2008-12-03

典型阿媽係女人嘅新聞

12月2日，週二。恆指跌702.99，收13405.85；成交385億元。新世界發展（017）跌9.7％，收5.77元；信置（083）跌9.6％，收5.55元；滙控（005）挫6.4％，見79元；中國海洋石油（883）跌8.5％，見5.95元；中石油（857）挫6.6％，收 6.13元。12月期指跌632點，收13238點，仍然低水。

　　11月樓宇買賣合約共三千七百八十六份，較10月跌37.5％，較去年同期跌79.1％。

　　滬深三百指數升0.24％，收1868.63。

羅傑斯又睇錯市

　　羅傑斯又一次睇錯市，美元未真正轉弱，金價亦未真正轉強。如果佢響接受彭博新聞訪問時真係拋出手上美元買金，就係又一次高價接金！貨幣Rallies通常以年或月計，而非以日計。根據Bespoke Investment Group統計，美元反彈平均可維持四百八十九天。換言之，今年7月開始嘅美元反彈仍有好一段日子上升，雖然12月份美元減息，但其他貨幣一樣須減息。 12月15、16日係美元今年最後一次減息，英鎊估計亦將減息半釐，而歐羅在明年年中前仍不斷減息，澳元今天則減息1釐。從呢點睇，美元強勢最低限度可維持到2009年年中。

　　貝南奇同殊仔都話會努力對付經濟衰退，前者只得番半粒子彈（本月中減息半釐），後者早已成為跛腳鴨政府。哈佛教授 Jeffsey Frankel係美國國家經濟研究局成員，佢認為前景暗淡，衰退才啱啱開始。戰後最長嘅兩次衰退期，第一個在1975年3月結束，第二個在1982年11 月，都長達十六個月。戰前最長嘅一次衰退期係1929年8月至1933年3月，共四十三個月。佢唔認為美國經濟可於明年年中復甦（根據11月份華爾街所作嘅調查，唔少分析員認為明年第一季經濟可復甦，依家改口為第二季），理由係前擴張期共七十三個月，於2007年 12月結束，乃戰後最短嘅繁榮期，未來衰退期會較長。美國採購管理協會（Institute for Supply Management, ISM）11月份新訂單指數見27.9（10月份32.2）；過去六十年只有三次低於30，每次都係處於大衰退。

　　10月份美國新屋銷售少5.3％或年率四十三萬三千間，為十七年內銷量最差嘅一個月；售價下跌7％，至218000美元。三十年期供樓利率由上週嘅6.3釐回落到本週嘅5.7 釐。今年10月份CPI較2000年1月份高30％，但樓價較2000年1月高出63％，估計未來樓價仍將下跌20％或以上。

　　根據美國全國零售業聯會數字，上週五、六、日共有一億七千二百萬人購物（部分係網上購物），較去年同期嘅一億四千七百萬人多17％；但消費金額只升3％，為106 億美元，其中唔少係大電視，情況都幾令人擔心。此乃週一美股大跌嘅部分理由，結束由11月20日起嘅技術反彈；呢段日子道指上升17％，羅素二千指數升 23％。

　　1871至1995年道指平均O十三點九一倍，只有1995到2007年平均O才高達二十四點九八倍，現水平O十七點三倍（歷史性純利計）。如重返1871至1995年，平均O水平，未來跌幅唔算大；但如重返三大超級熊市嘅O，未來跌幅仍十分大【圖】。

　　花旗估計，標普五百指數年底可見800點水平。美林估計股市仍需一年才見底、經濟需兩年、房地產需三年，估計標普五百指數在660點才見底。 Hussmen認為呢次熊市需較長時間才完成，未來平均每四個月便有一次反彈，理由係太多人相信「The worst is over」。股市通常在衰退結束前五個月見底。BNP意見係，一旦衰退確認，股市在首六個月仍跌14％，未來衰退日子愈長，股市回落幅度愈大。由1962 至2006年標普五百指數習慣在衰退開始前兩個月便回落；響過去六個衰退結束前，股市則先三至六個月回升。

中國政府大購基本金屬

　　南韓圜已貶值36％、印度盧比貶值22％、馬來西亞林吉特亦貶9％，人民幣今年卻升值5％，對出口不利。出口工業佔中國GDP 40％，人民幣會否進入貶值通道以協助出口？人民幣兌美元已連續四天走低。

　　中國政府宣佈動用30億美元購入一百萬噸基本金屬，以協助內地礦業，因為價錢已大幅回落；上述公佈令基本金屬價上升10％。政府計劃購入十五萬噸銅、三十萬噸鋁、十五萬噸鉛、三十萬噸鋅及十萬噸錫（錫全球年產量為三十六萬噸，估計所受影響最大）。

　　10月份中國建造房屋、寫字樓及工廠減少16.6％，因美國、日本及歐洲經濟已進入衰退；建造業聘用七千七百萬工人。里昂證券亞太區分析員Jim Walker估計，中國明年GDP增長率只有4％。上海樓價今年第三季較第二季回落19.5％，深圳及廣州跌幅更大，估計明年建築業收縮30％，可大部分抵銷政府擴大基建項目投資。過去中國係國際原材料最大買家，未來呢方面需求將大幅減少。

　　12月1日起實施嘅「家電下鄉」政策（政府補貼產品銷售價13％），估計可拉動9200億元人民幣消費，但唔少農村電力供應不足，有咗家電卻冇電，怎麼辦？

　　過去係歷史，將來係未知；人只能改變未來，卻無法改寫歷史。思想如流水，混濁之時往往看不清，只有平靜下來才清澈。此所以投資最高境界就係「論性」，因市場反應良好，令部分書局供應中斷。第八版《論性》週三可運到，前幾天買唔到書嘅讀者，請在週三下午再嘗試。

美國大企業可能減派息或供股　　由10月27日恆生指數由10676點開始上升，相信只係熊市二期反彈。後市展望，最樂觀估計係經濟出現U形反彈（即明年第三季GDP才回升）。1929至32年道指下跌86％才結束熊市；日經平均指數由1990年1月至今更進入L形經濟。

　　去年11月開始，投資策略不但要強調持盈保泰，同時要學習點樣在熊市中生存（活著就是唯一真理）。美國國家經濟研究局今天告訴你：2007年12月美國經濟已陷入衰退，真係典型阿媽係女人嘅新聞！我老曹起碼早佢十個月（2008年1月）已告知各位美國衰退開始；不過，人地係官方機構，我老曹唔係。今天人人在預測衰退何時結束，我老曹十分擔心係「漫漫長夜」。2009年第三季復甦乃官方機構預測，但至今我老曹仍未收到任何經濟復甦嘅訊號。美國十年期國債孳息2.72釐（為1955年以來最低），標普五百反而有4釐息收。點解？一如我老曹曾提出點解買滙控（005）股份收息較存款入滙豐銀行更多，答案係滙控股價將回落，因為滙控有可能減派息或供股。上述答案亦適用於標普五百指數，即未來美國大企業將出現減派息或供股。

　　Nouriel Roubini認為，呢個衰退期長達十八至二十四個月，由2007年12月起計，即最早係2009年7月，最遲係2009年年底？再用Robert Shiller十年平均純利O計，標普五百指數合理價880點，即股市已開始進入偏低期；至於偏低幾多才見底，只能做事後孔明（偏低並唔係入市理由）。

　　根據America Research Group統計，上週黑色週五消費項目中，70％係買大折扣貨品。另外根據Alliance調查，今年12月至明年1月消費者打算減少消費。

　　畢巴頓響11月24日認為，「We are in for the mother of all bear market rallies！」由於股價進入偏低期，一旦出現過分超賣便有反彈，反彈完成後股市再跌。現水平既唔係1932年亦非1974年極偏低期，因美股已回落 50％（港股10月27日止更回落三分二）。未來日子將出現大量反彈，升幅可由20％到50％，但要認清楚只係反彈。我老曹在11月21日（較畢巴頓更早）已指出股市將出現大反彈，昨天再指出大反彈完成；未來日子裡呢類大反彈可不斷出現。格蛇響1996年12月5日用「非理性亢奮」去形容美股，當時道指 6435點、標普744點。即現水平仍處「非理性亢奮期」？

　　美國住宅樓價在過去兩年失去4萬億美元市值，股票在過去一年失去9萬億美元市值，引發債務通縮（debt deflation）。10月份核心通脹率較9月份回落0.1％，單靠聯儲局加上美國政府甚至全球政府聯手，仍較債務通縮嘅力量弱。9月20日因雷曼兄弟倒閉，引發討厭股票嘅情緒，變成9月22日至10月27日嘅惡性拋售（美股則一直伸延到11月21日7449點，Rydex Ratio見負40％，同2002年10月接近才止跌）。

　　港股10月27日、美股11月21日經惡性拋售後，仍無法出現牛市，有四大理由：一、去槓桿化（Deleveraging）仍在進行。二、企業純利回落，銀行失去出售衍生產品嘅收入，令利潤永久減少34％；地產公司無法再利用重估資產產生利潤，令2009年純利減少40％。三、通縮壓力，為減少負債令產品及服務業收費下降，產生負財富效應。四、失望。去年10月過分樂觀估計的投資者，今年十分失望，擔心明年更進入絕望期。今年10月27日入市或11月 21日入市嘅理由只係博反彈，而非再投資（reinvest）。上述四大因素須充分在市場上反映。未來情況會否進一步惡化仍然木宰羊，今年仍有政府不斷 bailout，上述做法往往延長衰退，但改變不了經濟大方向。根據「The best suffers last」（最優質最後被質）理論，未來大藍籌股股價跌幅將大於二線股，因為二線股一早已被拋售！換言之，在滙控股價未見底前，恆生指數亦難見底。

最優質最後被質

　　分析界中睇得最淡係Fleet Street Letter嘅Ben Traynor，佢認為英國房地產在2017年才會見底，跌幅達47％。

　　奧巴馬建議美國人明年可由401（K）退休金中提取15％作生活開支，而唔使畀懲罰性稅項。里昂環球策略員Christopher Wood批評呢招叫做「燒傢俬取暖」！美林證券北美洲分析員David Rosenberg認為，11月21日止ECRI領先指數已連跌五星期並見新低（見負29.2，上週負28.2），較1974年負19.8仲低；上一次出現連跌六季嘅GDP負增長，恐怕呢一次情況更差。換言之，今年第三季開始嘅GDP負增長情況極有可能維持到2010年第一季（超過六季GDP負增長），而衰退唔會在明年第二季結束。10月份儲蓄率2.4％（9月份1％），即消費者對前景愈來愈擔心。今年12月15日及16日將係聯儲局最後一次減息，之後聯儲局將彈盡糧絕，2009年已無事可為，但經濟繼續衰退下去。

　　1990至2006年美國經濟透過物業市場蓬勃，創出了一個「虛假的財富效應」，令美國人消費大於收入，理由係自住物業不斷升值，加上利率低企令人們勇於借錢消費。2007年情況扭轉，樓價回落但人們繼續借錢消費，因股票市場繼續上升，直到2007年11月才如夢初醒。長達十六年嘅經濟繁榮期出現改變，情況有如1997年7月1日香港特區政府提出八萬五房屋政策，改變咗自1985年4月1日開始每年賣地五十公頃土地政策方向。港人經歷六年衰退期，2003年7月才企番起身。呢次美國需時幾耐？

　　日本大和證券認為，OECD經濟已進入第二次世界大戰後最嚴重嘅一次衰退，亞洲國家明年向美國同歐洲嘅出口將減少，內需有幾多幫助？中國人儲蓄率高達50％，亞洲其他國家35％，中國企業負債╱GDP只有21％。上述數字睇落仍幾樂觀，人人都希望火鳳凰出現。但滬深A股同中國地產今年在一片樂觀中死去，能否在明年重生？各位請坐定定！恐怕中國呢隻火鳳凰未能在明年重生，經濟轉型亦未能完成，中國企業將面對困難時期。至於香港，上次樓價調整期由1997年第四季開始，在2003年第二季完成；今天地產發展商經常性收入較1997年高出95％，因此唔使賤價賣樓。估計未來香港樓價進入牛皮悶局，既唔會大跌亦無力大升。