2008-03-17

淡市莫估底又一證明

　　3月16日，周日。雖然唔少股份由去年10月高價至今跌幅已超過50％，但美國聯儲局透過JP摩根大通向貝爾斯登提供二十八天短期貸款環境下，周一全球股市相信無法避免唔跌；恒生指數可能第二次接近21700點。

大戶唔一定醒過散戶

　　上周五貝爾斯登主席及CEO艾倫．施瓦茨話，過去二十四小時公司資金情況迅速惡化，令股價下跌47.4％，至30美元，即整間公司市值只有40億美元（去年11月中信證券注資時，市值達130億美元）。所以話大戶唔一定較散戶聰明。外傳摩根大通可能收購貝爾斯登，估計該公司家每股資產淨值38美元。上周五雷曼兄弟股價亦跌14.6％，花旗、高盛、大摩及美林跌幅介乎5％到6％之間。淡市莫估底又一證明。

　　由美國杜克大學與《CFO雜誌》向美國四百七十五名CFO調查所得，54％認為美國經濟已進入衰退，24％認為今年第二季將出現衰退。75％承認依家較去年第四季悲觀。大部分CFO認為減息唔會影響佢地生意，三分一認為依家信貸情況直接影響公司生意。杜克大學經濟樂觀指數係52％，為開始至今七年內最低。三分二中國CFO則關注美國經濟衰退影響，甚至JP摩根主席及CEO戴蒙亦認為，美國已進入衰退。

　　今時今日，買股票又如深夜經過墓地，需要吹吹口哨以壯壯膽。

　　阿根廷中央銀行3月15日宣布，今年8月起巴西及阿根廷雙邊貿易將以兩國本身貨幣進行結算，放棄以美元作為結算單位。上述係巴西總統盧拉2月訪問阿根廷時同總統克里斯蒂娜所達成協議，兩國4月底前完成金融訊息系統改造、5月底前完成測試工作、6月底簽約、8月份投入運行，以巴西雷亞爾和阿根廷披索結算，而唔再係美元。

拋售美元成市場共識

　　拋售美元似乎成為市場共識。上周日圓100關失守、歐羅1.56失守、金價1000美元失守。去年美元兌歐羅跌10.4％，今年至今再跌3％。弱勢美元有利美國經濟，但崩潰中美元則不利美國經濟，呢D大學做研究教授可能唔曉。貝仔行動已引發美元危機，投資者拋售美債，令美元長期利率上升，呢方面聯儲局冇控制能力；短息跌、長息升係美國家陣情況，愈愈似九十年代日本！如果干預可阻止危機惡化，十九世紀英倫銀行早已成功，1990年日本銀行亦應該成功。干預行為好似食止痛餅醫癌，只將表徵消除，最後一定更大鑊。

　　本金1萬元，年率1.25厘，要幾耐才變成100萬元？答案係二百一十三年，相信冇人可以咁長命，何況仲未計算通脹影響。以1萬元起步，利用牛眼投資法，每年皆射中牛眼（獲100％回報），幾多年可變成100萬元？答案係少於七年。歷史書內充滿「以小搏大」戰役，贏家往往唔係擁有百萬大軍一方，而係曉得利用時勢、策略、婷@@悃?鶪@方。你可以投資市場輸掉100萬元才學曉點樣運籌帷幄、決勝千里，亦可花128元買本《論戰》從中得到啟發（何況可做善事）。例如你由去年10月30日起拋空期指，一直roll over，一張期指已可賺50萬元；上述當然係事後孔明，但並非唔可能。請學習槓桿投資法，例如窩輪及期指，入市前先制訂策略及目標，而非漫遊。每天花十五分鐘檢討自己策略係咪可行，唔好被嚇倒，亦唔好太貪心，學習以平常心處事，以及唔好讓虧損超過15％。

　　上一個美國Secular Bear Market由1966年開始、1982年結束，低點係1974年12月。呢一個綿綿不絕熊市從2000年3月開始，2002年10月係其中一個低點，2007年10月係其中一個高點；未來去找尋另一個低點……。真正大牛市恐怕要到2016年才再開始。

　　畢非德最近巴郡年報中話，道指由1900至99年平均每年只上升5.3％，由66點開始至11497點。未來一百年如道指每年上升5.3％，到2100年道指將見2000000點，相信機會唔大；因此佢強調未來股市中賺取5％至10％亦變得唔容易。1999年標普五百O高達四十二倍，依家已回落到二十倍，估計未來十到二十年美股純利每年只能升3-5％（2006年企業純利上升11.4％），甚至每年10％亦唔容易。

很少牛市超過二十年

　　美國愈來愈多住房丟空（因供唔起樓被金融機構接管）。為維修呢D被接管住房，美國一年開支500億美元（平均一間管理及維修費1萬至1.2萬美元一年）。去年約一百萬間住宅被接管，較2006年上升一倍，相信今年更多。大摩報道，波士頓銀行兩年前出售一間物業，代價299000美元，由WMC Mortgage做擔保可回收。今天收回後，WMC Mortgage只能按市價54900美元出售。

　　換言之，樓按者一旦斷供，對樓按擔保公司而言係災難。今天被空置住房已達三百五十萬間，未來何處搵三百五十萬個有能力供樓新業主？Real Estate ConsultingJohn Burns認為，空置量要上升到四百萬間，樓價才可能見底，日子唔係2008年，而係2009年下半年；未來樓價可能再跌15-20％，即美國物業市場將失去50萬億至60萬億美元市值，樓價才有機會見底；上述分析係以1970年至今每次美國樓市調整期及調整幅度計算出來。

　　如上述分析正確，SIV、CLO、CDO、ABS或CMBS未來六個月所面對拋售壓力正不斷加重，聯儲局提供2000億美元救市基金實在少得可憐。

　　上一次美國樓價1979年見頂，1984年才見底，要到1995年才重返1979年水平（香港樓價1981年見頂，較美國遲兩年，1984年見底，1990年已重返1981年水平）。美國呢次樓價2006年7月見頂，可能需要十六年才重見1979年高價，即下一次美國樓價高於2006年係2022年。

　　長遠而言，樓價可跑贏CPI升幅，因土地供應有限；反之，商品價格卻跑輸CPI升幅。例如高盛商品指數（以二十四種商品組成）今年扣除通脹，只及上一個高位（1974年）40％。原材料（包括黃金）都不能保值，主因係價格一旦高企，代替品便湧現。隨經濟發展，各國CPI中服務所佔比重漸升（例如香港CPI中超過50％同服務有關，20％同租金有關，燃料費及食品約佔30％。因此推動本港CPI上升唔係原材料價格，而係工資同租金）。

　　好少牛市可超過二十年，例如美股由1983年起步牛市，2000年已結束；2007年高點其實係由美元價下跌所造成假象，唔係真正新高點。美國樓市牛市由1985年起步，到2006年下半年結束，已超過二十年（部分升幅亦因美元價下跌所造成）。任何項目上升接近二十年後才投資，未來十年到十五年的表現通常令人失望。

　　美軍伊拉克用幾多油？去年係十一億加侖燃油，相等於五千艘運油輪載油量，才推得郁美軍伊拉克戰機及軍車。去年美軍伊拉克燃料開支係520億美元，由此可見殊仔幾敗家！到此大家應明白點解美軍入侵伊拉克後，油價係咁升！

海龜人才唔值錢

　　今天油價、糧食價、貴重金屬價牛市已十分成熟，已接近尋頂期，波幅甚大，係咪值得加入搶購行列則見仁見智。

　　今時今日，「海龜」等人才已唔太值錢。北京，「海龜」研究生月薪平均3000元人民幣，可以講一落千丈。今天公司請人再唔管你學歷高低，而論往績，例如邊間公司做過？有幾多經驗、有幾多能力？能否管好所應徵公司業務？今天內地公司愈來愈重視質素，而輕視學歷。

　　今年北京五環外住房亦賣8000-10000元人民幣一平方米，連「海龜」亦負擔唔起。上海浦東12000元人民幣一平方米，好一D者要40000元人民幣一平方米，別墅更賣2億元一間。武漢房價亦6000元一平方米、青島8000元一平方米、西安4500元一平方米、大連6500元一平方米、深圳13000元一平方米、天津9000元一平方米，連廣東惠州房價亦要6000元、成都7000元、濟南6000元。唔好話中國本地大學生負擔唔起，連「海龜」研究生亦負擔唔起。內地房價漲得實在太離譜，調整只遲早。

台灣地產可睇好

　　台灣大選之後，估計三通最快奧運前出現。台灣二千三百萬人口中，已有5％（一百二十多萬）住大陸。台灣資金已有超過1500億美元經香港進入大陸。一旦三通，香港經濟將係受害者；反之，台灣高雄、台北市係受惠城市。台灣房地產係今年少數可睇好地區之一，因大選後台灣政治氣候開始向大陸靠攏。呢次中央政府重手鎮壓西藏人獨立要求，似有殺雞儆猴作用。