21-3-2008

通脹通縮如陰陽共生

3月20日，周四。恒生指數跌758.72，收21108.22；成交833.31億元。3月期指低水，跌822點，收20819點，即後市繼續睇淡。

　　本港2月份CPI 升6.3％（1月份升3.2％），理由係港元追隨美元貶值，其次係中價樓樓價同租金由去年9月至今齊齊上升25％及20％。

　　滬深三百指數則出現V形反彈，升1.8％，傳降低股票交易印花稅。

負利率屬成本推動

　　金價則挫5.9％，收945.3美元，係2006年6月13日以來最大跌幅；白銀跌7.6％，收18.445美元；白金跌4.1％，收1887美元。金融市場係咪進入通縮期?!一旦確認衰退，便會由通脹轉為通縮，呢方面各位要小心！

　　恒生指數去年10月30日見頂，通常要等六個月到九個月後，住宅樓價才見頂；今年3月已有個別投資者減價出售手上物業，似乎急咗D。沙田第一城唔少住宅單位已減價 10萬到20萬元（一位買家响今年1月以158萬元買入，願以150萬元出售，賬面虧損8萬元，連印花稅及佣金蝕13萬元）。去年9月至今湧入物業市場嘅資金，以投資客為主而非用家，理由係銀行減息。本港住宅樓價係咪响今年4月到6月見頂（恒指見頂後六個月到九個月）？大家不妨留意吓。

　　同樣負利率，由於產生方式唔同，結果亦互異。至於減息係咪睇好樓價嘅理由？請參考2001年1月2日至03年6月嗰次減息潮。

　　全球地產股指數過去兩季都係回落，其中又以香港跌幅最大，約28.4％；日本第二，跌26.8％；澳洲第三，跌24.3％；新加坡亦跌16.4％。內地內房股跌幅亦唔細（但冇內房股指數）。地產股通常較地產敏感，易升易跌。

　　今年第一季外資繼續從亞洲區撤走（台灣係少數例外）。無論中國、香港、印度、南韓、馬來西亞股市都受外資拋售，理由係投資者擔心美國次按危機下一波將侵襲亞洲地區（歐洲已受打擊）。各位請扣好安全帶。

　　唔好被熊市中嘅反彈所迷惑。美國減息0.75厘、房利美及房貸美有能力再借多2000億美元等等措施，只能減慢樓價下跌速度，以完成有秩序地下跌。兩間公司去年12月底已持有（或擔保）1.5萬億美元樓按，依家增加2000億美元而毋須增加股本，即可額外提供多13％樓按，足夠咩？美國住宅樓按市場大約 11.5萬億美元，依家增加2000億美元，即增加1.73％借貸能力咁多多，真係四兩撥千斤，怪唔得美股只升一天咁大把（港府過去唔協助負資產人士，令本港樓價下跌65％後反彈100％，下跌時間六年半；日本政府全力幫供樓人士，但東京樓價下跌75％，需時十三年，至今只反彈25％）！Feeling good及saying good，係人之常情，但冇乜用。

　　由VIX指數睇，股市由短期超賣引發反彈（俗稱熊腳），但並非見底，情況一如今年1月22日。唔好將反彈同見底混為一談。

30%資金入市止痕止癢

　　油價亦出現大幅回落，5月期油見101.66美元，4月期油104.48美元，較3月17日111.8美元回落唔少；小麥價亦回落。當經濟正式進入衰退期，商品價格會回落而非上升，因為市民減少消費。通脹對新興國家打擊較大，對OECD國家打擊較少。以香港為例，月入1萬元嘅家庭，有60％收入花响食物上；月入10萬元嘅家庭，只有12％收入花响食物上。當食物價格狂升令CPI上升6.3％時，低收入家庭所受壓力一定較高收入家庭大。同樣道理，印度同中國所面對嘅通脹壓力，必定較美國、歐洲及日本大。

　　响倫敦嘅JP摩根證券公司話，大量投資資金正由股票及債券市場流入商品市場。今年2月 28日止共三百六十一隻商品基金持有980億美元商品合約（去年12月共三百四十五隻基金持有800億美元商品合約）。商品市場相較於股票市場或債券市場細好多，只要2％或3％資金由證券市場及債券市場流入，已足以令商品價格爆炸性上升。我老曹認為，商品價格已開始中期調整，宜減持能源股及拋售金礦股（見上兩個星期分析）。

　　Patient should be rewarded！响熊市中揸住現金（或等同現金投資）癡癡地等好似好傻，我老曹建議將30％資金入市，目的係「止痕止癢」，而非賺錢（熊市中賺錢係極之困難嘅事）。利用30％資金去炒沙炒石、炒金炒油，但千萬不可動用餘下70％現金。一、唔好再信買入後持有策略。此策略由1967年開始生效，到1997 年結束。1997年後仲有幾多人靠長線投資而發達？二、Dollar-cost Averaging（或叫月供投資法），即每月將一筆定額資金投入市場。1982年起我老曹開始每月一金幣，到2001年一共買入二百四十個金幣，平均計仍蝕本。好彩當金價升上280美元時（寧買當頭起）吸入五百兩，320美元時再吸入五百兩；升上680美元放出五百兩，升上720美元再放出五百兩。見 1000美元後將二百三十個金幣亦放出，只餘下十個金幣用作提醒自己月供投資法係唔得嘅。三、分散投資不如集中投資，全神貫注。去年10月揸十隻股票同揸一隻股票分別唔係好大，除非你嘅分散投資係股票、債券、貴重金屬同房地產啦。四、抗跌力強嘅股份，只代表跌幅細一D，唔代表能逆市上升。五、股票便宜論。呢句最害人—貝爾斯登由去年1月170美元跌至今年3月12日60美元一股，係咪好便宜？本周卻跌落4美元！How cheap is cheap？平嘢冇好，千萬唔好奢望响廟街可以買到真嘅LV手袋或真嘅勞力士表！

蚊年係easy come, easy go。2007年8月17日恒指19386點，去年10月30日恒指31958點，依家又漸向19386點進軍。如將去年8月17日至今呢段日子切除，天下本無事，只係投資者玩完過山車後卻腳步浮浮，你好難話佢聽「天下本無事」。

　　由去年最高價計，美國住宅樓已失去2萬億美元市值，全球股市失去5萬億美元市值，未來會否因為美國減幾次息而抵銷全部影響？

　　通常通縮出現响美國大選之後，例如1980或2000年。如呢次通縮由2008年第二季開始，係歷史上少見，可以殺大部分商品好友一個措手不及。

　　2002、03年格蛇瘋狂減息，令美國GDP止跌回升，點解貝南奇唔可以？理由係2002、03年美國通脹率仍低，減息唔會刺激CPI大幅上升。2008年美國CPI已喺上升中，減息更令CPI加速上升。

　　2002及03年CPI剛開始上升，並未構成威脅，格蛇可利用減息刺激GDP上升。2007年第四季美國CPI已進入大升期，減息有如火上加油，加快CPI上升速度，卻未能令GDP止跌回升。

今年次季通脹變通縮

　　換言之，同樣係減息，响2002、03年係補品，但到咗2007年第四季至今卻只係火上加油。陰陽共生理論，相信貝仔唔會識，搞到面對大熱症仍用十全大補劑去醫，形成美國經濟火燒心嘅怪病。

　　通脹與通縮乃兩股唔同力量，卻係共生，任何一方都不能毀掉另一方。有如太極生兩儀，一陰一陽；陰盡陽生，陽盡陰生。太陰中有一點陽氣，太陽中亦有一點陰氣，雙生雙尅循環不息。

　　2000年至今金價由252美元升到過1000美元，升幅三倍；反觀道指至今只係上上落落；如以金價衡量，道指已回落75％。2000年42盎斯黃金換一股道指，今天11盎斯黃金已可換一股道指。八年後又點？值得注意嘅係，通脹之後係通縮，信貸創造能力隨次按危機爆破而進入收縮期。初期為逃避信貸收縮所帶來影響，資金由股市流向黃金；到今年第二季，黃金會否進入盛極而衰期？

　　同七十年代唔同，當年美國政府大印銀紙。呢次聯儲局並冇進一步增加貨幣供應，只係出售國庫券集資去購買流通能力較差嘅公司債券（mortgage backed bonds），唔構成通貨膨脹（流通貨幣增加），只令過緊嘅信貸變得寬鬆一D。簡單解釋，例如甲因信用不足而借唔到錢，乙有信用為甲做擔保，令甲可以借到錢，以濟燃眉之急，整個過程中並冇增加新貨幣。聯儲局响3月27日拍賣2000億美元國庫券資金借畀金融機構，但金融機構須提供抵押品（mortgage backed bonds）。去年9月至今美元滙價下跌、金價上升、油價上升，係投資者對前景看法改變，而非通貨膨脹（流通貨幣增加）、引發資金由股市流向其他市場嘅結果，而非聯儲局增加貨幣供應（聯儲局只係減息兼提供多D信貸）。

　　今年第二季經濟極有可能由通脹轉為通縮，呢點可由波羅的海乾貨輪指數（1985年才有，包括二十六條航線運費，可反映原材料需求）去年11月出現急跌後，今年1月回升，但上周開始又再回落。指數回落理由有二：甲、船隻供應量上升令船租回落。乙、對原材料需求下降令船租回落。1985年至今，指數跌幅超過35％共九次，只有兩次事後係原材料價格回落期。呢次波羅的海指數回落，到底係因為船隻供應上升抑或係原材料需求開始下降?!

金融危機必有大公司破產

　經濟周期可分為四期。一、信貸寬鬆，股市仍在低潮期，例如2002、03年。二、信貸寬鬆，股市在上升中；例如2003年4月至07年10月。三、信貸收緊，股市仍在高潮；例如 2007年8月至10月。四、信貸繼續收緊，股市進入下降軌；例如2008年3月起。相信我地依家已進入第四期。唔少人將信貸（Credit）與利率混為一談，此乃1971年前美元仍同黃金掛鈎時嘅事。自從1972年起美元滙率浮動以來，信貸與利率高低關係唔大，例如2004年6月至06年中係加息期，但信貸仍十分寬鬆。2006年6月至07年7月係利率穩定期，但信貸卻逐漸收緊。

　　技術上睇，股市已進入熊市第二期，滿街鮮血入市時機。到底要投資者流幾多血才係滿街鮮血？金融危機一如科網股泡沫爆破，最後必有大公司破產才結束，例如當年英隆事件。呢次次按危機，最終邊個破產？

　　1989年6月至1997年8月，負利率令本港樓價上升五倍；去年9月起另一負利率期，唔少人相信可重演1989年6月至97年8月嘅情況。負利率嘅產生可分「需求推動」（Demand push）及「成本推動」（Cost push）兩種。1989年6月至97年8月嗰次係需求推動（本港打工仔年年加薪雙位數）。至於呢次，擔心係成本推動（由2003年9月孫九招限制土地供應，令地價貴、然後樓價貴；反之，2003年9月至今打工仔加薪有限）。