2008-12-04

偽尖子製造泡沫圖利

12月3日，周三。恒生指數升182.81，收13588.66；成交379億元。12月期指升307點，收13545點，低水，小心反彈市出現飄忽變幻球（時好時壞）。新地（016）跌6.04％，收55.25元；中國鋁業（2600）升5.8％，收3.65元。

滬深三百指數升4.5％，收1952.67。

趁澳元疲弱去度假

泰國機場重開，泰國宣布減息1厘，係十七個月內首次；股市回升2.6％（今年已回落54％）。泰國第三季GDP上升4％，擔心第四季受示威影響而進一步下跌。各位已觀察過台灣式民主、泰國式民主、印度式民主……香港能否發展出「高質素民主」而非「低質素民主」？不然民主都幾得人驚。

澳洲第三季GDP只較第二季升0.1％，係八年內最差，亦係自1991年以來首次踏入衰退；股市今年跌44％，澳元成64.28美仙；貸款利率跌至4.25厘（兩年政府債券利率3.14厘），未來十二個月經濟活動亦將減弱。各位不妨趁澳元疲弱，响呢個聖誕節去澳洲度假，碧海藍天加上無污染環境，澳洲係少數仍能聞到樹香嘅地區；可惜我老曹今年仍太忙，不然可試試過一個陽光與海灘嘅聖誕，都幾盞。

保爾森勁過大衞高柏飛

美國國家經濟研究局周一正式確認美國喺2007年12月已陷入衰退，睇嚟詹瑞文兄應該學吓：你搞Gag都唔夠美國政府咁搞笑也。另一笑話係美國財長保爾森揚言盡一切努力去恢復經濟秩序；佢唔係來自高盛咩？佢對CDO、SIV、MBS嘅認識肯定超過你同我。過去佢利用次按發咗大財，依家出任財長佢又告訴各位：佢正在努力挽救CDO危機！正式神又係佢、鬼又係佢。唔係因為佢決定唔救雷曼兄弟才引發全球金融海嘯咩？真係反手為雲、覆手為雨，連魔術大師大衞高柏飛都嘆為觀止。呢批所謂社會偽尖子或政治企業家，利用自己响法律上嘅知識（或特權），製造一個又一個泡沫，然後從中獲取巨利，最後一走了之，讓整個社會甚至全人類承擔其後果。我老曹佩服、佩服。

當全人類都感到不安、沮喪及憂慮之時，突然又彈出一位奧巴馬，大叫change，令失意嘅投資者有如喺深海中抓到一根鹹水草，便以為自己有救，道指自11月21日起進入The mother of all bear market rallies期，反彈浪一個接一個出現。歡迎各位進入奧巴馬時代！因各位滿懷希望，以為社會會出現改變，而令道指由11月20日低點回升。股市已進入上落市（或長方形走勢），喺上落市中搵食（別人睇淡你睇好，別人睇好你睇淡）並唔容易。請唔好相信「牛市重臨」嘅謬論，因為全球情況仍在惡化，例如加州周一宣布財政進入危急期，如聯邦政府唔出手，加州政府可能破產。John Bogle係Vanguard Group創辦人，現年七十九歲，佢過去五十幾年曾經歷過十個熊市。該機構家吓80％資金仍放喺政府債券上，因估計未來十年回報率達每年5％（部分來自債券升值）；至於股票，只投放20％資金（較我老曹去年10月嘅三七分仲保守）。1973至74年及2000至02年美股亦曾跌50％，呢次美股由18萬億美元市值跌至95000億美元，只係由偏高重返合理，日後會否進入偏低及偏低幾多？木宰羊。2000年3月24日至08年12月2日止標普五百下跌45％，平均每年失去3.8％價值。邊個話長線投資實賺?!

通用汽車需要40億美元才能度過2008年，不然已經唔夠錢找數，明年再需820億美元貸款及60億美元信用額才能捱落去。福特要求90億美元，佳士拿要求70億美元……，美國汽車業要求350億美元政府注資才能生存落去。

豐田、本田、日產汽車11月份响美國銷售跌幅超過30％。豐田跌34％、本田跌32％、日產跌42％，係1980年以來最大跌幅。另一亞洲品牌現代汽車亦跌35％。11月份美國汽車銷售出現連續十三個月下跌，係十七年內最長下跌日子嘅一次。

邁阿密政府買「無殼蝸牛」怕
Oppenheimer執行董事Meredith Whitney相信美國經濟已經出軌，至今有3萬億美元信用被抹掉，依家70％美國家庭依賴信用卡去維持現金流（cash-flow management），其中90％利用循環貸款（用另一張卡去冚另一張卡數）。過去物業有價，佢地可加大樓按去支付卡數，依家呢一招已行唔通，令信用卡貸款開始出問題。Meredith Whitney認為，未來十八個月信用卡公司將減少持卡人信貸2萬億美元，令信用卡持有人可獲得嘅流動資金減少45％，信用卡貸款利率亦將大幅上升。

近月邁阿密嗰D空置物業已被無家可歸嘅人入侵，情況變得複雜。為阻止「無殼蝸牛」入侵，銀行決定對斷供者實行唔收樓，繼續等佢地住落去，以免被「無殼蝸牛」入侵，便趕都趕唔走；結果愈來愈多家庭索性唔供樓。唔少租出去嘅物業，租客亦索性唔交租，等業主收樓（業主亦唔敢收樓，因為一旦空置更加麻煩）。

邁阿密官方發言人話，政府無力阻止上述事情發生，並且希望業主自行諗辦法。

美國Simon Property Group（最成功商場營運商）、Boston Properties Inc.（最成功寫字樓擁有者）、General Growth Properties（响美國有二百多個商場）自11月19日起股價皆大幅回落。不景氣已由住宅擴展到商場及寫字樓。換言之，美國房地產市場回落情況不但未有改善，反而正在擴散，甚至酒店股亦大幅滑落。呢次地產泡沫爆破已唔再局限於住宅樓，而係全面性，只有上次大蕭條時期才出現過類似情況。恐怕人類史上最大嘅信貸泡沫正在爆破！通縮嘅巨輪正在壓碎一切障擋它前進嘅障礙物。呢次上天真係憤怒嘞，佢決定懲罰社會上嘅偽尖子及政治企業家，唔再容許類似AIG七十位公司嘅高層人員到加州度假，佢地除咗享用私人飛機外，亦用掉422000美元；又或三大汽車巨頭坐私人飛機去華盛頓要求政府注資呢類事情再發生。呢批偽尖子將公司搞到一塌糊塗，離開之時仲有「黃金降落傘」（由1000萬至1億美元）。公平去咗邊度?!政府不斷向納稅人借錢，然後送畀華爾街大鱷，因為呢D大鱷食唔飽可令整個金融系統崩潰云云。如果咁樣可以解決眼前問題，就真係天冇眼。

呢次反彈只係中途島戰役

根據彭博通訊社統計，去年至今美國金融機構虧損達6661億美元（未計政府為花旗集團3060億美元有問題資產提供擔保）。政府準備嘅7萬億美元（相當於美國一年GDP 50％），已動用其中31800億美元去改善金融機構嘅資產負債表。上述情況可維持幾耐？

今年11月起股市因超賣而進入反彈期，但經濟繼續惡化，呢段青黃不接期可維持幾耐？1929至32年期間亦出現過唔少反彈，有D升幅達到40％。今年11月起美股股價已進入「合理」水平（標普五百股息率達4厘，銀行存款收息不足1厘），加上指數拋離200天線34％，係1932年7月19日以來最大偏差，有條件反彈。反彈市係最難捕捉嘅，一般散戶都處理得唔好。標普五百指數跌幅至今略超過50％，仍唔及2000年3月10日納指由5132點跌到02年10月10日1108.49、跌幅79.64％大；更加唔使同日經平均指數1990年1月至今跌幅或1929至32年華爾街危機比較。呢次反彈相信只係「中途島戰役」（詳情可參考《論戰》一書）。點解有反彈？因投資者仍念念不忘2007年10月11日道指14198點。

美國勞動人口開始萎縮，情況同九十年代日本接近。戰後嬰兒潮步入退休年齡（一如我老曹）。避孕丸嘅普及，令出生人口由六十年代開始按年下降，估計到2012年每月新勞動人口供應量只有七萬三千個，而退休人口卻不斷上升。人口中最慘係三十歲到四十歲，呢批人口喺美國約七千萬人，佢地响1967至77年出生，喺九十年代及2000年進入社會做事，成為貴價樓嘅買家，但去年開始步入負資產，未來十年到二十年點可以依賴佢地消費去支持經濟？

去槓桿化即被迫斬倉

何謂「去槓桿化」？用普通人明解嘅文字寫，就係被迫斬倉。踏入今年11月，被迫斬倉已經完成，但投資者已冇蚊年再炒上。如投資方向正確，可以富甲天下；反之如方向錯誤，真係可以連底褲都輸埋，此乃大趨勢也。睇啱方向但策略出錯，一樣賺唔到大錢，此乃策略也。升市中太早回吐、跌市中太早入市，此乃「性」也。《論勢》、《論戰》、《論性》三書已結集成精裝版，將於12月10日起公開發售，已獲加拿大讀者寄來支票1萬港元訂購，作為聖誕節前送畀佢友好嘅禮物！我老曹已叫美寶小姐（本人秘書）代勞。如各位亦希望喺聖誕節前畀親友一份特別禮物，上述精裝版十分合適，既代表一份愛心，亦代表一份善心。

廣東省社科院境外資金異常流動課題組組長黎友煥話，根據地下錢莊監測到嘅數據睇，9月中下旬開始熱錢流出大於熱錢流入，至11月底止情況仍未改變。人民幣已跌至五個月內低價，最低見6.8867兌1美元，因一天內下跌超過0.5％而停板。

12月2日廣州八幅土地拍賣，一幅流拍、一幅高於底價200萬元成交外，其餘因現場無人出價，均以底價成交。八幅住宅用地共四十九萬七千方米，佔全年總供應量28％。廣州常元房地產公司以底價取得三幅土地，總代價4.6億元；南沙一幅地塊以2.64億元由廣州南沙建設公司投得。部分地產商估計兩年後樓價可回升，因此才會出價買地。