2008-12-06

以萬變應萬變

12月5日，周五。恒生指數升336.31，收13846.09；成交373.3億元。12月期指升350點，收13870點，高水，代表下周股市仍可睇好，但反覆難免。花旗推介中國海外（688），估計今年每股獲利71仙，升24.7％，P/E十四點四倍，目標價13.23元。

滬深三百指數升1.53％，收2013.18。

1929年9月道指由381.17下跌到11月198.69後，反彈至1930年4月294.07，大跌47.87％後又反彈48％。呢次道指由去年10月11日14198.10回落到今年11月21日7449.38，跌幅47.53％，會否由2008年11月21日起出現大反彈？未來反彈幅度如達45％，唔排除道指可重見10000點才完成大反彈，然後又再大跌。我老曹認為最惡劣日子仍喺前面，至今只完成熊市第一期，進入熊市二期反彈市。過去一年美國增加三百萬人失業，佢地依賴失業救濟金或儲蓄去生活，但美國人儲蓄率咁低，恐怕頂唔到幾耐。

明年係青黃不接年

邏輯思維係去年11月開始嘅大跌市今年11月結束（香港行先一步，喺10月27日），然後進入mother of all bear market rallies時段，即未來出現無數次反彈。2008年肯定係可怕嘅一年，明年又點？我老曹睇法係青黃不接年，衰嘢喺今年已發生得七七八八，但仍有餘震，策略係戒急用忍。劍橋大學Clare College最近借入1500萬英鎊投資美股（1999年該學院將美股全部出售，整整九年再冇掂美股）。Clare College係劍橋大學內最有歷史嘅College，過去投資成績顯赫。大摩環球策略員Richard Berner認為，呢個衰退係1981至82年以來最嚴重，但唔會變成1929至32年大蕭條。展望2009年經濟繼續惡化，例如美國失業率將升到8％（1981至82年失業率見11％）。

油價由7月11日147.27美元跌到43.67美元，跌幅達70％以上；11月份美國汽油需求較一年前減少6.2％。GSCI原材料指數亦由7月3日回落63％，周四銅價再跌5.1％。

恒生銀行估計，今年第四季香港GDP將出現0.5％負增長，明年零增長；通脹率明年下降至2.5％。

花旗集團首席經濟師Lewis Alexander出咗份長達九十二頁嘅2009年前景展望，認為家吓正處於環球衰退中途，主因環球金融系統正面對前所未見過嘅壓力，資產價格下跌大大減少全球財富。主要大金融機構面對嘅虧損，大大削弱佢地嘅借貸能力，同時亦動搖消費者及其他商業機構嘅信心。上述多種因素加起來，便大大減弱未來嘅經濟活動。各主要經濟實體明年出現收縮已成定論，另一方面資產價格進入極度偏低水平，早已預期2009年經濟負增長，因此即使2009年經濟好差，股市下跌空間亦唔大；反之，如果冇預期中咁壞，股市出現反彈亦唔奇。環球經濟情況令未來數季CPI升幅進一步受壓，至於會否出現通縮？今年10月G20會議後，相信各國已取得共識，並努力阻止通縮出現（例如集體大幅減息及採取擴張貨幣政策）。展望明年實質經濟進入衰退期，至於金融市場係咪早已充分反映，抑或反映不足或過度恐慌？便考各位眼光。

美林警告油價可能跌至25美元，係咪油價快見底嘅訊號？各位仲記得今年7月高盛預測油價可見200美元一桶嗎？我老曹一向對大行報告有保留。研究公司Stanford C Bernstein & Co.指出，全球石油生產成本35至40美元一桶，唔少深海項目例如喺墨西哥海灣或北海進行，一旦油價低於40美元，佢地將進入蝕本期而被迫停止進行石油勘探；OECD宣布12月17日開會時提出大幅減產。理論上到咗現水平，原油價格下跌空間漸細。

美國製造業11月已跌至1981至82年最差水平，估計12月16日利率將降至半厘，即1954年以來最低。Winans International Management and Research創辦人Ken Winans研究1850年至今美國房地產後指出，平均每個回落期為四年多D，平均跌幅達55％。由1992至2006年美國樓市興旺十四年，呢次每年平均升幅只有5％（過去樓市興旺期平均每年上升11％）。從呢點睇，佢相信呢次樓市調整期仍係四年多D，即2010年才見底，但跌幅應該唔係55％而係27.5％。

分析界對英鎊前景睇法開始分歧

貝南奇希望利用納稅人嘅錢減少銀行接管斷供樓。依家已被接管嘅住宅多達二百二十五萬間，另有20％樓按已資不抵債，只係銀行未有足夠人手處理。為減低供樓人負擔，政府已向兩房購入6000億美元債券，以便兩房有足夠資金做樓按之用，另計劃將供樓日期由三十年改為四十年，減少每月供樓金額。

股市泰斗Laszlo Birinyi話，已見到股市隧道嘅盡頭——壞消息股市不跌反升。Bill Miller周三更認為美股已見底，佢承認今年亦有損失，旗下Value Trust Fund今年下跌59.7％（同期標普五百下跌41％）。

今年9月曾批評英鎊滙價偏高嘅Pacific Investment Management Co.認為英鎊現價已合理。英鎊由今年7月略高於2美元回落到最近1.447美元，利率已降至2厘（10月7日為5厘），兌歐羅回落15％。英鎊最高峰係2007年11月，曾見2.1161美元，至今跌幅達31.6％；雖然估計明年利率可見1.5厘。但BNP百利達認為明年3月英鎊兌1.24美元才見底。德銀估計明年英鎊可見1.30美元。最樂觀係美國銀行，認為英鎊家吓已見底，明年3月將回升到1.67美元，理由係減息空間已極之有限，估計明年利率1.5厘。英鎊到咗現水平，分析界對前景開始出現分歧。

日本為吸引企業將資金調回本土投資，正計劃提供稅務優惠。估計日本企業有1800億美元响海外，如能回流日本投資設備，可帶動日本經濟向上。依家日本稅率40.7％，係OECD國家中最高，如能吸引資金回流甚至派息畀股東，亦可鼓勵日本人喺日本消費。各位小心日圓滙價進一步上升。

隨客觀形勢不斷改變投資組合

我老曹常用嘅方法係策略性資產分配（Tactical Asset Allocation），即係隨客觀形勢而不斷改變自己嘅投資組合。傳說國共商討對付日軍合作期間，蔣介石與毛澤東相約於廬山。清晨兩人各帶一隨從行山並碰頭，發現大家手上嘅書都係《資治通鑑》，相顧而笑。問起蔣介石點樣面對當前局勢？蔣氏回應曰：以不變應萬變……。毛氏呵呵大笑話：本人認為應以萬變應萬變！今天大家都知道誰得了天下。今年仲強調價值投資法者，係咪一如當年嘅蔣介石？各位有冇隨住形勢改變自己嘅投資策略?!今年冇改變自己投資策略者，相信已虧損纍纍。反之，隨形勢改變而改變資產分配者，大都可保存實力，有足夠力量東山再起。

股票、債券、商品、黃金、房地產及現金，都係其中項目而已。揸乜嘢最好？隨形勢改變而改變。例如股票高潮响去年10月、黃金高潮响今年3月、原油高潮响今年7月、地產高潮响今年第一季，美元高潮係咪明年第一季？我老曹正在留意中。上述乃循環理論。

依家較吸引嘅項目係REITs，佢地揸住商場、寫字樓為主嘅收租物業。同地產股唔同，地產公司可以減少派息，保留現金响公司；但REITs租金收入有90％必須用作派息（有D更係100％）。喺現階段買REITs收息，勝過買樓收租。至於房委會旗下嗰隻REITs則要睇清楚（因為如加租嘅話，D租客分分鐘搵代議士出面）。

除本港REITs外，亦可考慮外國REITs，例如Teflon REIT。該REIT不但有1億美元喺手，而且租約大部分响2013年才到期，唔係持有商場，而係擁有二千三百五十五個商舖，分布全美國四十九個州，其中97％已租出，而整間公司只有員工七十四人。即使未來美國樓價下跌25％，現價仍然抵買。

機會要靠自己去搵

另一值得留意嘅項目係中國3G牌短期內批出，建立3G網絡費用高達1160億美元（9000億港元），嗰D生產電訊器材嘅公司將獲益，股價近期已暗中上升。所以唔好話冇機會，機會要自己去搵，唔會從天而降。

1974年Richard Easterlin調查1946至70年嘅美國人，有以下發現：一、富人較窮人快樂。二、富有國家較貧窮國家快樂。三、當國家日漸富裕，人民日漸快樂。2003年Ruut Veenhoven及Michael Hagerty挑戰Easterlin嘅講法，並證明快樂與財富無關，甚至認為富人快樂程度反而唔及窮人！

今年賓州大學Justin Wolfers及Betsey Stevenson重新研究Easterlin嘅講法，作出以下結論：甲、當你貧窮到連孩子有病亦冇錢睇醫生，你點會快樂？此乃1946至70年美國人隨住財富上升而日漸快樂嘅理由。乙、當你嘅家庭已擁有兩部車，你唔會因為買入第三部車而感到快樂，此乃到咗2003年快樂指數漸同財富無關嘅理由。

我老曹完全同意賓州大學兩位學者嘅講法。從無到有，財富增加的確令人感到快樂。如你已擁有唔少財富（例如到達中產階級水平），快樂與否同財富關係漸漸分開，例如四叔添孫所帶來嘅快樂，較多100億元財富更大！到咗呢個水平，便必須追求其他快樂──其中最易嘅方法就係為善最樂。

香港十大致富法：

1.建立一間成功企業，例如李實發。

2.成為成功企業CEO，例如霍大班。

3.向畢非德學習。

4.成為歌星如張學友，或成為運動員如劉翔。

5.嫁個有錢人，如李嘉欣。

6.用OPM去投資從中分紅，例如Value Partners，賺錢自己有得分，蝕本則由基金持有人負責。

7.寫本全球風行嘅書，例如《哈利波特》。

8.回國內圈地（呢一招近年已行唔通）。

9.努力投資，嚴守止蝕唔止賺（最辛苦嘅致富法）。

10.你父親係有錢佬，身家由你承繼。