2008年3月16日 星期日

2008-03-15

滬深A股雪上加霜

  3月14日,周五。恒指跌64.53,收22237.11;成交882.83億元。3月期指仍係低水,升37點,收22132點。

3月結後悲觀氣氛稍緩

  恒指經大上大落後,仍在框框之內。即上阻力25000點、下支持21700點,RSI唔太弱。3月結後投資者悲觀情緒或可收斂D。美林證券策略員Steven De Sanctis建議大家投資個別細價股,Al Frank Asset ManagementBuckingham Al Frank更提議只買細價股,因細價股跌幅已大,令未來下跌空間有限。但花旗集團Lori Calvasina唔同意,認為1980、81、90及2001年衰退期,羅素二千指數(細價股指數)跌幅分別為26%、29%、34%及38%,呢次跌市由去年7月至今只回落22%。我老曹對細價股態度一向係細細注、大大聲。2008年第二季到底係bargain-hunting日子抑或係搵避難所最後時機?我老曹真係唔曉答。我老曹認識超過二十年外國朋友Bert Dohmen最近出一本書叫Prelude to Meltdown。可以話係超級無敵大淡友,佢投資通訊Wellington Letter係去年10月第一份認為美股熊市將至通訊。我老曹同佢相識於1990年,當年佢首次來港,經朋友介紹我老曹做佢香港帶街。佢太太係西班牙裔,十分健談。當年我老曹曾請教佢對1997年後香港點睇?他話作為美國人,實在唔明白香港人點解會咁驚?佢眼中,香港較東京更有前途(佢剛從東京來港)。從此我老曹成為佢Wellington Letter擁躉,唔經唔覺十八年矣。呢次佢睇得咁淡,到底係係錯?會否犯1990年香港人當年情意結?

  投資策略可分為三大類:一、Value Investor。經深入了解基本因素後,挑選最值得投資企業,然後長線持有。二、Growth Investor。追求高增長,找尋明白之星,呢方面風險較大,不過一旦買中,利潤極之可觀。第三類係學momentum技巧。利用技術分析,捕捉大市高低點。

  世上最成功Value Investor係畢非德,一隻股份佢可以幾十年,由undervalued到overvalued。至於利用momentum技巧,要神乎其技,可惜大部分分析員只懂三腳貓功夫,真正能掌握者唔多。例如50天線升穿200天叫黃金交叉點,可確認牛市;50天線跌穿200天線叫死亡交叉點,可確認熊市。上述訊號可靠性好高,只係出現得太遲,當出現之時已損失十分嚴重,因此只用作確認。

狂升暴跌多在牛三熊一出現  狂升暴跌,通常只牛三或熊一才出現,維持日子好短(通常三個月),其餘日子都係上落市或個別發展。1997年後上市行業多,唔同行業有本身盛衰循環,不能單單只以牛市或熊市便概括一切,但亦唔代表牛、熊市分析可以不理。因為牛市中,大部分股價皆向上;熊市中,逆市上升股份唔多(但唔係冇)。只有上落市時,才可用炒股唔炒市,如熊市一期,90%股份皆跌。

  《華爾街日報》3月7日至11日向五十一位經濟學家查詢,其中三十六位(佔總數超過70%)認為美國將陷入衰退。美國商業部周四亦宣布2月份零售數字下降0.6%(如唔包括汽車下降0.2%);估計3月份失業率將上升到5.5%(前為4.8%)。其中二十九位經濟學家認為,美國今年第一季GDP已係負增長,二十五位估計第二季才出現負增長;超過一半認為,呢次衰退較2001及1990至91年次更嚴重。大部分人相信6月份聯邦基金利率將跌至2厘。90%估計呢次減息0.75厘;84%認為2003年聯儲局減息太遲。

美國人期望下一個泡沫

  衰退官方定義係GDP連續兩季負增長,一般估計呢次同過去兩次一樣,只有一季GDP負增長但會出現兩次,分別今年上半年及2009年年中出現,即經濟出現「W」走勢。

  2000年3月當科網股泡沫爆破時,美國人祈禱希望有另一個泡沫,結果格蛇為大家製造一個,2001年利用減息製造樓市泡沫。2006年7月美國樓市泡沫爆破後,美國人又問下一個泡沫邊度?今天大家已搵到啦,就係原油加農產品加貴金屬泡沫。油價由2007年1月52美元升至家110美元,令汽油價由3美元一加侖升至4美元,令4月至7月(四個月)美國消費者多付1400億美元,超過政府退稅1150億美元,上述未計食物價格上升令開支增加。

  硬商品如油、金、白金等係去年唔少人至愛;今年雖然仍升,但升幅漸落後軟商品如大豆、玉米、小麥及肉類。2000年至今全球人口上升13%,收入上升35%,糧食消耗上升25%;加上殊仔乙醇計劃將唔少糧食轉為燃料(佔全美玉米產量五分一),引發全球糧食價格狂升。過去五年軟商品價格才升29%,貴金屬升170%;踏入2008年,軟商品已上升29%(媲美過去五年升幅),上升項目包括咖啡、棉花、可可甚至橙汁。

內地人買樓熱潮未退

  商品價格已進1978至81年段時期,段日子聯儲局主席米勒係咁加息,只係幅度唔夠,直到雪茄伏上台,一下子將利率由14厘提升到20厘引發美國經濟衰退才成功。呢次貝仔則搏命減息,因為美國經濟正陷入衰退危機。

  中國2月份CPI升8.7%(其中食物升23%,肉類、雞蛋及食用油升幅達50%)。今年1、2月中國城市固定資產投資較去年同期升24.3%或8121億元人民幣,同去年第四季升幅24%比較變化唔大,較去年全年25.8%略低。房地產投資上升32.9%,達2374億元人民幣,甚至較去年全年升幅30.2%大,代表內地人買樓熱潮未減退。

  滬深三百A股指數雖然已由去年10月高峰回落30%,或今年內回落20%,前景仍令人擔心。理由有五:一、今年A股純利增長大幅放緩,結果令股市由高O走向低O。二、過去股價受過分投機刺激而變成過分偏高。三、非流通股大量變成流通股。四、大量IPO後可供選擇項目增加唔少。五、開放投資渠道,內地人可透過基金投資海外。去年上市集資4500億元人民幣,其中30.4%由機構投資者持有,而禁售約1370多億元人民幣股票今年解禁。今年第一季企業純利升幅只有25%(去年第三季59%),de-rating由去年第四季已開始,今年第一季繼續。去年10月A股成交額係流通股市值110%,今年1月仍高達50%(納指2000年3月最高峰期亦不外40%),咁高易手率代表投機性十分高。A股O較離岸MSCI中國指數O高出48%,QDII及QDRI長期操作下,A股O同離岸MSCI中國O接近只係遲早事。

全球牛市已終結

  《上海證券報》認為,2003年開始全球牛市已終結,所有救市措施影響可能十分短暫。A股全球股市急挫帶動下,上證指數已由最高6124點回落到依家3900點左右。全球資本市場受次按危機衝擊下,A股所承受壓力不言而喻;加上政府為防止通脹惡化而實施緊縮政策,上市公司再融資及大小非流通股解禁,資金壓力促使A股調整雪上加霜。雖然對中國經濟未來增長保持信心及北京奧運已在眼前,分析認為,上證指數4000點附近投資者只可以守。

  去年10月至今年3月全球主要股票市場幾乎無一例外地下跌。由四大洲各國主要指數睇,過去五個多月全球股市已處於典型熊市狀態,全球牛市終結,導致A股亦危在旦夕。去年8月次按危機第一次集中爆發,對A股市場影響全無。去年11月及12月隨花旗、美林、瑞銀等幾家頂級銀行開始沖減巨額資產,市場發現次按危機較想像中大,令本已高處不勝寒A股調整速度及力度加快。短短一個月上證指數由6000點調整到4800點。最近第三次衝擊,隨凱雷等機構陷入資金困難,A股更雪上加霜,連4000點亦失守。

  中國平安及浦發銀行因再融資而令股價分別下跌40%和30%以上,市場對再融資態度係唔乃奇。但今年提出再融資企業已達四十五家,涉及資金3000億元,估計全年再融資達18000億元,超過2007年12000億元50%,顯然非市場可以承受。

中美利差倒掛人民幣加息空間小  今年3月起係大小非流通股解禁高峰期。據去年統計數字,解禁後套現比重達9%;換言之,解禁後股份90%以上唔套現(除非股價狂升)。

  加息方面,家中美息差出現倒掛,而且幅度不斷擴大,人民幣加息空間唔大。

  上證指數跌穿4000點,證監會副主席范福春表示,中證監唔會承擔救市角色。

  高盛3月12日報告詳細分析中國經濟1987-88年、1993-94年高通脹期出現前,都係貨幣供應增長加快;前者領先CPI升幅六到十二個月,一旦存款利率進入負數後,通脹進一步加速上升(即負利率進一步推高通脹)。第三係通脹壓力下,政府對信貸、投資、消費等實行嚴格控制,令經濟無法實現軟陸;高盛十分擔心今次又歷史重演。不過,國務院發展研究中心金融研究所所長夏斌卻認為,呢次不能同前兩次相比,今天中國全球化程度不可同日而語,只要中國GDP增長率保持10%,年底前中國經濟冇大問題。

沒有留言:

張貼留言