶。由於柴油供應緊張，周六及周日唔少小區樓巴暫停服務，慳番D柴油供周一至周五需要上下班嘅居民用。

　　原油價大幅上升，但中國政府唔准柴油加價，引發倒掛現象（成品油較原油便宜），結果形成冇油供應，令珠三角一帶交通出問題。唔少工廠因供電不足而自備發電機，最近亦因燃油供應不足，有發電機亦冇用，情況十分混亂。

　　政府樣樣唔准加價去控制CPI升幅，結果只會造成供應短缺，情況可能較加價仲差。

　　今天日圓升穿100兌1美元，引發利差交易unwind，全球資金回流日本，令全球金融危機進一步加深同拉長。上月美國同歐洲曾希望金融風暴响今年1月 22日結束，依家睇嚟將伸延至2009年。上周初仍以70美元一股易手嘅貝爾斯登，一下子只值2美元，係1930年代以來首次出現，所引起嘅震撼可以想像。一般人相信貝爾斯登唔會係最後一隻出問題嘅金融股，另一場風暴會否又再開始（第二隻鞋開始下跌）？

　　聯儲局宣布減貼現率0.25厘，至3.25厘，並批准JP摩根大通購入貝爾斯登，令美元兌日圓跌至十二年內低位，引發日經平均指數大拋售。日圓滙價高見96日圓兌1美元，係1995年8 月以來最高（1994年最高曾見78兌1美元）。上周五貝爾斯登急挫47％，見30美元，今天以2美元一股出售，JP摩根大通再提供300億美元資金去支持貝爾斯登，即整間貝爾斯登只值2.7億美元！貝爾斯登去年1月每股市值170美元，今時今日只值2美元，跌幅達98.8％，跌幅較1973至74年和記洋行仲大（當年由48元跌至1.1元，跌幅97％，需時二十一個月）。一間1923年創辦、捱過1929年華爾街危機及1943年第二次世界大戰嘅投資銀行，响紐約、倫敦、東京、香港、上海、北京、新加坡等地都有辦事處，擁有自置物業嘅大投資銀行竟然响一年時間失去98.8%市值，真係得人驚。

　　加州最大房屋建造商Lennar宣布去年第四季虧損13億美元，股價去年下跌63％，公司計劃為手上100萬美元以上嘅豪宅提供35％折扣優惠！即去年賣100萬美元嘅房屋，今年只需65萬美元。阿里桑那州嘅Cachet Homes向加拿大人招手，願意為旗下物業提供4.75厘貸款，直到買家售出手上舊樓為止。舊換新兼送低息貸款，呢一招似乎使得，一下子賣出十二間美國新樓畀加拿大人。

　　聯儲局在減息，但三十年期樓按卻加息至6.37厘，十五年期5.72厘，因為樓按風險在上升。過去响美國買樓要畀20％首期，近年唔少公司接受10％甚至5％首期，形成呢次樓價只下跌10％便有大量負資產家庭出現。點樣阻止美國樓價進一步下跌？聯儲局已在瘋狂減息，但有用咩？1930至32年聯儲局亦曾減息至1厘，股市卻跌到七個一皮；1990年6月起日本減息至近年接近絲路，日經平均指數亦跌足十三年。

美國次按危機演變成信貸壓縮（credit crunch），令一個本來十分溫和嘅調整變成嚴重衰退，較嚴重嘅衰退一旦出現，又可令金融機構虧損進一步擴大，擔心呢次美國經濟軟着陸可能失敗，由短而淺（例如一季）變成深而長（甚至超過兩季）。分析界預測將出現「W」形趨勢，即不景氣一直伸延到2009年下半年，而非類似1991或2001年式軟着陸。

　　以地產為例，住宅衰退正向商業樓宇市場擴散。美國經濟增長放緩已影響歐洲同日本，而且仍在繼續擴散。美國住宅方面，根據Case-Shiller╱S&P指數已回落8％，最後見底時低點好大可能較2006年高點回落20-25％。美國金融系統正面對1980年初以來另一次大考驗（當年因第三世界國家無力還款而引發金融危機）。問題已唔局限於次按債券，而係一旦樓價跌幅大於20％時所造成嘅負資產問題，依家涉及虧損可能高達4000億美元，而且在擴大中。好多LBO（Leveraged-Buy-Outs）面對經濟衰退，無力還錢問題將逐步浮現。問題唔再局限於CDO（Collateralized Debt Obligations），擴散到CDS（Credit Default Swaps）而影響企業借貸能力，更包括SIV（Structured Investment Vehicles），進而影響對沖基金、投資銀行等。

　　响過去衰退，標普五百指數平均跌幅28％，我地正面對相同危機，何況呢次可能較1990至91及2001年更嚴重。如美國樓價下跌20-25％，可令美國家庭財富失去4萬億至5萬億美元。美國私人消費佔美國GDP 70％，只要美國家庭略為減少消費，已可陷美國GDP長期處於負增長，上述未計股票市場回落影響及企業借貸能力減少嘅影響。

持盈保泰坐觀危機演變

　　今年兩間被接管嘅銀行都只係小型銀行。隨着貝爾斯登出事，知名度較高嘅投資銀行亦開始出問題，對投資者心理打擊更大。一般人心諗咁大嘅投資銀行點會出事？可惜依家信心亦開始動搖。

　　美國聯儲局瘋狂減息，對美元滙價害多於利，亦令金融政策對資本財需求嘅影響力愈來愈細（例如1990至2003年日本；1998年特區政府入市干預股市）。家吓美國經濟面對嘅困難唔係illiquidity，而係insolvency。至今美國仍係流動性過剩，只係貸款人無力還債，呢個問題無法透過減息解決。高盛證券估計，金融市場虧損2000億美元，可引發2萬億美元信貸收縮。中投投資响百仕通上虧損30％後，投資態度已轉為審慎；美國銀行投資响 Countrywide上損失20億美元，亦變得小心好多；中信證券响貝爾斯登上吃咗虧，亦醒目番少少。過去六個月各國主權基金面對虧損，漸漸令主權基金唔再成為資本供應者。美國兩間小型銀行出事，亦令中型銀行面對壓力……。各國中央銀行已成為最後資金提供者，情況都幾嚴重。

　　技術上睇，今年1月22日21709.63熊市第一期完成第三隻腳，進入熊市第二期，唔排除今年3月17日21041.26乃熊市第二期中第一隻腳。一如熊市第一期，熊市二期應有三至五隻腳（前低點係去年8月17日19386點）。從Bull╱Bears Difference指數睇，3月17日市場睇淡百分比已較今年1月22日有過之而無不及，甚至較去年8月17日更淡，理論上反彈市隨時出現。不過，响熊市中博反彈係極之危險嘅行為，我老曹意見係未出貨者不妨忍手，美國聯儲局減息約可引發一次反彈，因為已進入負利率期，即使熊市亦唔係只跌唔升。

　　今次同1990年日本危機唔同，當年危機並冇擴散；同1997年亞洲金融危機亦唔同，1997年歐洲同美國經濟唔受影響。呢次係美國次按危機，已開始波及日本同歐洲，亞洲能否保持「兩不相干」？响未有肯定答案前，投資者除持盈保泰外，可以做嘅事十分有限。如各位已做妥應變措施，不妨保持樂觀心態睇吓整場次按危機點樣演變。