冷靜尋底期開始
8月28日，周二。恒生指數跌213.97，收23363.76；成交1229.42億多元。8月期指跌266點，收23314點。日圓價進一步上升，德國商業信心連續三個月下降，令外圍股市回落，拖累港股。
今天國壽（2628）升5.7％，見37.15元；裕元工業（551）跌2.7％，見23.2元；中國鋁業（2600）再升5.6％，見22.6元；大唐發電（991）跌2.5％，見8.94元；長城汽車（2333）跌9％，見9.7元；青島啤酒（168）升14％，見26元。滬深三百指數連升7天，升幅共14％，收5251點；國壽A股漲10％停板、中國鋁業漲停、中金黃金漲停，青島啤酒亦漲停版。內地股市早已進入鬥傻期，此乃泡沫末期必然現象，無人能阻止。
恒指完成V形反彈後回落，主要係美國住房7月份市場出售數目達459萬間，較6月份升5.1％（或9.6個月供應量，6月份係9.1個月），代表美國樓價仍在惡化。
V形反彈形成因素係7月26日恒指由23557點回落到8月17日19386點，跌速太急，其後反彈至今天23750點【圖】，升速亦太急。後市進入冷靜期，通常需要下試低點，相信8月17日係呢次跌市最低點，至於次低點邊？市場找尋中。找尋過程中，亦係Bargain Hunters最活躍期，亦即個別發展期。
下月日圓加息機會大
8月23日日本銀行以八對一票否決加息，9月18至19日又點？依家日本首相已完成重組內閣，令下月日圓加息機會大幅上升。
星展銀行宣布持有24億坡元（16億美元）CDO，令股價下跌。CDO問題各地浮現。
Countrywide Financial股價周一回落6％，再次提醒大家美國房地產市場問題仍在惡化，雖然美國銀行入股16-17％股權。雷曼兄弟宣布結束次按部門，裁員1200人；Accredited Home宣布裁減一半人手。
後市展望，到底係雙頂回落抑或繼續一浪高於一浪？便睇9月份所出數據。8月28日恒指見23750點時，創新高股份反而唔及7月26日23557 點時多，如剔除幾隻創新高國企、紅籌股，今天股價能夠高過7月26日高點股份唔多。上述形勢令人對後市有D擔心，當指數表現較整個大市強，乃後市轉淡先兆。話到尾，2003年4月至今牛市已維持4年多，呢隻牛已有D「老」。
8月漸成過去，日後回憶時，必可以「刺激」去形容2007年8月。至於有幾多人8月份market timing做（四叔除外）？林治退休前曾講過：如你投資股票，必須知道股價隨時可大幅回落，只係唔知道幾時回落。我記憶中似乎冇人能準確預測何時回落，雖然好多人曾作許多預測。投資股票有如到賭場買大細，你永遠唔知道下一鋪係開大或開細。精明如林治亦咁講，各位認為一般所謂分析員水平如何？因此，一般投資者不宜過分注重timing，而應將注意力放stock picking 上。其次係利用「水車投資法」，即O8至12倍之時全部資金入市；O12倍到16倍時70％資金入市；O16倍到20倍時50％資金入市；一旦O高出20 倍，只留30％市場。根據Ibbotson AssociatesSahadi研究，1926年如你投資100元標普五百指數身上，到2006年12月你有307700元。972個月中，如你錯過其中40個月，2006年你回報只有1823元！即過去81年，99％升幅集中40個月內（佔全部時間4％）。Sahadi進一步指出，1987 年如投資100元在標普五百指數身上，2006年12月回報係931元；240個月中，如你錯過急升17個月，回報只有232元，即84％升幅集中 7％月份內！
水車投資法損失有限
結合林治同Sahadi理論，過分強調timing，結果只係High Risk, Few Rewards。1997年8月至今過去10年，一般投資者中80％係輸家。睇完上述分析後，你仲有冇興趣再學timing？有D危機事前十分明顯，只要細心已可避過，例如1987年10月股災前、1997年8月亞洲金融風暴前、2000年3月科網股泡沫爆破，如只用水車投資法（O20倍以上時只投入資金 30％），損失有限。
我老曹十分失望係，仲有人認為250天移動平均線係牛熊分界線。移動平均線理論係1973年7月《信報》創刊時從外國引入，我老曹運用移動平均數已有35年歷史。我老曹一再強調，移動平均線理論中並冇牛、熊市，牛、熊市係根據道氏理論，即牛市分三期、熊市分三期，呢個已係1900年前理論，近代已被人一再質疑。現代經濟咁複雜，股市係咪仲存在牛、熊市？大量國企來港上市後，本港股市對房地產依賴漸減，牛、熊市理論係咪仲有價值？過去35年我老曹研究移動平均線經驗係：A、牛市一期恒生指數唔會跌穿250天線。B、牛市二期恒生指數經常跌穿250天線，每次跌穿250天移動平均線不但唔係出貨訊號，反而係入貨訊號。C、只有牛市三期恒生指數跌穿250天線，才係牛市死亡訊號。結合道氏理論如下：A、牛市一期O8至12倍時，恒指應唔會跌穿 250天線。B、牛市二期O12到16倍，恒指跌穿250天線係入貨訊號。C、牛市三期O18到22倍，跌穿250天線才應小心。1997年8月同 2000年3月恒指O都22倍以上，牛市三期十分明顯。2003年4月恒指回升至今，未見O22倍以上（反之，國企指數已在22倍之上，國企股已進入牛市三期，即瘋狂上升期，開始唱《夕陽之歌》）。後市展望，股市繼續swings，投資策略係：你驚我唔驚，你唔驚我驚。
五時花六時變容易高追低沽
鑊鏟友與財經演員近期認為股市應大升，理由係中國政府宣布放寬資金自由行；一個星期後鑊鏟友同財經演員可能又認為股市應大跌，理由係美國次按危機惡化。如果你一如佢地咁五時花六時變，結果唔係高價追貨就係賤價沽貨（牛可以賺錢，熊可以賺錢，跑跑去豬被人屠宰）。如果你每天都分析D無關重要經濟數據，便有如車之時注意每條街上行人衣係咪入時，最後唔撞車先怪。
畢非德投資策略：一、買D有競爭優勢公司，例如擁有一個品牌、一組良好管理人才，或別人不易取而代之地位。二、買入D市價仍未顯示內在價值公司（森池兄最叻搵呢類公司）。三、買入後股價如上升20％，便應長期持有。
失敗投資者策略：一、聽貼士買股票；二、五時花六時變；三、自己唔做功課。
最近收到一位忠實讀者飛鴿傳書（佢話只睇本欄一年），剛學曉止蝕唔止賺，結果8月17日上午股市下跌中止蝕離場，點知8月17日下午股價一直上升，問我點解「止蝕」後有咁收場？我老曹為之氣結。上述係將複雜事情簡單化結果。我老曹一再強調，止蝕位訂立需要一定技巧，而非機械式，其中最大學問係股價與股市比較，即啤打系數（beta）。有D股份啤打系數低，即升市升得少、跌市亦跌得少；有D股份啤打系數高，例如細價股一般啤打系數係1.5 （即股市如升10％，細價股升15％；如股市跌10％，細價股可跌15％）。
2003年4月至今過去唔少例子係恒指接近250天線或略穿250天線便跌完，250天線附近入市係毋須用止蝕盤保護（除非50天線跌穿250天線）。
其次，入市前自己概念係乜？通常止蝕盤係股市大升之後才訂下，而非股市大跌後才訂，該讀者犯「半桶水」毛病。再次證明投資之道唔係三言兩語便講得明，真正成功投資者非十年不為功，就當交學費罷啦。
有消息稱中國銀監會即將出台政策，要求商業銀行將房供首付比例由依家最低30％提升到40%甚至50％，深圳、北京、杭州或廣東銀行已行一步，將首付最低升至40％，又或者停辦二手按揭貸款。國內好多城市已或明或暗開始收緊個人住房銀貸，最終能否阻止內地住房價格進一步上升？美國房貸次按風暴最終會否吹到中國？根據「溫水煮蛙」原理，邊次才係壓壞駱駝背脊最後一根稻草？今天中資房地產股普遍下跌，例如中期純利大跌復地（2337），甚至中期純利上升雅居樂（3383）、實力地產（2777）、深控（604）、上海置地（1207）等都逃不了。睇上述消息有一定可信性。
拉斯維加斯金沙集團將澳門機場附近興建一個新碼頭，有10個泊位，來往香港同澳門、香港國際機場至澳門、深圳至澳門，以及其他珠江三角洲城市之間。 10個新建渡輪碼頭分別今年10月至明年3月陸續投入營運，即今年10月起去澳門除原有舊碼頭外，將來有另一個新碼頭澳門機場及亞洲最大博彩度假村附近。未來澳門賭場誰領風騷？將有一番惡鬥。濠賭股又點睇？
中國2011年1月起全面禁止煙草廣告及相關促銷贊助活動，依家只在包裝上印上「吸煙有害」起唔到作用也。
沒有留言:
張貼留言