港股今年升37％
12月28日，周五。恒生指數跌472.33，收27370.60；成交782.2億元。1月期指收27306點，跌564點，低水。
東亞銀行（023）升3.73％，收53.4元，因西班牙銀行增持4.76％，至8.89％；東亞透過發行七千八百七十萬股新股，集資39.5億元，拓展中國市場，計劃兩年內來自中國收益佔總收益40％。
利豐（494）跌2.8％，收31.8元；工商銀行（1398）跌2.1％，見5.56元；建行（939）跌1.9％，見6.6元。主因受美國花旗、JP摩根大通、美林股價下跌影響。工銀亞洲（349）母公司增持8.23％，但股價跌1.6％，收5.68元。
11月份香港出口增速創下十四個月內最低點，只較去年同期上升6.6％（10月份上升9.8％），因美國需求放緩。
滬深三百指數出現八個交易天內首日低收。中國聯通跌1.7％、中石化跌2.4％、長江電力跌2.7％；但東方航空升6.8％、南方航空升2.4％、國航升1.1％，因人民幣升至7.3032兌1美元。
總市值接近20萬億
港股仍有下個禮拜一半個交易天便結束2007年，依家總市值接近20萬億元，較2006年年底13.33萬億元勁升50％有多，世界排名第七。恒指今年最高點係31958點，較年初19964點升60.07％；國企最高見20609點，升幅更達99.31％。以今天收市恒生指數27370點計，全年升幅達37.1％，成為A股以外升幅最大亞太區股市。地產分類指數升58.42％、工商股升53.13％、公用股只升12.58％；此外大型股只升11.52％、中價股升27.25％、小型股升33.24％，代表2007年係二線股世界。
摩根大通估計2008年港股直通車將開通，流港資金大幅增加；另2008年QDII流出規模達900億美元，係港股直通車外另一對港股刺激甚大因素。估計2008年恒生指數可升20％，A股同H股差價收窄至35％，即估計2008年恒指高點在33000點或以上。
新加坡豪宅今年升逾五成
2007年快將過去，今年全球豪宅升幅最大係新加坡；今年第三季較去年同期升56.4％（仲量行資料）；其次係北京，升幅25.7％。兩者皆超過香港及上海。2008年會係點？Intellectual Property行政總裁Tim Murphy估計將輪到鄰國馬來西亞吉隆坡。馬來西亞政府今年4月1日起取消資本升值稅，令外資流入房地產市場；反之，中國各大城市表現唔同，例如深圳同廣州今年第四季開始回落，珠海同澳門仲度上升。深圳樓價過去三年半勁升350％，今年第四季出現調整，因9月起人行要求購入第二間住房者付首期40％及額外多付利息10％。香港房地產2007年升17％（2005年升10.3％，2006年跌0.4％），豪宅平均升幅24.5％。美林分析員11月份估計未來兩年香港樓價再升50％；簡福貽公司則睇好400萬到1000萬元市值住宅樓。東京樓價2007年升幅唔大，泰國亦一樣。
中國經濟仍可睇好20年
2007年係中國難忘年。有D趨勢2007年第四季見頂回落，有D一直伸延到2008年，例如北京奧運2008年8月舉行，其影響力自然一直伸延到明年。雅典奧運2004年舉行，雖然令希臘蝕本，吸引遊客數目只及政府估計一半，但令希臘人昂首闊步進入二十一世紀。2008年有幾多遊客到訪北京並唔重要，中國卻可以向全球展示改革開放三十年成績，以及過去二十年中國GDP以年率10％速度上升成就。今天中國經濟較三十年前更有創見，技術水平提升唔少，資本增加好多，工資亦上升唔少。至於中國經濟係咪過熱亦唔重要，因過去推動中國經濟向上力量並冇消失，最多只係短期調整而已。五年前如果話中資金融機構注資協助美國大銀行及大金融機構度過難關，係不可想像事，2007年卻發生眼前。改革開放已三十年，但經濟上可以改善地方仲有好多，例如保健、教育、保險、金融、農業……。估計中國經濟仍可睇好二十年（短期風浪一定有）。
投資係買好公司，當其股價因短期因素而被質低，而非買壞公司，尤其係其股價因短期理由而被炒上！壞公司幾時都唔好買；反之，我地可趁短期股市回落吸納好公司。乜係好公司（D股價開始一浪高於一浪者。）乜係壞公司（D股價開始一浪低於一浪者）。
明年中國貨幣政策從緊係十年來首次，主因係中國CPI升幅由3月份3.3％上揚到10月份6.5％，全年可能超過4.4％，明年第一季可能進一步上升。由於流通中貨幣減少，10月份起開始影響內地房地產及股市，政府開始努力做好70％保障房問題。就像新加坡80％人口住政府組屋一樣（類似香港居屋）；香港有50％人口住公屋或居屋。中國政府最終係讓70％人口住政府廉租房、雙限房、保障房，讓30％房子價格由市場供求決定。至於奧運會後房價會唔會下降？萬通董事局主席馮侖認為，過去奧運舉辦城市都係人均GDP 1萬美元以上，北京依家只係6000美元，整個中國更只有2000美元。人家係經濟發展成熟後才舉辦奧運，中國經濟至今仍未讓人民吃飽，因此短期調整難測，長期則冇問題。中國指數研究院估計，中國地少人多，雖然2008年實施貨幣從緊政策，明年房價仍會繼續上漲。
次按風暴對2007年第四季大金融機構業績影響係點？明年2、3月係業績公布高潮。從大銀行及大證券行願付9厘到11厘息去補充資金睇，呢個代價認真便宜。控（005）因為資本充足，索性將450億美元SIV納入銀行資產負債表內，避免低價出售；接花旗集團亦將SIV納入銀行資產負債表，但唔係所有金融機構都有條件咁做。明年2、3月公布2007年第四季業績時，投資者反應會係點？
聖誕節過後聖誕老人去放假，唔再向各位派禮物。1月效應係點？大量利淡消息令1月效應暫時無法出現。領先經濟指標過去四個月有三個月回落；12月Philly信心指數係負5.7（11月係正8.2）。Shopper Trak（零售數據指數）顯示今年美國聖誕零售較去年同期減少10％！由於美國經濟以消費為主而非製造業，理論上很難出現連續兩季GDP負增長，除非出現類似日本1990至2003年連續十三年樓價回落或1997年9月至2003年8月香港樓價連續六年回落。透過減息及令美元價回落，1991年美國經濟避免出現衰退，2001年亦成功避過衰退；2008年會否出現經濟軟陸（GDP一季負增長）？
重新啟動經濟需要大電池
分析家相信，透過再膨脹（Reflation）去保持2008年GDP增長，此招格老運用得十分巧妙。2000年科網股泡沫爆破後，聯儲局將利率降至1厘；加上減稅、美元貶值因素，令樓價上升，抵銷科網股泡沫爆破影響。小女擁有四驅車最近因為少而冇電，我細佬駛來佢CAMY房車，利用汽車電池欲Jump-start小女架四驅車，可惜無效。小女致電豐田（該公司服務一流，不足三十分鐘便有車到。車來一個大電池，唔使十五秒便將小女架四驅車重新啟動）。原來要Jump-start架四驅車，CAMY房車電池唔夠力！經濟亦一樣，過去美國樓價上升力量足以抵銷科網股泡沫爆破，但要對付樓價回落影響，必須要有更大電池始掂。只憑貝南奇將利息減到3.5厘係唔足以重新啟動美國經濟。2003年下半年香港經濟能夠重新啟動理由，因為我地有大電池——中國，中央政府一聲自由行，十三億同胞排隊來港，如果每人一生人中來港一次，以香港每年只能容納二千萬旅客計，要六十五年（六十五年後新一代同胞又長大……，即長做長有），自由行仲未夠，跟住係CEPA、QDII、北水南調，香港經濟自然重新啟動；反觀日本經濟自2003年至今，雖然全世界好景，但日本GDP太大（僅次於美國），至今仲係半死不活，好難再啟動。
今天格老已經無官一身輕可以大講風涼話，但貝南奇卻騰晒雞。
次按危機高潮在明年上半年
部分對沖基金及主權基金被低價吸引，入市吸納或注資大銀行及大金融機構。佢地一向以醒目及錢多出名，今年佢地投資日後或者有利可圖又或者仍要受苦，只有時間可以話畀你知。捉住下跌中刀，從來唔係一件易事，我老曹亦冇資格妄加評論。過去幾年亦有對沖基金趁低吸納Sears及Kmart，但Sears由每股獲利53美仙下降至每股獲利1仙；Kmart亦唔見得有起色。八十年代上一次油價由高峰回落，令德州房地產大跌，1983年樓價較高峰回落50％，唔少人認為可趁低吸納，可惜1983年買入後，德州樓價仍然死氣沉沉，一直到2001年才復甦。趁低吸納？邊個水平才算低？1973年3月和記企業每股43元，1974年7月和記跌至每股7元算唔算低？我老曹由7元開始買，然後6元、5元、4元、3元，手上50萬元現金共十萬股和記，最終和記見1.1元才止跌回升。
Warburg Pincus12月10日以10億美元投資MBIA（一間債券保證公司），其後再用5億美元以每股31元入股，但MBIA保證81億美元CDO進一步轉差，該股12月21日跌至18.9美元，令Warburg十一天內失去35％投資價值，證明撈底從來不易。
有智慧不如趁勢，大趨勢係美國樓價2008年仍然回落，次按危機高潮2008年上半年，大量對沖基金及主權基金2007年入市，吸納美國大銀行及金融機構股權，最後結果係點？木宰羊。至於大銀行將SIV納入資產負債表內，即日後SIV得失由銀行股東承擔。控好DD點，因為本身資本充足，花旗便慘些，因為佢地資金成本高達11厘（另阿布扎比有權將佢轉為普通股）。用11厘息成本去持有SIV係咪化算？你話呢！九十年代美國佬笑日本銀行將垃圾掃入地氈底而唔去處理，今天美資金融機構何嘗唔係咁？將垃圾掃入地氈底只係睇唔見，但唔代表唔存在。
人們仍在期待另一個泡沫去抵銷美國樓市泡沫爆破，聯儲局及各國央行都在努力挽救全球信貸市場，暫時止得咳，長期就唔知道有乜結果。熊市唔係一天內出現而係逐漸浮現，資金由弱項流向強項，最後連最強項目亦回落，人們才驚叫熊來了。第一個熊爪睇落已今年8月出現，然後11月……正逐步擴散中。
沒有留言:
張貼留言