2007-12-22

男士女士齊流鼻血

　　12月21日，周五。恒指升609.83，收27626.92；成交833.65億元。期指高水，升816點，收27848點。長實（001）升4.5％、信置（083）升6.2％、中移動（941）升2.2％、中石油（857）升2.4％、國壽（2628）升2.9％。中國中鐵（390）升6.8％，見9.57元，有報道指該公司可能獲京滬高速鐵路400億元人民幣建築合約。

　　滬深指數升1.3％，收5101.85。國壽升2.2％、中國平安升2.7％、國航升3.7％、南方航空升4.8％、東方航空升2.2％；但內房股仍下跌。

　　後市展望，恒生指數在26000點形成雙底不破回升，向上挑戰阻力。

　　去年美國GDP平均每季增長率2.6％，今年每季GDP增長率達3％（但今年第四季GDP增長率只有1％），明年會點？估計仍有1.8％增幅。

　　明年股市展望如何？我地已面對一個成熟牛市（道指由2002年10月至今、恒生指數由2003年4月至今，兩者都有五年歷史）。成熟牛市性格今年下半年表露無遺，例如更大波幅，而個別股份因業績表現而互有升降。貨幣政策由緊變鬆，阻止股市進一步下跌。此外，企業純利明年升幅將放緩，美國樓市回落引發次按危機，並已進入偏高能源價格……。雖然係咁，全球GDP增長率亦只由今年3.7％下降至明年估計3.4％，美國經濟乏善足陳，但亞洲區仍十分興旺，新興市場GDP增長率由今年7.1％下降到明年（估計）6.9％；純利升幅由今年20.3％下降至明年15.3％。唔同地區、唔同行業明年將有唔同表現，相信資金正漸漸流向亞太區。

二線股或被邊緣化

　　中國方面，明年1月1日起兩稅合一，外資、內資稅率統一為25％，銀行、礦務、房地產、食品飲料等高稅率行業受惠，出口股及外資股則逐步將稅率提升至25％。人民幣加快升值，有利內需股、不利出口股。A股今年11月底總市值29萬億元人民幣，流通市值7.85萬億元，總市值係GDP一點二倍，肯定偏高，但未致於到1989年日本或2000年美國科網股水平。假設明年內地A股純利平均上升35％，O企於三十五倍，即現水平可企穩；估計明年滬深指數5000點水平運行。

　　我老曹日前已提出恒指將26000到32000點之間運行炒上落市，如成交額漸漸減少，擔心二線股將被邊緣化。

　　美元回落期似乎11月份結束，人民幣較美元強，但美元已較好多貨幣強，例如歐羅、英鎊、加元、澳元同紐元。六星期前1英鎊可兌2.11美元，我老曹英國物業本應完成交易，但買家要求將車位分契（即住宅一張契、車位一張契），結果拖到本周才完成交易，英鎊已跌至1.98美元，變相賣平6％（1.98美元應否將英鎊兌為美元？）。咁樣一拖，令該物業賺少5萬美元（接近40萬港元），都幾肉赤也。

英倫銀行睇淡英經濟

　　英鎊回落，理由唔係四年內首次減息0.25厘，而係英倫銀行九位成員一致通過減息（冇反對票），不但代表明年將再減息，亦代表英倫銀行對明年英國經濟睇淡。技術上睇，英鎊可見1.9美元，亦係我老曹今年聖誕節前收到最差聖誕禮物。

　　高盛三位分析員為公司拋空次按而為高盛賺40億美元，佢地冇一個超過四十歲，令索羅斯1992年拋空英鎊賺11億美元交易相形失色。分別係索羅斯係基金最大股東，從此發達；但高盛三位後生仔每人只獲1000萬美元（或以下）花紅，雖然以打工仔而言上述數字唔錯，但同40億美元比較真係九牛一毛。

　　貝爾斯登截至今年11月30日止三個月虧損8.54億美元或每股6.9美元，去年同期獲利5.63億美元或每股4美元。根據Thomson Financial數據，分析員事前估計係每股虧損1.79美元，再次證明所謂分析員睇好之時往往睇得太好，睇淡之時往往睇得唔夠淡。貝爾斯登宣布撥備19億美元（較11月初公布7億美元多出一點七倍）。貝爾斯登係美國五大投資銀行中最細，亦係五大投資銀行中虧損最大一間，股價已跌至88美元十二個月新低，亦係2004年10月以來最低。貝爾斯登宣布大減花紅，但高盛、雷曼兄弟、大摩仍大幅增加花紅，由去年435億美元上升到今年497億美元。換言之，次按損失係股東唔係職員。有時打工又好過做老闆喎。

　　本周睇好人數由上周53.3％升上56.5％，睇淡人數由25.6％降至22.4％，好淡比例係2.5（即兩個半好友才有一個淡友），較感恩節前1.6明顯上升。任何預測都唔係可靠指標，所有投資都包含一定風險，如果輸唔起千祈唔好玩。

　　Research in Motion第三季純利倍增，令股價上升12.37美元，收119.5美元。黑莓用戶第三季增加一百六十五萬名，公司估計第四季再增一百八十二萬名。明年計劃推出輕觸黑莓直接同蘋果iPhone競爭；輕觸優點係手機毋須鍵盤，令畫面大好多。呢幾年投資RIM者獲利不菲。

　　感恩節後開始年底反彈已進入1月效應。次按危機人們已漸習慣，美國樓價回落漸被局限，除本業外，其他行業唔受影響。美國出口在上升中，年率達19.1％（四年內最大升幅），上述因素支持美元價。雖然減息，美元仍出現強勢，第三季核心通脹係吐巴仙，係可以接受水平。

　　人行希望加息0.27厘去打擊豬肉漲價（貨幣政策從來唔影響食物同能源價格）？加息後一年期人民幣存款利率4.14厘，漸同美元4.25厘接近，如聯儲局明年1月再減息0.25厘，即人行明年已無加息空間（不然控制不了人民幣上升速度）。有理由相信呢次係人行最後一次加息。

明年2月7日係農曆新年，有七日假期。中國人消費唔聖誕節前而春節前，即1月先至係中國人高消費月。估計明年1月內地人消費十分驚人，聖誕節前香港已到處都係購物人龍（大部分講普通話），相信明年1月更盛況空前，刺激消費股（尤其係鐘表業及珠寶業）上升。

　　2007年將盡，下半年大量Deep V出現，的確可令男士甚至女士流鼻血。請記住賺錢時保持謙卑，蝕本時保持冷靜，勝敗乃兵家常事。勝必須賈其餘勇追窮寇，賺盡一D；蝕必須速戰速決，虧損15％（最多20％）便離場。即使唔肯止蝕都唔好溝落，記住溝上唔溝落。如果連上述要求都做唔到，請從2008年起唔好再沾手任何投資。只有謙卑人才可以山頂見到深溝、深溝望到山頂，享受Deep V帶來樂趣。股市無先知，你唔係，我唔係；但卻有成功策略，例如買乜？何時買？何處買？

　　油價起碼包含15美元地緣政治風險，有5美元係假設美元價進一步回落，扣除上述兩大因素，油價可回落到80美元。OPEC估計，如油價長期企於70美元以上，石油燃料市場佔有率將逐步下降。最近中國政府決定抽資源稅10％。加拿大認為只要油價企於60美元以上，加拿大油砂開採業可以賺到笑……。

　　基本金屬價都係周期性，而且熊市日子長、牛市日子短。例如銅價1980至2001年基本上係熊市，2001年至今已完成七年牛市，2008年點睇？

明年更多Deep V

　　農產品價格可預測性甚低，例如去年被羅傑斯大力推介糖今年跌到四腳朝天，估計明年上半年可見底。過去「糖牛」十年一閏，錯過後又要等十年。穀物方面，估計明年仲係牛市，因兩年前糖被視為生物燃料而被睇好，令價格升至非理性水平；美國通過能源法案卻以玉米為生物燃料，結果糖價跌到四腳朝天、玉米價卻飛升。今年中國限制玉米做生物燃料……由此可見政治因素影響好大。政治與女性脾氣一樣，皆充滿不穩定性（上述係男性咁迷戀政治同女性理由）；反之經濟有趨勢可循，所以好悶（此乃為何事業成功男性，通常都喜歡搞政治或女人，因為刺激之故也）。

　　內地經濟仍處GDP高增長期，但股市起碼偏高20％到30％，點樣平衡兩者間矛盾，乃2008年搵銀策略。2001年起亞洲世紀來臨，由於太多人認同上述睇法，形成太多資金湧入亞洲地區，到今年第四季形成中國、印度等股市極度偏高。A股近月雖然已調整20％，但仍然偏高；香港、南韓、馬來西亞及台灣相對而言仍處合理水平，形成呢D地區股市第四季起炒上落市。

　　花旗明年推介國泰航空（293），目標價25.2元；中移動目標價196元；中信泰富（267）目標價55元；新濠國際（200）目標價19.2元。明年大方向係減持國企、紅籌股，增持港股。

　　今年下半年走勢上出現多次Deep V，例如8月份同11月份，而且一個較一個深。11月份深溝更被形容為「數吋窄、千呎深」。兩個Deep V出現都同次按有關；8月16日透過聯儲局注資金融市場化解，呢次五大央行聯手，同時主權基金係向市場莊家（Market player）直接注資，阻止危機擴散。但次按問題從此解決嗎？明年應有更多Deep V出現，上述想法影響美國、歐洲同日本股市（投資者將減持股份去減少自己exposure；由於低質股冇市場，於是被迫拋售高質股）。

內地樓市降溫提供入市機會

　　中國方面，容易賺錢日子已成過去，政府一再收緊信貸去打擊CPI升幅，形成明年中國企業前景唔明朗。花旗推介招商局國際（144），目標價59.6元；華潤置地（1109）目標價23.71元；大連港（2880）目標價8.6元；聯想（992）目標價12元、蒙牛（2319）目標價33元、平安（2318）目標價102.81元。

　　中國通脹係結構性而非周期性，主要由食物價格上升推動。自2005年7月起雖然人民幣兌美元升值，但購買商品能力卻大幅下降，當商品價格急升，中國便面臨入口通脹，例如石油、鐵礦砂、銅……。部分中小銀行依家存貸比率已超過75％，存款準備金率十次提升後，中小銀行未來貸款能力已大受限制，估計可令明年貸款增長率重新納入政府目標水平。

　　內地銀行股、保險股及地產股經過今年大幅上升後，10月已面臨調整，借貸收緊將影響呢類股份明年上半年表現。反之，本港企業如恒地（012）、九倉（004）及新地（016）正在增加內房股色彩，例如九倉持有七千萬平方呎內地房地產項目，花旗推介恒地，目標價90元。本港地產股吸引力在於本港樓市正進入升溫期，提供獲利回吐機會；內地樓市進入降溫期提供入市機會。

　　花旗亦睇好機場股如美蘭機場（357），目標價11.6元。明年內地股市相信將大上大落。