2008-03-12

商品價格係另一泡沫

　　3月11日，周二。恒生指數升290.3，收22995.35；成交889.95億元。3月期指低水，升86點，收22885點。港燈（006）再升5.3％、中電（002）升3.7％、中華煤氣（003）升1.6％、中海油（883）升2.1％、思捷環球（330）升5.7％。

　　國際能源局估計，二十七個國家今年對石油新需求只上升八萬桶一天，至八千七百五十四萬桶，上升2％，而非上月估計增加二十萬桶一天，理由係油價升上108.21美元，較一年前升83％。

熊市二期考工夫

　　標普及穆雖然已downgrade一萬隻次按債券，但ABX指數內八十隻三A級債券冇一隻被downgrade，上述八十隻債券由銀行大量持有，一旦評級下降，銀行又必須做更多撥備。

　　滬深三百指數升0.22％，收4441.18。中國神華升4.3％，收50.03元，係2月4日以來最大升幅；中煤能源升2.9％，收19.38元；平煤天安升6.4％，收44.34元；潞安環能升4.5％，收58.43元；煤礦股全面上升。浦發銀行跌2.8％，收35.45元；興業銀行跌3.5％，收37.69元；美的電器跌7.7％，收35.37元；上海汽車跌3.4％，收17.12元。

　　技術上睇，到1月22日止只完成熊市第一期，正進入熊市第二期，跌市約完成一半。如睇升降指數（A╱D Line），股市距離見底之期仍遠。熊市第二期玩上落市，但好考工夫。

　　美股大牛市由1983年開始。今天回望，當年領導股市上升股份如Commodore、Atari、TeleVideo、Wang Laboratories等高科技股，大部分已不知去向。雖然利率由1981年起大幅回落，但市場競爭激烈，如無法應付競爭，高科技股一樣被淘汰出局。

　　八十年代、九十年代泡沫一個接一個；反之商品價格卻一浪低於一浪。2000年起科網股泡沫爆破後，商品價格卻進入一浪高於一浪期。換言之，自1971年美元唔再同黃金掛後，我地一直生活泡沫之中，理由係1971年至今美國政府不斷增加美元供應；蚊年總要搵出路也。

恒指21700點有支持

　　我老曹認為，恒指21700點有支持，但唔值得太博，因為我地處於熊市，長期展望仍欠佳。熊市中，保本乃首要責任，最多只能動用資本30％入市（70％仍現金或外幣存款）。呢次熊市低潮估計明年才出現，因為唔少企業今年純利展望將被downgrade；今年第一季業績公布時，相信將十分醜陋，尤其係金融股。推動企業股價上升唔係因為去年業績佳，而係前景展望好，呢點要緊記。熊市中，“The market wants to take your money！”股票市場從來唔係遊樂場，好多時較賭場更殘酷。熊市由去年11月才開始，斷估冇咁快完結。去年11月至今年1月只係完成熊市第一期（獲利回吐期），之後係熊市第二期（炒上落市），最後才係熊市第三期（惡性拋售）。熊市二期一般較熊市一期長（即唔止三個月）。

應減持資源股能源股

　　減息唔能夠解決問題。2001年1日至03年6月減息期唔能夠，2007年9月開始減息周期同樣唔能夠。2月份起美國失業率開始回升，約一百萬人失去職位，但大部分人決定暫時抖而唔急於搵工，令失業率反由1月份4.9％降至2月份4.8％。

　　有人擔心通脹進一步上升，我老曹唔係咁睇。經濟循環研究所估計，通脹率短期內將見頂，唔排除今年第二季開始回落。我老曹建議減持（而非增持）所有資源股同能源股，包括黃金。美國全國房地產經紀協會指出，美國新屋銷售今年估計只有五十九萬間，較去年減少23.7％。今年新屋建造估計下跌25.1％，至一百萬間；明年再下跌2.7％，至九十八萬七千間，將令大部分廉價金屬、水泥等需求下降。依家商品價格係另一泡沫。

　　中國2月份CPI升8.7％（1月份升7.1％），創近十二年內高點，代表過去小幅加息力度不能抑制當前通脹壓力；上述升幅係1996年5月份上升8.9％以來最高。今年2月份食品價格升11％；燃料、動力價升9.7％，原油出廠價升37.5％，令汽油、柴油及煤油出廠價分別升8.7％、9.8％及11.4％；原煤出廠價升19.4％。大型鋼材升18.9％、中型鋼材升29.6％、小型鋼材升27.8％、線材升25.6％、中厚鋼材升18.5％。PPI亦連續第七個月上升，而且升幅擴大，代表今後更長一段日子通脹壓力仍居高不下；3月份數字應該較2月仲要高。

上周五越南宣布放寬外管制，讓貨幣加快升值，以減輕境內通脹壓力。人民幣今年只升值3％（兌歐羅及日圓更貶值），面對2月份通脹率咁高，壓力漸加重（今年2月越南通脹率達15.7％，係十二年內最高）。內地會否同樣讓人民幣加快升值？

　　今天中國再唔係一個貧窮國，去年零售業數字係1萬億美元。據《福布斯》數字，2007年擁有10億美元身家中國富豪人數，由2006年只有十四個上升到2007年一百零六個。十五到二十年後中國股市總值不但超過日本，甚至有機會超過美國！中國一如八十年代香港經濟，正由出口、製造業帶動轉為內部消費帶動（香港轉型成功後，令恒生指數升穿1800點；去年10月最高見32000點）。十五到二十年後，中國股市總值係2007年10月十倍亦唔奇；反之，美股由現階段睇，未來何去何從？

　　今天中國，有如1950年代美國、1970年代日本或1980年代香港。中國去年人均收入已達2500美元一年，正向25000美元人均收入邁進。中國零售業以年率15％至20％速度上升，正步入高消費年代；估計2020年前中國私人消費以年率15％到20％速度上升。今天中國人均消費只及OECD國家5％，投資相等於OECD國家17％，出口相等於OECD國家31％。去年中國用去全球36％鋼鐵、50％水泥及9.5％石油產量。鋼鐵及水泥需求咁大，理由係中國仍處於基建項目投資高峰期，目的係增加基建設施去支持出口業務。石油消耗僅佔全球9％，比重咁少理由，係中國境內私人擁有汽車仍然唔多。

　　上一次中國零售高速上升期係1994年，其後回落到1998年；到2003年升幅只有5％到10％；2004年回升，近年再進入15％到20％較高增長期，但消費仍較集中汽車及房屋項目上。

　　中國人收入正由月入1500至2000元人民幣所謂低收入階層，進入4000至6000元人民幣階層，即由基本生活所需進入略為奢侈消費期，然後一如其他OECD國家，進入月入1萬元時期而引發大量消費。

　　上述情況五十年代至七十年代美國出現；六十年代至八十年代日本出現；七十年代至九十年代香港出現，未來亦中國出現。受惠項目包括平面電視、流動電話、數碼相機、寬頻服務、手提電腦、MP3、立體聲音響、DVD機等，其次係餐飲行業及旅遊業、酒店業、運動產品等。最大受惠行業自然係內房股。2005年一般家庭購買物業平均價507,000元、2006年549,000元、2007年657,000元（唔同地區差異好大），一如八十年代香港房地產，正步入大幅上升期，不過當然唔係直線上升。

英國皇太后因通脹陷財困

　　1997年唔少港人以為只要畀10％首期買樓花，當樓宇落成日樓價升10％，便可獲利100％。點知1998年樓價卻回落10％同時搵唔到買家。到2003年，港人面對樓價回落65％困境。

　　2007年，同樣遊戲美國出現（呢次更免首期）。到底美國樓價要回落到邊個水平，才再現買家多於賣家（依家美國住房已有十個月存貨量）？往往事後才知道。

　　1月份美國Douglass National Bank宣布破產，3月份Hume Bank宣布被接管，係今年內第二間。美國聯邦存款保險公司只為10萬美元存款戶提供保障，多於上述存款唔受保。樓價見底前，到底仲有幾多間銀行破產？

　　令打工仔洩氣係，1999年美國中產階級年入49244美元，2007年美國中產年入48201美元。唔好話扣除通脹及美元價回落，連金額計亦縮水！不過，2007年唔少香港人收入亦唔及十年前（1997）！

　　好多人仍未明白通脹威力。英國皇太后1936年獲國會批准每年支付7萬英鎊作為生活費，到1959年佢開支已達每年33.7萬英鎊，並陷入財務危機，佢要求首相麥克米倫協助，但麥克米倫表示無能為力，最後皇太后由佢女兒伊利沙伯二世承擔。以2008年英鎊購買力計，1959年33.7萬英鎊相等於今天1250萬英鎊。1936年每年7萬英鎊可過皇太后式生活，今天卻需要1250萬英鎊！

巴郡晒士太大升速減慢

　　我老曹認識一位朋友，佢1967年香港暴動期間向美資保險公司買100萬美元人壽保險，然後一生省吃儉用節省開支付保險費。十分不幸，佢1997年五十多歲便去世，留畀妻兒就係呢100萬美元……，1967年有100萬美元，可以做大富翁矣！但到1997年，100萬美元只夠買一間一千呎「豪」宅。按美國計算所得：1967年100萬美元購買力，相等於2008年2500萬美元。今天要擁有2500萬美元，才相等於1967年100萬美元購買力！

　　畢非德旗下巴郡去年獲利123億美元，或每股升值11％，跑輸過去四十三年平均數（每年平均升21.1％）。年內做七十六單交易，除處理1410億美元投資外，仲要管理保險公司旗下590億美元投資。年報內列出1965至79年每股平均每年上升42.8％；1979至93年每股平均每年上升25.6％；1993至2005年每股平均每年上升14.3％。隨晒士漸大，上升速度亦漸慢。

　　畢非德自1954年起從事投資工作，至今已超過五十年。1967年佢開始進軍房地產及保險生意，1986年從事再保險業務，近年投資能源及公用事業。家最大投資項目係美國運通、可口可樂、P & G及富國銀行。2007年最大出售係中石油（857），因為股價已偏高；佢2002及03年以4.88億美元購入中石油1.3％，2007年以40億美元售出，並向美國政府付稅12億美元。

　　唔好睇小年率增長11％，只要保持今天1萬美元投資，到2100年可變成2400萬美元，但佢相信自己已無法做到，因此已安排接班人，希望承繼人能繼續保持出色表現。