2008-03-06

美國政府無賴！

　　3月5日，周三。恒生指數跌5.53，收23114.34；成交797.7億元。3月期指高水，升149點，收23150點，睇港股應進入熊市二期，即1月22日起短期大市見底，進入個別發展期。港機工程（044）跌11％，見150.9元，雖然去年純利升27％；中國海外（688）跌2.7％，收13.82元；招商局國際（144）跌2.9％，收37.05元；中海油（883）跌1.8％，收11.9元；中聯通（762）升7.5％，收17元；網通（906）升6.2％，見24.05元，因高盛推介。東方海外（316）跌6.3％，收45.45元；永隆（096）跌5.6％，收89.65元，因純利跌15％。

本金年增長15%唔容易

　　滬深三百指數跌0.91％，收4628.72。寶鋼跌4.7％、武鋼跌6.3％、馬鋼跌3.1％、山東黃金跌3％。擔心美國經濟放緩將壓抑原材料需求。

　　愛爾蘭住宅價格去年跌7％，德國下跌6％、英國仍升9％、比利時升7％、法國升4％。愛爾蘭過去因升得多，去年回落正常；德國2006年已跌0.1％，去年又跌，令人失望；三年前我老曹曾考慮投資德國物業，睇完該國《租務法》後話怕怕。任何投資都必須深入了解調查，三思後才決定，不能魯莽行事。

　　美國有超過一萬隻基金。2006年獲利超過15％基金約一千四百隻，成績幾好。2007年又點？獲利超過15％基金只有二百七十隻，較2006年減少80％，其中大部分係貴金屬基金、能源基金及細價股基金。換言之，唔好以為本金每年增長15％係一件好容易事。

　　股價（P）由純利（E）及純利增長率（G）決定，但「E」及「G」卻唔容易掌握。

　　過去一年，小麥由3美元一蒲式耳升至今年一度見17美元，一年內升幅五倍，真係難以想像！主因係殊仔愚蠢乙醇計劃刺激玉米需求，加上去年全球天氣轉壞，令到全球糧食價格急升。

　　回望過去四十年，香港樓價由1967年50元一呎升至1997年8月12000元一呎，上升二百四十倍；金價由1969年初35美元升至1980年1月850美元，上升二十三倍；利率由1980年中21厘減至2003年中1厘，下跌95％；油價由1973年10月1.5美元一桶到2008年3月103.5美元一桶，上升二十八倍。恒生指數由1967年中67點到2007年10月32000點，上升四百七十六倍。只要捕捉到任何一個大浪，都可令人發達。

寧可失去一切不可敗壞家聲　　我老曹擒日搭的士，的士司機與我老曹同歲，佢大吐苦水曰，當年的士牌18萬元，佢冇膽供；住宅樓幾萬元一層時冇買，亦好後悔，到今天只能依靠月入萬零蚊，好彩身體仍佳頂得住。我老曹睇睇佢，再諗諗自己，到底係我老曹較別人幸運，抑或我老曹較別人聰明？1967年踏足社會做事至今超過四十年，工資收入有幾多？再計計1969年我老曹住5000元到銀行開支票戶口，學人地投資股票兼買樓，哪方面收入較多？答案係5000元資本投資回報（本利和），係自己四十年打工收入四倍！應驗七十年代一位世伯句──「發達容易、搵食艱難」及「冇人打工發達」。由此顯示，智慧理財十分重要。

　　2002年10月面對科網股泡沫爆破，年聖誕節唔少美國人祈禱：「上帝啊！給我多一個泡沫吧。」上帝果然天從人願，畀美國人一個地產泡沫。可惜美國人忘記2002年聖誕節禱告，以為好日子長存，結果2007年8月上帝十分憤惱，發出第一個警告，點知美國人仍當佢冇到；2007年11月當災難來臨，我地又可以怪誰？當樓價回落時，金融業缺點便逐步浮現出來。你可以裸泳，但退潮前必須番衫，不然便會自暴其醜。

　　港人又何嘗唔係？2003年4月到07年10月享受咁長歡樂時光，忘記當時鐘敲打十二下時，馬車將變回南瓜、駿馬將變回老鼠，一切打回原形──灰姑娘仍係灰姑娘。

　　貝南奇要求美國銀行家減免樓按者本金，減少喪失抵押品贖回權。問題係減少樓價由邊個支付？係銀行股東還是納稅人？利率下降已減少供樓者財政負擔。中國人話「冇咁大個頭唔好戴咁大頂帽」，供唔起樓點解要買樓？作為政府有責任解決人民居住問題，但冇責任幫人民做業主。2006年年底美國已有7％樓按者變成負資產，2007年年底根據高盛及大摩估計已上升到21％，或一千零五十萬個家庭。如樓價再跌15％（過去樓價調整一般達25％），將有2.6萬億美元樓按陷入負資產行列。

　　過去一百年美國迅速冒起成為世界領袖，來自背後三個C。第一個C係資本主義（capitalism）。鼓勵競爭，容許優勝劣汰，最後結果必然係資本集中少數人手中，形成貧窮差距擴大。第二個C係基督教精神（christianity）。倡導人要誠實、正直及可信賴，並向弱勢社群提供援助，減少窮人壓力。第三個C係憲法（constitution）。任何人、機構甚至總統及政府都必須守法。呢次次按危機，令人質疑美國大銀行及大證券行誠信。貝南奇拚命減息壓低美元價，令人感覺美國政府都幾無賴（四十年來我老曹第一次用「無賴」去形容美國政府）。我老曹細個時母親教導：仔，寧可失去一切，都不可敗壞家聲。永遠唔可唔屬於你東西。各位可能認為上述說話好老土，但今天我老曹教導下一代都係一樣，寧可失去一切，都不可敗壞家聲！貝南奇講話，令人再次感到美國人「無賴」！樓按者點可以咁無賴，輸賴贏要？

日央行好快干預日圓

　　今年日經平均指數下跌15％，因美元兌日圓回落8.2％，見102.62日圓。以豐田為例，弱勢美元令其去年第四季少賺1.94億美元，今年第一季影響更大；南韓好D，韓圜兌美元只升值5％；中國人民幣只升值2.5％，因此影響又較南韓少（反而勞工法影響更大）。日本財長表示，對日圓近日升值不滿，相信好快會下令日本央行入市干預，阻止日圓升穿100關口。加拿大央行宣布減息去阻止加元進一步升值。澳洲宣布呢次係最後一次加息。歐盟政府要求美國政府支持美元價，讓美元唔再兌歐羅貶值。美元貶值係咪快完成？3月18日減息後才知道。

　　彼得林治認為，投資市場，十次中睇六次已經了不起，冇人十次十次。投資要成功係點樣十次睇中六次中賺得大，睇錯四次中輸得少。就係唔好感情用事，其次係止蝕唔止賺，每次虧損10-15％時不要氣餒，傷心一天，第二天重返戰場。長痛不如短痛，投資就係學習接受短痛，唔好讓小虧損變成大虧損。

　　索羅斯認為，呢次衰退係過去六十年內最差一次，富國銀行主席認為，繼大蕭條後從未見過一次全國性房價咁樣跌法。波動股市中，風險往往超過回報。

　　唔怕米貴，只怕運滯。去年11月起港人面對米貴兼運滯，最近米價創二十年內新高。由於惡劣天氣，加上中國同印度需求上升，出口國如越南、埃及因存量跌至二十五年內新低而限制出口。全球共有二十五億「食米」民族，呢回真係食貴米，令人擔心捱唔起米貴地區將面對治安惡化。

又一鐵面無私——王岐山

　　人人都話滯脹。滯脹代表一方面停滯、另一方面膨脹。我老曹睇到經濟唔係停滯而係萎縮；未來唔係滯脹，而係通縮、通脹一齊出現，此乃信貸緊縮（Credit Crunch）後果。1974年12月至81年10月段日子才係滯脹。七十年代K增長率達60％，引發滯脹；反觀2001年1月至2004年6月K增長率只有24％，過去三年美國K增長率愈來愈慢。美國聖路易聯儲銀行主席話，過去三年，L年增長率5.5％、K接近零（M已唔再公布，因為太複雜）；至今為止核心通脹率仍然好低，只有能源及食品價格飛升。我地面對唔係滯脹，而係信貸緊縮；高油價、高金價及高食品價格理由係弱勢美元。股市回落理由係信貸萎縮；美國樓價回落理由亦係信貸萎縮。

　　王岐山係北京前市長，之前係銀行家，而且同全球各金融界領袖有良好關係。佢近年坐住白金升降機，相信將接替中國鐵娘子出任國家副總理。佢做銀行家時金融知識依家剛好用得，而佢過去亦曾幫助上海朱解決1998年國企債務重組。

　　1979年王岐山成為中央政府智囊團成員，協助中國走向改革開放；1989年成為建設銀行第二號把手，將該行改為商業銀行，2005年集資80億美元在港上市。1995年引入大摩，成為第一間進入中國投資銀行，組成中國國際資本公司。1997年香港主權回歸後經濟陷入低潮，兩間省政府支持國企宣布無力清還100億美元外債，佢下令廣東國際信託投資公司破產，令外資損失慘重並獲得教訓──貸款畀國企一樣要睇借款公司還債能力，唔好指望中央政府承擔；另將東江水收益注入粵海投資（270），協助還款。其後佢大力改革內地銀行，為中國金融業向外開放做工夫。沙士期間北京市政府一再隱瞞事實，令超過一百人死亡，幾千人受感染。佢出任市長後，協助醫院增加超過逾千張病床，處理超過一萬個病人，並充分同世界生組織合作將沙士疫情完全公開。冇耐之後，北京沙士受控制，問題解決，佢又立即參與2008年北京奧運建設。呢次升職，係協助中國面對美國經濟衰退（或放緩），同時解決內地通脹問題及改變內地貧富差距擴大。識得佢人都認為，王岐山係繼上海朱之後又一位鐵面無私。佢政策同溫家寶唔同。溫家寶政策如其名係「溫吞水」，王岐山則如其名「政令如山」。佢例如宣布價格控制去阻止通脹率進一步上升，媲美1994年上海朱宣布人民幣同美元掛，未來許升不許跌去抑制通脹。透過王岐山再次運用計劃經濟手段去阻止通脹率進一步上升，外資相信只係權宜之計，因為王岐山係支持改革放政策。1月28日雪災事件向全球顯示中國能源及電力輸送系統係幾咁脆弱，中國交通運輸系統根本上無法負荷GDP 10％速度增長。如中國以依家速度增長到2020年，中國將消耗全球50％煤，咁樣可能咩？唔搞好現在，點樣面對將來？

商品呈拋物線上升

　　滬深A股應不久將來發出熊市確認訊號（50天線跌穿250天線）。我老曹認為，環球化大環境下，只有時差（前後之分），冇兩不相干（decouple）可能性。新興市場不但升幅大，未來跌幅亦大，例如越南股市已由高位回落超過50％，以O計仍乏吸引力。中國GDP完成五年高增長後，總有三幾年低增長期，2008年可以例外嗎？去年中國人均收入達2500美元一年，相等於1951年美國、1970年日本，仍處於高儲蓄率、高投資期及私人消費上升期，呢段日子漸由出口帶動轉為內部消費帶動（一如八十年代至1997年香港）。去年12月中國零售業上升20％，係近十年內最好，轉型期通常出現短暫衰退期，例如1973至74年日本及1981至82年香港。所謂青黃不接期，即製造業出口業增長率放緩，但零售業及內需又未能完全取代。

　　過去六星期可用「狂牛」去形容商品價格，無論能源、貴重金屬、農產品價格，去年8月至今升幅都十分大；到底係需求推動抑或資金離開股市轉攻商品市場結果【圖】？

　　美國經濟進入放緩期，商品價格反而急升？有人認為係中國同印度因素。但點解價格去年8月前唔升，去年8月次按危機爆發後才升？上述項目已形成拋物線（parabola）趨勢。通常只有牛市三期，才會出現拋物線上升曲線，過去六個月商品價格上升，有可能係商品牛市第三期。大家都知道，拋物線上升，到極限時又可以出現拋物線回落，最近例子係本港國企指數，由去年8、9、10月上升，到11、12月及今年1月回落。

　　商品幾時見頂？甚至最專業投資者亦無法事前告訴你，但拋物線上升遲早見頂可以肯定。我老曹忠告係──遠離商品市場，沽售所有同能源、原材料有關股份。

　　引導群眾、追隨群眾、遠離群眾，乃成功投資策略三部曲。群眾轉角市出現前通常犯錯。