2008-03-19

捉熊腳唔易玩

3月18日，周二。恒指跌至20572.92後反彈，收市21384.61，升300點；成交1140億元。3月期指仍係高水，升144點，收21480點。玖龍紙業（2689）升8.3%，收6.92元，因大摩推介，目標價17元。阿里巴巴（1688）去年獲利上升340%，今天股價跌21%，收12.2元，即本周內股價下跌44%。

QFII基金面對贖回潮

　　花旗推介中信泰富（267）、長江基建（1038）、玖龍紙業、建滔化工（148）及建滔積層板（1888）。估計中信泰富今年每股獲利2.57元，升 13.2％，O十三點三倍；長江基建今年每股獲利2.29元，升8.2％，O十四點一倍；玖龍今年每股獲利66.2仙，升40.7％，O八點八倍。

　　溫總宣布採取有力措施壓抑通脹率，以達到今年全年CPI升幅4.8%嘅目標（2月份升8.7%，3月份升幅更大，政府欲响4月份將通脹壓下去，謠傳採取物價管制、加息及提升銀行存款金率），令滬深A股連續第五天下挫。消費股指數今天大跌7.1%，青島啤跌9.9%、光明乳業跌10%、北大荒跌停、江西銅及雲南銅跌停、中金凱南跌停、中國鋁業跌9.8%。

　　QFII基金過去六個月平均損失11.59％，形成基金投資者紛紛贖回。十九隻QFII基金2月份被兌現或投資減值而減少66.6億美元。响外國上市、投資內地A股嘅基金市值較NAV低16.94％，代表3月份QFII基金面對進一步贖回潮。

　　美國經濟衰退對中國產品需求增幅減少，加上內地CPI加快上升，外資認為持有A股基金已面對高風險，改為投資商品基金；2月份商品基金平均升幅12％。 2月份表現最好係台灣股票基金、泰國股票基金、巴西股票基金、天然資源股票基金及黃金股票基金。3月份好多商品已超買，相信3月結前唔少將被拋售套現。今天B股市場接近全部跌停，媲美今年1月22日或去年5月30日。上海B股指數跌9.04％，深圳B股指數跌8.51％；一百零四隻有交易嘅B股中，六十隻跌停，另五隻跌幅超過9％。

恒指反彈乏力

　　滬深A股跌5.08％，收3763.95，已漸接近去年5月30日低點。下跌A股多達一千三百八十五隻，近三百隻跌停，其中又以輕工業製造股跌幅較大；少數逆市上升有中國中鐵，上升3.99％。

　　瑞銀主席奧斯佩爾宣布自我減薪90%，去年薪金257萬瑞郎（約2000萬港元）已拒絕收花紅，因為瑞銀去年為美國次按撥備190億美元，手上仍有59億美元拍賣後證券今年仍須撥備，另有次按276億美元。佢相信2008年係困難嘅一年。

　　捉熊腳遊戲從來唔易玩，芝加哥期權交易所VIX指數超過35，較今年1月及去年8月更高，理論上可支持一次反彈。今天恒生指數反彈卻乏力，因為滬深三百指數正在加速下跌。

美股冀有系統回落

　　如果家吓情況唔係咁惡劣，相信貝爾斯登應已破產，依家透過JP摩根大通動用美國納稅人嘅蚊年去吊命，以令美國股市「有系統地回落」而非「崩潰」。上述消息令JP摩根大通升10.3％，但雷曼兄弟再跌19％（上周五跌15％）、美林跌5.4％、花旗跌6％、大摩跌8％、高盛下跌3.7％；貝爾斯登跌 84％，至4.81美元。

　　繼凱雷資本之後係貝爾斯登，前者兩星期前每股仍成20美元，宣布無力應付追孖展後，股價跌至36美仙；貝爾斯登一星期前每股仍成55.5美元，上周五回落到30美元，宣布收購價只有2美元後成4.81美元。

廚房唔止一隻曱甴

　　去年9月以11.77億美元購入9.4％貝爾斯登嘅英國投資者約瑟夫．路易，今天手上千一萬股貝爾斯登市值只有2200萬美元，11.5億多美元財富有如水蒸氣般蒸發掉。凱雷資本嘅股東資金只有6.7億美元，卻炒賣217億美元債券（槓桿比率達三十二倍），上述債券全部係GSE級，由半官方機構如房利美或房貸美發行，雖然非政府保證還款，但唔還款機會極微，利率又較國庫券高2厘，屬三A級，理論上風險唔大。點知次按危機下，連半官方機構所發嘅債券市價亦大跌，並面對孖展Call，咁就Dido！响慕尼克嘅Uni Credit SpA策略員話，當你响廚房搵到一隻曱甴，理論上係唔止一隻曱甴嘅。Alpha Capital Management創辦人Brad Alford話，此乃一生人中可能只會出現一次嘅厄運，依家偏偏遇上。

　　呢個心情我老曹明白。1973至74年眼見和記企業由48元一股跌至7元，以為係發達機會，便將自己50萬元身家分十次投入，每次買一萬股。結果7、6、5、4、3、2、1，當和記跌至1蚊時，自己揸咗十萬股和記，當年响獲多利（滙豐旗下）做事嘅森池兄通知我老曹，和記可能破產！1974年12月嘅心情，真係永世難忘。上述厄運，一生人可能只會出現一次，不過「一次就夠啦！」為阻止呢種情況响我老曹人生中再次出現，決定由1975年起直到永遠，我老曹都溝上唔再溝落！

　　兩星期前凱雷資本嘅股東，一星期前貝爾斯登嘅股東，好多人一生就此改變。貝爾斯登嘅情況迅速惡化，理由係上周Renaissance Technologies由貝爾斯登搬走300億美元資產，美國對沖基金S3Partners搬走250億美元資產，即貝爾斯登面對大戶大擠提！現獲JP 摩根大通注入300億美元資產，只可勉強應付（如再有大戶擠提，上述資金只係杯水車薪）。聽講整件事如下：JP摩根主席戴蒙當時正與家人响紐約一間希臘餐廳慶祝自己五十二歲生日，七點左右佢嘅顧問Gary Pan打電話畀佢，告訴佢聯儲局願提供資金，但需要JP摩根大通提供保證挽救貝爾斯登。經一晚商討後，挽救計劃周六上午八時三十八分宣布，成為聯儲局首次挽救投資銀行。其後擔心市場反應欠佳，周日聯儲局再宣布減貼現率0.25厘及周三宣布減息（估計1厘），可見情況幾咁惡劣！

去年3月 Countrywide出事，貝仔卻一再保證冇事，到去年8月仍然認為係小問題。經過一年醞釀，次按危機已漸漸變成金融危機，一如小損失唔止蝕變成大損失；大損失唔處理可變成無可挽回嘅大錯一樣。如果你投入股市嘅資金超過財產30%，It is never too late to sell！2000年3月至02年10月美股共下跌三十個月（港股受沙士影響，更跌至 2003年4月，共三十五個月）。去年11月至今跌市只有五個月，熊市第一期剛完成，進入漫長熊市二期，然後第三期……。冇人可事先知道熊市幾時結束，唔似牛市，牛市結束前必人氣鼎盛，例如去年10月，連唔係財經雜誌嘅八卦雜誌都大做財經文章；熊市結束時卻係滿街鮮血。熊市二期通常有三隻到五隻腳，捉熊腳較捉牛腳更難，必須做到「短、小、精、悍」，即只做短線、動用資金要小、分析能力要精、入市時機要狠。如未能符合上述四點者，請勿加入博反彈行列，因為死亡率達80％。熊市博反彈屬專業投機者遊樂場，非一般散戶玩得起。

　　殊仔話佢嘅管治層「好彩及時挽救」，令次按危機不致「擴大」。我老曹實在佩服佢今天仲可以咁蠢。「九．一一慘劇」後決定攻打伊拉克，之後要求格蛇減息到 1厘時，已種下今天惡果。去年8月貝仔才採取行動，仍叫「及時挽救」？有如某人爆咗血管，「幸好搶救及時」嘅道理一樣。點解唔响爆血管前，降低自己血壓、清理體內膽固醇及多做運動？到爆血管時，搶救及時又有乜用？醫番都殘廢啦。

　　一如有人今天才推介商品股、原材料股及黃金一樣，呢類產品供應彈性好差（不因價升而令供應大增），價格高低由需求決定；一旦出現經濟衰退，需求迅速下降。要知道通脹嘅極限係通縮，由通脹過渡到通縮，就係極度波動期，依家正進入過渡期。1980年金價、油價先爆煲，1981年才輪到樓價同股價；呢次2006年第三季美國樓價先爆破、去年10月美股，至於黃金同石油，相信今年爆煲，只係唔知邊個月及邊個水平。

　　估計今年首季雷曼兄弟每股獲利72美仙，較去年同期少63％；高盛每股獲利2.58美元，減少61％；大摩減少59％，每股獲利1.03美元。估計美國四大證券公司今年首季撥備130億美元，較去年第四季121億美元更大。

　　金融市場漸進入少做少錯、唔做唔錯期！貝爾斯登嘅情況媲美八十年代後期，九十年代初期嘅Drescel Burnham Lambert及Kidder Peabody事件，進入「有秩序地破產」，以免債券市場及房地產市場受過大衝擊。透過JP摩根大通之手，聯儲局共接管貝爾斯登330億美元資產，然後一步步响市場賣掉，以免引起太大波動。

請尊重熊市

　　資金繼續退出美元資產。全球外滙儲備64％仍係美元，過分向美元傾斜；現今各國央行皆在減少美元响在外滙儲備所佔百分比，大部分策略係「止當候贖」（即唔會拋售美元，但唔再購買美元）。整整二十七年，美國人利用中國改革開放政策去壓低CPI升幅，令利率下跌、資產價格上升，然後向全球借錢消費。大貸款戶包括日本、中國大陸、香港、台灣、南韓及中東。2006年7 月起美國房產唔再升值，去年10月起美國股票唔再吸引，全球進入向美國追債嘅時代！資金不斷由美國流走，美元滙價自2002年起進入有秩序下跌期。

　　今天係過去嘅延續；將來係今天嘅延續。1973-74年股災、1981-82年收回香港主權、1987年10月停市、1989年六四事件、1994年墨西哥危機、1997年亞洲金融風暴、2000年科網股爆破。股票市場邊段日子係冇危機嘅？能夠度過者便生存下來，甚至可以長大；無法度過者便被淘汰出局。

　　去年11月起我地又再面對另一危機，叫做次按危機，情況亦一如過去，能夠度過者生存下來，不能度過者被淘汰出局。未來回首2007年11月，同1973 -74年、1981-82年、1987年10月、1989年「六四」、1994年墨西哥危機、1997年亞洲金融風暴及2000年科網泡沫爆破，又有何分別？畀多點耐性，對熊市多加尊重，熊市一如牛市，最終係會過去嘅。好好保護你嘅資本，以便日後用作謀取利潤。至於呢個熊市有多深多長？事後才知道。

　　1816年英國係全球第一個建立金幣本位制嘅國家，將黃金由貴金屬變成法定貨幣（過去黃金只用作實物交易）。黃金變成金幣，大大方便其流通、支付及貯藏價值。

　　第一次世界大戰爆發後，為戰爭需要，各國發行紙幣，取代黃金地位。

金價升降繫於油價

　　第二次世界大戰結束，以英、美為首嘅國家訂立布列頓森林體系，英國同美國成為「金庫」，再以黃金作儲備發行美元及英鎊，各國再以美元或英鎊作儲備發行本國貨幣。其後英國因無力兌換英鎊，留下美國獨力支持35美元兌一盎斯黃金。

　　進入六十年代，各國將大量美元兌為黃金，美國漸漸支持唔住，1971年8月5日美國宣布停止兌換黃金，1971年12月宣布38美元兌一盎斯黃金（但美元不可兌換黃金），進入雙價制，即金價由市場決定，38美元兌一盎斯黃金只係「官價」，即1972年起金價開始自由浮動。1974年12月金價見200美元回落，1976年見103美元，再升至1980年850美元；之後再跌至1999年252.8美元，到2002年仍無多大起色。直到2004年第三次石油危機爆發，金價才狂升到2008年升穿1000美元。

　　過去二百年，都無法證明黃金有保值作用。金價1974年見200美元、1980年見850美元，都同石油危機有關，一旦石油危機結束，金價又大跌，呢次亦唔例外。未來金價升降由油價升降決定。