2008-12-02

掘窿填窿救經濟

12月1日，周一。恒生指數升220.6，收14108.84；成交439.2億元。12月期指收13870點，跌118點，低水，擔心反彈市又告完成。呢次港股連升五個交易天，係去年12月6日連升七個交易天後少見咁長嘅上升日子。中國十四省嘅農夫今天開始可用八七折購買電視、冰箱、洗衣機、手機……（另外13％由政府補貼），此所謂家電下鄉。內地政府希望擴大電器產品及電子產品內需，並協助電子廠及電器產品廠渡過嚴冬。

日本房地產再陷衰退

今天信置（083）升7.7％，見6.14元，因11月份本港十大私人屋苑成交量回升56％；港交所（388）升4.9％，見64元，今年股價已回落71％，並喺11月24日見49.7元今年最低價。國泰（293）回升5.1％，見7.9元；中國財險（2328）升8.6％，見2.92元，估計今年收入超過1000億元人民幣。

滬深三百指數升1.87%，收1864.20。

今年第三季對沖基金淨流出達186億美元（第二季淨流入40.3億美元，第一季淨流出119.6億美元），令今年9月止全球對沖基金資產值由18000億美元下降至16300億美元。雖然美國政府願意bailout房利美、房貸美及AIG，9月份卻因唔願bailout雷曼兄弟而引發全球金融海嘯。9月22日開始嘅惡性拋售，最後由美國政府推出TARP才平靜下來。第三季對沖基金回報率係負10.33％（同期美股回報率負8.35％）。

日經平均指數跌115.05，收8397.22。日本地產公司Morimoto申請破產，三井不動產及住友不動產股價一度跌5.9％，前者跌3.2％，收1419日圓；後者跌3.1％，收1357日圓。日本房地產又再陷入衰退。

日本嘅例子，令美國聯儲局極之擔心美國將步九十年代日本嘅後塵，此乃2001年1月至03年中美國大幅減息嘅理由。去年9月至今呢次雖然同樣大幅減息，但如今未見有乜反應，情況幾令人擔心。美國10月份CPI跌1％，係近六十年內最大嘅跌幅（扣除食品及能源嘅核心指數仍較一年前升2.2％）。貝南奇正盡最後努力阻止通縮响美國出現。

日本10月份進入滯脹，外在因素及內在因素皆不利，相信日本已進入漫長經濟衰退期。10月份工業生產較9月份跌3.1％（因全國汽車出口業不景），估計11月再跌6.4％、12月跌2.9％（日本經濟產業省所作計計）。擔心日本第四季GDP將係自1953年以來最大跌幅，因日本家庭消費已連續八個月回落。10月份較去年同期跌3.8％，係四十六年內最大跌幅（扣除通脹實質跌幅達6％）。估計10月至12月GDP下跌1.5％，明年進一步下滑。

美國第三季GDP下降0.5％，聯儲局估計明年首六個月GDP仍下降。消費者開始儲蓄而非增加消費，道指由11月24日7449點上升嘅理由亦只是超賣。穆廸經濟學家Gus Faucher接受《洛杉磯時報》訪問時回答：2009年上半年消費者會大幅減少消費。惠譽估計明年美國個人消費減少1.6％。Sharp Image Corp及Circuit City Stores Inc. 公布破產，大大影響今年禮物券嘅銷售。National Federation of Indepentent Business向少於五百員工嘅中小企所作調查，15％表示明年上半年仲會裁員。網上零售商Amazon.com今年股價已下跌55％。

今年投資政府債券回報達10.1％，係2002年11.6％回報以來最佳嘅一年。11月20日兩年期政府債券孳息率已跌至0.95厘，相信明年好難再有咁好回報率。BB&T、Black Rock Inc.、T. Rowe Price Group、Sage Advisory Services Ltd. 都在拋售政府債券，改為投資公司債券，例如大摩、JP摩根大通、高盛等公司債券。由於FDIC响11月21日宣布擔保呢D公司嘅債務（高盛及大摩喺9月21日轉為商業銀行），依家兩公司債券嘅息率較政府債券高出6厘，假設金融海嘯結束，呢類高息公司債券應有一定吸引力（何況獲FDIC擔保）。未來會否因利率回落而令呢類公司債券價格上升?!

明年石油消耗或首次下降

美國汽車銷售11月份進一步下跌，新車銷售年率只有一千一百萬部，較一年前減少32％。佳士拿跌44％、GM跌33％、福特跌32％，甚至豐田亦跌27％、本田跌22％、日產跌35％（美國自己生產嘅汽車市場佔有率47％）。

十年前OPEC無力阻止油價跌至10美元，今年11月29日開羅會議又能否阻止油價進一步下滑？美林估計明年將見到二十五年內首次全球石油需求負增長，並預計油價可見43美元（1998年12月油價由高峰回落61％，見10.35美元），即由今年7月高價回落67％。OPEC供應全球40％原油，10月24日OPEC決定每日減產一百五十萬桶；當時沙地石油部長納伊米希望將油價推高至75美元。第二次開會日期原定12月17日，因近期油價一度跌破50美元，而決定11月29日舉行臨時會議，會後1月期油成52.96美元，跌2.7％。1998年12月油價見10.35美元後，OPEC決定減產11％，到2000年6月已減產25％。如美林估計正確，明年將出現二十五年內首次石油消耗減少，OPEC必須大幅減產，才能阻止油價低於50美元。

中國政府計劃明年1月起取消鉛產品出口稅，加上美國汽車銷售跌至1991年以來最低，恐怕全球鉛價將進一步下跌；過去九個月已跌價70％，因有80％需求來自電池（用於汽車）。

英國政府所提出嘅刺激計劃，可令明年財赤升至1810億英鎊（相等於GDP 8％）。奧巴馬未來嘅刺激計劃將令美國財赤達12000億美元，相當於2009年GDP 8％。

今年5月殊仔嘅1500億美元刺激經濟計劃，成效如何？可以講「nothing」！既冇解決房屋財政失敗嘅問題，亦冇解決銀行資本充足比率不足問題，更加未能阻止美國GDP出現負增長。唯一成功係將原本5月份開始嘅衰退延遲到7月份，令美國暫時未出現連續兩季GDP負增長。

政府浪費資源crowd out私人投資

政治家利用各種理由去浪費納稅人嘅金錢，並令公眾人士誤以為佢地正在挽救經濟（其實係令情況惡化）。例如1997年7月香港特區政府嘅八萬五房屋政策及1998年8月1000億元入市打大鱷，反令香港經濟要到2003年下半年才復甦。凱恩斯認為政府刺激GDP上升，可以先聘請一批工人喺地上掘洞，然後又聘請另一批工人去將地上嘅洞填平。今天各國政府就係忙於做呢種事── 一方面掘洞，另一方面搵人填平。政府所造成嘅資源浪費，可crowd out私人企業嘅投資，令各國經濟走上九十年代日式經濟之路。

呢類「找工人掘洞、再搵工人填平佢」嘅方案，如果可令經濟復甦，共產主義早已超越資本主義矣。如果政府刺激經濟計劃可行，咁點解釋1990年至今日本經濟？咁2001年美國減息及退稅計劃及去年5月嘅退稅計劃呢？既然殊仔兩大刺激經濟計劃完全冇用，點解明年奧巴馬刺激經濟計劃會有用？今年香港特區政府提出刺激經濟方案，結果又如何？既然施政報告中嘅刺激方案無效，咁點解派消費券可以有效？請諸君唔好再浪費納稅人嘅血汗錢喇，我地好辛苦才賺返嚟！

英國首相白高敦11月24日嘅刺激方案包括降低VAT，將令英國財赤上升，不利未來英鎊滙價，形成英鎊長期弱勢。

美國奧巴馬經濟顧問古爾斯比周日提出嘅刺激方案達1萬億美元，亦只會令美國債券價格開始回落（長債息率上升）。

Thomson路透估計，11月份失去工作崗位人數達三十萬，係2001年10月後最多嘅一個月（失去三十二萬五千工作崗位）。Thomson路透估計，高潮係明年1月，將有三十四萬五千人失去工作崗位。

今年第三季美國企業純利估計修正為負18.7％（4月1日估計升17.3％、7月1日估計升12.6％、10月1日估計負4.3％），係連續五季負增長。11月28日止已有四百九十間企業公布業績，餘下仲有十間未公布。估計第四季純利上升13.3％（7月1日估計升59.3％、10月1日估計升46.7％、上周估計上升16.6％），情況繼續轉壞。

珠三角房產因有唔少港人投資，依家正面對大量拋售。港人經過1997年亞洲金融風暴洗禮，呢次面對金融海嘯已迅速反應，將深圳物業大幅降價拋售。例如祈福新村內嘅聯排別墅過去售價110萬元，依家叫價80萬元；東莞樟木頭一帶過去有「小香港」之稱，依家大量樓盤賤賣求售；香蜜湖一帶豪宅亦成為港人「甩賣」對象。

珠三角過去係港商投資嘅重要地區，約有七萬家企業、約一千萬員工。據香港工業總會調查，港商喺珠三角企業訂單不足嘅平均佔三成，唔少計劃未來一年內停產，呢個亦係珠三角一帶住宅樓價一片拋風嘅另一理由。始於一線城市嘅樓市調整，第三季已波及全國二三線城市。全國七十個大中城市房價較去年同期升5.3％，較第二季下降0.1％，係近年來首次下降。9月份四十個重點城市超過70％商品房銷售面積出現負增長，除新開工面積增幅下降外，投入資金亦減少16.68％。除東北地區及大西北地區等主要住房價仍保持小幅上升外，其他地區主要城市房價皆出現下降，包括深圳、廣州、上海、南京、杭州、北京。進入10月，開發商促銷再加大力度，以降價作招徠，11月進一步下降。換言之，內地房地產今年第三季亦進入回落潮。

今年2月21日農曆元宵節，上海萬科响特賣會上推出二百四十套房源，賣出其中80％，收回2.57億元。萬科响上海降價售樓，馬上引起一片謾罵；事後回望，呢個係中國樓市嘅拐點。萬科呢間一線公司响唔到兩星期內決定降價售樓，事緣1月25日到現場巡察嘅上海營銷總監發現，幾個場嘅客戶來訪量都在下降，部分跌幅更高達40％；當天下午促銷部便誕生減價促銷嘅諗法。開會兩天，促銷方案形成，一星期內價格便決定。此後一個工作天，特賣會將所有細節敲定，就响2008年2月21日開始減價促銷。

萬科寓「論戰」於管理

2006年起萬科開始實行分權制度，攞地權响董事會，定價權响一線公司；區域中心負責向一線公司提供情報，協助制定戰略，從而形成區域整體戰略，制定產品價格及管理標準，並將之推廣、歸類、分配並整合資源。2008年萬科再招聘風險管理師進駐各區域中心，目的係加快對市場作出迅速反應。萬科嘅研究報告肯定係國內最多，例如2007年碧桂園發展迅速，萬科亦針對其發展模式展開詳細研究，當年嘅順馳、中海等企業，萬科都曾進行詳盡研究，分析每一家企業嘅情況。上述研究早喺2001年已開始，初期叫「海盜計劃」（因人才都從中海等大型公司挖過來），2007年7月才改名「007計劃」，引進一批跨行業、跨國公司精英，用萬科自己嘅講法：去挖一批「見過世面嘅人」嚟幫手。「007計劃」開展後，共引進三十二名跨行業管理人才出任要職，包括前寶潔公司負責品質管理嘅陳東峰、曾任百安居中國區副總裁嘅袁伯銀、原萬博宣偉國際公關公司（中國區）消費品及醫療領域負責人于玉光，以及曾任仲量行亞太區董事及資產管理總監嘅許國鴻。萬科建立咗一套「隨行就市」策略；如市場要求降價，佢地絕唔會坐視不理。萬科2007年訂下土地儲備謹慎策略，可以基本上滿足未來兩年新開工需要就可以；2008年訂下現金流策略，公司認為當前最重要資源係保持現金流。

去年萬科已完全改變囤地策略，只收購唔拍賣，過去一年冇一幅新增土地係拍賣返嚟嘅。今年首先降價25％賣樓，唔似其他企業只降價5％或10％，因為萬科總經理郁亮認為，只有降價25％才能馬上令成交量上升，降價5-10％雖然對市場起刺激作用，但效果唔明顯，而降價25％係萬科極限。今年萬科再建立一個全國性資金管理平台，將北京、上海、成都、亞洲等十八家分公司嘅賬戶進行集中管理，所有收款都進入集團結算中心，通過資金管理中心進行銀企互聯支付，控制資金流量、流向，例如廣州分公司銷量出現問題，總公司可馬上反應……。可以講，萬科早已將「論戰」應用喺公司管理上，將生意當成一場戰爭去打，調兵遣將都有科學根據。何時進攻、何時防守，事前做足資料搜集。反觀本港唔少上市公司董事，連「勢」都睇唔清，更加唔好話「論戰」，既不科學管理，又無資料搜集，一切憑直覺（董事長個人喜好），更加唔好話去到「論性」層次。