2007年12月20日 星期四

2007-12-21

抽新股都要揀股

  12月20日,周四。恒生指數跌12.17,收27017.09;成交776.16億元。12月期指跌22點,收27032點。越南製造加工(422)首日掛牌潛水,收3.12元,招股價3.75元。比亞迪電子(285)收11元,較招股價10.75元升2.3%。中材(1893)較招股價4.5元升35%,收6.07元。證明甚至申請新股都要揀股。

港通脹將進一步惡化

  中投公司向大摩注資50億美元,令中國銀行(3988)升1.8%、中國建行(939)升0.5%、恒生銀行(011)升1.4%。

  香港11月份CPI升3.4%(10月份升3.2%),係1998年6月以來最大升幅。今年恒指上升35%,地產分類指數上升53%,食物價格上升6.5%,租金上升4.2%,公用事業上升3.4%;再加上港元兌歐羅回落9%,兌人民幣跌6%,而且11月份失業率只有3.6%,通脹率可見將來會進一步惡化(今年首十一個月平均通脹率較去年同期升1.9%)。

  滬深三百指數升1.8%,收5037.19。浦發銀行升4.3%、萬科升2.1%、深圳發展銀行升2.7%、招商銀行升2.4%,中國遠洋升4.8%、中海發展升3.4%、中遠航運升4.1%。

格蛇唔睇好救市計劃

  中國人行宣布一年期存款利率由3.87厘上調至4.14厘,加息0.27厘;但活期存款由0.81厘降至0.72厘。貸款利率由7.29厘上調7.47厘,上調0.18厘。中央一年內第六次加息去壓抑內地通脹,因11月份全國樓價上升10%。

  格蛇接受ABC訪問時認為,滯脹前期徵狀已大量出現,包括油價、食物價格大升、經濟增長率放緩;加上減息刺激通脹率進一步上升,情況同1970年代接近。格蛇並唔睇好保爾森凍結次按貸款供款計劃,認為只會延長而非解決美國樓按風暴。可以肯定係,美國樓價2008同09年仍將回落。

  從歐洲央行瘋狂注資睇,OECD國家唔少銀行已面對擠提(bank run),今天擠提唔係排隊提款,而係將存款轉為買國債,代表西方國家信貸收縮。

  新興國家紛紛成立主權基金,即更多資金願意承擔高風險。呢次中資動用50億美元入股大摩,根據Thomson Financial計算,中國今年共購入292億美元外國公司股份,其餘國家共購入215億美元。大摩第四季撥備94億美元,係花旗、瑞銀、貝爾斯登之後另一單。花旗獲阿布扎比注資75億美元後,將490億美元次按納入資產負債表;瑞銀獲新加坡投資局入股;中國工商銀行入股南非標準銀行56.2億美元,中國政府投資百仕通30億美元、國家發展銀行入股柏克萊29.8億美元、平安保險(2318)入股富通銀行26.7億美元……。仲有中海油(883)曾計劃入股Unocal,但唔獲美國國會批准。

  可以講,中國已成為美股最大投資者之一,有主權基金,令唔少金融服務機構較易獲注資,令股市某一水平內上落,進入trading range。

  金融市場參與者往往一個泡沫後期最樂觀,例如油價(已由10美元升至接近100美元時),以及今年10月份銅價、鉛價及上半年鎳價。令人擔心係內地樓價,甚至10月份本港國企股。呢類啦啦隊隊長往往最唔合適時間引導投資者入市,因為呢個時候人人樂觀。從走勢睇,標普五百已形成頭肩頂,依家正形成右肩,如長期上升軌1400點跌穿,將會好大件事,因為可見1130點。

  從澳洲Centro事件,可見股市風險有幾大。受次按危機影響,Centro無法為手上39億澳元短期貸款再融資,股價一天之內跌幅甚巨。投資者過分追求高回報率而忽視短期風險;止蝕唔止賺要切記,以免賺賺埋埋唔夠一鋪蝕(Beware of downside risks)。要記住,天下冇必贏投資。

明年恒指26000-32000點上落

  美國房地產未來二至三年仲係回落期,由地產所衍生出來市場無法唔受呢個客觀環境影響,例如銀行業估計明年上半年仍未擺脫惡劣天氣,最快要到明年下半年天氣才會好轉。地產貸款佔美國銀行總貸款40%、佔歐洲銀行總貸款30%至40%(其中又以西班牙、愛爾蘭及英國最高)。假設未來二到三年英國及美國樓價回落15%至30%,美國同歐洲各大銀行業務不得不受壓。從呢個角度睇,銀行業前景展望並唔樂觀。

  瑞銀對明年股市展望係牛熊共舞,繼續玩stock picks,建議overweight亞洲(日本除外)。亞洲區純利增長仍係全球最強、最吸引,由於今年股市已出現雙位數增長,令明年揀股方面倍加困難。小心「value traps」!明年最大風險係美國經濟陷入衰退,樓市不景氣擴散到各行各業,出現類似香港1997年8月至2003年4月環境。瑞銀相信,明年美國經濟只會放緩而非衰退,投資者宜進入防守性(defensive)。歐羅開始回落,令歐洲漸漸恢復競爭力,亞洲區仍一片繁榮。瑞銀建議overweight科技股、電訊股及工業股,而減持金融股;對美國消費股抱中性態度。

  依家全球大部分股市已較10月高價為低。今年大價股表現十分出色,未來銀行必須再充實資本(Recapitalizations),相信有排搞;油價亦由高峰回落,原材料價格亦一樣。上述環境有利工業股。亞洲區股市係2000年以來首次以偏高姿態進入2008年,甚至唔包括中國同印度亦偏高17%(反之,過去五年卻以偏低10%到30%進入新一年)。何況上海泡沫在萎縮中,上證指數由高點回落超過20%,最高O水平達七十五倍。香港企業純利增長率由2007年(估計33%)下降至08年估計10.5%。低增長令O回落,更何況要面對明年美國經濟放緩及上海股市泡沫爆破?換言之,明年港股投資策略亦必須defensive;出入口有關業務仍佔香港GDP 33%,令香港經濟難以唔受外圍影響(唔似中國出入口有關業務只佔中國GDP 8%,可透過內需增長完全抵銷)。估計香港GDP增長率將由2007年6%下降至08年5.2%,通脹率由1.9%上升至3.5%(2007年受財政司宣布退稅影響,而令CPI升幅減少1%)。樓價今年首十個月已上升11%,家仍在上升,如明年聯儲局減息至3.5厘,即香港進入無利率時代(即一年存款利率同CPI升幅一樣),但唔係負利率;除非美國減息幅度大於估計,又或人民幣大幅上升。

  恒生指數32000點時已充分反映公司價值,此乃11月起港股回落理由(考慮2008年所面對風險);26000點情況係股價已將明年所面對風險充分反映,未來下跌空間又有限。換言之,明年港股應26000至32000點之間浮沉,受利好、利淡因素影響而上上落落,消化2003年4月至07年10月升幅。最難估計係紅籌同H股,如港股直通車放行自然可上升,但現價已偏高。較可睇好股份有九倉(004)、中銀香港(2388)、大新金融(440)及裕元工業(551)。九倉內地已有足夠土地供七年發展用,日後來自內地地產收益將令2009年起純利急升;中銀香港係減息受惠者,因為佢係香港數一數二按揭貸款銀行;大新金融保險業務發展良好;裕元工業則有分拆概念。

  8、9、10月份港股急升,理由係流動性過剩。估計QDII基金將令330億美元資金流港,加上H股透過回歸A股,大大充實資產負債表。明年情況又會點?

  瑞銀展望明年除日本外睇好整個亞太區。行業方面包括鋼鐵股、煤炭股、工業股及科技股;推介內地股份對象有鞍鋼(347)、馬鋼(323)、中國神華(1088)。工業股雖然面對出口增長率下降,但可從內需方面獲支持;加上過去數年股價下跌,已到上升周期,睇好項目包括手機生產股、LCD電視機股、LED生產商、GPS設備生產商等。最值得吸納係中價企業(mid-cap)。

細價股上升潮亦結束?

  航空航運方面,瑞銀推介國泰(293),目標價24元,係奧運受惠者,而且相信明年油價唔會高出100美元。航運方面,乾貨輪亦睇好,因中國內需強勁;反而貨櫃輪睇淡,因中國出口增長率及美國經濟增長率放緩。公用股方面睇好中電(002),目標價60元;大唐發電(991)目標價8.8元;港華燃氣(1083)目標價5.6元。中電受管制合約到期影響,今年表現失色,相信明年可追落後;港華有中華煤氣(003)支持,全力拓展中國業務,成為高增長公用股;大唐繼續增加新發電廠。LCD電視進入高增長期,加上過去幾年激烈競爭,已淘汰部分競爭能力弱對手,令明年出現供應不足,減價戰明年停止,將令毛利率上升;反之,圓晶生產未來仍十分惡劣,256Mb晶片需求大增,同時供應量亦急升,估計明年供過於求,過去幾年投資晶片生產股者損失好大,樂觀估計2009年才復甦。

  內地地產方面正步香港後塵。豪宅繼續睇好,普通住宅樓投資價值唔大。

  估計A股指數仲有30%調整空間,吸引力有限。

  全球經濟正步入滯脹期,呢段日子,新興工業國表現較OECD國家出色(例如七十年代香港經濟亦較美國好),因此睇淡美國、歐洲同日本,而睇好亞洲地區,但同時要提防過熱(例如1973╱74年港股亦曾大跌)。因此揀股更為重要。

  零售股方面,睇好華潤創業(291),目標價36元。

  電腦生產方面,估計明年市場上升10%(今年上升13%)。

  明年投資策略:保本為主,增值為次。揀股為主,唔好過分注重timing。唔好聽信謠言,多做功課──分析個別股份而非猜測股市方向,唔識則最好唔做。

  值得注意係,羅素二千指數(細價股指數)上升軌失守,即唔止大企業股價紛紛見頂二線股亦唔例外。2005年7月開始細價股上升潮會否亦告一段落?睇明年認真搵食艱難。

  NAM TAI(2633)、JIC Tech(987)、信寶國際(600)停牌。

沒有留言:

張貼留言