2007-12-12

港明年被迫負利率


　　12月11日，周二。恒生指數升725.74，收29226.84；成交899.64億元。12月期指高水，升856點，收29410點。控（005）升2.2％、新地（016）升6.8％、長實（001）升4.6％、富力地產（2777）升3％。

　　滬深三百微升0.13％，已連升七天。貴州茅台升4.5％、蘇寧電器升2.4％。

　　明年美國經濟增長放緩，令出現低利率機會好大。香港基於聯繫率制度，明年亦將被迫出現負利率時代（中國因素令香港CPI升幅擴大，聯制度令明年香港利率低於2.5厘機會甚高，即重返1990至91年情況。分別係1990年只有《信報》才知乜係負利率；反之，今天連十歲小孩亦知道乜係負利率。明年負利率效應會否一如1990至97年，產生所謂理性預期）。

　　明年中聯邦基金利率最大可能性係3.5厘，美國核心通脹率1.9％，仍非負利率；香港利率明年有可能見2.5厘，而CPI維持3％水平；上述環境不利出口業務。至於地產股，有人認為股價早已反映負利率因素。

銀行股已見底？

　　周一道指升101.45或0.7％，因UBS大幅撥備後股價反升2.3％，收51.66美元。JP摩根升2.9％，見47.42美元，紐約金融項目指數升1.8％。各位真係相信銀行股已見底咩？12月20日至1月9日被認為係產生「1月效應」時間，今年會否出現？聯儲局減息後，美股反應又係點？

　　UBS今年第三季已撥備42億瑞士法郎（37億美元），第四季須再撥備100億美元，並出售股權畀新加坡政府投資機構，集資110億瑞郎；另出售部分股份畀中東投資者，集資20億瑞郎。新加坡政府投資機構將持有UBS 9％，成為最大單一股東。新加坡主權基金1981年成立，依家管理財富約1000億美元，僅次於另一國家基金淡馬錫管理1080億美元。兩大基金近年海外投資十分成功，尤其係淡馬錫最近香港單係出售小部分國企、紅籌股，獲利已極之驚人。

美次按危機將產生通縮壓力

　　繼花旗、貝爾斯登、柏克萊、UBS之後，美國次按問題係咪已解決？分析家認為，明年美國經濟出現衰退機會上升到38％（11月係33.5％），估計今年第四季GDP只上升0.9％（事前估計升1.6％），明年第一季GDP增長率1.5％（11月估計1.9％）。明年美國樓價繼續回落已成為共識。

　　今年至今道指上升10.14％、標普五百指數升6.89％；日經回落1％；恒生指數上升46％；滬深A股上升166.30％。明年又點？道指能否再升10％？恒生指數能否再升46％？滬深A股肯定不能再升166％。今年中國每天有十多萬個新股票戶口，但10月17日起A股亦開始反覆回落【圖】。小胡上任後第一次主持共產黨十七大會議已指明，到2020年前中國強調經濟結構改善、保護環境及建立和諧社會，唔再盲目追求GDP高增長。日本1990年至今股市崩潰後，利率已降至接近零（近期微升至0.25厘），情況係點？2007年美國人負債肯定較1990年日本人多，未來又如何？次按危機影響及樓價回落下，明年道指能再上升10％咩？如美國同中國股市明年表現皆失色，恒生指數能夠再升46％咩？單靠美國明年減多兩次息，全球經濟就可以繼續繁榮落去咩？可以講2008年投資環境相當醜陋。

　　值得注意係，美國次按危機及樓價回落可產生通縮壓力（請參考1990年至今日本—日本通縮壓力未令九十年代全球通脹升幅減少，直到中國出口能力大增為止）。問題係來自美國通縮壓力，面對新興工業國通脹壓力，最終誰佔上風？

　　英國三百五十間銀行組成指數自2004年起表現已弱於大市，標普五百銀行分類指數過去兩年亦好弱；瑞士銀行指數2001年年初表現出色，但今年6月起跌幅十分大。加拿大金融指數今年初仍不俗，但新加坡金融分類指數已失去上升動力，恒生金融分類指數2005年年初已轉弱。

　　換言之，次按危機早已孕育，只係到2007年才表面化。如參考日本銀行股過去表現，擔心呢次西方銀行股弱勢仍有排搞，危機仍未完全過去。大銀行仍有主要基金及中東資金注資，細銀行又點？股票市場係咪高興得太早。

　　11月份中國CPI上升6.9％，創下1997年1月以來十一年新高，主因係糧食價格上升，例如豬肉價格較一年前升56％。發改委副主任畢井泉話，明年推行資源價格改革，令物價上漲壓力較大，即中國通脹率可見將來仍係上升，唔排除年底前再加息。

　　明年從緊貨幣政策將進一步影響中國房地產業。11月份不斷傳出北京、深圳、廣州及上海等一D中心城市房價下跌消息，一反多年來一路上揚，拐點似乎已在眼前。買房唔再咁心急，賣房亦冇以往「牛氣」，市場觀望氣氛漸濃。深圳10月樓價14797元一平方米，已較9月下跌一成；北京市四十五個新開樓盤，平均每平方米14966元，較10月份15324元下降358元。上海上周住宅成交價，平均每平方米10614元，較11月下降7.24％，亦開始回落。

　　內地智聯招聘公司上周六公布今年白領炒股調查報告。被調查六千多名白領參與者，顯示超過60％白領把手上財產一半以上投入股市，全年計超過60％係賠多賺少，理由係今年內地股市太多deep V。投資者過去一年為股喜、為股悲，結果損手者居多。至於冇入市白領不外四大理由：一、冇膽量；二、冇資金；三、冇知識；四、冇興趣。其中以冇知識者最多，因為自認對股票投資認識唔多，唔敢隨便進入。

內地白領炒股輸多贏少

　　雖然今年內地白領炒股輸家多贏家少，但51.5％白領股民對前景仍充滿信心，只有30％表示痛心。散戶中，贏錢超過一倍不足10％，20％表示有錢賺，26.8％表現不賠不賺，其餘都係蝕本。絕大多數股民決定明年繼續作戰，未入市白領14.9％表示明年一定入市、5％表示唔會做任何投資。香港情況又如何？相信亦好唔到幾多。唔好以為今年恒指上升44％便人人賺錢，估計一樣係輸家多、贏家少。

　　1984年7月至1997年8月前後共十三年，香港股市出現超級大牛市，令買入後持有成為超級大贏家。1997年8月至2007年7月過去十年又將買入後持有者變成大傻瓜。十年過去，唔少股份不但未能重返1997年高位，有D股份自1994年起股價已停滯不前。唔單止咁，四十年前百萬富翁已生活得好好，今天擁有一百萬元財富只係一位Sissiy，你退休生活要好好計劃，以免捉襟見肘。通貨膨脹壓力下四十年後又點樣？今天要過中產階級退休生活，每年收取四厘息回報計，最低要求係1000萬港元財產（每月開支33000元），上述已非豪華退休生活。但一百個退休人士中，有九十九個未擁有1000萬元。至於擁有100萬元退休者如每月開支二萬計，十年後連本金亦吃掉，二十年後而唔使綜援機會只有33％（如六十歲退休，有90％機會超過八十歲）。上述係我老曹一直反對四十五歲前退休理由（除非你已擁有超過1000萬元家財）。不然遲早變成Sissiy。

　　戰後嬰兒潮（1946至64年）係世界上最幸運一群，正好趕上世界經濟繁榮期。比較不幸係1978至97年才出生一群，當1997年佢地踏足社會時，面對中產階級全球化；巴西、中國、印度、馬來西亞、墨西哥、菲律賓、俄羅斯甚至印尼、巴基斯坦中產階級均大量湧現。情況有如八十年代香港工人階級所面對問題一樣。供過於求令工人階級自1980年至今收入扣除通脹冇實質上升，部分甚至下降。1997年起出現環球中產階級供應大增浪潮，令香港中產階級收入停止上升，因為佢地工種被大量外判到新興國家，情況一如1980年製造業一樣。基於供求因素，1997年香港中產階級並唔值錢。換言之，未來香港20╱80現象只會惡化，難以改善。過去窮人可透過讀書由貧窮階級晉身中產階級，生活立即改善；1997年起即使讀書成績好而成為中產階級，但收入由1997年起已無法按年上升。2007年愈來愈多大學生成為中下階級而非中產階級，估計到2050年全球各國大部分人口都係中產階級（真正窮人數字大減）；而財富分配有可能進入10╱90環境（即10％人口擁有大部分財富，90％人口只能過普通人生活）。全球大部分家庭由戰後一家七口（五個孩子）進入一家四口期，估計到2050年全球人口不但停止增加，反而開始減少，令全球人口結構由金字塔形、變成圓錐形（由一歲至七十歲分布相同，至七十歲起才漸漸減少），即老人社會現象由今天日本向全球擴散，無論北美洲、亞洲、歐洲、拉丁美洲分別都唔大。即未來四十年新興國家中產階級人數爆炸性上升期，漸漸同歐美國家冇乜分別；最多老人係中國（一孩政策後果）。

　　另一大趨勢係都市化。1950年29％人口都市生活，今天48％；未來2050年將有70％都市生活。類似東京大城市（人口一千萬以上）大量湧現，令唔少城市樓價狂升，人口過分擠逼大城市，亦一如東京1990年起樓價走下坡。作為地產投資者，可利用都市化過程從中獲利，但人口一旦超過一千萬大城市便得小心，例如去年美國加州及佛州唔少大城市，以及今年倫敦及紐約（日本大城市地價扣除通脹1990年起一直走下坡。雖然2003年起香港樓價回升唔少，但此乃港元率下跌錯覺，香港地價自1997年起亦在反覆回落中）。

新興市場國家將收緊貨幣政策

　　中國因素（或加上印度因素），令全球資源價格自2000年起上升。隨中國策略上改變，全球資源價格會否今年見頂？從最近數字睇，原材料價格升幅漸漸集中農產品方面。全球農地供應1961年至今只上升13％（主要南美洲），雖然美國及歐洲仍有部分農地棄置唔用作耕種（基於國家政策），但隨糧食價格上升引來更多投資，但能夠供應農地有限。唔同生活水平，受食物價格影響唔同，例如歐美，食物只佔CPI 10％；反之，菲律賓，食物則佔CPI 50％。換言之，愈貧窮國家所受通脹壓力愈大（社會上亦一樣，愈窮人所受壓力愈大），如唔適當處理，可引發政治不安。相信唔少新興工業國明年都會採取略緊貨幣政策，以壓抑樓價上升，不利新興國家市場股市及樓價。