2007年12月23日 星期日

2007-12-24

科技股抬頭要識揀

   12月23日,周日。Merry Christmas!今年標普五百指數只升4.66%,真係見身郁唔見米白;日經平均指數更回落11.43%。恒生指數升38.38%,其中紅籌指數升80.58%、國企指數升54.56%。可以講「無限風光在險峰」,機遇與風險同在。紅籌、國企一飛沖天(11月才回落),同美國次按有關股份又慘過梁天來、苦過金葉菊。中央經濟工作會議開出「防過熱、防通脹」藥方後,11月起至今內地金融股、內房股調整幅度唔細。但機遇與風險同在,11月起科技股又紛紛抬頭,因此聖誕係咪快樂,要睇你識唔識得揀。 

 受豬肉、食用油等漲價影響,中國CPI升幅由3月份3.3%到11月6.9%,連續九個月超過人行3%警戒線,主因係貿易順差導致巨額外儲備同銀行系統內流動性過剩(估計今年外貿盈餘高過2500億美元)。為壓縮信貸,人行今年已六次加息、十次上調存款準備金率。雖然係咁,滬深兩地投資戶口多達一億三千萬,機構投資者五千多個,今年滬深三百指數上升164%。另外,政府宣布2008年推出「從緊」政策,內地房地產及股市會否10月份出現拐點?泡沫往往爆破後才獲確認,事前難以評估。

投資地產股勝過買樓

  香港樓價1997年8月至2003年8月跌幅超過65%;2003年9月自從出「孫九招」後至今,樓價上升超過100%,但仍較1997年高峰期低25%。上升部分理由係港元追隨美元貶值50%。今年香港地產分類指數升幅達59.45%,同期中國內房股升幅達60%至70%(雖然近期已大幅調整);反而馬來西亞、菲律賓、泰國及印尼地產股升幅只有30%,新加坡升幅更只有20%,日本則冇升幅。從呢點睇,投資地產股較直接投資地產吸引。

  花旗、美銀、JP摩根大通等已放棄800億美元Super SIV計劃。花旗已將四百九十億美元SIV納入資產負債表內;SIV市值6月份係NAV 102%、一個月前係71%,最近係55%。花旗將之納入資產負債表,便唔使市場出售,但如此一來銀行必須擴大資本。

  調查顯示,85%以上投資者認為明年股市唔再依賴金融、地產股;50%以上仍追隨奧運經濟概念。今年上漲行業如石油、煤炭、原材料股利益非常豐厚,明年進一步漲價空間唔會好大;反之,下游行業利潤率非常低,今年成本上升導致毛利率下降,如提升一定議價能力,估計明年純利有上升空間。

  受科技股刺激,標普五百指數上周由低點反彈,全周升1%,睇科技股繼續值得睇好(起碼明年第一季仍睇好)。科技股最適合D希望Get Rich Quick人士買,而非D已發達人士。美國次按問題仍在惡化,例如房貸美上周五所提供三十年期樓按利率係6.14厘,兩星期前仍係5.96厘;申請樓按指數由兩星期前800點下跌至653.8。睇美國物業市場及次按問題明年上半年仍將惡化。美國樓價回落引發次按危機,令今年下半年美國金融股純利大減,會否影響明年經濟?超過3000億美元次按ARMs明年上半年到期,要按正常供樓價供款。如次按不能市場出售,銀行必須加大一級資本,因監管機構要求一級資本最少相等於總貸款5%、核心資本最少係總資產10%。

  今年第四季金融機構大幅撥備,令資本減少,唔少必須重新注資……。2001年美國科技股泡沫爆破後,房地產升值抵銷科技股泡沫爆破影響(此乃2001年1月起美國聯儲局減息之底因)。面對資產價格下調,又靠乜支明年GDP增長?

  過去五年投資新興市場回報同投資成熟股市,回報係兩回事。總部波士頓GMO繼續睇好新興市場(過去五年該基金平均年上升37.61%)。不過,該基金減持中國同印度股票,而增持巴西、泰國、台灣同南韓。睇好巴西理由係原材料有價,巴西人已有錢買樓、買車,消費上升繼續支持經濟向好,而且唔少優質股O仍十至十二倍;睇好台灣理由係台灣股係十分便宜新興市場科技項目,個人電腦、手機、手提電子器材上有領先地位;南韓亦類似。台灣另一優點係民進黨過去阻礙兩岸關係發展正常化,如國民黨重新上台,兩岸關係可急速升溫(但國民黨較民進黨更貪污,所以亦有一定風險存在)。另外,泰國大選後,相信資金會重新流入。

試用高科技產品挑選股份

  今年美國三大科技股(蘋果、Google、Research in Moton)表現出色,提醒投資者今年下半年雖然金融股表現失色,但科技股相對較好。今年投資美股成績如何?完全睇你識唔識得揀。股票市場內既有天使亦有惡魔,既有三大科技股,亦有花旗,百仕通、貝爾斯登、美林同大摩。今年7月推出iPhone相信仍有一段日子興旺,因為好易用及可儲存大量相片,唔似其他手機每次轉手機時要將舊手機電話號碼輸入,十分麻煩,iPhone可直接由個人電腦將資料轉過來。對炒股票人士而言亦更方便,因為有報價系統,亦可處理email及voice mail、聽音樂及睇天氣報告(指全球所有大城市),亦可作記事簿用,更加可上網及玩電子遊戲……今年聖誕已成為熱賣(本報林太送出兩部iPhone作聖誕抽獎,抽到同事無不歡喜若狂,證明不但年輕人喜歡iPhone,而且接近人人喜歡)。至於RIM推出黑莓已成為每個專業人士手有一部,市場仍在擴展中。Google搜尋功能亦係無出其右。值得一提係大部分手機都包括微軟Windows OS,令微軟不但稱霸個人電腦市場,亦成為手機軟件霸主。今年7月用過iPhone才買蘋果,一樣賺大錢;愛上黑莓才買RIM,利潤一樣驚人。唔好以為分析高科技股好難,試試用該公司新產品,如果認為「得」就買、「唔得」便唔買,就係咁簡單。明年高清電視將成為熱賣,因此找尋生產高清電視公司股份去買……。明年奧運概念,亦可留意D生產電子運動輔助產品公司股份……。踏入11月,股市對國企、紅籌股不利,但對科技股有利。從日本過去發展史,1964年東京奧運後,日本經濟轉型(由低質素產品自1965年起走向高品質及品牌產品),同樣事件正在中國發生。

1月效應繼續發揮威力

  至今為止,1月效應仍在發揮威力(香港因冇資本升值稅,理論上冇1月效應。不過,受美股升降刺激無可避免),其中又以細價股1月效應更明顯,可以12月中入貨,直到1月底出貨。過去八十年美股表現有六十九年出現1月效應,二線股平均升幅7%,大價股平均升幅2%。

  資金正大量流向中國、香港同新加坡,其次係印尼、馬來西亞及泰國;反而流去台灣唔多;外資亦係南韓及菲律賓淨買家(即買入多於賣出)。

  德意志銀行發布明年中國經濟展望報告,係少數外資銀行之中認為滬深指數明年可再漲40%,由5000點上望7000點。明年中國GDP增長率出口放緩下,由11.5%下降至10.4%,人民幣升值可能加速,但通脹壓力在減少,令加息壓力漸漸緩解。民間資金大量購入汽車、黃金、珠寶、時尚服飾同物業,令明年內地消費市場一片興旺。財富效應下,可令股市更上一層樓,估計明年內地存款準備金率再提高150至200個基點、人民幣升值6%至7%,年底1美元兌6.9元人民幣,令大量資金流入股票市場。羅傑斯則認為A股短期內將大幅下調,但仍係一個很正買入機會,因長期A股仍會上升。

東京奧運後經濟表現值得參考

  1964年10月10日奧運日本東京舉行。1959年起,日本為呢個奧運會而投入大量資源,投資設備帶動經濟繁榮,銀行信貸大量增加,日本股市由1958年初471點到1961年7月見1829點上升288%;呢段日子亦叫「岩戶景氣」。經濟過熱令日本銀行1962年7月及9月兩次上調官定利率,「岩戶景氣」宣告結束,股票指數由1961年年底開始跌去三分一市值。由於擔心影響奧運,1962年年底日本政府發表經濟白皮書,認為日本經濟已擺脫單純依靠增加設備投資促進增長模式,日本各銀行又展開新一輪貸款競爭,1963年日本股市又再上升。奧運之後,日本經濟又再急劇衰退,1965年日本政府發行特別年債及推出一連串刺激經濟政策,1965年秋季日本經濟再由谷底走出來,步入高速增長期。1964年東京奧運後日本經濟表現,值得2008年北京奧運後中國分析員參考,有助了解A股後市走勢。中國2003年開始投資水平居高不下,2007年起政府強調以往依賴投資主導型增長模式正在發生變化。2005年中開始上升中國股票熱2007年10月見頂。由於2008年中國舉辦奧運,A股近日又止跌回升,估計可升到奧運結束為止,然後會否再下跌?依家中國現況又係咪同1963年年底日本極之相似?東京奧運之後雖然出現不景氣,但1965年日本又再進入高速增長期,理由係技術革新為日本帶來新機遇,當年係耐用家電產品及電子產品,依家呢個市場早已飽和,但一樣有高科技產品面世。

  中國國務院發展研究中心研究員魏加寧研究日本經濟,總結出好多有益啟示。

  一、擴大內需唔等於擴大總需求。日本日圓升值壓力下,首次實施擴張性財政政策及寬鬆貨幣政策,才係出現1980年代泡沫經濟理由。

  二、放鬆管制唔代表放鬆監管。美國列根上台後一步步放鬆金融管理,但擔任監管官員不減反增,處罰非但冇減弱反而加強。日本推行金融自由化過程中,將放鬆管制等同放鬆金融監管,結果搞到一塌糊塗。

  三、金融穩定唔等於金融機構穩定。日本著名學者吉野直行指出,盡早淘汰經營不善銀行反而可維護整個金融系統穩定。政府應維護整個金融系統穩定,而非金融機構穩定。

  四、泡沫經濟唔等於共同富裕。泡沫經濟反而產生資產分配出現兩極化,幸好日本社會安全網健全,即使面對金融危機,社會亦冇出亂子。

  中國政府透過研究日本如何從戰後廢墟中崛起過程,協助制定政策,防止泡沫經濟形成,又或將泡沫破滅後對經濟及社會造成衝擊減到最低。

大學生供應過剩係好事

  明年1月1日《勞動合同法》內地實施,企業再不能以「試用期」變成「白用期」去剝削打工仔。雖然係咁,明年起亦係內地高校畢業生數量達到史無前例日子。1970年代美國面對大學生供應過剩問題,首次聽到大學生從事掃街工作(外國掃街係車,唔似香港真係掃街)。過去香港因為大學較少,大學生變成天之驕子。隨大學普及化(唔少書院1997年前晉升為大學),1990年代開始已有人問:「點解D大學生買唔起樓?」並以此要求政府干預樓市。社會漸漸穩定,大學生供應過剩乃遲早問題;今天輪到中國面對大學生供應過剩問題。此乃好事(點解大學生係天之驕子?)。大學生讀完書後進入社會做事,將來有冇成就應由你願意付出幾多代價而定,唔應該因為你係大學生而有優先權。中、大學生供應過剩,代表中國中產階級在迅速形成。

  國家財政部宣布家庭每月收入2000元以上者先至要畀稅(之前為1600元),即內地收入少於2000元家庭被視為「中低收入」,須重點照顧。

沒有留言:

張貼留言