2007年12月5日 星期三

2007-12-06

次按明年第二季解決

  12月5日,周三。恒生指數升465.86,收29345.45;成交1140億元。12月期指升408點,收29510點,高水。中石化(386)升4.3%,收12.16元;中移動(941)升2.1%,收144.9元;中聯通(762)跌3.8%,收16.34元,因為一位大股東配售一億五千萬股。建行(939)升4.4%,見7.78元;恒生銀行(011)升6.2%,見158.8元;東亞銀行(023)升6.5%,見55.2元,主要係預期下周減息。 08年美股表現唔會好差

  滬深三百指數出現第三天上升,寶鋼升6.6%、新華金屬升4.4%、鞍鋼升9.2%、唐鋼升7.5%;過去一周鋼價上升5.5%,至每噸四千八百一十九元人民幣。中石油升2.8%、海通證券升3.3%、兗州煤升3.8%。今年迄今為止,滬深三百指數升幅仍達一倍。

  2007年第三季及第四季美國金融股業績甚差,繼續拖低美股。估計2007年標普五百指數純利只升1%(雖然上半年升幅十分大),因為2007年第三季純利跌8%,成為近五年來首次季度純利出現下降,主因係金融類別純利少40%,令2007年每股純利由93美元降至90美元;反之,2008年每股純利展望卻由95美元升上100美元,理由係美元弱勢令海外純利大升。從呢點睇2008年美股表現又唔會好差。

  金融危機差唔多每隔十年到十二年便發生一次,理由係社會上只有20%人口真正賺到好多錢,可以盡情消費,其他人雖然賺唔到好多錢,卻仍然希望可以盡情消費!自從西方社會發明先使未來錢後,金融圈便諗出種種方法去滿足先使未來錢需求。大量新金融產品應運而生,例如SIV或COD,背後目的只有一個,就係讓負擔唔起人過有錢人生活,直到信貸爆煲為止。呢段日子,金融機構營業額及純利急增、股價上升……爆煲由政府注資由納稅人負擔,然後遊戲重新開始過。點解政府唔阻止?因為刺激消費過程中,政府亦同樣受惠。因此美國次按危機最終會解決,最大可能性係2008年第二季。投資策略係點樣次按危機沉船中搵寶藏?金融項目壞消息自今年8月起無日無之,但股市一樣有升有跌。只要避開外國商業銀行、證券行、財務機構、地產信託及保險公司股,其他行業仲好安全,尤其係地產建築股,早已過分拋售,今年12月起進入止跌回升期;新加入睇淡項目如Tiffany、Coach等出售奢侈品股。過去六個月Tiffany股價已跌8.3%,雖然第三季純利仍然上升;反之,百事可樂今年7月至今股價上升唔少,寶潔、高露潔等因美元價下跌,令美國以外純利大幅上升;高科技股如Google、Apple、Research in Motion今年更升爆燈!

明年樓價有條件再升5-10%

  香港經濟較受房地產升降影響,屬利率敏感地區,隨美元利率下降,明年本港房地產價格有條件再升5-10%(我老曹唔相信2008年本港樓價可再升25%),資金今年10月炒完國企、紅籌股後,已流向房地產股如新鴻基地產(016)、長江實業(001)、恒地(012)、信和(083)、嘉里建設(683)等地產發展股受惠;反而收租股受惠較少,例如鷹君(041)及各REITs。至於內房股,因為中央加強調控,令內地房地產進入整固期,例如中國海外(688)、雅居樂(3383),由於已嚴重超賣,有條件反彈。

  一片睇好2008年房地產股聲中,瑞銀反而質疑呢個睇法,理由包括:一、過去四個月(即8月17日聯儲局宣布減貼現率半厘開始),本港地產股已升74%。由1984年至今六次減息中,有五次上升、一次下跌(2001年次),十二個月後平均升幅40.3%,升幅最大一次係1989年,升64.2%,換言之,呢次地產股升幅已超過以往任何一次。二、1984、95及98年減息時,恒指平均O只有九點五倍,而9月份本港減息時,恒指O係十四點二倍。三、過去地產股市值一般低於資產淨值,依家已高出資產淨值4%。因此擔心12月11日減息0.25厘,對地產股冇乜大刺激。

  油價見99.25美元一桶後,相信上升空間有限;加上中國石油(857)、中海油田(2883)等市價較國際油股高出一倍,作為國際投資者,減持中石油、中海油,轉為投資蜆殼石油、艾克森石油、英國石油等好正常,因而令到中國油股上升乏力。

  加拿大開採油砂技術成本係沙地阿拉伯採油成本七倍,理由係油砂屬半固體,不能用泵將佢泵出地面,有賴露天礦坑方式開採而非打井技術。2006年加拿大開採成本約85美元一桶,咁樣油價要升至100美元才有利可圖。隨住新科技出現及更佳管理技巧,估計有條件將開採成本下降至16至33美元一桶,成本同深海採油接近。呢類油砂全球蘊藏量十分豐富,造成油價無法長期維持100美元一桶;因全球傳統石油蘊藏量只佔30%,油砂及油頁巖蘊藏量佔70%。隨技術改良,人類仍不乏石油應用(只係開採成本大升而已)。如各位同意油價不能長期企於100美元以上,便明白2007年下半年我老曹睇淡能源股理由(好消息出貨)。
煤發電改善空間十分多

  除上述外,今天中國以煤發電為主,但57%熱能浪費掉,10%變成煙,不但染污大氣層,而且浪費;再加上推動發電機所耗能源,只有33%多成為有用電力。換言之,煤發電其實改善空間好多,未來技術突破應該可做到用相同煤產出依家雙倍電力及同時減少空氣染污,包括將酸性液體注入煤層產生甲烷(沼氣),再用甲烷發電或以導管輸到民居用作燃料。2006年中國呢方面投入資金達50億美元,估計到2010年成為另一能源來源。分析界認為,投資煤礦股較投資石油股更有前景。例如中煤能源(1898)估計2007年每股獲利47仙、O五十倍,2008年每股獲利59仙,O三十九倍,雖然已貴,估計仍有一定上升空間。

  今年對中國而言的確係「金豬年」,不但百業興旺,連豬肉價格亦飛升;10月份內地零售業增長率係1999年以來最快。城市升幅達13.5%,扣除通脹其實升幅9%,相信2007年中國人收入上升20%,係改革開放政策落實以來最快一年。隨收入上升,消費增加,自然推高通脹率(CPI)。

  展望鼠年,各類升幅相信唔及豬年,不過,仍然相當良好。明年應係銀鼠年,GDP增長率由2007年第三季11.5%下降至2008年第四季9%;同時,通脹率亦回落,即內地人講由「快牛」變成「慢牛」。出口增長率放緩,但內地零售增長率保持。2007年內地人收入上升20%(扣除通脹上升15%),2008年估計回落到17%(2006年水平),扣除通脹,上升14%。

  中國社會科學院召開「2008年中國經濟形勢分析與預測」,估計中國GDP增長率由2007年第三季11.6%下降至2008年第四季9%,CPI升幅2008年只有4%(高盛估計11月份CPI上升6.7%)。

  國家能源領導辦公室網站上公布《能源法》徵求意見稿,由本月3日起至明年2月1日。目的係為能源價格形成市場調節主導機制,未來價格唔再由政府決定。依家中國能源價格係扭曲,以電力為例,民用電價偏低而工業用電價格偏高,如由市場決定,擔心民用電費大幅上升。其次成品油係偏低,汽油零售業做蝕本生意。如開放市場,成品油供應唔再緊張,但價格將大幅上升,擔心私家車增長率將下降。由徵求意見到國務院依照意見修改《能源法》,到送交全國人大立法,估計最快2009年才出台,但《能源法》影響2008年已浮現。

  10月1日至12月4日內地A股跌幅有幾大?雲南銅業跌45.46%、錫業股份跌44.5%、辰州礦業跌44.36%、中金黃金跌41.15%、中鐵二局跌39.56%、中金嶺南跌38.81%、馬鋼跌36.9%、粵電力跌37.11%、大同煤業跌33.17%、中集集團跌31.49%、青島海爾跌33.17%、國陽新能跌35.78%……。如以10月17日最高價比較,跌幅更大。經過大幅回落後,近日A股出現反彈,但前景並唔樂觀。中央經濟工作會議本月3日京開幕,決定包括:一、土地信貸政策進一步繃緊;二、防止價格由結構性上漲變成明顯通脹;三、貨幣政策繃緊;四、明年最少加息一至兩次。

唔好睇少二線股壯大速度

  滴水可成洋、聚沙可成塔。今天藍籌股都由過去二線股開始。例如微軟1986年3月上市市值5.19億美元,以年率35%速度長大,今天市值2800億美元。雅虎1996年上市時市值3.34億美元,今天市值430億美元,年增長率55%。星巴克1992年上市時市值2.16億美元,今天市值250億美元,年增長率37%,因此唔好睇少二線股。

  二線股啤打系數通常好高(即升幅或跌幅都大於指數),投資二線股需要係耐性,有時可以動也不動,但一飛又往往沖天。小小利淡因素又可跌到七個一皮。二線股欠缺透明度,因為好少大行推介(賺唔到佣金),十隻二線股中,有八隻冇投資價值。點樣搵到餘下一、兩隻,極考眼光。點樣射中「牛眼」?難度極高。今年連David Webb亦失水準,更何況一般連功課都唔肯用心機去做散戶。

  美國11月份汽車零售業疲弱,通用汽車減少11%,福特升0.4%,甚至豐田美國銷售亦只升0.3%(豪華房車凌志銷量更回落7%);反而日產汽車上升6.1%及本田汽車升4.7%。影響之下,汽車零部件出口股大受影響,例如德昌電機(179),踏入2000年,先受原材料價格如銅及鐵上升影響,再受內地工資上升打擊,依家採用最多電動摩打行業美國汽車業又走下坡,怪唔得2000年至今股價跌完又跌。過去八年德昌電機股價失去四分三市值,睇2008年前景仍然未許樂觀,因為通用汽車、佳士拿及福特齊齊宣布明年減產。可見1997年8月以後投資乜行業極為重要。

  航運股過去十五個月勁升,但11月起調整幅度亦好大,令人擔心航運股有可能見頂。

  高盛證券睇淡2008年黃金,估計有15-20%跌幅!睇好林吉特、坡元及新台幣(呢三種貨幣都極難大手吸納)。我老曹金價見845美元後,對後市睇法亦有保留,因為美國房地產進入回落期。2007年原材料價格同金價上升有賴美元貶值。

  美元已經回落至1971年浮動率制度以來最低,尤其係8月17日次按危機令聯儲局再減息0.75厘。呢段日子出現美元大拋售潮而忽略美國貿赤在減少因素,令金價11月7日見845美元。

沒有留言:

張貼留言