2008-03-07

內地房策借鑑香港

　　3月6日，周四。恒生指數升228.39，收23342.73；成交695.53億元。3月期指低水，收23170點，升20點；4月期指收23149點，升29點。低水及倒掛現象又出現。

　　花旗推介平安保險（2318），目標價78.5元，去年每股獲利估計2.07元，上升63.4％，O二十四點九倍；今年每股獲利2.09元，上升0.9％，O二十四點七倍；今天股價升4.6％，見59元，因股東大會通過發債170億美元方案。國壽（2628）亦升2.1％，收29.25元，董事長楊超計劃向外國戰略投資者出售股份。中海油（883）升3.2％，見12.24元；中石油（857）升2.4％，至11.04元；華晨中國汽車（1114）升4.1％，見1.52元；國泰航空（293）跌2.6％，至15.9元，因花旗建議拋售。中煤能源（1898）升2.2％，見15.22元，公司計劃增產17％；百盛集團（3368）跌6.2％，見71.35元，因大股東計劃出售五億七千八百四十萬元股票，每股作價70元。永隆（096）跌5.3％，見84.9元，JP摩根大通降評級。

CDO市場再受壓

　　滬深A股升1.22％，收4685.03。平安保險升7.9％、國壽升4.9％、中金黃金升2.8％、雲南銅業升3.1％、中信證券升3％、海南航空升2％。

　　歐羅創新高成1.5345美元，估計歐羅利率維持不變。

　　美國信貸市場又再惡化，CDO市價繼續下跌，因各銀行減持CDO，令呢個總值1.5萬億美元CDO市場進一步受壓。唔少銀行年結日期係12月31日，已為手上CDO大幅撥備，踏入2008年第一季CDO價值又下跌，銀行今年第一季業績須進一步撥備。

　　美國係咪陷入衰退？畢非德認為是也；至於技術上而言係咪衰退（即連續兩季GDP負增長），我地唔知道，亦無多大關係。2000年3月至2002年10月技術上而言美國並冇衰退，但對科網股投資者而言已經苦不堪言。

鬍鬚曾時也命也風水也

　　3月18日將出現第六次減息，代表貝南奇認為美國經濟仍然有病需要服藥。我老曹有時都幾同情貝南奇，因為泡沫係由格蛇一手炮製，卻由貝南奇去承受。一如香港樓市泡沫係由中英聯合聲明（每年賣地五十公頃）一手製造，卻由白眉董去承受一樣。白狗偷食，黑狗當災。前人種樹後人收，陰功積落兒孫受。例如阿松做幾年財爺，致力搞好香港經濟，卻因買車事件下台；呢幾年香港經濟果然好番，鬍鬚曾一上台便可派糖，成為民望最高財爺。時也命也風水也，有時唔恨得咁多。

　　People see what they want to see，例如淡友只睇見利淡因素，好友只見利好一面。傳媒只報道佢地想報道新聞，而非讀者想知道消息。世上人人都有偏見，唔好自以為客觀。世上冇一個人係客觀，因為客觀本身已經係一個立場。我老曹亦從來唔客觀，只相信理性分析、獨立思考，才決定自己立場，然後堅持己見，直到自己分析被證明錯誤為止。投資泰斗彼得林治話，十單中睇六單已經犀飛利，因此有60％睇已好開心。

　　美國係咪陷入衰退？Applied Industrial Technologies主席認為何來衰退？該公司去年營業額上升5％，邊際利潤在擴闊，相信今年業績表現更佳。

美元家視貝南奇為仇人

　　美國係咪陷入衰退？高盛證券主要分析員奧尼爾則認為：「美國唔係一早進入衰退咩？」。美國樓價回落漸向歐洲擴散，最後影響中國、印度及其他發展中國家……。

　　由此可見，唔同行業、唔同人，對今年美國經濟亦有唔同見解。邊個客觀、邊個主觀，又點樣一一分清楚？

　　貝南奇眼中，依家最大挑戰係資產價格萎縮令破產率上升，而非通脹，依家佢正在奮力抗戰。黃金好友一定視貝南奇為最佳盟友，有佢做聯儲局主席，金價見1000美元真係指日可待也；白金今年內已上升46％。美元家則視貝南奇為仇人，佢領導下，美元愈來愈唔值錢。

　　道指如以美元購買力計，由1966年高點回落到1982年8月低點，跌幅高達70％，但以指數計回落不足20％。上述叫做「睇唔到崩潰」。

　　2000年至今，標普五百指數表面上睇係上升，甚至去年10月見高位；一旦改為以歐羅計，卻已回落37％，如以金價計則回落60％，又係今時今日另一齣「睇唔到崩潰」。

　　趨勢係你最好朋友。如不了解大趨勢，只睇走勢有如不辨方向小子大海中船。只係有智慧不如趁勢，講就易、做就難，尤其面對轉勢日子。例如去年10月由牛轉熊時，你有冇因應趨勢改變而改變？淡市不出三（個月）；經過11月、12月及1月下跌，今年1月22日起極有可能進入熊市二期，可以炒上落市，只係上落市從來唔易玩；相信呢段上落市日子十分長。

　　美股大牛市由1982年開始、2000年結束。2000年3月24日起至今每年平均回報率（包括股息）只有2％；情況有如1966至82年。2000年3月至02年10月美股係跌市；2002年11月至07年10月係牛市，去年11月起又再回落。1966至82年共十六年，由2000年起至今只行八年，理論上美股仍有八年上落市。此乃點解「買入後持有」策略自2000年起美國不管用（上述策略早1997年9月起香港已不管用）。2002年10月美股較2000年3月指數低49％，2007年11月起回落，跌幅應少於上述幅度。1966至82年投資策略係高賣低。呢次回落，金融股並唔使考慮，短期炒能源股同資源股之後，又炒乜？

　　中國人民銀行行長周小川話，政府係鼓勵國內居民對外投資，過去各種限制及審批措施慢慢都要減少或取消，但具體一項措施推出要適時適度。

　　國家外管理局去年8月20日宣布港股直通車計劃，當天恒生指數22817點，其後恒指直衝上10月30日31958.41，溫家寶總理叫停直通車計劃，到家仍未實行。今天周小川被問及此事時話，中國GDP中，儲蓄率比較高，如果都用到國內投資，經濟會過熱及產生產能過剩。呢種情況下，必然有相當一部分蚊年投資到國外。但仲有好多措施要推出，任何措施都應該適時適度推出，但呢個方向唔會動搖。周小川更表示，依家國內對外投資已有多種渠道、多種方式，亦唔一定非要投資港股不可，仲有日本、倫敦及新加坡等多個市場。

恒指出現長方形走勢

　　從周小川講話，可歸納出以下幾點──一、國內居民對外投資限制將一步步減少甚至取消，此乃國策，唔會改變。二、一項措施推出要適時、適度。去年8月20日外管局公布港股直通車計劃，代表中央政府認為恒生指數22000點係適時、適度。10月30日當恒指升到31958點時，溫總理叫停，代表中央政府眼中，上述恒指係唔適時、適度。即恒指如重返22000點時，唔排除直通車會開出。從呢點睇，港股最大可能性係出現長方形走勢【圖】。

　　中國住房改革起源於二十年前。最新一期《瞭望》周刊檢討二十年中國房改缺陷，包括：甲、在住宅體制轉換中矯枉過正、甩包袱過速、全盤市場化，加上保障體系嚴重缺乏，對百姓而言，面對高房價有切膚之痛。乙、城市拆遷過速，導致大量被動剛性需求集中釋放、衝進市場，加劇供求緊張，補貼及安置唔到位，地方政府利用房產作為資金來源，成為商品住房政策下最大獲利者，開發商次之，跟住係商業銀行。由此便不難理解中央政策無法落實理由，結果造成土地資源濫用、消費力透支、經濟過熱等問題。

　　中央政府經過上述教訓後，呢次十一屆全國人大會議上政府工作報告中強調住房問題。呢次係繼1998年第二次住房體制改革後另一次大改革。

　　十一屆人大會議上，總理溫家寶強調為中低收入階層提供地積比率高住宅大廈，今年將投資68億元人民幣興建廉租屋及經濟房，較一年前多33％。至於中產，將提供多渠道財務協助佢地購買較細單位住宅，以解決市民居住問題，閒置土地將回收……。

內地樓市將進入雙價制

　　未來中國房屋政策愈來愈似以前香港，既有廉租屋（類似香港公屋）亦有經濟房（類似香港居屋），亦有專為中產興建較細單位住宅（類似香港PSPS，即私人參建居屋），私人發展商可集中發展中上家庭住宅及豪宅。換言之，內地樓市將類似香港樓市進入雙價制，居屋市場價廉物美，但買家必須通過入息審查屬中低收入階層才可購買，連居屋亦買唔起者可申請廉租屋；至於中上層人士及有錢家庭，可購買私人發展商興建住宅。

　　香港家庭分布，係35％人口住公屋、10％住居屋、55％住私人住宅（其中少於10％係豪宅）。新加坡冇廉租屋，85％人口住組屋（類似香港居屋，必須係新加坡人及有入息限制），只有15％人口住私人興建豪宅。相信中國房屋計劃將以經濟房（即居屋）為主，由於廉租屋必須政府補貼，估計供應唔會好多（社會結構中少於20％人口係貧窮，即居住香港公屋者，有50％係唔應該再住公屋，享受政府補貼）。我老曹意見係，15％社會人口住廉租屋、45％人口住居屋、40％住私人興建住宅，咁就最恰當，即係介乎香港同新加坡之間。