2007-12-13

減息作用愈愈細


　　12月12日，周三。恒生指數跌705.78，收28521.06；成交1172.66億元。期指接近平水，跌886點，收28524點，代表一般人已由睇好轉為平常心。　

　今天新地（016）跌2.5％，收161.3元；信置（083）跌5.4％，收26.45元；建行（939）跌3.1％，收7.22元；中國海外（688）跌4.9％，收16.3元。中國遠洋（1919）及中海集運（2866）因李實發減持，中國遠洋跌8.4％，見24.4元；中海集運跌12％，見5.61元。新上市陽光紙業（2002）只較招股價升2.8％，收6.17元，招股價為6元。麗盛（1004）升8％，造1.88元；冠捷科技（903）升3.8％，見5.75元。

分析界認為美救市計劃冇料到

　　豐、恒生（011）及中銀（2388）公布減息0.25厘，至6.75厘；渣打及東亞（023）亦減息0.25厘，至7厘。10月份新樓宇貸款229億元，係1997年8月以來最高，唔少炒友10月同11月買樓博明年升值，恐怕明年將失望，因為此一時也，彼一時也。

　　滬深A股跌1.22％，收5077點。萬科跌4％、保利地產跌4.6％、浦發銀行跌5.9％、招商銀行跌4.3％；中海集運A股第一天上板，股價漲升75％，成11.57元。

　　殊仔提出由財長保爾森執行次按危機挽救計劃，被分析界認為冇料到兼幫唔到手。ARMs重組高潮由2008年1月1日至2010年7月31日，分析界指情況仍在惡化。

高盛指工業原料價進入熊市

　　高盛認為工業原材料價格似乎進入熊市，黃金亦唔例外，估計明年金價只值750美元一盎斯。明年睇好係農產品，尤其係大豆，但牲畜肉類明年升幅有限。燃料明年高價牛皮，油價有機會高出100美元，但升穿100美元後升幅亦有限，因為美國同歐洲經濟增長率放緩，限制原材料價格同燃料價格上升。外方面，該行睇好日圓，美元止跌但未能回升，雖然美國外貿赤字漸收窄，但ARMs重新整理將拖累美元價，並令美元利率回落至3.5厘；歐羅價則已偏高7-14％。

　　大摩仍睇好未來中國造船業，遲早（或2015年）超過南韓，成為全球最大造船國，但短期則已見頂。今年造船訂單，油輪增40％、乾貨輪增56％、貨櫃船增60％，上述船隻如全部下水，可令總供應量上升10％，由於歐洲及美國經濟增長率放緩，需求轉弱，因此中期展望睇淡。另一方面，中國造船勞工成本只及日本10％，鋼鐵價亦較南韓便宜10-15％，形成造船訂單迅速由日本及南韓流向中國。大量投資令中國生產二千五百載重噸貨櫃船由以前一百二十天縮短為八十天，估計中國造船技巧好快同南韓睇齊，主要係中國政府去年起對造船業大力支持。雖然係咁，中國明年造船訂單數目亦將減少，因航運業已開始回落，最先係運油輪受高油價影響而走下坡，貨櫃輪估計明年起亦走下坡；乾貨輪好景估計可維持到2010年，因中國對鐵礦砂、煤及小麥需求仍大。

　　高盛認為，高油價將影響全球汽車製造業，最終將影響中國、東歐、俄羅斯及印度，因此唔建議吸納汽車製造股。

　　全世界都估到美國減息四分一厘，令道指下跌294.26或2.1％，標普五百及納指更下跌2.5％。減息後二年期債券利率見2.92厘，代表明年最少有兩次減息機會，未來目標利率3.5厘（即減息0.75厘）。減息唔係靈丹妙藥，只係止痛餅，第三次減息威力已唔大。呢次聯儲局雙管齊下（減聯邦基金利率及減貼現率），道指卻回落294點或2.1％，有人批評減息幅度不足，我老曹認為只係減息威力漸失，相信即使明年1月同3月再減息，但作用將愈來愈細。至於優惠貸款利率由7.5厘降至7.25厘亦冇乜用（一如香港唔少人已可用低於優惠利率借到錢），令人擔心反而係房屋擔保貸款利率由10月30日5.4厘升上6.3厘，證券擔保貸款利率由6.6厘上升7.7厘。除上述因素外，美國信貸市場繼續萎縮，資金流向優質債券（Flight for quality），令二年期國債息率由3.18厘降至2.92厘。花旗股價回落超過4％，KBW銀行指數跌幅更超過5％。繼UBS後，Washington Mutual計劃發行優先股集資25億美元，股價下跌12.4％。房貸美CEO估計來年再虧損55億到75億美元，股價跌10.6％；房利美亦跌7.1％。《道氏理論通訊》作者Richard Russell認為，美股已進入熊市，即後市開始進入一浪低於一浪！我老曹過去係道氏理論讀者，七、八十年代學好多，其後發現只睇大市已無法應付依家股市千變萬化環境，九十年代開始漸減少閱讀該刊物，但好尊重Richard Russell。至於佢11月21日發出「熊市訊號」，似嫌略遲（我老曹早11月1日起已叫大家小心）。值得注意係，全球經濟已非美國主導，漸漸變成多頭經濟，類似七十年代三頭馬車即美國、日本同德國，取代五、六十年代由美國主導。今天除美國外，仲有歐盟及金磚四國，可惜明年展望連歐盟亦放緩；至於金磚四國經濟正飽受通脹壓力，亦不得不放緩，例如滬深A股10月16日亦開始進入熊市。

享受聖誕氣氛唔做賺錢機器

　　大部分經濟由2002或03年起復甦，至今已五年，出現一年或兩年放緩期十分正常。戰後美國GDP佔全球40-50％，今年只佔38％，未來將進一步下降。興起不但有日本同德國，接係亞洲四小龍、NIC、中國同印度、東歐及俄羅斯，仲有南美洲甚至非洲。美股出現熊市，唔代表冇全球投資機會，但Baby It's Cold Outside！出門之前請記得多件衫。美國GDP早以2％速度增長，但中國卻以每八十個月GDP增大一倍速度膨脹。滬深A股上市公司超過一千間，過去六年平均年增長率27％，但股價要到2005年7月才上升，結果一飛沖天。到今年10月估計有七百三十間至七百七十間公司股價已偏貴，二百三十間至二百七十間股價落後，其中一百間控制股權架構十分複雜，外人難以了解，部分可能涉及地方官員或北京官員利益。另有一百多間同美國證券公司關係良好，外資證券公司協助下引入外界股東，亦屬外人難以了解。到底有幾多資產負債表以外利益？約有三十至七十間公司值得研究，公司業績不俗但股價未充分反映。換言之，內地A股仍有投資價值者只有3％到7％，由此可見揀股困難程度。香港亦好唔到幾多，依家仍有投資價值約6％到14％。

　　美林證券北美洲分析員David Rosenberg認為，明年大量企業純利面臨downgrade，而非過去五年咁每年純利上升15％係例行公事。金融股及地產股純利回落期估計明年下半年才停止，明年美國消費股可能亦令人失望。

　　畢非德本周二接受CNBC訪問，佢提醒投資者明年美國失業率可能上升。今年我老曹本港股市仍搵到唔少「double your money」機會，2008年又點？或者我老曹應聽聽太太勸告──「放下投資心態，好好享受聖誕節氣氛；唔好將『賺錢』放第一位，做個『笑爸爸』，唔好做賺錢機器。」　　2008年將係2007年延續，世界銀行估計亞洲（唔包括日本同澳洲）GDP上升8.2％（4月估計升7％），中國上升10.8％（2007年上升11.3％）；新加坡、香港及台灣減慢速度快一D；馬來西亞及印尼明年仍加速上升。

　　亞洲發展銀行較為悲觀，認為60％區內貿易最終產品仍輸往美國、歐洲同日本，好難唔受美國、歐洲同日本經濟放緩影響。

　　中國11月份CPI升6.9％，其中豬肉升56％、食油升35％，食物升18.2％、非食物升1.4％。低收入者（例如月入1000元人民幣或以下）叫苦連天，因為過去高增長、低通脹年代結束，並進入高增長、高通脹年代。政府已大為緊張，大量政策出籠，但能否收效則木宰羊。

　　中國11月份零售數字升18.8％，至8105億元人民幣（10月份升18.1％），係1999年以來最高。依家中國家庭消費只佔全國GDP 36％（印度佔50％以上）。

內地基金經理對A股牛市信心動搖　　中國投資者對滬深A股牛市信心在動搖中。內地投資經理佔一半以上只有兩年經驗，從未經歷過熊市，三分一更只有一年經驗，第一次經歷10月17日起指數下跌超過20％。過去五次當每次指數下跌超過20％反彈後再跌，平均跌幅35％。上一次熊市由2001年6月開始，2005年7月結束，跌幅超過50％。內地金融業員工每年有15-30％流轉率；反之，美國，一位基金經理平均留任五點七年。內地A股44％由基金持有加上滬深A股平均O四十五倍，如佢地信心動搖，可以好大件事。

　　中央經濟工作會議已結束三天──明年金融策略將由穩健轉為從緊。家一年期存款利率3.78厘，面對CPI上升6.9％，自然無法把資金吸回金融體系。估計未來中國仍將加息三到四次，存款準備金率上調到16％，人民幣兌美元升值速度加快（唔排除一次性大幅升值出現）。上述策略令內地商業銀行利差收入增幅放緩及營運成本上升，不利內地銀行股。銀行業將加大發展理財、代理基金及保險等中間業務，積極發展綜合業務去提升自身競爭力，包括包銷公司上市、提高產品創新、市場交易及風險管理能力。即理財業務將成為今後內地銀行重點項目。

中國三十一個省、自治區、直轄市政府換屆，明年1月全部完成。人行行長周小川12月11日提及換屆現象明年會否出現？例如2002年底到2003年年初係上屆政府換屆期，2003年第一季新增貸款上升兩倍多，令中國經濟2003年起全面復甦。呢次換屆後，會否落實貨幣從緊政策？新官上任三把火，會否齊齊收緊全國銀根？

　　格蛇認為，冷戰結束後，蘇聯為首經濟體系面對挑戰。鄧小平提出改革開放政策，漸漸取代蘇聯模式計劃經濟。八十年代中國經濟成就，引發柏林圍牆倒下全球採用自由經濟制度，令前共產主義國家或第三世界國家GDP以雙倍於OECD國家速度上升。低生產成本令大量產品出口到歐美，導致OECD國家勞工失去議價能力，亦同時降低OECD國家通脹率。由於發展中國家人民儲蓄率甚高，佢地賺到錢後，唔似OECD國家人民咁亂消費，以近年為例，即使減息情況下，全球儲蓄率仍由1999年24％上升到2006年33％。新興國家高儲蓄率抵銷OECD國家低儲蓄率，令全球走向低利率時代，唔少資金流入股票市場（只有日本同德國例外），亦推高全球股市。

　　但以半個世紀觀察，中國情況並非乜特別例子。中國出現情況早已其他國家出現（尤其係亞洲四小龍），佢地低成本勞工、接受良好教育後，獲得OECD國家勞工相同技術而引發出口興盛期，然後刺激房地產、股票價格上升，最後泡沫爆破，樓價同股市雙雙回落，但人均收入仍保持。過去發生亞洲四小龍身上情況同樣發生中國，再加上美國次按危機今年爆發，影響明年吸收入口貨能力，過去日本曾力抗日圓升值而造成流動性過剩問題，依家同樣中國出現。1998年6月日本政府決定放棄阻止日圓升值，開始抽緊銀根至1990年6月；日本股市1990年1月回落，樓價1990年7月開始回落。上述風險中國正在面對，各位宜小心。

　　《時代》雜誌評選2007年十大最差交易，百仕通IPO最差，排名第一，由首日交易至今股價下跌38％。百仕通槓桿性收購狂熱達到頂點時上市，該公司老闆獲利近5億美元，其他投資者皆損失（包括中國政府）。

　　第二差係貝爾斯登取消Everquest Financial公司IPO，結果自己住幾十億美元CDO。

　　第三差係德國汽車廠以74億美元向Cerberus出售汽車企業品牌克萊斯勒80.1％權益，上述項目係1998年以360億美元收購番。

　　第四差係微軟入股Facebook 1.6％，代價2.4億美元；該公司今年共獲利3000萬美元，但市值（以微軟入股價計）為150億美元。

　　第八差係花旗以11厘息發行75億美元可換股債券畀阿聯酋阿布扎比投資局，分析家認為成本太高。

　　上述交易證明，大戶一樣會睇錯市也！