2007-12-28

食最緊要消化

　　12月27日，周四。恒指跌285.87，收27842.93；成交765.99億元。12月期指低水，跌460點，收27795點；1月期指收27868點，跌431點。

　　今天建行（939）跌3.2％，報道指人行向四大國有銀行確定明年新貸款配額；恒地（012）跌2.8％、信置（083）跌2.7％、九倉（004）跌4.7％。中國電信（728）升6.3％、中國聯通（762）升3.6％，因國務院宣布新一代寬帶無線移動通信已完成審批。綠城中國（3900）升2.2％、華能電力（902）升2.9％、中石化（386）升1.5％。

澳元家今年財息兼收

　　滬深指數出現第七天上升。上海石化同儀征化纖漲停，因兩大公司母公司承諾一段較長時間內唔會出售兩公司新股。

　　人民幣升至7.3162兌1美元，估計明年底可見6.84兌1美元，以減少明年內地通脹壓力。澳元亦上升，成87.45美仙，三個月銀行票據利率成7.26厘，令到利差交易大增。今年澳元兌日圓升6.5％、兌美元升11％；澳元家今年財息兼收。

　　希望每個讀者都有一個有趣而滿足假期，與家人及朋友共度歡樂時光。幾天假期後疲倦，影響住今天股市表現。2007年將盡、2008年將臨，又係回顧與展望日子。2007年道指升8％（標普五百指數升幅只有5％）、日經跌8％、恒生指數升40％，最出色係A股升162％。2007年香港投資，中字派贏成條街，2008年又會點？2007年將過去，留畀人們記憶係國內流動性過剩，造就前所未見A股瘋狂、前赴後繼IPO上市，以及爭先恐後股民投資，例如中國中鐵（390）、中海集運（2866）、中國遠洋（1919）等等。有D IPO上市後升完可以再升，亦有D一上市便跌破招股價。正是寒天飲水，冷暖自知。由於90％新股由大機構包銷，佢地今年佣金收入可以令大型證券商職員豐衣足食，今年花紅十分驚人；其客戶分得新股市場出售，利潤亦不俗。

　　展望2008年兩大唔明朗因素，令未來存在諸多不確定性。美國樓價仍未見底，至今年10月美國樓價只回落6.7％，高盛證券估計最快2009年美國樓價才有反彈。

　　2007年美國超過二十間金融機構出問題，2008年次按危機仍未過去。

走出去走進來無可避免

　　2007年係中國金融機構走出去年份，全國資產規模最大工商銀行（1398）收購印尼Halim銀行90％權益，8月再以5.83億美元收購澳門誠興銀行80％權益，10月以56億美元收購南非標準銀行20％權益，成為第一大股東。國家開發銀行7月份則以22億歐羅購入英國巴克萊銀行3.1％權益，民生銀行10月再以3.2億美元購入美國聯合銀行9.9％權益，並有權未來增持至20％。令人失望係中投公司30億美元入股百仕通，起碼吃眼前虧；中投第二次出擊係50億美元購入大摩可換股債券，一旦行使便成為第二大股東。中信證券以10億美元購入貝爾斯登6％。平安保險（2318）以27億美元入股富通集團4.18％，成為最大單一股東；中國人壽（2628）亦計劃收購歐美一家大型保險公司策略性股權。金融業一向係中資機構較弱一環，2007年走出去成功與否，好大程度睇次按危機未來發展如何？次按危機令國際大金融機構利潤大縮水，股價大幅回落，到底係商機抑或係危機？2008年將明朗化。

　　近期收購，中資機構只擔當投資者地位，一般購入唔超過10％股權，不但可避免所在國國家安全局審查，同時被購一方管理層亦唔會加以阻礙，被收購者亦可借助中國資金加快恢復元氣，有機會產生互利局面（例如拓展中國市場及中資機構拓展外國市場）。

　　WTO框架下，中國金融市場最終要全面開放，中資走出去、外資走進來已係無可避免發展。過去為開放金融市場，中國金融機構實現股改上市，競爭力普遍提升，混合經營提速（全力拓展非借貸業務）；反之，全球金融業受次按拖累，2007年一般表現欠佳，令中國金融業進軍海外適逢其時。雷曼兄弟亞洲經濟學家孫明春估計，中國2007年資金流出超過1900億美元（2006年為1340億美元），估計2008年將達2500億美元，即2008年將有更多中國金融機構走出去。對唔少中資金融機構而言，呢次係第一次出海，會否暈船浪？幾年前中國製造業走出去，成績唔係好理想。對習慣食中菜中資金融機構講，能否習慣用刀叉？以香港為例，1980年豐銀行走出去收購美國海豐銀行亦吃大虧，到1990年收購英國米特蘭銀行，便發揮1+1=2.5協同效應；至於近年收購美國Household便賺頭蝕尾。中國人民大學金融與證券研究所副所長趙錫軍話齋，吃東西用筷子同用刀叉分別唔大，最重要係食落肚能否消化，即中資金融機構能否從收購中吸收營養、壯大自己？中資金融機構中國加入WTO前，對各部門有效控制及監督不足，形成呆壞賬大量出現，中央須一再注資；其後透過股權重組上市，令業務模式從傳統借貸走向混合型（資產管理）。

　　1980年代日本銀行業亦曾走國際化之路，由於監管力度不足，加上擴張太速，由此隨日本股市泡沫破滅，日本銀行業國際銀行界地位急轉直下，不但將國際化努力盡付東流，更留下大量呆壞賬。1985到90年日本銀行界海外投資500億日圓以上超過二十一項，背後理由係日圓低息，海外大量收購經營不善銀行；加上日本政府一向對銀行界疏於監管，內控自查機制漏洞百出，例如大和銀行1995年冇向美國聯邦及地方監管當局披露超過10億美元交易損失，而被判不能美國營業至1998年，呢方面詳情張建雄兄九十年代《信報》所發表文章有大量披露，從略。

中資金融機構收購小心謹慎

　　作為中國人，2007年眼見中資金融機構入股外國知名品牌金融機構，的確有D驕傲，但同時亦有D驚慌。最後是福是禍？過去我老曹係批評TCL（1070）及聯想（992）走出去是禍不是福，今年才見TCL同聯想扭轉劣勢；至於中資金融機構走出去，我老曹水平未足以畀評論。一如張建雄兄所講，成功收購有如搵到世上另一半，真正如魚得水；唔成功收購有如鬥氣夫妻，兩敗俱傷。可幸2007年中資金融機構所有收購都以投資者身份而非併購，代表中資金融機構小心謹慎，此乃好事。

　　高盛估計，花旗2008年派息或會減少40％以保留資金，今年花旗股價已回落45％，因此有7.1厘息（其他金融股平均只有3.3厘）。高盛同時估計，JP摩根大通CDO撥備第四季高達34億美元、美林撥備115億美元……。

　　畢非德用45億美元購入Marmon 60％，該公司主要生產電線、火車卡、物流用品、金屬器皿等；北美洲、歐洲及中國有超過二百五十個部門聘用超過二萬一千人。Marmon 2006年營業額70億美元，獲利超過8億美元，以畢非德購入價計，O約為九倍，而今天股市平均O十六倍，以上述O收購有一定吸引力。Pritzker家族係美國最富有家族之一，佢地發展及控制Hyatt集團，近期已出售芝加哥Presidential Towers住宅大廈，售價4.7億美元，係該物業每年純利二十八倍，唔少人認為售價偏高。咁富有家族點解出售手上投資？至今係一個謎。

　　1971年日本人均收入超過2000美元，至1980年突破10000美元；1971年12月起日圓宣布價浮動，由360日圓兌1美元升至1980年308日圓。呢段期間，個人信託及證券投資佔個人金融資產由7％上升到20％，儲蓄資金由75％下降至45％。

　　1972年台灣人均收入549美元，1973年政府宣布1美元兌38元新台幣、1978年改為36元新台幣、1991年25元新台幣，到1993年台灣人均收超過10000美元。台灣信託投資公司資產佔台灣GDP由1972年2.42％，上升到1991年12.83％。

中國人收入逐步急升

　　從日本、台灣例子可見，隨人民收入上升，用於投資證券蚊年漸多，儲蓄所佔百分比便下降；台灣信託投資公司（主權基金）資產佔台灣GDP比重亦上升。

　　中國正漸漸進入勞動力價值重估期，理由係1987年起出生率持續下降，即2005年起年滿十八歲適齡勞動力供給增長在迅速下降，2011年將係中國勞動力人口比重高峰期。換言之，2005年起中國人薪金進入快速上升期，2011年後更會加快上升，即使唔及1971至80年日本升幅咁大，亦可達1972至92年台灣水平；即中國人均收入未來十年（或二十年）將可達10000美元。中產階級迅速成長，儲蓄率將下降，證券投資則上升。2005年7月起中國證券業呈現爆炸性增長，情況媲美1971至73年3月香港，可能已出現泡沫，但大方向仍十分樂觀。2008年中國面對金融從緊政策，可能出現調整，但長遠而言則極之樂觀。

　　中共中央政策研究室副主任鄭新立話，2020年中國人均收入可翻兩番，到時中產佔人口半數，即年收入60000元人民幣（8000美元以上）將佔55％，城市中78％家庭達上述水平。據社科院主任蔡日方研究，「人口紅利」將持續十五年，到時A股市場應係全球最大。

　　謝國忠認為，1900年美國1％人口擁有全國42％財富，其後漸漸分散，到六十年代最為分散，七十年代開始又漸漸集中，到2000年45％社會財富又聚集1％美國人手中。上述情況將中國重演，即中國進入財富漸分散期，然後又集中。例如香港1997年前係財富分散期，1997年後進入財富集中期，漸漸一如美國45％社會財富由1％人口擁有。

　　美國標普零售指數周三跌1.5％，美斯百貨跌3.9％、J C Penney跌2.8％，理由係聖誕零售並唔理想。

　　10月份美國房價出現十七年來最大跌幅，標普12月26日宣布美國樓價今年跌幅達6.7％，並估計未來十二個月進一步下跌10％。

　　8月初美國次按風暴，給英國銀行帶來巨大衝擊，第五大銀行Northern Rock因流動性困難，9月中出現英國一百四十年來首次銀行擠提，英倫銀行為救助Northern Rock而提供超過210億英鎊，雖然係咁，LIBOR仍升上6.6厘係十年內最高，顯示市場依然存在流動性困難，英國抵押貸款銀行協會表示，2008年英國抵押貸款市場面對300億英鎊資金缺口。

　　依家英國借貸銀行提供房貸95%貸款，如將貸款比率下降將影響英國樓價，其次英國政府規定12月14日起任何人賣房都必須付350英鎊製作「待售房屋資料」（以前一居室及二居室房子唔使花錢製作「待售房屋資料」），此一政策令業主增加11月及12月初出售量而拉低整體房價。

很明顯，英國房價已出現拐點，以致12月6日英鎊利率降低0.25厘，至5.5厘，但大多數商業銀行並冇降低抵押貸款利率，供樓人士並冇得到好處。

　　經濟學家山姆．羅賓遜接受天空衛視採訪時話，英國房價下降將2009年結束，因居民對住宅需求好大，相信明年將完成尋底。

　　中國方面，各個地方樓市並唔一樣，上海同北京比較平穩；廣州及深圳今年首三季房價升幅大概50％到100％，其中唔少資金係港資，以炒作為主；第四季起廣州及深圳同時出現拐點，但其他大城市表現唔一樣。11月北京市商品房平均價12830元一平方米，已較9、10月份下降；上海市商品房交易價7731元平方米係全年最低；深圳市連續三個月走低，樓價平均下調10％，寒流更蔓延到東莞、惠州、佛山等地，只有澳門及珠海仍在上升。廣州10月房價仍係11574元，11月卻急降1141元一平方米。

　　國務院總理溫家寶宣布審議並原則上通過新一代寬帶無線移動通信網重大專項實施方案（即3G啟動在即），並以TD-SCDMA技術為準，奧運前推出肯定冇問題。由於TD-SCDMA標準係中國獨立制定，估計仍需兩年才能成熟，相信奧運期間只能小範圍服務。
八成投資者有膽蝕錢冇膽賺錢

　　國務院通知，2008年1月1日起上調部分鋼鐵產品出口關稅率，佔鋼鐵總出口量28％。其中調幅較大有鋼坯、熱軋窄帶、冷軋窄帶、生鐵等出口關稅由15％上調至25％；螺紋鋼、線材由10％上調至15％；熱軋及冷軋窄帶鋼由5％上調至15％。

　　以家存款利率3厘息計，10000元存款要一百五十六年才變成100萬元，相信冇人有咁長命。2003年4月當牛市開始時利用牛眼投資法，至今為止變成100萬元可以咩？理論上係可以，只要五年內射中牛眼六次每次獲利超過100％便可。我老曹主張「錢大要守、錢少要博」；「年紀大要守、年紀輕要博」。五年內有冇出現六次賺取超過100％利潤機會？已經唔使我老曹回答，問題係各位有冇上述分析能力及有冇賺錢勇氣。賺錢需要勇氣？事實的確係咁。

　　我老曹從事金融界三十八年，發現80％投資者有膽蝕錢、冇膽賺錢（的而且確，散戶一旦有20％或以上利潤，好多投資者立即變成心慌；反之，損失20％卻願意死守落去）。當然，要每次擊中牛眼並唔容易（但非唔可能）。The trick to making money with shares is simply to play，即賺大錢心態係以遊戲心態，而非投資心態。每天花十五分鐘去檢討自己投資項目，將佢變成一如漱口、洗臉、擦牙一樣自然事。最後係聽別人意見、嚴守紀律，得閒之時唔好打電話畀經紀，除非你已決定行動。學習基礎分析，然後才利用走勢去決定何時買賣。上述似易實難，似難實易。買股票唔同獎券由運氣決定，而係由策略決定勝負。學習好好管理風險，而且不忘適當時候「行動」。

　　亞洲資產（8025）、ROJAM（8075）、保興投資（263）、佳邦環球（471）停牌