2008-03-14

死都嚇番生

　　3月13日，周四。恒生指數跌1121.12，收22301.64；成交1068.36億元。3月期指低水，跌1255點，見22095點，睇將考驗21700點支持，千祈唔好估，只要等。熊市中，只能將30％資金投資（70％現金或外幣），因為全球經濟在惡化中。美元已跌穿100日圓；1995年至今，每次接近100日圓時，日本央行便入市拋售日圓，總共四次；但呢次唔得，因為日本央行仲未有人出任行長！6月22日至今日圓兌美元升值24％（跑贏人民幣升幅）。日圓先生木神原英資認為，美國進入衰退機會已超過50％；G74月12、13日華盛頓開會，到時可能聯手支持美元，但遠水救不了近火。

放虎歸山後患無窮

　　今天控（005）跌2.2％（即三天共跌6.6％）、中國銀行（3988）跌4.3％、中國石化（386）跌8.4％、國泰航空（293）跌4.5％、信置（083）跌10％、招商局國際（144）跌11％、香格里拉（069）跌8.5％，中國鐵建（1186）首日上市，較招股價升12％，報12元。法國興業證券交易員Andrew Clarke話，佢地有D客戶擔心沙士再現，因港府緊急宣布幼稚園及小學停課兩周……。

　　滬深三百指數跌2.57％，收4198.96。南方航空跌10％停板、東方航空跌8.3％、國航跌7.1％（香港跌5.3％）、寶鋼跌4.9％、馬鋼跌5.1％。

　　1980年雪茄伏不惜付出經濟衰退代價，才馴服通脹。2003年，格蛇減息到一厘後，又再放虎歸山，自然後患無窮。過分寬鬆信貸形成樓市泡沫（一如1990至97年香港），當樓市泡沫爆破，自然引發次按危機，貝南奇又想利用減息去抵銷，世界有咁便宜咩？G. William Bernanke同七十年代後期聯儲局主席G. William Miller同名，只係唔同姓，但做手法卻如出一轍。八十年代雪茄伏將利率推高至20厘（香港22厘），才馴服通脹呢頭怪獸；今天美國CPI升幅4.11％，即美國利率必須推高至6.25厘或以上，而非依家2.25厘。Miller時代美國帶來滯脹（經濟呆滯不前，物價狂升），仍然唔算太差；貝南奇正引發通縮（九十年代日式經濟），我地將面對信貸緊縮（Credit Crunch），大量呆壞賬出現而引發企業倒閉、失業率上升；情況有如1997年下半年香港。各位請扣好安全帶，因前路十分顛簸。

只能忍耐再忍耐

　　過去六個月，油價、金價、玉米價、小麥價狂升，股市同利率則狂跌，尤其金融股同航空股，後者更因油價上升而受影響。後市展望，如美國經濟真係陷入日式衰退，會否連油價、金價、玉米價、小麥價亦回落？去年股市跌10％（或15％）後而唔肯嚴守止蝕者，面對家環境真係進退維谷。有邊個事前可知恒指三個月內（去年10月30日至今年1月22日）跌10000點？今年1月22日至今反彈又乏力至此？

　　聯儲局欲阻止次按危機惡化，可能製造另一個資產泡沫；基金、石油及其他商品過去六個月正迅速泡沫化。

　　2006年油價一度見75美元一桶，然後迅速回落到2007年1月52美元，部分人以為石油牛市已完，但去年8月聯儲局大量注資，令油價又再狂升超過100%（去年9月至今升32%）；油價帶動下金價接近1000美元。

　　過去六個月投資者不但股市血流成河；即使唔投資，率上（如以歐羅或日圓計，港元跌幅唔細）亦損失好大。跌幅超過50%股份比比皆是，情況漸漸同2000年3月至03年4月相似。尋底從來唔易，歷史亦告訴我地冇人可以成功，睇除忍耐外，可以做事極少。

　　次按危機後，必令借貸成本上升（雖然聯儲局減息）及令企業純利走下坡，消費者消費力減少，影響正由美國向全球擴散，而非decouple（兩不相干理論真實面前不斷瓦解）。2月份中國鋼鐵產品出口美國較去年同期減少29％。中國今年2月份出口到美國只有155億美元（1月份192億美元），美國房地產不景氣漸漸影響中國貨入口美國（中國21％總出口係出口到美國）。

　　中國鋼鐵工業協會會長張曉剛話，與武鋼、包鋼、首鋼、太鋼四大全國鋼鐵業代表傾過，鐵礦石今年4月1日漲價65％後，中國鋼材已失去國際競爭力！

　　由於效率問題，今年4月1日起日本由澳洲進口鐵礦石到岸價每噸90美元到93美元之間，升幅60％；從巴西進口到岸價94美元左右，上升30％；反之，中國漲幅皆超過65％，理由係日本及南韓從澳洲進口海運費只有6美元到10美元一噸，中國卻要40美元；日本及南韓從巴西進口海運費只需40美元一噸，中國卻要80美元。因為日本及南韓早進入大批購買、大批運送，因為鋼鐵廠已集中；中國鋼鐵廠仲係各自為政，小批購買、小批運送，形成運費較日本及南韓高一倍、兩倍甚至三倍，加上生產流程及工藝落後，中國生產一噸鋼要一點五五噸鐵礦石，人家煉一噸鋼只需一點三噸鐵礦石，令中國生產成本較日、韓高好多。

凱雷狼胎難救

　　過去中國工資低優勢，近年已被高運費、生產流程及工藝落後蠶食。同樣一噸鋼，日本及南韓生產較中國便宜。何況煉鋼用「熱能煤」（Thermal coal）澳洲Newcastle港口離岸價132.05美元一公噸，較一年前升一倍，而且缺貨，供應較鐵礦砂更緊張。自去年起中國開始入口煤多於出口。

　　凱雷217億美元按揭證券，已面對被清盤威脅。德銀及JP摩根大通本周開始出售該公司抵押資產，到本周一止已售出57億美元，仍有166億美元按揭證券伺機出售。其他貸款機構包括美林及貝爾斯登等共十二間投資銀行（或金融機構），亦打算出售凱雷抵押品。凱雷主力係三A級房利美及房貸美債券，2006年才開始業務，去年因唔切集資，今年已被銀行清盤。該公司只有6.7億美元客戶資金，卻投資217億美元按揭證券，即係槓桿比率達三十二倍，認真狼胎，睇落幾難救得番。上周四股價下跌60％，上周五停牌。本周宣布無力應付銀行call孖展，而四間銀行開始出售其抵押資產，復牌後股價再狂跌。

　　貝南奇設計TSLF（Term Securities Lending Facility）今年3月27日才開始拍賣國庫券，集資2000億美元，用以向各銀行及證券公司購買三A級「按揭證券」（金融機構必須三十天至九十天內贖回）。一位唔願透露姓名美國銀行家話，聯儲局竟然接受「接近破產」按揭證券來發貸，係佢成世人都未見過全球任何中央銀行曾做過之事，簡直死都嚇番生！呢次係美國聯儲局成立以來做得最出位事，如果呢招亦唔靈，擔心已經冇更好「二號計劃」矣。呢次貝仔鋌而走險，如果失敗，只有將利率減至1厘，以及任由美元價繼續貶落去。香港銀行家話，呢次寒冬真係要，你地準備好禦寒之衣未？各位係咪仍然住條泳褲準備過冬季？咁就好易感冒矣。對沖基金已在流血（部分更破產），專家估計約有三分一對沖基金未來可能被淘汰出局，你信唔信3月18日減息可阻止上述事件發生？

商品泡沫遲早爆破

　　過去四年恒生指數由8300點升上32000點，升幅285％；如回落前升幅50％，恒指可以下跌12000點；如回落前升幅61.8％，跌幅更大。依家恒指平均O仍高達十六倍，只係合理O，而非偏低O；國企O更高，代表距離熊市三期仍遠。

　　美國按揭銀行家協會宣布，至3月7日止個星期，申請新貸款及再按揭貸款減少1.9％。三十年期固定利率貸款（唔包括手續）利率6.37厘，較上周升0.39厘，係2007年10月12日見6.4厘後第二高；十五年期係5.72厘（上周係5.26厘），ARMS貸款6.72厘（上周係5.83厘）。換言之，美國借錢買樓利率繼續上升中。

　　油價、通脹、美元已陷入惡性循環。油價上升推高CPI，CPI上升推跌美元，美元價下跌又刺激油價。雖然國際能源機構（IEA）宣布OECD成員總體原油庫存水平顯著上升，可足夠五十三天用，油價卻升上110.2美元，十分非理性。油價、金價、農產品等商品不斷泡沫化，遲早爆破，又為投資者帶來另一虧損（通脹極限係通縮）。例如1973至74年之後係通縮，1980至81年後亦係通縮，2000年後亦係通縮。巴哈馬鄧普頓（John Templeton）話，佢開始睇到商品價格進入爆破期，未來可能回落50％。2001年至今油價上升500％、銅價上升300％、工業用金屬平均上升400％，一旦泡沫爆破，將係另一場災難。

日圓進入冇王管時代

　　天有不測風雲，日圓升至100兌1美元，日本央行理應入市干預，但日本上議院否決首相提議武藤敏郎出任行長，首相短期內唔打算提議另一人選，即日本央行下周四開始冇行長；日圓進入「冇王管」時代！上述消息令日經平均指數跌3.33％，見12433點，或去年7月31日以來下跌28％（同期美股道指跌8.3％）。日圓升上99.7兌1美元，1995年以來最高，如日本央行唔入市干預，擔心好快見90日圓兌1美元。