2007-08-28
中港樓市星光熠熠
8月27日，周一。恒指升655.84，收23577.73；成交1263.4億多元。8月期指升676點，收23580點。正是花不迷人人自迷、酒不醉人人自醉，內地同胞D蚊年未到，香港人自己已炒到癲晒。今天已百分百完成V形反彈，而唔理會日圓又再回升至116.26兌1美元。建行（939）升 5.1％，見6.15元；工商銀行（1398）升3.5％，見5.08元；中石油（857）升3.8％，見8.47元；中移動（941）升4.1％，見 100.6元；中國鋁業（2600）升32％，見21.4元；上海石化（338）升14％，見5.72元；華潤創業（291）升4.9％，見32元；百麗國際（1880）升6％，見8.98元。
雖然港股直通車仍未開出，股市已再次面對流動性資金過剩，出現雞犬皆升局面。雖然恒生指數已完成V形反彈，但細價股指數仍未完成V形反彈，只係炒落後心態，二線股短期上升空間應該唔細。存心不良玩鬥傻
內地居民資金自由行計劃，令港人炒定A、H股差價收窄，六個交易天內A、H股差價由118％收窄到50％。由於A股同H股不能互相流通，上述「想當然」理論係咪正確？9月份才揭曉。我老曹唔認同內地人會沽A股而買H股，因為A股就係A股，H股就係H股，兩者不能互通。情況有如新鮮豬肉同雪藏豬肉，又或日本黃豆期貨同美國黃豆期貨關係一樣。1971年我老曹曾跟一個日本人學陰陽燭走勢兼學炒日本期貨，發現美國期豆較日本期豆便宜好多，便自作聰明美國買入期豆、日本拋空期豆，以為可以賺差價。事後結果係美國期豆進一步下跌，日本期豆漲停板，我老曹5萬港元孖展一個月內輸突！雖然日本係從美國進口大豆，但芝加哥期豆不能用作東京期豆交收，兩者短期差價可以好大。因日本人喜歡夏季吃豆腐，形成日本大豆夏季供應出現短缺；美國卻進入豐收期，形成夏天美國大豆跌價。上述係我老曹5萬元買番教訓─—全世界唔係只有你先知道日本期豆有溢價。A、H股差價長期存在，理由係H股投資者來自全世界，可供佢地選擇投資項目十分多（唔買H股可以買全球其他投資項目）；A股出現溢價理由係內地人只可投資A股，冇得揀，開放A股市場長遠而言應係A股回落，唔係 H股上升。最近A股不跌反升，H股亦上升，只係港人希望內地人來港接火棒而已，唔好聽係玩鬥傻遊戲及存心不良。如內地投資者真係來港買H股，係佢地傻；如內地投資者來港唔買H股，就係今時今日高價吸納H股者傻，最後結果到底係邊個傻？9月自有分曉。
花旗今天推介盛高置地（337），估計今年每股獲利50.2仙，較去年升4.6％，O12倍；明年每股純利可上升至63.8仙，上升27.2％，未來 O只有9.3倍。另推介華電國際（1071），因為可能發行A股內地掛牌，加上今年每股獲利估計22仙，上升10.6％，O16.8倍，唔算貴。大行亦加入推介二線股行列。
獨立自主代價唔輕
環球化對中國有利，但唔係冇代價。1997年亞洲金融風暴前，中國出口增長率達30％；亞洲金融風暴後，1998年中國出口出現10％負增長（因東南亞國家貨幣大幅貶值，而人民幣唔貶）。咁情況下，中國提供出口退稅優惠，才令中國出口恢復增長。2000年美國科網股泡沫爆破後，中國出口增長率又放緩，即1997至2001年中國出口平均年增長率只有12％。2001年年底中國獲准加入WTO，WTO其他成員國市場亦向中國開放；加上美元2002 年起貶值，引發2002至06年中國平均年出口增長率上升至30％（今年上半年仍升28％）。過去5年中國出口升幅倍於1997至2001年，引發全球原材料價格上升，但近年連內地地價亦上升及勞工供應不足。
今年7月起中國政府逐步減少或取消出口退稅，相信未來中國出口增長率將放緩。中國出口及相關項目佔中國GDP 40％以上，呢方面增長率放緩，係咪真係對經濟冇影響（1998及2001年中國出口增長放緩，對中國GDP影響好大）？何況今年起美國經濟受次按影響， GDP增長率第二季已開始急速下降，今年中國仲可以依賴歐洲共市（EU）令出口保持高增長，但次按危機已波及歐洲大銀行（包括豐），依家中國GDP高速增長，又可以維持幾耐？
中國經濟一直由外國帶動（情況一如1990年前日本）。開放28年後今天，中國經濟係咪已長大成人，毋須再依賴向外國出口而能自行保持增長（日本 1990年起減少對出口依賴後，經濟一直不振）？獨立自主係有代價。時下幾多年輕人過21歲仍然同屋企人住，因為佢地明白財政獨立代價唔輕。1979 年鄧小平訪問美國，令中國獲MFN地位，中國出口便一直依賴美國市場，2001年12月起才逐步擴大到WTO其他成員國。時下香港年輕人21歲後，有幾多個真正離開父母，以及財政上真正獨立，毋須依賴家庭？唔好話照顧父母，單係負擔自己獨立生活已經唔容易。
中國「十一．五」發展專項規劃強調，到「十一．五」後期，乙醇汽油消費量佔全國汽油消費量比例，將由依家20％升到50％以上，即2010年中國乙醇汽油市場規模預計將達6650萬噸，到時中國乙醇年產量將超過330萬噸。中國乙醇汽油使用佔全國汽油消費量20％，係巴西、美國之後第三大生物燃料乙醇生產國同應用國。何謂乙醇汽油？就係汽油中加入10％無水乙醇（俗稱酒精）。今年全國所消耗汽油已有20％加入乙醇，計劃到2010年消耗汽油中乙醇汽油佔50％。中國2000年黑龍江、吉林、安徽、河南開始生產燃料乙醇，到去年黑龍江華潤酒精廠、吉林燃料乙醇公司、安徽豐厚生物化學公司及河南天冠集團加起來年產量已達160萬噸。2004年國家稅務總局為鼓勵汽車多用乙醇汽油，宣布汽車如採用乙醇汽油者，其增值稅實行先徵後返。
乙醇燃料項目三個不得
上述四家公司，除河南天冠以小麥為原料，其他三家企業均以玉米為原料生產燃料乙醇。導致食物價格急漲後，國家認為糧食安全永遠較能源安全重要，宣布今後發展生物燃料必須由「糧源」調整為「非糧」，即新一代生物燃料生產廠必須以「非糧」為原料。近年各地小酒精企業均以玉米為原料，生產規模大都1.5萬到3萬噸，年利潤可達100萬元以上，屬於投資小回報高行業。但咁樣會令玉米供應緊張，飼料變得昂貴，豬肉同雞蛋大漲價。例如天津玉米期貨價格由 2006年1300元一噸，漲到依家1800元一噸，政府宣布取消玉米補貼（加上玉米漲價），令上述工廠變成無利可圖，紛紛停產，形成以玉米為原料生物燃料生產廠產能出現過剩。去年12月財政部已下發兩個文件：一、各地不得盲目發展玉米加工乙醇能力；二、對玉米加工專案進行清理。其後國家發改委、財政部提出，獲國務院批准實施「生物燃料乙醇及車用乙醇汽油」、「十一．五」發展專項規劃，任何地區無論係非糧原料抑或其他原料燃料乙醇專案核心及建設，一律要國家審定，凡違規者不得享受燃料乙醇稅收政策及追究經濟損失由有關單位負責。今年6月7日再增加「三個不得」：不得佔用耕地；不得消耗糧食； 不得破壞生態環境。由於2000年上馬生物燃料生產項目係1996至99年糧食供應過剩時批出，上述新規定令已上馬項目出現尷尬場面。 乙醇汽油有好強吸水性，長期儲存會使水含量上升（溫度愈低、耐水性愈差），因此乙醇汽油儲運周期只有4、5天；換言之，只適合D入完油後2、3天便將汽油用完汽車，一般私家車如果唔係2、3天內將油用完，便不宜使用乙醇汽油。此外，運送、儲罐、槽車、調和及加油設施都必須先行改造或重新建設才可，令推廣乙醇汽油使用上面對一定困難。而且乙醇生產、儲存、燃燒過程中會產生有機酸，對機件產生腐蝕及磨損，對汽車部分橡膠材料起化學作用而需要更換其他橡膠材料。另一方面，中國玉米成本較美國高出80％，中國乙醇價格又較美國低18％，如全國推行，政府每年必須補貼100億元人民幣，乙醇企業才有利可圖，取消補貼則乙醇企業無法生存。中國生產一噸乙醇耗水12噸（美國1.8噸），中國3.3噸玉米生產一噸乙醇（美國2.8噸）。中國係缺水國家，甚至以木薯、甘蔗、甜高粱、農作物桿等非糧原料生產乙醇，係咪符合經濟效益又係另一個問題。換言之，中國發展燃料乙醇路十分崎嶇。
各位知唔知道炒樓係明星們最有效聚財手段？以史提芬周為例，1990年佢購入第一個豪宅就係香港寶雲道12號峰景花園，買入價475萬元，家市價 1500萬元；1993年佢以2800萬元購入淺水灣恒峰複式單位，1996年以4250萬元賣出，賬面獲利1450萬元；再以8383萬元1996年購入山頂普樂道7號，依家市價4億元；最大手筆係2004年3月23日佢以3.2億元購入山頂普樂道一幅土地，改建為4棟別墅，目前市價9.2億元。 除豪宅外，2002年佢以3000萬元購入旺角先達廣場兩個商舖，2004年以4300萬元賣出，賬面賺1300萬元。2004年11月12日以2.1 億元購入尖沙咀加連威老道34至36號連城閣地下、閣樓等，並以5000多萬元收購灣仔皇后大道東物業，依家市價已升至9700萬元。大明星炒樓賺唔少
成龍大哥演戲一流，投資房地產眼光亦一流。去年佢在美國好萊塢比華利山超級豪宅上淨賺3000萬元，香港物業淨賺7000萬元，即去年佢投資房地產利潤超過1億元。
任達華亦不俗，全世界20多個城市都有物業，包括紐約曼哈頓158號、巴黎二區、香港中區、北京新世界商園等。
劉嘉玲拍片唔多，但投資物業眼光一流。除香港外，北京、上海、蘇州、重慶都有物業，聽講去年佢賺進2500萬元。
那英10年下來置業7處，最近一次更購入3000多萬元市值豪宅，係目前北京頂級豪華別墅，比王菲晴翠園別墅面積仲要大一倍以上。 趙薇上海及北京亦購入多處別墅公寓，最近購入係一間市值2000多萬元上海別墅。
李嘉欣最近出售跑馬地樂陶居，收回8500萬元，仲住物業包括渣甸山獨立別墅，市值5000多萬元，以及荃灣愉景新城多個單位。
張柏芝兩年前以2100萬元購入大埔康樂園，最近以2600萬元賣出，賺500萬元，以明星計算係賺得最少。
容祖兒2005年以4000多萬元購入跑馬地山村台兩個豪宅，亦升值唔少。
阿Sa2002年12月以700多萬元購入九龍站漾日居，近期出售，賺過千萬元。
不過，亦有失手藝人，最出名係阿B，1996年香港樓市高峰期入市，狂掃港灣道會景閣5個豪宅及其他項目，欠債1.54億元，其後本息變成2.5億元，只有申請破產。
張衛健更慘，1997年年初才入市，拍6、7年電影，收入不但未夠還債，仲變成負資產；好彩近10年收入多，捱過2003年低潮後，據《廣州日報》報道，佢已清還所有欠款，但從此唔敢沾手房地產矣。
除炒樓外，明星亦有炒股票。佢地明白依家食係青春飯，日子唔長；做生意則因為自己時間唔夠，所做生意賺錢少蝕本多；甚至炒股票亦需要太多時間。大部分明星最喜歡投資係炒樓，大部分藝人樓市都賺唔少，阿B同張衛健例子只係少數。 過去內地買樓，一般租金回報率8厘以上，即12年可收回成本，到時層樓冇成本賣幾多賺幾多；過去3年內地樓價狂升一倍到兩倍，但租金卻漲唔上去，售價100多萬元住宅月租只係3000到4000元，回報率已跌至3.5厘，即30年才收回成本（同香港睇齊）；上述係普通住房租務回報。豪宅仲有趣，租金不升反跌，例如陽光100月租由4500元降至3500元，現代城月租由5000元降至4000元，售價卻由11000元一平方米升上13000元一平方米。內地買一套住房打算5年內售出，計算「打和點」邊？一、1.5％至3％契稅；二、2％公共維修金；三、0.05％印花稅；四、出售時5.5％營業稅、0.05％印花稅、20％個人稅及1％土地增值稅；五、買賣佣金及其他開支。換言之，買入一套住房，5年內升值13％才打和（上述未計裝修費同供樓利息，如計算在內，內地樓價升值20％仍然賺唔到錢）。今時今日回國炒樓？請三思而後行，唔好見大明星炒得好過癮便照跟。
沒有留言:
張貼留言